LƆSƐNƆ L’OKRISTO

Lɔkɛwɔ l’ɔlɔlɔ ndo dilɛmiɛlɔ di’efula kotolaka elonganyi oya lo akambo wa mɛtɛ

Mbala efula, waa wadi wonga ambetawudi kotolaka waomɛwɔ oya l’akambo wa mɛtɛ diɛsɛ la lɔkɛwɔ lawɔ l’ɔlɔlɔ. Koko dui sɔ mbeyaka mbaalɔmba dia mbikikɛ ekakatanu l’edja k’ɛnɔnyi efula. (1Pe 2:21-23; 3:1, 2) Naka olonganyi ayɛ ekɔ lo kosoya osoyasoya, kete ntetemala nɛndja akambo wa kɔlɔ lo nsala kɛnɛ kele ɔlɔlɔ. (Rɔm 12:21) Ɛnyɛlɔ kayɛ k’ɔlɔlɔ mbeyaka monga la shɛngiya ya dimɛna oleki ɛtɛkɛta ayɛ.

Hemba dia mɛna akambo oko awaɛna olonganyi ayɛ. (Flp 2:3, 4) Yadja lo dihole diande, okande kɛtshi ndo nsala la wolo dia nkotsha dimɛna ɔkɛndɛ ayɛ wa wadi. Onga onto lahokamɛ dimɛna. (Jak 1:19) Onga la solo dia lotutsha ndo nshikikɛ olonganyi ayɛ dia wɛ mboolangaka. Kaanga naka olonganyi ayɛ hakolange kana hakɔlɛmiya woho wɔlɛmiyayɛ, wɛ koka monga l’eshikikelo dia Jehowa mbɔsaka kɔlamelo yayɛ la nɛmɔ.—1Pe 2:19, 20.

NYENDE VIDƐO YELE L’ƆTƐ A DUI ƆNƐ: JEHOWA TOSHAKA WOLO WA MƐMBA WOTSHO ASO NDO OMA LAASƆ, NYOKADIMOLE LO AMBOLA WAYELA ANƐ:

Ngande waki lɔsɛnɔ laki Grace Li l’etatelo lo diwala diande?
Kakɔna kakookotola oya l’akambo wa mɛtɛ wa lo Bible?
Ngande wakakikɛ kadiyɛso Li ehemba l’ɔkɔngɔ wa nde batizama?
Kakɔna kakalɔmbaka kadiyɛso Li lo dikambo di’omɛnde?
Ɛtshɔkɔ akɔna wakakondja kadiyɛso Li l’ɔtɛ wa lɔkɛwɔ lande l’ɔlɔlɔ ndo dilɛmiɛlɔ diande di’efula?

Osato wele la tenyi efula: Akɛnyi wa lo vidɛo yele l’ɔtɛ a dui ɔnɛ: ‘Jehowa toshaka wolo wa mɛmba wotsho aso,’ wɛnya ehamelo watasale Grace Li. 1. Grace alela lo shɛsɛsɛsɛ mɔtshi; 2. Kadiyɛso kɛmɔtshi eka Bible nde la Grace Li. 3. Grace nde la anande wambotshika rɛstora wa nkumbo dia ntshɔ otsha lo losanganya lɔmɔtshi. 4. Grace Li nde l’ase nkumbo kande divwa lo Mbalasa ka Diolelo. — Lɔkɛwɔ l’ɔlɔlɔ ndo dilɛmiɛlɔ di’efula mongaka l’etombelo w’amɛna efula!