Mbɔtwɛlɔ yendana la woho wa mbisha biukubuku—Etenyi 2
OMBA
Quel est le but de la vie ? Comment le découvrir ?
L’ɔkɔngɔ wa mbisha onto lasawola la yɛ mɔyɔ, wɛ mbeyaka mbuta ɔnɛ:
“Ɛlɔ kɛnɛ, lɔsɛnɔ lambolola mɛtɛ la ekakatanu ndo la ekiyanu. Onde wɛ fɔnyaka dia lɔsɛnɔ pombaka monga ngasɔ? [Tshikande akadimole.] Biukubuku nyɛ mɛnyaka dia sangwelo diaki Nzambi di’oma k’etatelo diendana la anto ndo la nkɛtɛ diayokotshama. [Lembetshiya osato wele lo lɛkɛ 20-21. Oma lâsɔ, adia odingɔ 9, tɔtɔmiya Isaya 14:24 ndo 46:11.] Mbala kekina kayomoya, layolanga ndjokɛnya lɛnɛ atɛkɛta Bible dikambo dia Paradiso kayela Nzambi la nkɛtɛ.” Shande biukubuku, ndo toyalɔngɔsɔlɛ dia nyomoyowenda.
Etena kayoyokalola dia ndjowenda nto, wɛ mbeyaka mbuta ɔnɛ:
“Lakakotɛ mbala ketshi dia sangwelo dia Nzambi ele dia anto nsɛna pondjo pondjo la nkɛtɛ lo paradiso. [Ɛnyande osato wele lo lɛkɛ 20-21 nto.] Lembetɛ dia Yeso, Petero, ndo Davidi wakatɛkɛta dikambo dia Paradiso.” Lɔmbande dia nde mbɔsa biukubuku yande. Oma lâsɔ, fola lo lɛkɛ 21-22, ndo nyɔsɛdingole odingɔ 10-13. Tɛnde dia nyu tatɛ mbekaka Bible, kana toyalɔngɔsɔlɛ dia nyu ndjɔsɛdingola ɛtɛ ɛmɔtshi wa awui wahɔnyi wa lo lɛkɛ 29-30 lo wendelo wayaye.
Opandjudi weke l’ɛnɔnyi dikumi l’ɛmɔtshi mbeyaka mbuta ɔnɛ:
“Anto efula wa lo lɔlɔnga lami kandakandaka dikambo dia nshi yayaye. Onde wɛ fɔnyaka di’anto wa lo lɔlɔnga layaye wayonga la lɔsɛnɔ la dimɛna efula? [Tshikande akadimole.] Bible tɛkɛtaka dia nshi yayaye ya amɛna dikambo dia anto tshɛ. [Fola osato wele lo lɛkɛ 31 wa lo biukubuku, ndo adia awui walembetshiya osato. Oma lâsɔ, ko wɛ mbadia 2 Petero 3:13.] Biukubuku nyɛ yekɔ la alako wendana la ɛtshɔkɔ wakombɛ Nzambi anto. [Tɔtɔmiya ɛtɛ w’awui wahɔnyi wa lo lɛkɛ 29-30, ndo shande biukubuku.] Dimi kombolaka nyomoyokenda dia sho ndjosawola dia daka diaki Nzambi dia kumiya ata tshɛ.” Toyalɔngɔsɔlɛ dia nyomoyowenda.
Etena kayoyokalola dia ndjowenda nto, wɛ mbeyaka mbuta ɔnɛ:
“Mbala ketshi kakamakembola, takatɛkɛta lo tshena pe dikambo dia sangwelo diaki Nzambi dia kadimola nkɛtɛ paradiso. [Tɛkɛta dia osato wele lo lɛkɛ 31 nto.] Layɔngɛnangɛna mboka tokanyi tayɛ lo kɛnɛ kendana la daka diaki Nzambi dia kumiya ata tshɛ.” Lɔmbande dia nde mbɔsa biukubuku yande. Oma lâsɔ, nyadia ndo nyɔkɛtshanya odingɔ 3-6 wa lo lɛkɛ 29. Toyalɔngɔsɔlɛ dia nyu ndjɔsɛdingola odingɔ 7-8 lo wendelo wayaye.
Etena katandasambisha la dikɛnda, opalanga mbeyaka ndjalowola ndo ndowola dikɛnda lo mbuta ɔnɛ:
“Naka wɛ nangaka, ________ ekɔ lo nanga kɛnya osato ɔmɔtshi ndo kadiɛ divɛsa dimɔ oma lo Bible. [Dikɛnda ambowɛnya osato, ko ambadia awui walembetshiya osato wa lo lɛkɛ 31 ndo oma lâsɔ, ambadia Enyelo 21:4.] Biukubuku nyɛ, nembetshiyaka kɛnɛ kayosala Nzambi lo dikambo dia ekakatanu wahomana laso ɛlɔ kɛnɛ. [Lembetshiya lo tshena pe ɛtɛ w’awui wahɔnyi wofundami l’alɛta woleki edima wa lo lɛkɛ 29-30, ndo shande biukubuku.] Etena kayotokalola ndjokenda nto, layolanga ndjokɛnya kɛnɛ kata Bible lo dikambo dia ekomelo ka ekakatanu tshɛ wendana la yônge ya demba.”
Lo wendelo w’oyoyo, opalanga mbeyaka mbuta ɔnɛ:
“Lo sawo diaso dia mbala ketshi, lakakewoya dia dimi nangaka ndjokɛnya kɛnɛ kata Bible lo dikambo dia ekomelo ka ekakatanu tshɛ wendana la yônge ya demba. Hokamɛ kɛnɛ kotami lanɛ.” Lɔmbande dia nde mbɔsa biukubuku yande. Oma lâsɔ, nyɔsɛdingole odingɔ 9-14 lo lɛkɛ 29. Tɛnde dia nyu tatɛ mbekaka Bible, kana toyalɔngɔsɔlɛ dia nyu ndjɔsɛdingola odingɔ 15-17 lo wendelo wayaye.
[Caption on page 3]
Mbɔtwɛlɔ efula mbishama lo dikatshi di’okotsha nɛ dia kokimanyiya dia wɛ nɔngɔsɔlaka mbɔtwɛlɔ yendana la woho wa mbisha anto tobukubuku. Mbɔtwɛlɔ nyɛ pombaka mbɔtɔnganɛ la awui wa lo ɛtshi kanyu ka nkɛtɛ.—Enda Olimu aso wa Diolelo wa Ngɔndɔ ka ntondo 2005, lɛkɛ 8 ndo wa Ngɔndɔ ka samalo 2005, lɛkɛ 3 ndo 4.