Woho wakokayɛ ndjɔsɛna l’andja w’oyoyo

Asawo wetshi wakɛnyisha dia keema edja Nzambi ayanga nkomiya ntshunda di’anto wa kɔlɔ ndo ekakatanu adiɔ tshɛ. Sho koka monga l’eshikikelo dia dui sɔ diayosalema. Lande na? Nɛ dia Ɔtɛkɛta wa Nzambi, Bible ndakaka ɔnɛ:

“Andja ɔnɛ wekɔ lo teete.”—1 JOANI 2:17.

Sho koka monga l’eshikikelo dia anto amɔtshi wayoka nɛ dia divɛsa dia lo Bible dia la diko ndakaka nto ɔnɛ:

“Ɔnɛ lasala lolango la Nzambi tshikalaka pondjo.”

Laasɔ, naka talanga dia ndjoka l’ekomelo k’andja, sho pombaka nsala lolango la Nzambi. Dia mbeya ele lolango la Nzambi, sho pombaka ntondotondo mbeka dia mbeeya.

SHO KOKAKA NDJOKA L’EKOMELO K’ANDJA LO “MBEKA DIA MBEYA” NZAMBI

Esato womamatanyi: 1. Ɔfɛlɛmɛ ɔmɔtshi lo lopitadi odjashi l’odihe wa lo lopitadi, ambɔkɔmɔ ndo ele l’akambo tɔɔ. 2. Nde omuya ndo ekɔ lo nnɔ eloko lo dihole dianɔwɔ eloko ndo ambɛna osekande ele l’ɔngɛnɔngɛnɔ etena kadiande periodikɛ kɛmɔtshi. 3. Osekande lakamba la nde ekɔ lo mbowadiyɛ divɛsa dimɔtshi di’oma lo Bible ndo ambowosha kartɛ ka woho wa mbɔtɔ lo jw.org.

Yeso akate ɔnɛ: “Dia vɔ nkondja lɔsɛnɔ la pondjo, weke dia keya wɛ Nzambi ɔtɔi ka mɛtɛ, la Yeso Kristo lakayatome.” (Joani 17:3) Dia ndjoka l’ekomelo k’andja ndo dia ndjɔsɛna pondjo pondjo, sho pombaka ‘mbeka dia mbeya’ Nzambi. Dui sɔ nɔmbaka awui efula lo dihole dia mbeya tsho ɔnɛ Nzambi ekɔ kana mbeya awui angana ato wendana la nde. Ekɔ ohomba sho mbɔtɔ lɔngɛnyi la nde. Naka talanga dia lɔngɛnyi laso nkeketala, kete sho pombaka mbetshaka wenya kaamɛ l’angɛnyi aso. Ngasɔ mbediɔ ndo lo dikambo dia lɔngɛnyi lasaso la Nzambi. Tɔsɛdingole awui amɔtshi wa mɛtɛ w’ohomba wekaso oma lo Bible watokimanyiya dia mpamia ndo nɔngɔsɔla lɔngɛnyi lasaso la Nzambi.

Awui wa mɛtɛ wekaso oma lo Bible

Sho mbekaka dia Nzambi kombolaka dia sho nsɛna lo Paradiso.

Nde akatonge anto wa ntondo, Adama nde la Eva ndo akaakitsha lo dihole dia dimɛna efula diakawelɛka ekambɔ k’Ɛdɛna. Vɔ waki kokele ndo Nzambi akawasha kɛnɛ tshɛ kakiwɔ la tɔ ohomba dia vɔ ngɛnangɛna la lɔsɛnɔ. Vɔ wotokoka nsɛna pondjo pondjo. Totowovɔ otowotetemala nama lɔngɛnyi lasawɔ la Nzambi. Koko vɔ wakasɔnɛ dia mpindola didjango diaki komonga wolo nkitanyiya diakawadjangɛ Nzambi.

Sho mbekaka lande na kasowaso nshi nyɛ.

Lo mpindolɛ Nzambi, pami ka ntondo, mbuta ate Adama, akashisha diaaso dia nsɛna pondjo pondjo le nde ndamɛ ndo le anto akina tshɛ. Bible mbutaka ɔnɛ: “Oko wakɔtɔ pɛkato l’andja oma le onto 1 ndo nyɔi oma lo pɛkato, ɔnkɔnɛ nyɔi kakadiangana le anto tshɛ dikambo anto tshɛ wakasale pɛkato.” (Rɔmɔ 5:12) Paka oko wakoka onto ɔmɔtshi mpowɔ ɛkɔmɔ kɛmɔtshi oma le ambutshi ande mbele ndo ana wa Adama tshɛ wakahowɔ eongelo kele keema kokele kande. Etombelo wambonga la dui sɔ ele, tekɔ lo ntshunda ndo tekɔ lo mvɔ.

Sho mbekaka kɛnɛ kamboshilaka Nzambi tosalɛ dia tokimanyiya.

Bible mbutaka ɔnɛ: “Nzambi akalange andja lo yɛdikɔ y’efula, diakɔ diakandakimɔ Ɔnande ɛtɔi lakandote, dia onto tshɛ longa la mbetawɔ le nde atovɔke, koko akondja lɔsɛnɔ la pondjo.” (Joani 3:16) Nzambi akatome Yeso la nkɛtɛ dia ndjokimɔ lɔsɛnɔ lande lo wahɔ aso. Lo kɛnɛ kendana la tshelo ya ngandji shɔ, pami kɛmɔtshi kelɛwɔ Prabhakar kele l’ɛnɔnyi 86 k’oma la Inde, mbutaka ɔnɛ: “Dui sɔ mɛnyaka ngandji k’efula kamboka Jehowa.a Ngandji kande kambombisha elongamelo ka nsɛna pondjo pondjo.”

Sho mbekaka woho wakokaso mɛnya lowando lo kɛnɛ kakasale Nzambi lo dikambo diaso.

Bible mbutaka dia sho koka mɛnya lowando laso oma lo kɛnɛ kakatosalɛ Nzambi lo “nkitanyiya ɛlɛmbɛ ande.” (1 Joani 2:3) La ngandji tshɛ, Jehowa Nzambi tɛnyaka kɛnɛ kakokaso nsala dia ngɛnangɛna la lɔsɛnɔ l’etena kɛnɛ. (Isaya 48:17, 18, nɔtɛ) Nzambi hakombola dia sho nsowa. Nde tolakaka dia naka sho ndjela wadjango ande, kete hatotɔngɛnangɛna aha tsho la lɔsɛnɔ l’etena kɛnɛ koko ndo nto tayonga la diaaso dia sɛnaka pondjo pondjo.

ADIAKA ƆTƐKƐTA WA NZAMBI, MBUTA ATE BIBLE, LUSHI TSHƐ

Ɔfɛlɛmɛ enda l’olongo l’ɔkɔngɔ wa nde mbadia Bible etena kalɛnde yangɔ ya la midi l’andja. — Wɛ koka ndjoka l’ekomelo k’andja lo nɔmbaka Nzambi ekimanyielo ndo nsala lolango lande

Sho ndɛka mbo ya ndɛ mbala la mbala dia ntshikala la lɔsɛnɔ. Koko Yeso mbutaka ɔnɛ: “Onto hayala la lɔsɛnɔ oma lo mbo ya ndɛ tsho, koko ndjalaka la lɔ oma lo ɔtɛkɛta tshɛ watomba oma l’onyɔ wa Jehowa.”—Mateo 4:4.

Ɛlɔ kɛnɛ, sho tanaka ɛtɛkɛta wa Nzambi lo akatshi wa lo Bible. Etena kayoyeka dibuku di’ekila sɔ, wɛ ayeka awui wa mɛtɛ w’ohomba wakasale Nzambi lo nshi y’edjedja, wasalande nshi nyɛ ndo awui wayondosala lo nshi yayaye.

LƆMBA NZAMBI DIA NDE KOKIMANYIYA

Kakɔna kakokayɛ nsala naka wɛ alanga ndjela ɛlɔmbwɛlɔ ka Nzambi koko wɛ mɛnaka dia ekɔ wolo ntshika nsala awui watande dia wekɔ kɔlɔ? Lo dikambo sɔ, mbeka dia mbeya Nzambi koka kokimanyiya lo yoho ya laande.

Tɔsɛdingole ɛnyɛlɔ ka womoto ɔmɔtshi lelɛwɔ Sakura, lakasɛnaka lɔsɛnɔ la mindo. Etena kakandatatɛ mbeka Bible, nde akeke didjango diaki Nzambi diata dia “[ndawɔ] awui wa mindo wa dieyanelo.” (1 Kɔrɛtɔ 6:18) Sakura akalɔmbɛ Nzambi dia nde mbosha wolo ndo nde akonge l’akoka wa ntshika mbekelo ka kɔlɔ kɛsɔ. Koko nde akatetemala ndɔshana la ehemba wakoyɛka mbala la mbala. Nde mbutaka ate: “Etena kandjelɛ tokanyi ta kɔlɔ t’awui wa mindo, dimi mbitɛka Jehowa la losembwe tshɛ lo dɔmbɛlɔ lo mbeya dia hakoke ndɔsha dui sɔ dimɛ. Wolo wele la dɔmbɛlɔ wakakotola dia dimi monga suke suke la Jehowa.” L’ɛnyɛlɔ ka Sakura, miliyɔ y’anto yekɔ lo mbeka dia mbeya Nzambi. Nde ekɔ lo mbasha wolo wewɔ la wɔ ohomba dia vɔ nsala etshikitanu lo nsɛnɔ yawɔ ndo nsɛna lo yoho yawɔngɛnyangɛnya.—Filipɛ 4:13.

Etena tshɛ kayoyotalekaka mbeka awui wendana la Nzambi ndo mbeeya dimɛna dimɛna, mbayoyoleka ‘mbeyama le Nzambi’ oko ɔngɛnyi wele la nɛmɔ efula. (Ngalatiya 4:9; Osambo 25:14) Oma laasɔ, wɛ ayonga suke dia ndjɔsɛna l’andja w’oyoyo waki Nzambi. Ko ngande wayonga andja w’oyoyo akɔ ɔsɔ? Sawo diayela diayolembetshiya dui sɔ.

a Jehowa mbele lokombo la Nzambi latanema lo Bible.