Mukanda w’oma le filialɛ

Apandjudi Aso wa Ngandji wa Diolelo:

‘Nzambi akatetemala pamia olimu ɔsɔ.’ (1 Kor. 3:⁠6) Ekɔ ɔngɛnɔngɛnɔ heyama dia mɛna ohamelo wamonga lo mbilo ya Congo yakɔ hiende! L’ɔnɔnyi w’olimu 2003, takatatɛ mbeka Bible l’anto w’eyoyo ndekana 100000! Ɔsɔ ekɔ dikambo di’ɔlɔlɔ efula mɛtɛ.

Jehowa ekɔ lo tshɔkɔla olimu lo mbilo kaso kele l’ɛtɛkɛta wotshikitanyi. Dia nyomoleka tondja ekanda l’ɛtɛkɛta ɛmɔtshi wa lo mbilo kaso, Olui-Walɔmbɔla akɔshi yɛdikɔ ya dihola biro hiende y’okadimwelo. Biro kɛmɔtshi kekɔ la Lubumbashi, lo Katanga, R.D.C., lo dikambo dia wanɛ wakadimola lo Kiluba la Uruund, ndo biro kekina la Mbuji-Mayi, lo ɛstɛ ka Kasai, R.D.C., dikambo dia wanɛ wakadimola l’Ɔtɛtɛla la l’Oluba. Biro shɔ yendana l’olimu w’okadimwelo wekɔ lo kɛndakɛnda oko tenyi dimɔtshi dia Bɛtɛlɛ. Oyango wambowotoma akadimodi l’ahole asɔ ele dia mbakimanyiya dia vɔ mbeyaka woho watahame ɛtɛkɛta wakadimolawɔ.

Dia tondja ekanda dikambo di’olimu watatetemala pama l’andja w’otondo, wekɔ lo nunya ɛprimɛri wele lo fɛrmɛ kaki la Société Watchtower, kele suke la Wallkill, New York. Ohamelo wa dimɛna wayonga lam’ele wambâkotshɛ nto ɛtshi ka nkɛtɛ kele la yɛdikɔ ya mɛtɛlɛ 350. Ɛtshi ka nkɛtɛ kambowakotshɛ kɛsɔ kekɔ oko la woke wa Mbalasa ya Diolelo 30! L’etatelo k’ɔnɔnyi 2004, wayotoma mashinyi ehende wa weke wafunda ekanda. Mashinyi la mashinyi wayonga l’akoka wa tondjaka periodikɛ 25 lo sekɔndɛ. L’ɔnɔnyi 2004, vɔ wayonga la dihomɔ di’eyoyo diendana l’omamatanyelo ndo okahanyelo w’ekanda. Dihomɔ sɔ diayokimanyiya dia tondja ekanda efula aha la nɔmba di’anto monga efula.

Lam’ele tambotatɛ ɔnɔnyi w’olimu w’oyoyo 2004, tekɔ lo nɔmba kâmɛ la nyu dia Jehowa ‘tetemala pamia olimu ɔsɔ.’

Anangɛnyu,

Biro ka Filialɛ ka Congo (Kinshasa)