Rɛferansɛ wa lo Dikatshi dia losanganya la Lɔsɛnɔ ndo olimu aso
© 2024 Watch Tower Bible and Tract Society of Pennsylvania
NGƆNDƆ KA TANU 6-12
AKAMBO W’OHOMBA W’OMA L’ƆTƐKƐTA WA NZAMBI OSAMBO 36-37
“Totshimbake wɔɔngɔ l’ɔtɛ w’anto wa kɔlɔ”
Kakɔna kayonyɛma etena kayoya Diolelo diaki Nzambi?
4 Akanga wa kɔlɔ wekɔ la shɛngiya yakɔna le so ɛlɔ kɛnɛ? Ɔpɔstɔlɔ Pɔɔlɔ akate dia lo nshi y’ekomelo, “tena dia paa dia wolo mbikikɛ diayoyala.” Oma laasɔ nde akakotsha ate: “Akanga wa kɔlɔ ndo akanga wa lokeso wayoleka mpama lo kɔlɔ.” (2 Tim. 3:1-5, 13) Onde wɛ ambɛnaka akambo asɔ? Efula ka l’atei aso tambodiɛnɛka oma le akanga wa kɔlɔ wele oko asoyanyi wa djawudi, akanga wa kɔngɔdi wahetshana, ndo atshi w’awui wa kɔlɔ efula. Amɔtshi l’atei awɔ hawoshɛ akambo wa kɔlɔ wasalawɔ. Akina sɛmaka dia wekɔ lo nkimanyiya anto, koko lo mɛtɛ vɔ wekɔ akanga wa kɔlɔ. Koko, oyadi kaanga tatadiɛnɛka la dikambo dimɔtshi dia kɔlɔ efula, akanga wa kɔlɔ wekɔ la shɛngiya le so. Sho tataka hemɔ etena kokaso woho wasalɛwɔ ana w’akɛnda, esombe ndo anto akina wahakoke ndjakokɛ akambo la esehe tshɛ. Akanga wa kɔlɔ asɔ wekɔ lo nsala akambo lo yoho yaakonya dia mɛnama oko nyama ya ngala kana oko ɛdiɛngɛ. (Jak. 3:15) Diɛsɛ ko, Ɔtɛkɛta wa Jehowa toshaka elongamelo.
Jehowa tshɔkɔlaka wanɛ wadimanyiyana
10 Namɛ onto kumbɛkumbɛ ekɔ waale le so. Jehowa nangaka dia sho monga la wɔladi wonga l’onto etena kanyande tokumbɛkumbɛ l’otema. (Adia Ɛfɛsɔ 4:31, 32.) Nde tokeketshaka dia “kimɔ nkɛlɛ ndo tshika odudu.” (Os. 37:8) Ekɔ dui dia lomba ndjela dako sɔ. Nama kumbɛkumbɛ kana nkɛlɛ mongaka l’etombelo wa kɔlɔ lo demba ndo lo yimba yaso. (Tok. 14:30) Etena kalamɛso onto ɔmɔtshi tokumbɛkumbɛ, dui sɔ hatowosalɛ kɔlɔ, ekɔ oko naka tambɔnɔ lɔlɛngɔ, dui sɔ diayonga l’etombelo wa kɔlɔ le so, koko aha le onto lakatosalɛ kɔlɔ. Woho akɔ waamɛ mbele, etena kadimanyiyaso onto okina, sho ndjakondjiyɛka wahɔ. (Tok. 11:17) Sho mongaka la wɔladi wa lo yimba ndo wa l’otema ndo sho mongaka l’akoka wa ntshɔ otsha la ntondo l’olimu wakambɛso Jehowa.
‘Tɔngɛnangɛnake le Jehowa’
20 Ɔnkɔnɛ, “akanga a memakana wayukita kete.” (Osambu 37:11a) Ko waa na wele “akanga a memakana”? Tshɛkɛta yakakadimɔma lanɛ ɔnɛ “memakana” ndja oma lo tshɛkɛta yalembetshiya “sui, ndjâkitshakitsha kana mɔnywama.” Eelo, akanga a memakana ekɔ wanɛ watokongɛka Jehowa la ndjâkitshakitsha tshɛ dia nde mbanyɛ akambo wa kɔlɔ wawaɛnya pâ. “[Vɔ] wayongenangena la etshoko efula wa ki.” (Osambu 37:11b) Kânga kakianɛ, tekɔ l’ɛtshɔkɔ efula wa ki lo paradiso ka lo nyuma kele kâmɛ l’etshumanelo ka mɛtɛ k’Akristo.
Diangɔ di’oshinga wolo dia lo nyuma
it-2-F 341
Dikona
Shikimala, tshikalaka pondjo kana otale. Mbala efula mbutamaka di’akona nshikimala ndo tshikalaka pondjo. (Isa 54:10; Hab 3:6; ɛdika la Os 46:2.) Ɔnkɔnɛ, etena kakate omembi w’esambo dia losembwe la Jehowa lekɔ “oko akona wa Nzambi,” (Os 36:6) aha la taamu nde akalange mbuta dia losembwe la Jehowa nshikimala nge. Kana lam’ele akona wekɔ etale, ondo nde akalange mɛnya dia losembwe la Nzambi ndeka l’anto la fwa. (Ɛdika la Isa 55:8, 9.) Lo kɛnɛ kendana la woho wakatshola ondjelo w’esambele dikɔhɔ dia nkɛlɛ ka Nzambi, Ɛnyɛlɔ 16:20 mbutaka ɔnɛ: “Akona kotanema nto.” Dui sɔ mɛnyaka dia kaanga diangɔ diele etale oko akona hadiotohandɔ etena kayotshola Nzambi nkɛlɛ kande.—Ɛdika la Jɛr 4:23-26.
NGƆNDƆ KA TANU 13-19
AKAMBO W’OHOMBA W’OMA L’ƆTƐKƐTA WA NZAMBI OSAMBO 38-39
Toyaɛndjake onongo amboleka l’ɔtɛ wa munga yayɛ
‘Endaka tɛɛ’ otsha lo nshi yayaye
12 Adia 1 Joani 3:19, 20. Sho tshɛ ndjaɛndja onongo lo tena dimɔtshi. Ɛnyɛlɔ, amɔtshi ndjaɛndjaka onongo l’ɔtɛ w’akambo wakawasale ntondo ka mbeka akambo wa mɛtɛ. Akina ndjaɛndjaka onongo l’ɔtɛ wa munga yakawasale l’ɔkɔngɔ wa batisimu kawɔ. Dui sɔ komɛka anto efula. (Rɔmɔ 3:23) Lo mɛtɛ, sho nangaka nsala kɛnɛ kele ɔlɔlɔ. Koko “sho tshɛ takanaka mbala efula.” (Jak 3:2; Rɔmɔ 7:21-23) Kaanga mbele hatolange ndjaɛndja onongo, dui sɔ mongaka la wahɔ ɛmɔtshi. Lande na? Nɛ dia ndjaɛndja onongo koka totshutshuya dia ndjalowanya ndo ndjashikikɛ diaha kalolɛ munga yaso.—Hɛb. 12:12, 13.
13 Lo wedi okina, onto koka ndjaɛndja onongo amboleka, mbuta ate ntetemala ndjaɛndja onongo kaanga l’ɔkɔngɔ wa nde ndjatshumoya ndo wa Jehowa mɛnya dia nde ambodimanyiya. Yoho ya ndjaɛndja onongo shɔ koka monga waale efula. (Os. 31:10; 38:3, 4) Lo ngande? Tɔsɛdingole ɛnyɛlɔ ka kadiyɛso kɛmɔtshi kakayaɛndja onongo l’ɔtɛ wa pɛkato yakandasale lo nshi yakete. Nde akate ate: “Lakayaoke dia handjokoka ndjasha l’olimu wa Jehowa nɛ dia ondo dimi hatoshimbamɛ.” Anto efula l’atei aso koka ndjaoka oko kadiyɛso kɛsɔ. Ekɔ ohomba efula dia sho mbewɔ djonga ya ndjaɛndja onongo amboleka. Ndo nto, tokanyiya ɔngɛnɔngɛnɔ wayonga la Satana naka sho mpekɔ, etena kele Jehowa atatohekɔ!—Ɛdika la 2 Kɔrɛtɔ 2:5-7, 11.
w02-F 15/11 20 od. 1-2
Akokaso nsala dia nshi yaso monga la nɛmɔ lo washo wa Jehowa?
MƐNAMAKA dia nshi ya lɔsɛnɔ laso yekɔ yema tshitshɛ ndo mbetaka esadi. Omembi w’esambo Davidɛ akakane yimba efula lo woho wele lɔsɛnɔ mondo ndo ekanelo kande ka yimba kakotshutshuya dia nɔmba ɔnɛ: “Jehowa le, onkimanyiya dia mbeya woho wayonga ekomelo kami, ndo yɛdikɔ ya nshi yami. Lo mɛtɛ, wɛ aketɛ nshi yami yema tshitshɛ; ndo otale wa lɔsɛnɔ lami wekɔ anyanya la ntondo kayɛ.” Davidɛ akasalaka tshɛ dia nsɛna lo woho wakakoke ngɛnyangɛnya Nzambi, oyadi l’ɛtɛkɛta kana l’etsha. Lam’ele nde akendɛka le Nzambi nde akakotsha ate: “Wɛ oto kele elongamelo kami.” (Osambo 39:4, 5, 7) Jehowa akoke dɔmbɛlɔ diande. Lo mɛtɛ, nde akasɛdingola awui wakasalaka Davidɛ ndo akofute lo ndjela awui asɔ.
Ekɔ dui dia wɔdu dia monga l’awui efula wa nsala lo lominitɛ tshɛ la lo lushi ndo nkoma polo ndo lo monga la dui dia nsala oseka wonya tshɛ. Dui sɔ mbeyaka monga lo kiɔkɔ y’ekiyanu wahashile, lam’ele tekɔ l’awui efula wa nsala ndo wambishola lo lɔsɛnɔ, koko wenya bu efula. L’ɛnyɛlɔ ka Davidɛ, onde tekɔ lo nsala tshɛ dia nsɛna lo yoho ya sho mbetawɔma le Nzambi? Tolembete dia Jehowa mɛnaka ndo sɛdingolaka la yambalo tshɛ ɔmɔmɔ la l’atei aso. Ambeta ɛnɔnyi 3 600, Jɔbɔ pami kakokaka Nzambi wɔma akate dia nde aki l’eshikikelo dia Jehowa akasɛdingolaka mboka yande ndo akadiaka wanya ande tshɛ. Jɔbɔ akambola ate: “Akokami mbokadimola etena kayangande dia mbikoya la mi?” (Jɔb 31:4-6, 14) Sho kokaka nsala dia nshi yaso monga la nɛmɔ lo washo wa Jehowa, lo mbetsha awui wa lo nyuma lo dihole dia ntondo, lo nkitanyiya ɛlɛmbɛ ande ndo lo nkamba la wenya aso la lomba. Nyɛsɔ tɔsɛdingole dimɛna awui asato asɔ.
Lowanya diɔtɔnganelo diasayɛ la Jehowa
Sawolaka la Jehowa mbala la mbala. Shɔ koka nshihodia dia l’ɔtɛ watetemalayɛ ndjaɛndja onongo, koka monga okakatanu le yɛ dia mbɔɔlɔmba. (Rɔmɔ 8:26) Koko ‘ntetemala nɔmba,’ tɛ Jehowa dia wɛ nangaka efula lɔngɛnyi lasayɛ la nde. (Rɔmɔ 12:12) Andrej mbohɔka ate: “Lakayaɛndjaka onongo ndo laki la sɔnyi. Koko l’ɔkɔngɔ wa dɔmbɛlɔ tshɛ, tokanyi tɔsɔ takatakitakitaka. Lakaleke monga la ki ka lo yimba.” Naka wɛ heye kɛnɛ ka nɔmba, kete nsɛdingola alɔmbɛlɔ wa Davidɛ, nkumekanga kakayatshumoya watanema l’Osambo 51 ndo 65.
Diangɔ di’oshinga wolo dia lo nyuma
Ɛnya dia wɛ ekɔ onto lasungana mbɛkɛ otema
16 Ndjakimɛ kekɔ ohomba naka sho nangaka di’anto akina ndjaɛkɛ le so. Dionga sɔ tokimanyiyaka dia nama ɛlɔmɔ aso etena kahembamaso dia mbuta dui dimɔtshi dia sheke diakawatotɛ. (Adia Tokedi 10:19.) Sho koka mɛna dia ndjakimɛ kaso kambɔtɔ l’ohemba etena kakambaso la rɛzo sɔsio. Naka hatendji ɔlɔlɔ, kete aha la mbeya sho koka ndjoshola awui wa toseke le anto efula. Ndo naka tambodianganya losango lakɔ l’Ɛtɛrnɛtɛ, kete hatotonga l’akoka wa mbidja elelo lo woho wakoka anto nkamba la losango lakɔ kana waale wakokalɔ monga le anto. Ndjakimɛ tokimanyiyaka dia sho ntshikala ki etena kayanga andɔshi dia tokonya dia sho mbishola awui wakoka mbidja nsɛnɔ y’anangɛso l’akadiyɛso lo waale. Dui sɔ koka salema etena katooka apulushi ambola lo wodja ɔmɔtshi wamboshimbama olimu aso kana wambowosekɛ awui amɔtshi wendana l’olimu aso. Sho koka nkamba la tɔndɔ diata ɔnɛ “dimi layolama onyɔ ami la ɛngɔ kadihawɔ mfɔ onyɔ” l’akambo wa ngasɔ ndo akina. (Os. 39:1) Oyadi tekɔ kaamɛ la nkumbo kaso, l’angɛnyi aso, l’anangɛso, l’akadiyɛso kana l’onto okina tshɛ, sho pombaka monga anto wakokawɔ mbɛkɛ otema. Ndo dia monga onto lakokawɔ mbɛkɛ otema, sho pombaka monga la ndjakimɛ.
NGƆNDƆ KA TANU 20-26
AKAMBO W’OHOMBA W’OMA L’ƆTƐKƐTA WA NZAMBI OSAMBO 40-41
Lande na kahombaso nkimanyiya anto akina?
Akanga wa lokaho wekɔ l’ɔngɛnɔngɛnɔ
16 Lo mɛtɛ, anto wele la lokaho hawokahe l’elongamelo k’anto ndjowakahɛ vɔ lawɔ. Yeso akate ate: “Etena kasalayɛ fɛtɛ, elɛ ase wola, akanga wa dikɔmɔ, akanga wa tshumbe ndo akanga wa totshungu; ko wɛ ayonga l’ɔngɛnɔngɛnɔ, nɛ dia vɔ ndooko la ɛngɔ ka kofuta.” (Luka 14:13, 14) Bible mbutaka nto ɔnɛ: “Kanga lokaho ayɔtshɔkwama,” ndo ɔnɛ: “Ɔngɛnɔngɛnɔ le ɔnɛ tshɛ ladja mbolambola yimba.” (Tok. 22:9; Os. 41:1) Sho pombaka monga la lokaho nɛ dia sho nangaka mɛtɛ nkimanyiya anto akina.
17 Etena kakashile Pɔɔlɔ ɛtɛkɛta wa Yeso wata ɔnɛ “ɔngɛnɔngɛnɔ waya lo mbisha ndeka wa nongola,” nde kɔtɛkɛtaka tsho lo kɛnɛ kendana la mbishana diangɔ dia l’emunyi. Sho koka mbisha anto ndo ekeketshelo, alako w’oma lo Bible ndo ekimanyielo. (Ets. 20:31-35) Lo ndjela kɛnɛ kakate ndo kakasale Pɔɔlɔ, nde akatetsha ohomba wa monga la lokaho lo kɛnɛ kendana la wenya, wolo, yimba ndo ngandji kaso.
18 Anyangiyangi wakeke lɔkɛwɔ l’onto wakɛnyi vɔ lawɔ dia lokaho mbishaka anto ɔngɛnɔngɛnɔ. Lo ndjela sawo dimɔtshi, anto mbutaka dia vɔ ndekaka monga l’ɔngɛnɔngɛnɔ l’ɔkɔngɔ wa vɔ salɛ anto akina awui w’amɛna. Anyangiyangi mbutaka dia etena kakimanyiyaso anto akina, sho ndjaokaka dia lɔsɛnɔ laso lekɔ l’oyango ndo ohomba. Diakɔ diele, tomanyi tɔmɔtshi mbutaka di’anto kambaka elimu la lolango dia ndeka monga la yoonge ya dimɛna ndo l’ɔngɛnɔngɛnɔ. Lo mɛtɛ, kɛnɛ kakawashola hatambiya, nɛ dia Jehowa Otungi aso wa ngandji, mbutaka tena tshɛ dia lokaho toshaka ɔngɛnɔngɛnɔ.—2 Tim. 3:16, 17.
Jehowa ayokosukɛ
7 Koko naka wɛ ekɔ la hemɔ, Jehowa ayokokeketsha ndo ayokosukɛ oko wakandasalɛ ekambi ande wa lo nshi yakete. Nkumekanga Davidɛ akafunde ate: ‘Ɔnɛ latokanɛka ose wola ele la ɔtshɔkɔ. Jehowa ayowotshungola lushi l’asui. Jehowa atoolamaka, atombaka lomu lande.’ (Osambu 41:1, 2) Lo mɛtɛ, Davidɛ konanga mbuta ɔnɛ onto ɔlɔlɔ lakasɛnaka lo nshi shɔ lakakimanyiya ose wola takandahombe pondjo mvɔ. Ko ngande wakakoke Jehowa nkimanyiya onto ɔlɔlɔ ɔsɔ? Davidɛ akalembetshiya ate: ‘Jehowa ayowosukɛ lo mbeto kande k’ɔkɔnyi. Lam’ayondonga la hemɔ, wɛ ayotshikitanya mbeto kande tshɛ lo tshɛ.’ (Osambu 41:3) Jehowa mbeyaka dimɛna woho wasowa ekambi ande, ndo nde hawaohɛ. Nde koka mbasha dihonga ndo lomba. Jehowa akasale demba di’onto lo yoho yakokadiɔ ndjakɔnɔla dɔamɛ.
Okoya Jehowa lo mbokana kandji
17 Kaanga mbele mbokana kandji ekɔ ohomba le so, ɔkɔkɔ woleki woke wokanaso kandji ele nɛ dia sho nangaka mbokoya Jehowa ndo mbosha lotombo. Nde kele Kiɔkɔ ya ngandji ndo kɛtshi. (Tok. 14:31) Nde toshaka ɛnyɛlɔ ka kokele. Ɔnkɔnɛ, nyɛsɔ tosale kɛnɛ tshɛ kakokaso nsala dia mbokoya Nzambi lo mbokanaka kandji. Lo nsala ngasɔ tayoleka monga kaamɛ l’anangɛso la akadiyɛso ndo tayoleka monga la diɔtɔnganelo dia dimɛna l’anto wotodingi.—Ngal. 6:10; 1 Jni. 4:16.
Diangɔ di’oshinga wolo dia lo nyuma
it-1-F 1261
Jehowa
Bible k’otondo tɛkɛtaka dia oyindjamelo wa lowandji la Jehowa ndo dui sɔ mɛnyaka hwe oyango wa Jehowa woleki woke, mbut’ate okidiamelo wa lokombo la nde. Okidiamelo ɔsɔ mendanaka la mbɛdia lokombo la Nzambi oma lo ntɛngɔ tshɛ. Laadiko dia laasɔ, okidiamelo ɔsɔ nɔmbamaka dia ditongami tshɛ diele la yimba dia l’olongo ndo dia la nkɛtɛ, nɛmiya lokombo lɔsɔ oko welɔ ekila. Dui sɔ, nɔmbaka dia vɔ mbetawɔ ndo nɛmiyaka woho wele Jehowa Nkum’olongo, vɔ salaka dui sɔ la lolango ndo vɔ ngɛnangɛnaka mbokambɛ lo nsala lolango lande l’ɔtɛ wa ngandji kawokawɔ. Lo dɔmbɛlɔ diakandalɔmbɛ Jehowa l’Osambo 40:5-10, Davidɛ akɛnya yoho y’ekanelo ka yimba ka ngasɔ lo ntɛkɛta di’okidiamelo wa mɛtɛ wa lokombo la Jehowa. (Enda woho wakakambe ɔpɔstɔlɔ ɔmɔtshi la tenyi dimɔtshi dia l’osambo ɔnɛ lo ntɛkɛta diambo dia Kristo Yeso lo Hɛb 10:5-10.)
NGƆNDƆ KA TANU 27–NGƆNDƆ KA SAMALO 2
AKAMBO W’OHOMBA W’OMA L’ƆTƐKƐTA WA NZAMBI OSAMBO 42-44
Kondja wahɔ tshɛ lo tshɛ oma lo wetshelo wa Nzambi
Akambo w’ohomba w’oma lo etenyi ka hende ka dibuku dia Esambu
42:4, 5, 11; 43:3-5. Naka l’ɔtɛ w’ɛkɔkɔ ɛmɔtshi tayokakitɔna lo tshanda mɔtshi l’etshumanelo ka Akristo, sho koka kondja ekeketshelo naka sho mbohɔ ɔngɛnɔngɛnɔ wakongaka laso etena kakatasangana l’anangɛso. Kânga mbele l’etatelo dui sɔ mbeyaka tosha pâ nɛ dia tayoyaɔsa oko ekalema, diɔ diayotohola nto dia Nzambi ekɔ eshamelo ndo ɔnɛ sho pombaka kongɛ le nde dia kondja esambelo.
Woho wa nsala wekelo wa Bible wa dimɛna
1 DƆMBƐLƆ: Dɔmbɛlɔ mbele dui dia ntondo diahombaso nsala. (Osam. 42:8) Lande na? Sho pombaka mbɔsa wekelo w’Ɔtɛkɛta waki Nzambi oko etenyi kɛmɔtshi k’ɔtɛmwɛlɔ aso. Ɔnkɔnɛ, sho pombaka nɔmba Jehowa dia nde tosha yimba y’ɔlɔlɔ ndo nyuma kande k’ekila. (Luka 11:13) Barbara lambokamba oko misiɔnɛrɛ l’edja k’ɛnɔnyi efula mbutaka ate: “Dimi nɔmbaka mbala tshɛ la ntondo ka mbeka Bible. L’ɔkɔngɔ wa nɔmba, dimi mbokaka dia Jehowa aya suke la mi ndo nde ngɛnangɛnaka kɛnɛ kayangami nsala.” Nɔmbaka la ntondo ka mbeka Bible nɔngɔsɔlaka etema ndo timba taso dia sho nshihodia awui wa lo nyuma wayangaso mbeka.
“Tetawɔke dia anya ayɛ nɛmba”
11 Jehowa tokeketshaka nto lo tshimbo ya wetshelo wakondjaso oma lo nsanganya yaso y’Akristo, nsanganya ya weke ndo lo kalasa ya l’okongamelo. Wetshelo ɛsɔ koka tokimanyiya dia kambɛ Nzambi l’eyango w’amɛna, ndjadjɛ eyango ndo dia nkotsha ɛkɛndɛ aso efula w’Akristo. (Osambo 119:32) Onde wɛ nomɔlomɔka dia nkondja ekeketshelo oma lo wetshelo wa Jehowa?
12 Jehowa akakimanyiya wodja ande dia nɛndja ase Amalɛka, ase Etiyɔpiya ndo nde akasha Nɛhɛmiya la ase Juda wolo wa nshidiya wokelo wa mpele dia Jɛrusalɛma. Woho akɔ waamɛ mbele, Nzambi ayotoshaka wolo wa ntetemala nkamba olimu aso w’esambishelo kaanga l’atei w’ekiyanu, ɔlɔshamelo ndo wendjudi w’anto akina. (1 Petero 5:10) Jehowa hoosala di’ekakatanu aso nshila lo yoho ya dihindo. Koko, sho pombaka nsala awui amɔtshi. Awui akɔna? Sho pombaka mbadiaka Ɔtɛkɛta wa Nzambi lushi tshɛ, nɔngɔsɔlaka ndo mbɔtɔka lo nsanganya yaso lomingu tshɛ, ntetemala nsala wekelo w’onto ndamɛ ndo ɔtɛmwɛlɔ wa lo nkumbo ndo ndjaɛkɛ le Jehowa lo dɔmbɛlɔ. Tatetawɔke pondjo di’ɛngɔ kaanga ɔtɔi mbekola timba taso oma lo tɛdikɔ talɔngɔsɔla Jehowa dia tosha wolo ndo tokeketsha. Naka wɛ amboshihodia ɔnɛ anya ayɛ wambɔlɛmba lo dui dimɔtshi dia l’awui asɔ, lɔmba Nzambi ekimanyielo. Oma laasɔ enda woho wele nyuma kaki ‘Nzambi kayokosha wolo ndo kayokosha nsaki la wolo wa nsala akambo.’ (Filipɛ 2:13) Ko, onde wɛ koka nkeketsha anya w’anto akina?
Diangɔ di’oshinga wolo dia lo nyuma
it-1-F 417
Mbolo
Mbala efula, afundelo tɛkɛtaka dikambo dia mbolo dia mbisha ɛnyɛlɔ ka dui dimɔtshi. Etena kakandalembetshiyaka ɔkɛyi waki la nde, Jɔbɔ akate dia nde aya “ɔnango mbolo.” (Jɔb 30:29) Lo ntɛkɛta dikambo dia ɔlɛndjamelo wa sɔnyi wa wodja wa Nzambi, ondo omembi w’esambo akatɛkɛtaka dia dihole dialɔmaka ta diele mbolo yakatshumanaka dia ndɛ edo (ɛdika la Os 68:23), nde akate la lonyangu ɔnɛ: “Wɛ ambotominola lɛnɛ adjasɛ mbolo.” (Os 44:19) Woho wakadinge ase Babilɔna Jɛrusalɛma lo 607 N.T.D. akela ndjala ka kasha kakakonya ambutshi wa wamato amɔtshi dia vɔ nsalɛ anawɔ akambo la ngala tshɛ. Aha la taamu, Jɛrɛmiya akɛnya otshikitanu wa ngala kaki l’ase ‘wondja ande’ la woho wakokɛ mbolo anatɔ.—Del 4:3, 10.
NGƆNDƆ KA SAMALO 3-9
AKAMBO W’OHOMBA W’OMA L’ƆTƐKƐTA WA NZAMBI OSAMBO 45-47
Osambo lo dikambo dia diwala dia Nkumekanga
Tɔngɛnɛngɛnɛ l’ɔtɛ wa diwala dia Ɔna Ɔkɔkɔ!
8 Adia Osambu 45:13, 14a. Bible mbutaka dia otshukami ayoyala “la lutumbu tshe” etena kayosalema diwala. Lo Ɛnyɛlɔ 21:2, otshukami ɔsɔ mbɛdikamaka la osomba wa Jɛrusalɛma y’oyoyo “wamboyalɛnga dia ntshɔ le omɛnde.” Osomba wa l’olongo ɔsɔ wekɔ la “lotombo la Nzambi” ndo vɔ pɛtaka ngai ngai “oko lɔwɔkɔ loleki oshinga wolo, oko lɔwɔkɔ la jaspɛ lahɛta oko lɔwɔkɔ la kristalɛ.” (Ɛny. 21:10, 11) Dibuku di’Ɛnyɛlɔ nembetshiyaka woho wele Jɛrusalɛma y’Oyoyo ngai ngai. (Ɛny. 21:18-21) Diakɔ diele, keema dui dia diambo lo woho wakɛnya omembi w’esambo dia otshukami akɔ ekɔ “la lutumbu tshe.” Eelo, diwala sɔ diayosalema l’olongo.
9 Otshukami ayɔlɔmbwama otsha le otshuki, mbuta ate Nkumekanga Mɛsiya. Nde ekɔ lo mbɔlɔngɔsɔla ndo ekɔ lo ‘mbɛɛdia la ashi w’ɔtɛkɛta wa Nzambi.’ Otshukami ekɔ “ekila ndo aha l’ɛkɔmɔ.” (Ɛf. 5:26, 27) Nde ekɔ lo ndjalɔngɔsɔla dia nde ntomba dimɛna lushi la diwala. Ndo ngasɔ mbayondoyala. Lo mɛtɛ, “Ekutu andi wakatelama la eshinga wa paunyi,” ndo nde ‘ayɔlɔmbwama otsha le Nkumekanga ɔlɔtshi okutu ande wele l’alangi wa weho la weho.’ Lo lushi la diwala di’Ɔna Ɔkɔkɔ, “waka[sha wadɛnde] lotshungɔ la nde ndɔta dihɔndɔ dia swaswa dia ngaingai ndo dia pudipudi, nɛ dia dihɔndɔ dia swaswa sɔ diekɔ didjidji di’etsha w’ɛlɔlɔ w’ekilami.”—Ɛny. 19:8.
Kɛnɛ kalembetshiya dibuku dia Ɛnyɛlɔ lo dikambo dia nshi yayɛ yayaye
10 Kakɔna kayosala Jehowa lo ta dia wolo sɔ? Nde totɛka ɔnɛ: “Nkɛlɛ kami k’efula kayodɔdɔ.” (Ɛzk. 38:18, 21-23) Ɛnyɛlɔ tshapita 19 mɛnyaka kɛnɛ kayosalema oma laasɔ. Jehowa ayotoma Ɔnande dia ndjoshimbɛ ekambi Ande ndo dia ndjɔlɛndja atunyi awɔ. “Alembe wa l’olongo” wayokengama l’andjelo wa kɔlamelo kaamɛ l’anto 144 000 dia ndɔsha Ngɔngɔ ka la Mangɔngɔ. (Ɛny. 17:14; 19:11-15) Ko etombelo akɔna wayonga la ta sɔ? Elanyelo k’anto tshɛ ndo k’atshunda walɔshana la Jehowa!—Adia Ɛnyɛlɔ 19:19-21.
11 Ohokanyiya woho wayoyaoka anto wele la kɔlamelo la nkɛtɛ etena kayowohandɔ lam’ayolanyema atunyi wa Nzambi tshɛ! Ande ɔngɛnɔngɛnɔ wayonga l’etena kɛsɔ lee! Kaanga mbele ayonga ekoko w’ɔngɛnɔngɛnɔ l’olongo lam’ayolanyema Babilɔna ka Woke, ekɔ dui dikina diayotosha ɔngɛnɔngɛnɔ woleki. (Ɛny. 19:1-3) Ɔsɔ ekɔ dui di’ɔngɛnɔngɛnɔ diatɛkɛtama lo dibuku dia Ɛnyɛlɔ, “diwala dia Ɔna Ɔkɔkɔ.”—Ɛny. 19:6-9.
12 Etena kakɔna kayosalema diwala sɔ? Anto 144 000 tshɛ wayonga l’olongo yema la ntondo ka ta di’Aramangɛndɔna ntatɛ. Koko, aha l’etena kɛsɔ mbayosalema diwala dia Ɔna Ɔkɔkɔ. (Adia Ɛnyɛlɔ 21:1, 2.) Diwala dia Ɔna Ɔkɔkɔ diayosalema l’ɔkɔngɔ wa ta di’Aramangɛdɔna ndɔma ndo w’atunyi wa Nzambi tshɛ ndanyema.—Os. 45:3, 4, 13-17.
it-1-F 1041
Ta
L’ekomelo ka ta sɔ, nkɛtɛ kayonga lo wɔladi l’edja k’ɛnɔnyi kinunu. Ɛtɛkɛta wa l’Osambo wata ɔnɛ: “[Jehowa] ekɔ lo nkomiya ata lo nkɛtɛ k’otondo. Nde ambɔkɔla ota ndo ambohembola dikɔnga; nde ambotshumba pusupusu y’asɔlayi lo dja,” wakakotshama mbala ka ntondo lo etena kakakawoya Jehowa wɔladi lo wodja w’Isariyɛlɛ lo nanya dihomɔ di’ata dia atunyi awɔ. L’ɔkɔngɔ wa Kristo ndanya anto wele lo kiɔkɔ y’ata l’Aramangɛndɔna, wɔladi wa pondjo ndo wa kokele wayokaloyama polo lo tokoma ta nkɛtɛ. (Os 46:8-10) Anto wayokondja lɔsɛnɔ la pondjo ele wanɛ “wayotshula tokuwa tawɔ ta ta nkongo ndo akɔnga awɔ tɔshɔlɔ takɔlɔngawɔ adiyo” ndo vɔ “hawoteka ta nto.” “Nɛ dia onyɔ wa Jehowa kanga lolembelembe kambota”.—Isa 2:4; Mik 4:3, 4.
Diangɔ di’oshinga wolo dia lo nyuma
Kakɔna kayonyɛma etena kayoya Diolelo diaki Nzambi?
9 Kakɔna kayɔhɛna atshunda wa kɔlɔ? L’ɔkɔngɔ wa Aramangɛdɔna, onde tshunda dimɔtshi diayoyala la nkɛtɛ? Bible mbutaka ɔnɛ: “Lo ndjela daka diande, sho tekɔ lo nkonga olongo w’oyoyo ndo nkɛtɛ k’oyoyo, lɛnɛ ayongaka losembwe.” (2 Pet. 3:13) Olongo w’edjedja ndo nkɛtɛ y’edjedja ele mandji ya kɔlɔ ndo anto walɔmbɔlawɔ. L’ɔkɔngɔ wa vɔ minyɛma, kakɔna kayowahɛna? “Olongo w’oyoyo ndo nkɛtɛ k’oyoyo.” Olongo w’oyoyo mendanaka la lowandji l’oyoyo, Diolelo diokengami la Yeso Kristo nde la anto 144 000 wayolɛ kaamɛ la nde. Nkɛtɛ k’oyoyo mendanaka la anto wayɔlɔmbwama oma le Diolelo diaki Nzambi. Yeso nde la wanɛ wayolɛ kaamɛ la nde wayokoya lo yoho ya kokele Jehowa Nzambi, lele Nzambi kaha la ofukutanu. (1 Kɔr. 14:33) Ɔnkɔnɛ, “nkɛtɛ k’oyoyo” kayokongɛma dimɛna. Apami w’amɛna wayonga dia nkokɛ diangɔ. (Os. 45:16) Apami asɔ wayɔlɔmbwama oma le Kristo la anto 144 000. Ohokanyiya yema etena kayɔhɛnyama atshunda tshɛ wa kɔlɔ la tshunda ɔtɔi diele kaamɛ diahongaki kɔlɔ pondjo!
NGƆNDƆ KA SAMALO 10-16
AKAMBO W’OHOMBA W’OMA L’ƆTƐKƐTA WA NZAMBI OSAMBO 48-50
Ambutshi le, nyokeketsha wɛkamu w’ase nkumbo yanyu l’okongamelo wa Jehowa w22.03 22 od. 11
Ɔtɛmwɛlɔ wa mɛtɛ wayokofudiyɛ ɔngɛnɔngɛnɔ
11 Sho tɛmɔlaka Jehowa etena kekaso Ɔtɛkɛta ande ndo ketshaso anaso awui wendana la nde. Sabato akashaka ase Isariyɛlɛ diaaso dia ntshika elimu awɔ wa lushi la lushi ko ndeka ndjasha lo diɔtɔnganelo diaki lam’asawɔ la Jehowa. (Eto. 31:16, 17) Anto wa kɔlamelo waki l’atei awɔ waketshaka anawɔ akambo wendana la Jehowa ndo ɛlɔlɔ ande. Ɛlɔ kɛnɛ, sho lawɔ pombaka mbɔsa etena ka mbadiaka ndo mbekaka Ɔtɛkɛta wa Nzambi. Ɔsɔ ekɔ etenyi kɛmɔtshi ka l’ɔtɛmwɛlɔ wa Jehowa ndo dui sɔ tokimanyiyaka dia sho ndeka ndjasukanya la nde. (Os. 73:28) Ndo etena kekaso kaamɛ oko nkumbo, sho koka nkimanyiya lɔlɔnga l’oyoyo, mbuta ate anaso dia monga la diɔtɔnganelo dia dimɛna vɔamɛ la Shɛso lele l’olongo loludi la ngandji.—Adia Osambo 48:13.
Tekɔ l’ɛkɔkɔ wa monga l’ɔngɛnɔngɛnɔ
Sho mbadiaka lo Bible ɔnɛ: “Nyokendekende lu Siona, nyutshimbi l’utshimba awo, nyali efula ka mvudu yawo y’etangelu. Nyendi ngeli yawo ololo, nyushishimi mvudu yawo ya diulelu, dia ndjusanyiya lolonga layayi.” (Osam. 48:12, 13) L’avɛsa anɛ, omembi w’esambo akakeketsha ase Isariyɛlɛ dia vɔ tɛna Jerusalɛma la washo awɔ. Onde wɛ kokaka nkanyiya akambo w’ohomba wakohɔka nkumbo y’ase Isariyɛlɛ etena kakawatshɔka l’osomba w’ekila l’afɛstɔ wakasalemaka ɔnɔnyi l’ɔnɔnyi ndo kakawɛnaka tɛmpɛlɔ katɔ ka lotombo la washo awɔ? Vɔ mɛtɛ wakatshutshuyamaka dia “ndjusanyiya lolonga layayi.”
Tokanyiya dikambo dia nkumekanga ka womoto ka la Shɛba, ɔnɛ laki kombetawɔ awui wakawawotɛ wendana la ɛlɔmbwɛlɔ ka lotombo kaki Sɔlɔmɔna ndo lomba laki la nde. Kakɔna kakayowetawoyaka ɔnɛ awui wakandoke waki mɛtɛ? Nde akate ate: “Dimi kumbetawo lukumu lako ntundu dimi latayi ndu latenyi la ashu ami.” (2 Ek. 9:6) Eelo, kɛnɛ kɛnaso la ‘washo aso’ kokaka monga la shɛngiya ya wolo le so.
Ngande wakokayɛ nkimanyiya anayɛ dia vɔ mɛna okongamelo wa diambo waki Jehowa la ‘washo awɔ’? Naka nyekɔ la Bɛtɛlɛ ka Ɛmɛnyi wa Jehowa suke la ngelo kanyu, kete nyosale la wolo dia tokiembola. Ɛnyɛlɔ, Mandy nde la Bethany wakole lo ngelo kakangana la Bɛtɛlɛ ka lo wodja awɔ kilɔmɛtɛlɛ 1 500. Koko, ambutshi awɔ wakakongɛ dia vɔ tshɔka dia tembola Bɛtɛlɛ, djekoleko etena kakawayolaka. Vɔ mbutaka ɔnɛ: “La ntondo ka sho tembola Bɛtɛlɛ, takakanyiyaka ɔnɛ paka epalanga w’anto ato mbele lɛkɔ.” Koko, takatɛnaka ndo ɛlɔngɔlɔngɔ l’esekaseka wakakambɛka Jehowa la wolo awɔ ndo l’ɔngɛnɔngɛnɔ. Takashihodia di’okongamelo waki Jehowa wekɔ l’akambo efula lâdiko dia wanɛ wakasalemaka lo ngelo kaso. Ndo etena tshɛ kakatembolaka Bɛtɛlɛ, takalekaka ndjasukanya la Jehowa ndo takakeketshamaka dia ndeka ndjasha l’olimu ande. Woho wakɛnyi Mandy nde la Bethany Bɛtɛlɛ la washo awɔ akâtshutshuya dia vɔ ntatɛ nkamba olimu w’ombatshi mboka, ndo wakayelamɛka dia tokamba lo Bɛtɛlɛ oko anto wayakimɔ la lolango lo tshanda mɔtshi.
Tosale akambo oko ambolami wa Diolelo!
5 Mbeka ɔkɔndɔ wa wodja. Onto lalanga nkoma ombolami wa diolelo di’anto, pombaka mbeya akambo amɔtshi wendana l’ɔkɔndɔ wa wodja akɔ. Woho akɔ wâmɛ mbele, wanɛ walanga monga ambolami wa Diolelo diaki Nzambi pombaka mbeka akambo tshɛ wendana la diolelo diakɔ. Tende kɛnɛ kakasale ana waki Kɔra wakakambaka l’Isariyɛlɛ w’edjedja. Vɔ wakalangaka Jerusalɛma ndo dihole diayɔ di’ɔtɛmwɛlɔ ndo wakangɛnangɛnaka kɔndɔlɛ anto akambo wendana la dihole diakɔ. Aha dia dimɛna di’osomba mbakawaleke mbidja yimba, koko lo kɛnɛ kakalembetshiyaka osomba ndo dihole di’ɔtɛmwɛlɔ. Jerusalɛma aki “usumba wa nkum’ekanga ka wuki,” Jehowa nɛ dia lɛkɔ mbaki dihole di’ɔtɛmwɛlɔ wa mɛtɛ. Lɛkɔ mbaketshamaka anto Ɛlɛmbɛ ande. Anto wakalɔmbwamaka oma le nkumi ya dikanga yakolɛka la Jerusalɛma waki anto waketawɔmaka ndo wakalangemaka oma le Jehowa. (Adia Osambu 48:1, 2, 9, 12, 13.) L’ɛnyɛlɔ k’ana wa Kɔra, onde wɛ ekɔ la nsaki ka mbeka ɔkɔndɔ wa etenyi ka la nkɛtɛ k’okongamelo waki Jehowa? Lo yɛdikɔ yayototalekaka mbeka akambo wendana l’okongamelo waki Nzambi ndo woho wasukɛnde ekambi ande, mbayotalekaka Diolelo diaki Nzambi monga dui dia mɛtɛ le so. Nsaki kaso ka nsambisha lokumu l’ɔlɔlɔ la Diolelo kayoleka mfula.—Jer. 9:24; Luka 4:43.
Diangɔ di’oshinga wolo dia lo nyuma
it-2-F 799-800
Ɔngɔnyi
Lam’ele vɔ waki wodja waki l’ɔngɔnyi, ase Isariyɛlɛ waki la kɛnɛ ka ndɛ ndo ka nnɔ (1Ku 4:20; Ond 5:18, 19) ndo ɔngɔnyi awɔ akakokɛka oma lo paa yela wola. (Tok 10:15; Ond 7:12) Koko, kaanga mbele Nzambi akalange di’ase Isariyɛlɛ monga l’ɔngɔnyi oma l’olimu awɔ wa wolo (ɛdika la Tok 6:6-11; 20:13; 24:33, 34), Jehowa akawaewola oma lo waale waki la ntondo kawɔ naka vɔ mbohɛ dia nde mbele lo kiɔkɔ y’ɔngɔnyi awɔ ndo ndjotatɛ ndjaɛkɛ lo ɔngɔnyi akɔ. (Eoh 8:7-17; Os 49:6-9; Tok 11:4; 18:10, 11; Jɛr 9:23, 24) Wakawaohola dia ɔngɔnyi tshikalaka paka lo tshanda mɔtshi tsho (Tok 23:4, 5), takawakoke mbisha Nzambi ɔngɔnyi oko oshinga w’etshungwelo dia ntshungola onto oma lo nyɔi (Os 49:6, 7) ndo ɔnɛ vɔ bu la wahɔ le onto lambovɔ (Os 49:16, 17; Ond 5:15). Wakawaɛnya dia naka vɔ ndeka ndjasha l’ɔngɔnyi, kete vɔ mbeyaka ndjosala awui waha la losembwe ndo hawototetemala mbetawɔma le Nzambi. (Tok 28:20; ɛdiaka la Jɛr 5:26-28; 17:9-11.) Vɔ wakakakeketshama nto dia ‘nɛmiya Jehowa la diangɔ diawɔ dia nɛmɔ.’—Tok 3:9.
NGƆNDƆ KA SAMALO 17-23
AKAMBO W’OHOMBA W’OMA L’ƆTƐKƐTA WA NZAMBI OSAMBO 51-53
Kɛnɛ kakokayɛ nsala dia mbewɔ munga ya weke
Ngande wakokayɛ namaka otema ayɛ?
4 Lo Tokedi 4:23, tshɛkɛta “otema” kambemaka dia nembetshiya ‘lonto la l’etei k’otema’ kana ‘la lo woshɛshɛ.’ (Adia Osambo 51:6 ndo nɔtɛ.) L’ɛtɛkɛta ekina, “otema” nembetshiyaka tokanyi taso hita, yoho yayaokaso, eyango aso ndo nsaki yaso. Ɔsɔ ekɔ woho weso mɛtɛ l’etei, aha woho wɛnamaso l’andja.
5 Tɔsɛdingole woho wɛnya yoonge yaso ya demba ohomba wa woho weso l’etei. Ntondotondo, dia sho ntetemala monga la yoonge ya demba ya dimɛna, sho pombaka ndɛka diangɔ di’amɛna ndo sutshasutshaka demba mbala la mbala. Woho akɔ waamɛ mbele, dia sho ntetemala monga la yoonge ya dimɛna ya lo nyuma, sho pombaka ndɛka mbo ya ndɛ y’amɛna ya lo nyuma ndo mɛnyaka mbala la mbala dia tekɔ la mbetawɔ le Jehowa. Sho mɛnyaka dia tekɔ la mbetawɔ le Jehowa lo nkamba la kɛnɛ kekaso ndo lo nsambisha awui wendana la dietawɔ diaso. (Rɔmɔ 10:8-10; Jak. 2:26) Dui dia hende ele, lo menda ɛnamelo kaso, sho mbeyaka mfɔnya ɔnɛ tekɔ la yoonge ya dimɛna ko tetele tekɔ la hemɔ l’etei. Woho akɔ waamɛ mbele, lo menda woho weso la mbekelo ya lo nyuma, sho mbeyaka mfɔnya ɔnɛ mbetawɔ kaso kekɔ nge, koko mbeyaka monga ko nsaki ya kɔlɔ yekɔ lo ndjahame l’otema aso. (1 Kɔr. 10:12; Jak. 1:14, 15) Sho pombaka mbohɔka dia oyango wa Satana ekɔ dia sho monga la tokanyi tande. Ngande shikaa wakokande nsala dui sɔ? Ndo ngande wakokaso ndjakokɛ?
Sho kokaka monga la lɔkɛwɔ la pudipudi
5 Yoho mɔtshi y’ohomba yakokaso mɛnya dia tekɔ lo ndjaɛkɛ tshɛ le Jehowa ele, mbɔlɔmbaka mbala la mbala dia nde tokimanyiya dia ndɔshana la tokanyi ta kɔlɔ. Etena kayasukanyaso la Jehowa lo dɔmbɛlɔ, nde ndjasukanyaka la so. Nde toshaka nyuma kande k’ekila dia sho ntetemala monga la lɔkɛwɔ la pudipudi ndo nshika tanga la ntondo k’awui wa mindo. Lo alɔmbɛlɔ wasalaso, sho kokaka mbutɛka Nzambi dia sho nangaka monga la tokanyi t’amɛna t’ɔngɛnyangɛnya. (Osam. 19:14) Onde sho mbɔlɔmbaka l’okitshakitsha tshɛ dia nde tɔsɛdingola l’oyango wa sho mbeya “dikambu dia kolo,” nsaki kana tokanyi ta kɔlɔ tshɛ takoka tokonya dia nsala pɛkato? (Osam. 139:23, 24) Onde sho mbɔsɛngasɛngaka mbala la mbala dia nde tokimanyiya dia sho nama olowanyi aso etena kahomanaso l’ohemba?—Mat. 6:13.
6 Woho wakatodiama kana dionga diaki la so ntondo koka ndjotokonya dia nkombola nsala akambo wahetawɔ Jehowa. Oyadi ngasɔ mbediɔ, Jehowa koka tokimanyiya dia nsala etshikitanu dia sho ntetemala mbokambɛ lo yoho yetawɔma. Nkumekanga Davidɛ akeyaka dui sɔ. L’ɔkɔngɔ wa nde nsala loseka la Batɛ-Shɛba, Davidɛ akasɛngasɛnga Jehowa ate: ‘Otonge otema wa pudipudi l’etei kami, ndo odje l’etei kami yimba y’oyoyo ndo yamboshikimala.’ (Osam. 51:10, 12) Lɔkɛwɔ la kɔlɔ koka monga la shɛngiya y’efula lo alemba aso, koko Jehowa koka tokimanyiya dia monga la nsaki ka mbookitanyiya. Kaanga naka taki la nsaki y’awui wa mindo ntondo ndo tekɔ lo ndɔshana la yɔ, Jehowa koka tɔlɔmbɔla dia nkitanyiya wadjango ande ndo nsɛna lo yoho yɔtɔnɛ la wɔ. Nde koka mbekɛ lonya diaha dikambo tshɛ dia kɔlɔ tahemɛ.—Osam. 119:133.
Diangɔ di’oshinga wolo dia lo nyuma
it-1-F 663
Dɔɛngɛ
Ose Ɛdɔmɛ, owandji w’alami w’ɛkɔkɔ waki nkumekanga Saolo ndo nde aki la dihole dia nɛmɔ. (1Sa 21:7; 22:9) Dɔɛngɛ aki ose wodja lakayokomaka ose Isariyɛlɛ. Lam’ele nde ‘akakimamɛ la ntondo ka Jehowa’ la Nɔbɔ, ondo aki l’ɔtɛ wakandasale dɔkɔlɔkɔ, l’ɔtɛ wa mindo kɛmɔtshi kana l’ɔtɛ wakinde la tolembetelo t’onto lele la sudi. Dɔɛngɛ akɛnyi Ahimɛlɛkɛ asha Davidɛ mapa wa lɛɛnya ndo lukuwa la ta la Ngɔliatɛ. Oma laasɔ, etena kakatɛ Saolo ekambi ande dia nde akafɔnyaka dia wakawɔtwɛka sheke dia mbosalɛ kɔlɔ, Dɔɛngɛ akate kɛnɛ kakandɛnyi la Nɔbɔ. L’ɔkɔngɔ wa nde mbelɛ ɔlɔmbɛdi wa laadiko ndo ɛlɔmbɛdi ekina wa la Nɔbɔ ndo l’ɔkɔngɔ wa nde mboka Ahimɛlɛkɛ ambola, Saolo akadjangɛ andawi dia ndjaka ɛlɔmbɛdi. Lam’ele andawi wakatone, aha la mengenga Dɔɛngɛ akadiake ɛlɔmbɛdi 85 oko wakandjanga nkumekanga. L’ɔkɔngɔ wa nde nsala dui dia kɔlɔ sɔ, Dɔɛngɛ akalanya Nɔbɔ, lo ndjaka anto tshɛ, akɛnda l’epalanga mbidja ndo dongalonga.—1Sa 22:6-20.
Oko wɛnyamidiɔ lo efunde wa la diko ka Osambo 52, Davidɛ akafunde lo dikambo dia dɔɛngɛ ate: “Lolemi layɛ la mpɛmɔ oko ɛrɛswara, kongɛka dia nsala kɔlɔ ndo kesaka, wɛ nangaka kɔlɔ oleki ɔlɔlɔ, mbuta kashi oleki mbuta kɛnɛ kosembwe. Wɛ nangaka ɔtɛkɛta tshɛ wa kɔlɔ, wɛ lolemi la lokeso.”—Os 52:2-4.
NGƆNDƆ KA SAMALO 24-30
AKAMBO W’OHOMBA W’OMA L’ƆTƐKƐTA WA NZAMBI
Nzambi ekɔ lo wedi ayɛ
Monga la lomba kɛdikɛdi mboka Nzambi wɔma!
10 Lo diaaso dimɔtshi, Davidi akalawɔ dia toyashɛ laka Akishi, owandji wa l’osomba w’ase Filistiya wa Ngata, osomba wakotɔ Ngɔliyatɛ. (1 Samuele 21:10-15) As’olimu waki Akishi wakate dia Davidi aki otunyi wa wodja awɔ. Kakɔna kakasale Davidi la ntondo ka dikambo dia wâle sɔ? Nde akalɔmbɛ Jehowa l’etete. (Osambu 56:1-4, 11-13) Kânga mbakandadimbiya dadi dia nde kondja woho wa ndawɔ, Davidi akeye dia Jehowa mɛtɛ mbakotshungola lo tshɔkɔla welo wakandadje. Woho wakayaɛkɛ Davidi l’otema ɔtɔi le Jehowa akɛnya dia Davidi akokaka mɛtɛ Nzambi wɔma.—Osambu 34:4-6, 9-11.
11 L’ɛnyɛlɔ ka Davidi, sho koka mɛnya wɔma wokaso Nzambi lo ndjaɛkɛ lo daka diande dia tokimanyiya dia sho ndɔshana l’ekakatanu. Davidi akate ate: “Uyakimo le [Jehowa], ekamaki le ndi, ku ndi ayukutshela dikambu diako.” (Osambu 37:5) Kɛsɔ halembetshiya dia sho pombaka kɛkɛtshiya Jehowa ekakatanu aso ko sho kɔma anya aha la sala ndoko dui ko nongamɛ dia nde kandola ekakatanu akɔ. Davidi kɔnɔmba Nzambi dia mbokimanyiya ko nde kɔma anya. Nde akakambe la wolo wa demba ndo la yimba yakawosha Jehowa dia nde kandola ekakatanu waki lande. Koko, Davidi akeyaka dia aha oma lo wolo ande hita mbakoka onto kandola ekakatanu ande. Ngasɔ mbediɔ ndo lo dikambo diaso. L’ɔkɔngɔ wa sho sala kɛnɛ tshɛ kakokaso sala, sho pombaka tshika akambo akina l’anya wa Jehowa. Lo mɛtɛ, mbala efula ndoko kakokaso sala lâdiko dia tshika tshɛ l’anya wa Jehowa. L’etena kɛsɔ mbahombaso mɛnya wɔma wokaso Nzambi. Sho koka keketshama oma l’ɛtɛkɛta ɛnɛ wakate Davidi l’otema ɔtɔi ate: “Ekesanelu ka [Jehowa] keko le wane watuwukaka woma.”—Osambu 25:14.
Ndoko kakoka ‘tânganya oma lo ngandji ka Nzambi’
9 Jehowa mbɔsaka nto ekikelo kaso la nɛmɔ. (Mateu 24:13) Tohɛke dia Satana nangaka dia wɛ mboka Jehowa ɔkɔngɔ. Lushi tshɛ latshikalayɛ la kɔlamelo otsha le Jehowa mbokimanyiyaka dia nde mbisha otunyi ande Satana lawɔnyɔla okadimwelo. (Tukedi 27:11) Mbala mɔtshi ekikelo hatongaka dikambo dia wɔdu. Hemɔ, ekakatanu wendana la ekondjelo, ɔkɛi ndo ekakatanu ekina mbeyaka mbetɛ oseka lushi tshɛ leeta oko tshondo y’ohemba. Elongamelo kahakotshama esadi koka nto kɔmɔla otema. (Tukedi 13:12) Ekikelo la ntondo k’ekakatanu ɛsɔ tshɛ ekɔ dikambo di’ele la nɛmɔ dia lânde lo washo wa Jehowa. Diakɔ diele, Nkumekanga Davidi akalɔmbɛ Jehowa dia nde mbidja asɔi ande “l’olondo,” ndo nde akakotsha la eshikikelo tshɛ ate: “Efula kawo kunfundama lu buku diaye uka?” (Osambu 56:8) Eelo, Jehowa hɔnyɔla ndo nde mbohɔka asɔyi ndo asui tshɛ wakikɛso dia nama kɔlamelo yaso otsha le nde. Vɔ lawɔ nto wekɔ la nɛmɔ lo washo ande.
Woho watokimanyiya ngandji dia ntondoya wɔma
16 Satana mbeyaka dia sho mbɔsaka lɔsɛnɔ laso la nɛmɔ. Koko nde mbutaka dia tayoyahondja ɛngɔ tshɛ kele laso, mbidja ndo diɔtɔnganelo diasaso la Jehowa dia nkokɛ lɔsɛnɔ laso. (Jɔbɔ 2:4, 5) Satana bu la shadiya! Lam’ele nde ekɔ “ɔnɛ lele la akoka wa ndjakisha,” Satana pembaka nkamba la wɔma wele laso wa nyɔi dia tokonya dia sho nsɛka Jehowa. (Hɛb. 2:14, 15) Lo tena dimɔtshi, ekambi waki Satana manɛka atɛmɔdi wa Jehowa dia mbadiaka naka vɔ hawɔsɛki mbetawɔ kawɔ. Lo tena dikina, Satana koka mɛna dia tekɔ l’ohomba w’esakelo ka wanyandja ndo nde koka nkamba la dui sɔ dia tokonya dia sho nsekola ɛlɛmbɛ wa Nzambi. Adɔkɔtɛlɛ w’aseka enganga kana ase nkumbo wele bu ambetawudi koka tɔsɛngiya dia mbetawɔ nkaloya dikila, dui diasekola ɛlɛmbɛ wa Nzambi. Kana onto ɔmɔtshi mbeyaka tetawoya osakelo ɔmɔtshi walɔshana l’atɔndɔ wa lo Bible.
17 Kaanga mbele hatolange mvɔ, sho mbeyaka dia Jehowa hotshika toka ngandji kaanga naka tambovɔ. (Adia Rɔmɔ 8:37-39.) Etena kavɔ angɛnyi wa Jehowa, nde mbalamaka lo yimba yande wate kana oko vɔ wekɔ la lɔsɛnɔ. (Luka 20:37, 38) Nde kombolaka mbaolola. (Jɔbɔ 14:15) Jehowa akafute oshinga wele la nɛmɔ di’efula l’oyango wa sho ‘nkondja lɔsɛnɔ la pondjo.’ (Jni. 3:16) Sho mbeyaka woke woke wa ngandji katoka Jehowa ndo woho wayakiyanyande dikambo diaso. Laasɔ, lo dihole dia nsɛka Jehowa etena keso la hemɔ kana kambowotanɛ dia todiaka, sho nyangaka esambelo, lomba ndo ekeketshelo oma le nde. Kɛsɔ mɛtɛ mbakasale Valérie nde l’omɛnde.—Os. 41:3.
Diangɔ di’oshinga wolo dia lo nyuma
it-1-F 646-647
Dikoka dia mbeya akambo la ntondo, kongɛ akambo la ntondo
Woho wakafunge Judasɛ Iskariyɔtɛ Yeso akakotsha Prɔfɛsiya y’oma le Nzambi ndo akɛnya dikoka dia Jehowa nde l’ɔnande dia mbeya akambo la ntondo. (Os 41:9; 55:12, 13; 109:8; Ets 1:16-20) Koko, hatokoke mbuta dia Nzambi akakongɛ la ntondo dia Judasɛ ndjonga la lɔkɛwɔ la ngasɔ. Prɔfɛsiya yakataka dia ɔngɛnyi ɔmɔtshi wa ma ma wa Yeso kayoyowofunga, koko tɔ kombola onto akɔ lokombo. Ndo nto, atɔndɔ wa lo Bible wakashikikɛma hawote dia Nzambi akakongɛ la ntondo dia Judasɛ ayoyosala awui asɔ. Pɔɔlɔ akate atɔndɔ w’oma le Nzambi anɛ: “Tosasɛke dia mbahɛ onto anya ndo toyatambiyake lo pɛkato y’anto akina, oyalamake pudipudi.” (1Ti 5:22; ɛdika la 3:6.) Woho waketsha Yeso otsho w’otondo dia nɔmba la ntondo ka nde ndjɔsɔna apɔstɔlɔ 12, mɛnyaka hwe dia Yeso akayakiyanyaka dia mbɔsa yɛdikɔ shɔ la lomba ndo lo yoho yahombama. (Luk 6:12-16) Otondonga Nzambi akakongɛ la ntondo dia Judasɛ ndjonga ofungi, tshike totondetawɔ dia nde sɔnama ndo naka sho ndjela tɔndɔ sɔ, kete ndo Nzambi otoyatambiya lo pɛkato yakasale onto ɔsɔ.
Mɛnamaka hwe dia etena kakandasɔnama oko ɔpɔstɔlɔ, otema ande komonga ndooko la ndjembetelo yakɛnyaka dia nde ayoyonga ofungi. Judasɛ aketawɔ dia “lɔsɔngu l’ololo ntomba” ndo mbodja mindo, ko dui sɔ diakayokonya lo ntakɔ mboka ndo mbetawɔ nɔmbwama aha oma le Nzambi, koko oma le Diabolo ko nde akayonga wovi ndo ofungi. (Hɛb 12:14, 15; Jni 13:2; Ets 1:24, 25; Jak 1:14, 15; enda JUDAS No. 4.) Etena kakahame awui wa kɔlɔ asɔ lo yɛdikɔ mɔtshi, Yeso akayɛna awui waki l’otema wa Judasɛ ndo akayota dia nde kayowofunga.—Jni 13:10, 11.