Kakɔna kele ‘kiɔkɔ y’ɔngɛnɔngɛnɔ aso’?
1. Kakɔna katosha ɔngɛnɔngɛnɔ l’ekomelo ka ngɔndɔ tshɛ?
1 Etena kalɔmbawɔ apandjudi tshɛ dia nkimɔ alapɔlɔ awɔ w’olimu l’ekomelo ka ngɔndɔ, kakɔna kele ‘kiɔkɔ y’ɔngɛnɔngɛnɔ’ aso? (Ngal. 6:4) Oyadi tekɔ ombatshi mboka wa lânde wakimɔ wenya 130 kana tekɔ apandjudi wetawɔma dia nkimɔ kânga minitɛ 15, sho tshɛ pombaka monga l’ɔngɛnɔngɛnɔ l’olimu wakatakambɛ Jehowa l’anima aso tshɛ.—Osam. 100:2.
2. Lande na kahombaso ndjasha tshɛ l’olimu waki Jehowa?
2 Oko wende Nkum’Olongo, Jehowa mbakoka nongola kɛnɛ koleki tshɛ dimɛna oma le so. (Mat. 1:6) L’ɔtɛ wa ngandji kawokaso, takayakimɔ le nde dia salaka lolango lande. Ɔnkɔnɛ, l’ekomelo ka lushi kana ka ngɔndɔ, naka tekɔ la eshikikelo dia takakambe la wenya aso, la diewo diaso ndo la wolo aso lo yoho yoleki dimɛna l’olimu waki Jehowa, kete tekɔ la ɔkɔkɔ wa monga la ɔngɛnɔngɛnɔ. (Tuk. 3:9) Ko naka nkum’otema kaso totɛka dia sho pombaka ndjalowanya lo dikambo dimɔtshi, kete sho pombaka nsala dui sɔ.—Romo 2:15.
3. Lande na kele honga dui dia lomba dia ndjaɛdika l’anto akina?
3 ‘Tatoyaɛdikake l’anto akina’: Kema dui dia lomba dia sho ndjaɛdika l’anto akina kana mbɛdika kɛnɛ kakatasalaka etena kakiso la wolo w’efula la kɛnɛ kotosala nshi nyɛ. Akambo wa lo lɔsɛnɔ tshikitanaka ndo akoka w’anto ntshikitana. Ndjaɛdika l’anto akina konyaka onto dia monga la yimba ya shɛmanedi kana dia nde ndjaɔsa oko ɛngɔ k’anyanya. (Ngal. 5:26; 6:4) Yeso kondjaɛdika la anto akina. Koko nde akandolaka anto lo ndjela kɛnɛ kakiwɔ l’akoka wa nsala.—Mako 14:6-9.
4. Wetshelo akɔna w’ohomba wakokaso nkondja oma lo wɛɛla waki Yeso wa talata?
4 Lo wɛɛla waki Yeso wa talata, os’olimu tshɛ akalongola talata ‘lo ndjela akoka ande.’ (Mat. 25:15) Etena kakakalola nkumɛwɔ ndo kakandakoya la wɔ, wanɛ wakakambe olimu l’etete lo ndjela akoka awɔ ndo akambo waki la wɔ wakandɔma ndo wakɔtɔ l’ɔngɛnɔngɛnɔ wa nkumɛwɔ. (Mat. 25:21, 23) Naka sho lawɔ ndjasha tshɛ l’olimu w’esambishelo ka Diolelo, kete sho kokaka monga l’eshikikelo ɔnɛ tayetawɔma le Nzambi ndo tayonga la ɔkɔkɔ wa monga l’ɔngɛnɔngɛnɔ.