Wɛ koka sɛna l’andja w’oyoyo waki Nzambi wa wɔladi — BIBLIƆTƐKƐ WA LO ƐTƐRNƐTƐ wa Watchtower

TSHAPITA 48

Wɛ koka sɛna l’andja w’oyoyo waki Nzambi wa wɔladi

NZAMBI akakitsha Adama nde l’Eva l’ekambɔ k’Ɛdɛna. Kânga mbakiwɔ komonga l’okitanyiya ndo mbakawavu, Nzambi akasale woho w’anawɔ kâmɛ ndo sho ɛlɔ kɛnɛ sɛna pondjo pondjo lo Paradiso. Bible ndakaka ɔnɛ: “Antu w’ololo wayukita kete, way[ɔsɛna]ka loko pundju.”—Osambu 37:29.

Bible tɛkɛtaka dikambo dia “ulungu w’uyuyu” ndo dia “kete y’uyuyu.” (Isaya 65:17; 2 Petero 3:13) “Ulungu” wa nshi nyɛ kɛdikɛdi mandji y’ana w’anto, koko Yeso Kristo nde la wanɛ wayolɛ la nde l’olongo mbayonga “ulungu w’uyuyu.” Ayonga mɛtɛ dimɛna efula lam’ayolɛ “ulungu w’uyuyu” ɔsɔ nkɛtɛ k’otondo! Lowandji laki Nzambi la losembwe lɔsɔ mbayela wɔladi!

Ko lâsɔ, ele “kete y’uyuyu” na?. . . “Kete y’uyuyu” ayonga anto w’ɔlɔlɔ woka Jehowa ngandji. Wɛ pombaka mbeya dia lam’atɛkɛta Bible dikambo dia “kete,” dikambo sɔ nembetshiyaka mbala mɔtshi anto wasɛna la nkɛtɛ, koko aha okama wa nkɛtɛ. (Etatelu 11:1; Osambu 66:4; 96:1) Ɔnkɔnɛ, anto wakenga “kete y’uyuyu” wayɔsɛna lanɛ la nkɛtɛ.

Etena kɛsɔ andja wa nshi nyɛ w’anto wa kɔlɔ ɔnɛ hawotonga nto. Ohɔ dia Mvula k’Elola ka lo nshi ya Nɔa akalanya anto wa l’andja wa kɔlɔ wa l’etena kɛsɔ. Ndo oko wambotodieka, andja wa nshi nyɛ wa kɔlɔ ɔnɛ wayolanyema lo Aramangɛdɔna. Ɛsɔ tende kakianɛ woho wa lɔsɛnɔ layonga l’andja w’oyoyo waki Nzambi l’ɔkɔngɔ wa Aramangɛdɔna.

Onde wɛ nangaka sɛna pondjo pondjo lo Paradiso ka l’andja w’oyoyo waki Nzambi?. . . Ndoko dɔkɔtɛlɛ diakoka sala dia sho sɛna pondjo pondjo. Ndoko dimuka di’okanga diakoka toshimba di’aha sho mvɔ. Yoho tshɔi yakokaso sɛna pondjo pondjo ele ndjasukanya otsha le Nzambi. Ombetsha a Woke totɛka woho wa sala dui sɔ.

Tɔshi Bible yaso ndo tofole lo Joani tshapita 17, divɛsa 3. Lo divɛsa nɛ, Ombetsha a Woke mbutaka ate: ‘Lɔsɛnɔ la pondjo lɔnɛ, wêke dia keya wɛmɛ, Nzambi ɔtɔi ka mɛtɛ ndo Yeso Kristo ɔnɛ lakayatome.’

Lo ndjela kɛnɛ kata Yeso, ahombaso sala dia sho sɛna pondjo pondjo na?— Ntondotondo, sho pombaka kondja ewo ka Shɛso lele l’olongo Jehowa ndo k’Ɔnande lakakimɔ lɔsɛnɔ lande dikambo diaso. Kɛsɔ nembetshiyaka dia sho pombaka mbeka Bible. Dibuku nɛ: Etshama oma le Ombetsha a Woke, tokimanyiyaka dia sala dui sɔ.

Ko ngande wele mbeka awui wendana la Jehowa ayotokimanyiya dia sho sɛna pondjo pondjo na?. . . Oko weso l’ohomba wa diangɔ dia ndɛ lushi tshɛ, mbeso ndo l’ohomba wa mbekaka awui wendana la Jehowa lushi tshɛ. Bible mbutaka ɔnɛ: ‘Onto hahombe sɛna tsho la diangɔ dia ndɛ, koko ndo l’ɛtɛkɛta tshɛ watomba oma l’onyɔ waki Jehowa.—Mateu 4:4.

Ekɔ nto ohomba sho kondja ewo k’awui wendana la Yeso Kristo nɛ dia Nzambi akatome Ɔnande ɔsɔ dia ndjotonyɛ pɛkato yaso. Bible mbutaka ɔnɛ: “Panda kema le untu ukina.” Ndo Bible mbutaka nto ɔnɛ: “One letawo Ona, eko la lumu la pundju.” (Etsha 4:12; Joani 3:16) Lâsɔ, ‘monga la mbetawɔ le Yeso’ kɛdikɛdi na?. . . Dui sɔ nembetshiyaka dia sho mɛtɛ mbetawɔka Yeso ndo mbeyaka dia sho hatokoke sɛna pondjo pondjo naka aha nde. Onde sho mbetawɔka dui sɔ?. . . Naka eelo, kete tayotetemala la mbetshama oma le Ombetsha a Woke lushi tshɛ, ndo tayosalaka kɛnɛ katande.

Yoho mɔtshi ya dimɛna ya mbetshama oma le Ombetsha a Woke ele mbadiaka dibuku nɛ mbala la mbala ndo mendaka ndo kanaka yimba l’esato tshɛ wele lɔkɔ. Oma lâsɔ, ko wɛ menda kana wɛ koka kadimola lo wembola wele l’esato akɔ. Ndo nto adiaka dibuku nɛ wɛ la papa kana wɛ la mama kayɛ. Naka aha wɛ l’ambutshi ayɛ mbadjasɛ, kete adia wɛ l’opalanga okina ndo l’ana akina. Kema ayonga dui dia dimɛna efula naka wɛ kimanyiya anto akina dia vɔ mbetshama oma le Ombetsha a Woke dia vɔ mbeya kɛnɛ kahombawɔ sala dia sɛna pondjo pondjo l’andja w’oyoyo waki Nzambi?—

Bible totɛka ɔnɛ: ‘Andja ɔnɛ wekɔ lo teete.’ Koko oma lâsɔ, Bible nembetshiyaka woho wakokaso sɛna pondjo pondjo l’andja w’oyoyo waki Nzambi. Tɔ mbutaka ɔnɛ: “Keli one latutshaka lulangu la [Nzambi], atuyalaka pundju.” (1 Joani 2:17) Lâsɔ ngande wakokaso sɛna pondjo pondjo l’andja w’oyoyo waki Nzambi na?. . . Ele lo kondja ewo ka Jehowa ndo k’Ɔnande la ngandji, Yeso. Koko sho pombaka nto kamba la kɛnɛ kekaso. Wekelo ayɛ wa dibuku nɛ wakokimanyiya dia wɛ sala awui asɔ.

[Kiombo ya lo lɛkɛ 251]

Lam’adiayɛ Isaya 11:6-9 ndo Isaya 65:25, wɛ koka mɛna woho wayɔsɛna waa nyama lo wɔladi. Ohenda esato ɛnɛ. Ohenda woho wele ɔn’ɔkɔkɔ, ɔna mbudi, nkɔi, ɔna ngɔmbɛ, kimbwe ka woke, ndo ɔna dikɛnda kâmɛ. Onde wɛ koka mbuta nkombo ya nyama kina yele lanɛ yatɛkɛta Bible?. . . Ohenda nganɛ wakɛnya ɔna ongo l’olui welɛwɔ kɔbra! L’andja w’oyoyo, ndoko layohomba mboka wɔma. (Hosea 2:18) Akanyiyayɛ lo dikambo sɔ?. . .

[Kiombo ya lo lɛkɛ 252, 253]

Kakianɛ ohenda wɔladi wele lasa anto wa weho tshɛ. Vɔ tshɛ wekɔ la ngandji lam’asawɔ, oko wakatatshi Yeso di’ambeki ande wayokana ngandji. (Joani 13:34, 35) Wayokonya ekoma walɔwɔ ata dihomɔ dia kambaka nkɛtɛ. Bible tɛkɛtaka dia wɔladi wa diambo ndo lotui tshitshi layonga l’anto l’andja w’oyoyo waki Nzambi. Sho koka mbadia awui asɔ l’avɛsa wele oko Osambu 72:7; Isaya 2:4; 32:16-18; ndo Ezekiyele 34:25.

Ohenda anto wele lo dikatshi nɛ. Vɔ wekɔ lo nɔngɔsɔla nkɛtɛ ndo wekɔ lo kietɛ dihole dia dimɛna efula. Ohenda luudu la dimɛna lakawɔ ndo elowa tshɛ w’amɛna ndo akatshikatshi watɛnyawɔ lanɛ. Anto hawoyolanya nkɛtɛ nto, ɔnkɔnɛ tɔ kambokoma paradiso oko ekambɔ k’Ɛdɛna. Sho koka mbadia awui wa diambo efula asɔ l’Osambu 67:6; 72:16; Isaya 25:6; ndo 65:21-24; Ezekiyele 36:35.

[Kiombo ya lo lɛkɛ 254]

Oko wɛnayɛ lanɛ, onto tshɛ ekɔ la demba dia dimɛna ndo ekɔ l’ɔngɛnɔngɛnɔ. Anto koka fumbɔfumbɔ oko mpele. Ndoko onto lele etshumbe, tshungu kana la hemɔ. Ndo ohenda anto anɛ wambolɔ oma lo nyɔi! Bible tɛkɛtaka awui asɔ lo Isaya 25:8; 33:24; 35:5, 6; Etsha 24:15; ndo Enyelo 21:3, 4.