Nyɔlɔtɛ Ndjâkitshakitsha
1 Dikɛnda dimɔtshi dia pami diaki olami w’ɛkɔkɔ akayaɛkɛ le Jehowa ko akalɛmbia ɔndɔshi ɔmɔtshi w’ata waki la wolo efula. (1 Sam. 17:45-47) Pami kɛmɔtshi k’ɔngɔnyi akakikɛ ehemba la solo dia lotutsha. (Jobo 1:20-22; 2:9, 10) Ɔn’aki Nzambi akashaka She lotombo la wetshelo ande tshɛ (Joa. 7:15-18; 8:28) Lo bɛnyɛlɔ sɔ tshɛ, ndjâkitshakitsha akakambe olimu w’ohomba efula. Polo nd’ɛlɔ kɛnɛ, ndjakitshakitsha ekɔ ohomba efula dia sho ndɔshana l’ekakatanu wahomana laso.—Kol. 3:12.
2 Etena Katatasambisha: Oko weso Akristo, la ndjâkitshakitsha tshɛ sho sambishaka lokumu l’ɔlɔlɔ le weho w’anto tshɛ, aha la mbakanɛ kɔlɔ oyadi lokoho la demba lele lawɔ, mbekelo yawɔ kana ahole wadjasɛwɔ. (1 Kor. 9:22, 23) Naka amɔtshi wekɔ lo tona losango la Diolelo la ngala tshɛ, sho hatowaokoya koko la solo dia lotutsha sho tshɔka dia toyanga anto wakoka mpokamɛ losango laso. (Mat. 10:11, 14) Lo dihole dia nyanga dia mambiya anto akina l’ewo kaso kana okanda wakateke, sho kotolaka yambalo y’anto otsha l’Ɔtɛkɛta wa Nzambi, teya dia vɔ mbakoka mbaetawoya oleki akambo akina tshɛ wakokaso mbuta. (1 Kor. 2:1-5; Heb. 4:12) L’ɛnyɛlɔ ka Yeso, sho mbishaka Jehowa lotombo tshɛ.—Mako 10:17, 18.
3 L’Etshumanelo: Akristo pombaka nto ‘ndjalɔtsha la ndjâkitshakitsha lam’asawɔ.’ (1 Pet. 5:5) Naka sho mbɔsa di’anto akina toleka, kete tayoyanga toho takokaso kambɛ anangɛso lo dihole dia sho nyanga dia vɔ tokambɛ. (Joa. 13:12-17; Fil. 2:3, 4) Hatotoyaoka di’olimu wendana l’osolelo kana wɔmbɛlɔ wa Mbalasa ka Diolelo hendana laso.
4 Ndjâkitshakitsha tokimanyiyaka dia sho ‘nyimanyiyana kɔlɔ la ngandji tshɛ’ ndo mbidja wɔladi ndo kâmɛ l’atei w’etshumanelo. (Ef. 4:1-3) Tɔ tokimanyiyaka dia monga l’okitanyiya otsha le wanɛ wakasɔnama dia tɔlɔmbɔla. (Heb. 13:17) Tɔ totshutshuyaka dia mbetawɔ alako kana lohango tshɛ lakokawɔ tosha. (Osam. 141:5) Ndo ndjâkitshakitsha totshutshuyaka dia sho ndjaɛkɛ le Jehowa dia sho mbeya mɛmba ɔkɛndɛ tshɛ wele laso l’atei w’etshumanelo. (1 Pet. 4:11) Oko Davidi, sho mbetawɔka dia tayotondoya oma l’osukɔ waki Nzambi koko aha oma l’akoka wele l’anto.—1 Sam. 17:37.
5 La Ntondo ka Nzambi Kaso: Lâdiko di’akambo asɔ tshɛ, sho pombaka ‘ndjâkitshakitsha la tshina dia lonya la wolo laki Nzambi.’ (1 Pet. 5:6) Naka tekɔ lo ndɔshana l’ekakatanu wa wolo, kete tekɔ lo nomɔlomɔ dia kondja etshungwelo kayotela Diolelo diaki Nzambi. Ɔnkɔnɛ, la ndjâkitshakitsha tshɛ sho mongaka la solo dia lotutsha, takongɛ dia Jehowa kotsha alaka ande l’etena kakandashikikɛ. (Jak. 5:7-11) Oko wakidiɔ mɛtɛ lo kɔlamelo ya Jɔbɔ ɔnɛ lakalame olowanyi ande, sho pombaka ndeka ndjakiyanya dia ‘lokombo laki Jehowa tetemala la tombwama.’—Jobo 1:21.
6 Omvutshi Danyɛlɛ ‘akayakitshakitsha la ntondo ka Nzambi’ ko nde akatshɔkwama efula oma le Jehowa ndo akalongola waɛsɛ efula. (Dan. 10:11, 12) Nyɛsɔ sho lawɔ tɔlɔtɛ ndjâkitshakitsha, teya dia “difutu dia ndjakitshakitsha la woma wa [Jehowa] dieli: ekundji, nemo la lumu.”—Tuk. 22:4