Olimu w’Okristo Wekɔ Olimu Aso Woleki Ohomba
1 Sho tshɛ tekɔ la weho w’elimu wotshikitanyi wahombaso sala. Nzambi akatosha ɔkɛndɛ wa kotsha ehomba w’ase nkumbo. (1 Tim. 5:8) Koko, ɔkɛndɛ wakatosha Nzambi ɔsɔ hawohombe mbeta la ntondo k’olimu w’esambishelo ka Diolelo ndo wa mbetɛ anto ambeki.—Mat. 24:14; 28:19, 20.
2 Yeso akatotshikɛ ɛnyɛlɔ ka sho ndjela lo kɛnɛ kendana la ‘nyanga ntondo diolelo.’ (Mat. 6:33; 1 Pet. 2:21) Kânga mbakinde komonga la diangɔ efula dia l’emunyi, nde akayasha efula dia sala lolango laki She. (Luka 4:43; 9:58; Joa. 4:34) Nde akasale la wolo dia sambisha l’oseka diaaso tshɛ. (Luka 23:43; 1 Tim. 6:13) Nde akakeketsha ambeki ande dia vɔ ndjasha woho akɔ wâmɛ l’olimu wa dinela.—Mat. 9:37, 38.
3 Woho wa Mbokoya Yeso Ɛlɔ Kɛnɛ: Sho koka mbokoya ɛnyɛlɔ kaki Yeso lo sala la wolo dia ndjasha tshɛ l’olimu w’Okristo lo lɔsɛnɔ laso. Naka tekɔ la kɛnɛ kahombama lo lɔsɛnɔ, kete nyɛsɔ toyele dako diele lo Bible diatɔlɔmba di’aha ndjayangɛ lomombo efula la l’andja ɔnɛ. (Mat. 6:19, 20; 1 Tim. 6:8) Ekɔ mɛtɛ ɔlɔlɔ efula nyanga dia sho ndjasha efula l’olimu w’esambishelo! Naka tambohomana l’ekakatanu, kete sho koka ndjaketembola woho wakasale Yeso, di’aha mbetawɔ di’eyango wa lo lɔsɛnɔ mbahemɛ olimu aso woleki ohomba wa mbewoya lokumu l’ɔlɔlɔ la Diolelo.—Luka 8:14; 9:59-62.
4 Kânga wanɛ wele l’ɛkɛndɛ efula mbidjaka olimu w’esambishelo lo dihole dia ntondo. Ɔnangɛso ɔmɔtshi lele la nkumbo ka woke ndo lakamba olimu ɔmɔtshi wa woke ndo lakamba nto oko ekumanyi l’etshumanelo k’Akristo akate ate: “Dimi mbɔsaka olimu w’esambishelo oko olimu ami woleki ohomba lo lɔsɛnɔ.” Kadiyɛso kɛmɔtshi kele ombatshi mboka akate ate: “Olimu w’ombatshi mboka ndeka olimu wa l’emunyi mbisha ɔngɛnɔngɛnɔ.”
5 Oyadi ekakatanu akɔna wele laso, toyele ɛnyɛlɔ kaki Yeso. Lo yoho yakɔna na? Lo mbetɛ olimu w’Okristo olimu aso woleki ohomba.