Tosuke kanyi y’Afundelo lo dikambo dia okundelo—Etenyi 3

Okundelo w’Akristo pombaka salema lo yoho yaha kawotake, ya dimɛna ndo yele la kɛnɛmɔ

1. a) Lande na kalɔngɔsɔla wanɛ wele kema ambetawudi etanda wa weke dia mambiya anto? b) Kakɔna katosalaka anto amɔtshi dia kotola anto efula l’otanda?

Wanɛ waheye eongelo ka mɛtɛ ka wanɛ wambovɔ fɔnyaka dia sala ekundelo wa kawotake ekɔ ohomba dia ngɛnyangɛnya odo ndo diaha nyangiya ewotɔ weke la lɔsɛnɔ. Le anto wele kema ambetawudi, nɔngɔsɔla otanda wa woke ‘wɛnya lo sɛkɛ’ dihole diaki l’onto lovwe lo tshunda kana ekondjelo kande ndo ka nkumbo kande ekɔ ohomba. (1 Joa. 2:16) Mbala efula, yimba ya shɛmanedi mɛnamaka lo okundelo ndo anto amɔtshi nyangaka dia kundɛ edo awɔ lo yoho yoleki anto akina. Dia kotola anto efula, vɔ panɛka foto ya weke y’odo lo ahole wotshikitanyi dia mbewoya anto dia otanda wekɔ. Anto amɔtshi kitshaka odo nshi efula kana mingu efula la ntondo ka kundɛ l’oyango wa mɔtsha falanga efula ndo nɔngɔsɔla okundelo wa mamba. Ɔnkɔnɛ, anto mbidjaka yimba efula lo dui sɔ polo lo yɛdikɔ yele kânga nkumbo yoleki tshɛ wola ndjadjaka l’ekakatanu wendana la falanga dia sala otanda wa woke wayɔngɛnyangɛnya ewotɔ ndo ase ngelo.

2. a) Ngande wotshikitanyi ekundelo w’Akristo wa mɛtɛ la w’ase andja ɔnɛ? b) Lo ndjela Joani 17:16 ndo Tukedi 11:2, lande na kele ekɔ ohomba di’ekambi waki Nzambi kundɛka edo awɔ lo yoho yaha kawotake ndo ya dimɛna?

² Otshikitanyi l’anto akina, ekambi waki Nzambi mbeyaka dimɛna dia wanɛ wambovɔ haweye ndoko dui ndo haweye dia kana wekɔ lo tombwama oma le anto akina. Akristo wa mɛtɛ hawɛnya lo sɛkɛ ekondjelo kele la wɔ lo kundɛ edo awɔ lo yoho ya mambiya anto akina. Naka sho ndjasha lo ditshelo sɔ, shi kete dietawɔ diaso hadiotshikitana la di’ase andja ɔnɛ? (Joa. 17:16) Shi tayɛnya anto akina dia sho lawɔ mbokaka edo wɔma? Mbeya di’anto wa lo ngelo kaso mbokaka edo wɔma pombaka totshutshuya dia sho monga la yewo ndo la lomba lo kundɛ edo aso lo yoho yaha kawotake ndo ya dimɛna. (Tuk. 11:2) Ngande wakokaso sala dui sɔ?

3. a) Toho takɔna takamba la anto amɔtshi dia kondja falanga ya kundɛ odo? b) Ngande wɔsa ekambi waki Jehowa toho tɔsɔ?

³ Adepasɛ w’okundelo: Lo ahole amɔtshi, anangɛso amɔtshi ndjelaka mbekelo ka sanganaka la ntondo ka kundɛ odo dia vɔ kɔngɔla falanga. Vɔ tomɛka tshumanelo mikanda dia diɔ mbakimanyiya la falanga. Akina mombaka falanga yayoyâkimanyiya dia kundɛ etena kayovɔ onto ɔmɔtshi. La ntondo k’okundelo, ɔnangɛso ɔmɔtshi lakasɔnama oma le olui wa dikumanyi ntshɔka lo luudu la luudu dia kɔngɔla falanga kana nde salaka dui sɔ lo Mbalasa ka Diolelo. Anto kitshaka asaka la tɔsɛndji di’anto woye l’otanda mbidjaka falanga. Lawakawɔ, vɔ mbewoyaka nkombo y’anto wakimɔ ndo lofulo la falanga lokimwewɔ l’olui kana l’onto ndo l’onto. Lo waaso wa ngasɔ, vɔ mbishaka anto wanu ndo mbo ya ndɛ dia mbâkeketsha dia vɔ nyomoleka kimɔ falanga. Ngande wahombaso mbɔsa awui asɔ? Akristo wa mɛtɛ hawoyange falanga ya kundɛ onto lo toho ta ngasɔ.

4. a) Ele l’ɔkɛndɛ w’adepasɛ w’okundelo? (Enda nɔtɛ ka l’ɛse ka dikatshi) b) Naka nkumbo kɛmɔtshi bu l’akoka wa kundɛ odo awɔ, waa na wakoka mbakimanyiya? (Enda nɔtɛ ka l’ɛse ka dikatshi) c) Wâle akɔna wakoka ndja oma lo nongola falanga y’oma le ase nkumbo wele bu ambetawudi, ndo ngande wakokaso kamba la Tukedi 27:12?

⁴ Nkumbo k’Akristo pombaka mbeya dia vɔ mbele l’ɔkɛndɛ wa ntondo w’adepasɛ w’okundelo wa lakiwɔ lovwe.a Naka nkumbo kɛmɔtshi kambovusha ko tɔ bu l’akoka wa sala okundelo waha kawotake, kete ondo ase nkumbo akina mbeyaka mbakimanyiya.b (1 Tim. 5:3; enda od lɛkɛ 132, od. 1) Ko naka polo ndo lâsɔ ko ohomba wekekɔ w’ekimanyielo, kete anto akina kana etshumanelo mbeyaka mbakimanyiya. (1 Joa. 3:17, 18) Koko, pombaka monga la yewo. Etena kalɔmbanyu ase nkumbo wele bu ambetawudi dia vɔ kimɔ falanga y’okundelo, vɔ mbeyaka ndjɔsa dia wekɔ la lotshungɔ la mbɔsa tɛdikɔ ta woho wahomba okundelo salema. Dui sɔ kokaka mbela okakatanu wa wolo etena kayanga Akristo dia sala okundelo aha la mbidja ditshelo dia mindo. Kɛsɔ halange mɛnya di’Akristo pombaka tona dia nongola ekimanyielo kahawalɔmbi kawasha ewotɔ awɔ. Koko, naka mɛnamaka dia ase nkumbo wele kema ambetawudi mbeyaka ndjohika dia mbɔsa tɛdikɔ tɔmɔtshi tendana l’okundelo, kete l’etena kɛsɔ mbeyaka monga dui dia lomba dia tona weshasha awɔ.—Tuk. 27:12.

5. a) Adia Efeso 4:17-19 ndo Romo 12:2. Ngande watɔlɔmbɔla atɔndɔ anɛ dia sho nɔngɔsɔla okundelo? b) Ngande wakakundɛma Yeso, ndo shɛngiya yakɔna yakoka monga la dui sɔ le so? c) Adia Luka 14:28 ndo 2 Koreto 8:12. Diaha nɔmba anto akina akuta, sɔmba kana mbɔtɔ abasa, ngande wahomba nkumbo y’Akristo kundɛ edo awɔ?

⁵ Eokelo kaso ka shikaa kendana la eongelo ka wanɛ wambovɔ pombaka tosha dihonga dia sho kundɛ odo aso aha la mbidja mbekelo ya kɔlɔ ya l’andja ɔnɛ yasalema efula le anto wele bu la eokelo k’awui wa lo Bible. (Ef. 4:17-19) Kânga mbahatalange takanya anto akina lo kitshakitsha adepasɛ wendana la okundelo lo tshambandeko, hatetawɔ di’anto wa l’andja ɔnɛ totshutshuya dia sho mbokoya wanɛ wele lo wodjima wa lo nyuma. (Romo 12:2) Tohɔ dia Yeso laki onto loleki tshɛ woke lakasɛnɛ la nkɛtɛ akakundɛma lo yoho yaha kawotake ndo yɛnya dilɛmiɛlɔ. (Joa. 19:40-42) Wanɛ wele la “yimba ya Kristu,” hawoke sɔnyi sala woho akɔ wâmɛ. (1 Kor. 2:15, 16) Omalɔkɔ mbele, diaha nɔmba anto akina akuta, sɔmba kana mbɔtɔ abasa, nkumbo k’Akristo pombaka kundɛ edo awɔ lo yoho yaha kawotake ndo ya dimɛna lo ndjela ekondjelo kawɔ.—Luka 14:28; Ɛdika la 2 Koreto 8:12.

6. a) Lande na kele bu ohomba mbewoya tshumanelo dikina losango la nyɔi ndo tɛdikɔ tambɔsama? b) Lande na kele honga dimɛna dia mbitola nsanganya y’otsha l’esambishelo kana tshikitanya ekongelo ka nsanganya ya l’etshumanelo l’ɔtɛ w’awui wendana l’okundelo? Adia ndo ɛnya woho wa kamba la Mateu 6:33, 34.

⁶ Sawo di’okundelo: Losango la nyɔi pandjɔka esadi esadi, ɔnkɔnɛ bu ohomba dia mbewoya tshumanelo dikina losango la nyɔi ndo tɛdikɔ tambɔsama. Honga ohomba tomɛ tshumanelo dikina mukanda dia mbaewoya losango lɔsɔ. Lo mɛtɛ, honga dimɛna dia mbitola kana tshikitanya ekongelo ka nsanganya ya l’etshumanelo l’ɔtɛ w’awui wendana l’okundelo. Lo mbetsha akambo wa lo nyuma lo dihole dia ntondo, sho namaka kanyi yele la wɛdimo lo dikambo di’anto wambovɔ ndo tetemalaka mbidja wahɔ wa Diolelo lo dihole dia ntondo lo nsɛnɔ yaso.—Mat. 6:33, 34.

7. a) Kakɔna kahomba salema etena kashama sawo di’okundelo di’oma lo Bible? b) Kakɔna kahahombe ɔtɛkɛtshi sala etena kashande sawo?

⁷ Naka aseka odo nangaka ndo naka dikumanyi dia l’etshumanelo mbetawɔka, kete sawo di’okundelo di’oma lo Bible kokaka mbishama lo Mbalasa ka Diolelo, laka odo kana lo dihole dikina. Ɔtɛkɛtshi wayɔsɔnama oma le nkumbo k’onto lovwe pombaka kamba l’ekongelo ka sawo di’okundelo k’oma le okongamelo wa Jehowa. Sawo di’okundelo pombaka samba, keketsha ndo mbodia anto lo nyuma. Ɔtɛkɛtshi pombaka tɛkɛta paka awui wele l’ekongelo ka sawo sɔ ndo nde hahombe mbidja awui w’oma lo waetawɔ wa kashi. Ɛnyɛlɔ, mbuta ɔnɛ onto ambovɔ l’ɔtɛ wa mananu kana anto akina mbôdiaki hɔtɔnɛ la akambo wa mɛtɛ wa lo Bible ndo mɛnyaka di’oko Jehowa bu l’akoka wa kokɛ ekambi ande. (Tuk. 18:10) Ɔtɛkɛtshi pombaka nto monga la yewo diaha kɛnɛ kayondota lo sawo kana lo dɔmbɛlɔ mɛnya dia nde ekɔ lo mbutɛ onto lambovɔ awui wate kana oko nde eke la lɔsɛnɔ. (Und. 9:5, 10) Etena kavɔ okambi waki Jehowa wa kɔlamelo, ɔtɛkɛtshi mbeyaka mbuta lo tshena pe ɔkɔndɔ wa lɔsɛnɔ la kɔlamelo laki l’onto akɔ. (Heb. 6:12) Koko, honga dimɛna dia memadia anto dia vɔ tombola odo kana mbonyamɛ la ntondo ka sawo, wonya wa sawo ndo l’ɔkɔngɔ wa sawo.

8. a) Kakɔna kaya tshondo ya mbekelo le anangɛso l’akadiyɛso amɔtshi, ndo lande na kele mbekelo kɛsɔ kema dimɛna? b) Minitɛ ngana yahomba mbɔsa sawo di’okundelo ndo dɔmbɛlɔ? c) Naka nyambokamba l’onto lɔtshiya ɔtɛkɛtshi, kakɔna kahandahombe sala?

⁸ Anangɛso l’akadiyɛso amɔtshi waya la mbekelo ka tshumanaka dia memba esambo wa Diolelo wenya efula la ntondo ka sawo di’okundelo tatɛ. Kânga mbakoka esambo wa Diolelo membama la ntondo ndo l’ɔkɔngɔ wa sawo di’okundelo, ayonga oko tokoya kɛnɛ kasala ase Lokristokristo naka elui w’anangɛso l’akadiyɛso tshumanaka dia memba edja efula la ntondo ka sawo di’okundelo. Mbala tshɛ sawo di’okundelo hahombe ndekana minitɛ 30 ndo diɔ pombaka tatɛ la wonya. Ɔtɛkɛtshi ndamɛ mbakoka sɔna dia sala dɔmbɛlɔ la ntondo ka sawo di’okundelo kana kema. Kema ohomba di’onto mbɔtshiya ɔtɛkɛtshi ndo komiya losanganya lɔsɔ. Koko, naka nyambokamba l’onto lɔtshiya ɔtɛkɛtshi, kete nde hahombe tɛkɛta awui efula. Ndoko ohomba wa nde nyomovusola kɛnɛ kakatshi ɔtɛkɛtshi kana sala sawo dia mbisha wanɛ wele lawɔ losaka. Naka ase nkumbo nangaka, nde kokaka tɛkɛta lo tshena pe awui amɔtshi ndo sala dɔmbɛlɔ la waombo dia komiya sɛlɛmɔnyi k’okundelo. Tanyohɛke dia onto lele kema ombetawudi hahombe nɔmbɔla awui wendana l’okundelo kana mbosha ɔtɛkɛta lo Mbalasa ka Diolelo kana la waombo.—2 Kor. 6:14-18.

9. Kakɔna kakeketshamaso dia sala etena katshɔso tohokamɛ sawo di’okundelo?

⁹ Tonge la dionga di’ɔlɔlɔ: Dionga diakɔna diahomba monga la so etena katshɔso l’okundelo? Kânga mbakoka etema aso ndola la kandji, sho kombolaka keketshama oma lo Afundelo. Lâsɔ, wanɛ watshɔ tohokamɛ sawo di’okundelo pombaka ntshɔka la Bible yawɔ. Tayelaka avɛsa lo Bible yaso kâmɛ l’ɔtɛkɛtshi ayokeketsha mbetawɔ kaso lo daka dia eolwelo kayoyala etena ‘kayonyɛma nyɔi.’ (Eny. 21:4) Ɔsɔ ekɔ nto diaaso di’ɔlɔlɔ dia kamba l’ɛtɛkɛta wakeketsha otsha le nkumbo kovushisha ndo otsha le anto akina wele lawɔ. Etena kongaso la dionga dia ngasɔ, sho hatosambe tsho anto akina koko sho kitshakitshaka ndo kandji kele la so lo mbika washo lo ɛngɛnɔngɛnɔ wayonga lo nshi yayaye etena kayonyɛma nyɔi lo pondjo.—Is. 25:8.

10. a) Ngande wakɛnɛmɔla wanɛ wele lo wodjima wa lo nyuma kandji kawɔ? b) Ngande wasala wanɛ wele l’ewo k’akambo wa lo nyuma, ndo lande na? Adia ndo ɛnya woho wa kamba la 1 Tesalonika 4:13.

¹⁰ Anto efula mbutaka dia monga la kandji k’efula mɛnyaka dilɛmiɛlɔ ndo ngandji kokaso onto lovwe. Diakɔ diele, etena katowofolaka elungi k’odo dia anto tawɛnyi, lo sawo di’okundelo ndo la waombo, anto efula ndelaka lo yoho ya tshambandeko, ndjangitolaka lo nkɛtɛ ndo tɛkɛtaka la ntondo ka dibaya wate kana oko onto lambovɔ âkasɛnɛ. Anto amɔtshi ndjokomaka lo kumbatɛ odo, mbishama lâdiko dia dibaya kana pemba dia ndjadja lo diombo. Kânga mbele sho tshɛ mongaka la lɔkɔnyɔ l’efula etena kavɔ onto, ekambi wa Nzambi hawɔkɛnɛmɔla kandji kele la wɔ lo yoho ya tshambandeko. Lande na? Nɛ dia sho ‘mbeyaka mɛtɛ lo dikambo dia wanɛ wambovɔ.’ Sho mbeyaka dimɛna eongelo k’anto wambovɔ ndo tekɔ l’elongamelo ka shikaa ka eolwelo. (Joa. 5:28, 29) Lam’ele daka sɔ tokeketshaka, sho hatohombe ‘ndjala la lonyangu oko anto wele bu l’elongamelo.’—1 Tes. 4:13.

Mbekelo yasalema l’ɔkɔngɔ w’okundelo

11. a) L’ɔkɔngɔ w’okundelo, ngande wakokaso ndjakiyanya la ngandji tshɛ dikambo di’aseka odo? b) Kakɔna kahatahombe nongamɛ kondja etena kembolaso aseka odo, ndo ngande wakokaso kamba la Etsha 20:35 lo dikambo sɔ?

¹¹ Kam’akundɛma odo, anto pombaka pandjɔ. Ndoko dui diakokaso salɛ odo nto. L’ɔkɔngɔ w’okundelo, anto amɔtshi mbeyaka kombola tembola aseka odo dia mbasamba ndo mbakeketsha. L’etena kɛsɔ, tekɔ la diaaso dia mɛnya anto woho wele lɔsɛnɔ mondo ndo di’ɔnɛ “lushi la nyoi ndeka lushi la mbuto ololo.” (Und. 7:1) Ayonga dui dia dimɛna dia mbewɔ mbahɛ aseka odo wotsho okina lo mbatshutshuya dia vɔ tosha mbo ya ndɛ, wanu kana ahole wa ndala. Ekambi wa Jehowa mbetawɔka dia ‘ɔngɛnɔngɛnɔ waya lo mbisha ndeka wa nongola.’ (Etsha 20:35) Ekɔ dimɛna dia kanyiya ekeketshelo k’oma l’Afundelo ndo ekimanyielo ka shikaa kakokaso mbisha aseka odo lo dihole dia kanyiya kɛnɛ kakokawɔ tosha dia ndɛ, nnɔ ndo woho wakokawɔ tolongola. Lo sala akambo lo yoho yɛnya dia hatotahɛ aseka odo wotsho okina, tayɛnya ngandji ndo lɔsɛngɔ l’Okristo.—Ngal. 6:2.

12. a) Kakɔna kasala anto waheye akambo wa mɛtɛ wele lo Bible l’ɔkɔngɔ w’okundelo? b) Lande na kalɔngɔsɔla anto alambo asɔ, ndo dietawɔ diakɔna diahɔtɔnɛ l’Afundelo diele la wɔ?

¹² Tewɔ sɛlɛmɔnyi yasalema l’ɔkɔngɔ w’okundelo: Wanɛ wele bu la eokelo ka dimɛna k’akambo wa mɛtɛ wa lo Bible salaka akambo lo yoho yotshikitanyi l’ɔkɔngɔ w’okundelo. Vɔ nɔngɔsɔlaka dambo dia woke dia ase nkumbo, asukanyi ndo anto akina tshumana dia ndɛ, nnɔ ndo kɛnya mishiki w’ewelewele. Anto efula mbelɛka tshelo shɔ ɔnɛ ohandjwelo w’otanda. Mbala efula, lo waaso wa ngasɔ anto ndɛka ndo nɔka lo yoho ya tshambandeko, kɛnyaka mishiki lo yoho yemula nsaki ya dieyanelo ndo salaka awui wa mindo. Anto kotwamaka oma lo mishiki w’ewelewele dia ndja lo difɛstɔ sɔ oyadi kânga vɔ haweyana l’ɔnɛ lovwe kana l’aseka odo. Anto amɔtshi mbutaka dia ɛngɛnɔngɛnɔ wa ngasɔ kimanyiyaka di’aseka odo kitshakitsha kandji kele la wɔ. Koko, Akristo wa mɛtɛ pombaka mbeya dia anto efula salaka totshelo tɔsɔ dia tombola odo ndo tondja okishi ande oma l’okonda dia nde ntshɔ le watshɛnde.

13. a) Diɔtɔnganelo diakɔna diele lam’asa sɛlɛmɔnyi yasalema l’ɔkɔngɔ w’okundelo la kɛnɛ kɔkɔndwami lo Etumbelu 32:1-6? b) Adia Undaki 3:1, 4. Lande na kele awui asɔ bu dimɛna le ekambi wa Nzambi? c) Lo ndjela Joani 17:16 ndo 1 Koreto 10:7, lande na kahomba Akristo wa mɛtɛ mbewɔ dia nɔngɔsɔla kana ntshɔ lo sɛlɛmɔnyi ka ngasɔ?

¹³ Anto efula mbutaka dia alambo asɔ wekɔ l’atei wa mbekelo yawɔ. Koko, hatohombe pondjo kamba la mbekelo yaso oko yɛkɛ nɛndɛ dia ndjasha lo dionga diahɔtɔnɛ l’Afundelo. Ɛnyɛlɔ, ase Isariyɛlɛ waki la mbekelo ka memba esambo ndo kɛnya lokombe. Koko, etena kakɔtɔnɛka akambo asɔ la ditshelo diahangɛnyangɛnya Nzambi, vɔ wakalanyaka diɔtɔnganelo diasawɔ la Jehowa. (Etum. 32:1-6) Ngasɔ mbediɔ ndo lo kɛnɛ kendana la nkombe ndo la fɛtɛ yaleka salema l’ɔkɔngɔ w’okundelo. Nyɔi ka lakiso la ngandji kema diaaso dia sho ngɛnangɛna ndo sala fɛtɛ. (Und. 3:1, 4) Dako nɛ dia lo Afundelo diekɔ ohomba efula: ‘Otshutshumalo ndeka ɔngɛnɔngɛnɔ dimɛna nɛ dia oma l’elundji ka lonyangu otema ngɛnangɛnaka.’ (Und. 7:3) Lam’ele sɛlɛmɔnyi yasalema mbala efula l’ɔkɔngɔ w’okundelo kakatana la awui wa mindo ndo la diɔtɔnganelo dia l’ɛdiɛngɛ, Akristo wa mɛtɛ hawosale sɛlɛmɔnyi shɔ ndo hawotshu lɛkɔ. Naka sho tona mbekelo shɔ, kete tayɛnya dia sho “kema wa la kete” nyɛ ndo sho nɛmiyaka Nzambi k’akambo wa mɛtɛ ndo nkum’etema y’anto akina.—Joa. 17:16; 1 Kor. 10:7.

14. a) Awui akɔna wasalema mbala efula, ndo vɔ salemaka nshi ngana l’ɔkɔngɔ wa kundɛ odo? b) Le wanɛ wele kema ambetawudi, diɔtɔnganelo diakɔna diele lam’asa awui asɔ la okishi w’onto l’ovwe?

¹⁴ Ohandjwelo w’otanda ndo anivɛrsɛrɛ wa nyɔi k’onto: L’ɔkɔngɔ w’okundelo, ase nkumbo amɔtshi ndjalɔngɔsɔlaka dia ndjohandjola otanda. Anto akina nɔngɔsɔlaka dia sala anivɛrsɛrɛ wa nyɔi k’onto dia tombola odo ndo mbôhɔ. Lo waaso asɔ, vɔ mbishaka anto mbo ya ndɛ ndo wanu, vɔ pomaka mishiki ndo salaka ɛkɔngɔ wa falanga. Mbekelo shɔ salemaka mbala efula nshi 40 l’ɔkɔngɔ wa kundɛ odo kana edja efula l’ɔkɔngɔ. Anto efula mbɔsaka dia ohandjwelo w’otanda ndo anivɛrsɛrɛ wa nyɔi k’onto ekɔ ohomba nɛ dia vɔ mbetawɔka di’okishi w’onto lovwe hawokoke tomba oma l’okonda paka awui asɔ wambosalema.

15. a) Lande na kalɔngɔsɔla anto amɔtshi ohandjwelo w’otanda? b) Dimbola diakɔna dionyiyama?

¹⁵ Ntshɔ kana nɔngɔsɔla ohandjwelo w’otanda mingu kana ngɔndɔ efula l’ɔkɔngɔ w’okundelo mbeyaka mɛnama oko diaaso dia nyomosamba aseka odo. Diɔ mbɔsamaka oko yoho ya kimanyiya wanɛ waki komonga lam’akakundɛma odo dia vɔ kondja diaaso dia ndakana la nde. Anto akina kambaka la diaaso sɔ dia kaloya wanɛ wakâkimanyiya l’otanda losaka. Onde sho kokaka mbuta dia lam’ele mbekelo shɔ bu mbekelo y’apanganu ekɔ dimɛna dia etshumanelo ndo ase nkumbo kaso ndjiyela?

16. a) Kânga mbele bu kɔlɔ dia tembola aseka odo lo shɔpɔ, kakɔna kahomba Akristo wa mɛtɛ mbewɔ dia sala? b) Lo ndjelo 1 Koreto 10:32, 2 Koreto 6:17 la Osambu 97:10, lande na kele ekɔ kɔlɔ nɔngɔsɔla ohandjwelo w’otanda kana ntshɔ lɛkɔ?

¹⁶ L’ɔkɔngɔ w’okundelo, ase nkumbo wa suke suke mbeyaka mbɔsa yɛdikɔ ya tshumana lo shɔpɔ dia menda adepasɛ wakawasale l’okundelo ndo awui akina wendana la lɛɛta. Lâdiko dia lâsɔ, anto amɔtshi mbeyaka mbisha aseka odo ekimanyielo ka l’emunyi ndo ka lo nyuma ndo esambelo l’ɔkɔngɔ w’otanda. Koko, dui sɔ salemaka mbala efula lo shɔpɔ ndo hendana la etshumanelo k’otondo. Ko kakɔna kayotomba naka ase nkumbo nɔngɔsɔla ohandjwelo w’otanda dikambo di’etshumanelo, di’ewotɔ awɔ ndo di’angɛnyi awɔ? Sala akambo asɔ mbeyaka konya anto amɔtshi dia vɔ mbɔsa di’Ɛmɛnyi wa Jehowa wekɔ la yoho yawɔ yasalawɔ ohandjwelo w’otanda kana anivɛrsɛrɛ wa nyɔi k’onto. Dui sɔ koka takanya esadi eto wanɛ weya kɛnɛ ketawɔso ndo ketshaso lo dikambo dia wanɛ wambovɔ. (1 Kor. 10:32) Lam’ele ohandjwelo w’otanda ndo anivɛrsɛrɛ wa nyɔi k’onto kakatana efula la dietawɔ diendana l’ekishi wa watshɛwɔ, atɛmɔdi wa mɛtɛ waki Nzambi mbewɔka dia sala oseka dikambo tshɛ diafɔna l’ohandjwelo w’otanda. (2 Kor. 6:17) Naka kɛsɔ mbasalaso, kete sho mɛnyaka dia mɛtɛ sho ‘mpetshaka kɛnɛ kele kɔlɔ’ ndo sho nangaka ndo sukɛka kɛnɛ kele pudipudi ndo kele ɔlɔlɔ. (Osam. 97:10; Romo 12:9) Nyɛsɔ sho tshɛ tokambe l’atɔndɔ w’amɛna efula wele lo sawo nɛ dia sho ndjashikikɛ dia sho kundɛka edo aso lo yoho yaha kawotake, ya dimɛna ndo yahɔtɔnɛ la ditshelo dia mindo.

[Nɔte ya l’ɛse ka dikatshi]