Tshapita 1
Loseno la Pondjo Kema Dɔ di’Anyanya
1, 2. Lande na kele eko wolo mbetawo one anto kokaka monga la loseno la pondjo ndo l’ongenongeno la kete na?
ONGENONGENO la kete—hakoke tshama kânga yema. Hemo, lotshundu, ndjala, ndo odakanelo—oko akokaso shila paka awui aso ato—shishaka ongenongeno wa la kete. Ondo mbala motshi we kokaka mbuta wate: teketa dikambo dia monga la loseno la pondjo lo paradiso ka la kete eko oko ndjadiha washo di’aha mena akambo wa mete. We kokaka mena di’oko eko wetshelo a wenya mboditeketa ne dia dɔ di’anyanya mbedio.
2 Mete, anto efula kokaka kana laye woho oso. Ko bonde k’etawoso l’ololo tshe one kokaka we monga la loseno la pondjo lo paradiso ka la kete na? Lande na k’etawoso one loseno la pondjo kema dɔ di’anyanya na?
LANDE NA ETAWOSO
3. Kakona k’enya one Nzambi nangaka di’anto monga l’ongenongeno la kete na?
3 Sho mbetawoka ne dia, Nzambi Kanga-Wolo-Tshe akalongosola kete woho wa ngenyangenya anto l’ehomba awo tshe. Kete yakatongama kokele dia dikambo diaso! Ndo nde akatonge pami la womoto woho w’olowanyi dia vo ngenangena ndo monga la loseno la pondjo—la kete.—Osambu 115:16.
4. Lo ndjela wekelo w’akanga a diewo dia demba di’onto, kakona k’enya one dio diakatongama woho wa monga la loseno la pondjo na?
4 Akanga wa diewo suyaka one: demba di’onto mbolôlɔka doameme. La diambo di’efula, tenyi dia demba di’evusu kana tɔtshɔngu ta lo demba tambolemba tohenamaka oma le tokina t’eyoyo endaka ohomba weko. Ndo menamaka dia otshelo oso wa ndjaololɔ ka demba akahombe tetemala la tshama pondjo pondjo. Koko, aha osoku mbatshama, ndo dikambo so kumiyaka ewo k’akanga a diewo. Watadja dia mboka hwe lande na kele anto komaka esombe. Onkone mbatawo voate: naka akambo tshe nongoswama dimena, kete anto wayokoka sena pondjo pondjo.—Osambu 139:14.
5. Kakona kata Bible dikambo di’oyango waki Nzambi lo kene k’endana la kete?
5 Onde mete oyango waki Nzambi eko di’anto wônge la loseno la pondjo ndo l’ongenongeno la kete? Endaka osoku, kete loseno la pondjo kema dɔ di’anyanya—eko dikambo dia mete diayotshama! Ko kakona kata Bible, dibuku ne diele la eyango waki Nzambi dia dikambo so na? Dio mbutaka dikambo diaki Nzambi, “[Okengi wa kete ndo One lakayisale, NW]” ate: “Ndi kakayishikike; Ndi kuyitunga utungatunga, Keli akayitungi dia antu mbidjase loko!”—Isaya 45:18.
6. (a) Akambo a woho akona watshama ɛlɔ kene la kete na? (b) Onde woho oso mbakalange Nzambi dia yo ndjala?
6 Onde we menaka wate kete yambolola kakiane lo ndjela woho one wakalongosola Nzambi dia yo ndjala? Mete, anto weko lo sena l’ahole suke la tshe wa la kete. Ko onde anto wasenako kame l’ongenongeno oko nkumbo otoyi lo ndjela woho one wakalongosola Otungi awo dia dikambo diakiwo? Ɛlɔ kene, andja waya tenyi tenyi. Lohetsho lambotana dihole. Odakanelo ambekama l’atei. Ata weko. Efula ka miliyo y’anto weko la hemo ndo la ndjala. Akina weko l’okiyanu wa lushi la lushi dia kondja luudu la ndala, olimu kana ekimanyielo. Akambo aso tshe hawongenyangenya Nzambi kânga yema. Lo mete, kete yatalole lo ndjela woho one wakalongosola Nzambi Kanga-Wolo-Tshe dia yo ndjala.
7. Oyango akona waki la Nzambi etena kakandatonge anto ahende wa ntondo na?
7 L’okongo wa nde tonga atshukani ahende wa ntondo, Nzambi akâkitsha lo paradiso ka la kete. Lolango lakinde aki dia vo ngenangena lo loseno lane la kete pondjo pondjo. Oyango ande otsha le wo aki dia vo nanula paradiso kakiwo polo ndo lo kete k’otondo. Dikambo so menamaka oma l’okende akandawasha one: “Nyuyali la diwutshi, nyufulaneli, nyuludia kete, nyuyûleli.” (Etatelu 1:28) Eelo, oyango waki Nzambi aki dia, l’edjedja ka wonya, kete k’otondo koma la tshina di’elombwamelo ka nkumbo k’anto w’ololo, wadjase kame, la woladi ndo l’ongenongeno.
8. Lande na kahombaso suya one oyango waki Nzambi kotshikitana kânga mbakôtombokwe anto ahende ntondo na?
8 Kânga mbele atshukani ahende wa ntondo wakatombokwe Nzambi, dikambo diakenya dia takawasungana monga la loseno la pondjo, oyango waki Nzambi w’etatelo kôkadimo. Wayokotshama! (Isaya 55:11) Onkone mbalaka Bible ate: “Antu w’ololo wayukita kete, wayudjaseka loko pundju.” (Osambu 37:29) Bible totɛka tena efula dikambo dia tɛdiko tele la Nzambi woho wa mbisha ekambi ande loseno la pondjo.—Joani 3:14-16, 36; Isaya 25:8; Enyelo 21:3, 4.
SHO KOMBOLAKA MONGA LA LOSENO—LENDE NA?
9. (a) Kakona kakombola anto mete na? (b) Kakona kalanga nembetshiya Bible lam’atama loko one: ‘Nzambi akadje kanyi ya pondjo l’etema awo’ na?
9 Mete sho kokaka ndjala l’ongenongeno ne dia oyango waki Nzambi ele dia sho monga la loseno la pondjo. Ohotokokanyiya yema di’oko we mbahomba shikike, lushi lakona layohomba sonola dia we mvo na? We hôkoka sonola ndoko lushi otoyi, kema osoku oka? We halange mvo, woho ako wame mbele ndoko onto okina lakanyiya ndo lele la demba dia wolo lakoka mbetawo dikambo so. Nzambi akatotonge la saki ka monga la loseno koko aha la saki ka mvo. Lo ndjela woho one wakatongama onto oma le Nzambi, Bible mbutaka ate: “Nde akadje kanyi ya pondjo l’otema [ande].” (Ondaki 3:11, Segond) Dikambo so alangadio nembetshiya na? Dio nembetshiyaka dia anto kombolaka monga paka la loseno, koko aha dia mvo. Omaloko mbele dia talola osenelo, anto watotshakaka la weolo awo tshe dia tshikala elongolongo pondjo.
10. (a) Lende atolangaka onto monga la loseno la pondjo na? (b) Bonde kahombaso mbetawo one Nzambi ayetɛ akambo wodu woho wa sho monga la loseno la pondjo la kete na?
10 Lende akombola anto dia monga la loseno la pondjo na? Lane la kete oko ele mbekelo kakiwo. Onto akatongama dikambo dia kete, ndo kete dikambo di’onto. (Etatelo 2:8, 9, 15) Bible mbutaka ate: “We [Nzambi] akashikike kete lu dikitshelu diayo, Diako mbahayasukasukaki pundju.” (Osambu 104:5) Lam’ele kete yakatongama dia ndjala pondjo, onto lawo nto akahombe monga la loseno la pondjo. Mete Nzambi ka ngandji kotonga anto la saki ka vo monga la loseno la pondjo loto aha la sala woho omotshi wa saki kako kotshama!—1 Joani 4:8; Osambu 133:3.
WOHO WA LOSENO LAKOMBOLAYE
11. Kakona kata Bible dia menya one anto wayokoka monga la loseno la pondjo ndo l’alemba a wolo na?
11 Ohotokenda dikatshi diayela dingo. Woho akona a loseno langenangena anto ane na? Onde we kombolaka monga oko omotshi a l’atei awo? Eelo, osoku mbayota! Ohenda woho ongo w’ekewo elongolongo ndo l’alemba w’okolonganu! Naka vo kotɛ one anto ane kama wewo ango deko ko deko di’enonyi, onde w’ayokoka mbetawo ondo? Bible toteka dia: esombe w’anto wayokalola elongolongo nto, akanga a hemo wayokalangana ndo akanga wa tshumbe, totshungu, akanga a poke ndo nyumi wayokono. Etena kakinde la kete, Yeso Kristo akasale ahindo efula wa konola hemo y’anto. Lo sala akambo aso, nde akenya woho akona wele, lo etena ka lotombo kene kaya suke, alemba w’olowanyi wayokaloyama nto le anto tshe wayonga la loseno.—Jobo 33:25; Isaya 33:24; 35:5, 6; Mateu 15:30, 31.
12. Akambo akona w’enaso l’esato ene?
12 Ohenda woho w’ekambo ka dimena efula kene! Lo ndjela daka diakasha Kristo, to keko mete paradiso kofonyi la kene kakashisha akanga w’ohedia wa ntondo, pami la womoto. (Luka 23:43) Woladi ndo diokanelo tanemaka loko. Weoho w’anto tshe—Edima, Asungu, Ndɔɔndɔ—wasenako oko nkumbo otoyi. Oyadi kânga nyama yeko lo woladi. Enda woho ongo wakenya ona nde la tambwe. Ndoko engo kahomba mbûkiya woma. Dia dikambo diako mbata Otungi ate: “Koi la ona mbudi wayetama kame. osongo wa ngombe, tambwe, la elungalunga ka wata wayuyala kame, ku kiendakenda ayuyilombola. . . . Tambwe ayole nengese oko ngombe. Ona laloma ayokenya lasuki la ushu wa tshuha.”—Isaya 11:6-9.
13. Akambo akona wayonyema la kete etena kayokotshama oyango waki Nzambi na?
13 Lo paradiso kene kambolaka Nzambi dikambo di’anto, weoho w’akambo efula wahomba mbela ongenongeno wayoyala. Kete yayongonya diango efula di’amena dia ndɛ. Ndoko onto layotata ndjala nto. (Esambu 72:16; 67:6) Ata, odakanelo, akambo w’osehe, lohetsho kame ndo lokaki hawonga nto. Eelo, etshelo eso wayonyema pondjo! (Esambu 46:8, 9; 37:9-11) Onde we mbetawoka dia osoku mbayosalema akambo aso tshe?
14. Kakona kakosokoya dia we mbetawo one Nzambi ayokumiya asui tshe na?
14 Tênde yema: otondonga we eko la wolo, onde totoyoshidiya awui ane wa sokisha anto? Totoyêla akambo ane wakombola otema w’onto? Mete, osoku mbotoyosala. Woho ako wame mbayosala Sheso ka ngandji le l’olongo. Nde ayokotsha ehomba aso tshe ndo kene kakombolaso ne dia, Osambu 145:16 mbutaka dikambo diaki Nzambi ate: “We atukhukulaka lunya laye, atulutshaka engo tshe keli la lumu.” Ko etena kakona kayotshama akambo aso na?
ETSHOKO A WEKE EFULA WAYA SUKE
15. Ekomelo k’andja ayondolembetshiya (a) le kete? (b) le anto wa kolo? (c) le wane wa ntsha lolango laki Nzambi?
15 Dia kete kondja etshoko eso, Nzambi akalake dia minya kolo ndo atshi w’akambo wa kolo. Koko l’etena kako kame, nde ayokoke ekambi ande ne dia, Bible mbutaka ate: “Andja one lo tete kame la saki yawo, koko one la ntsha lolango la Nzambi ayotshikala pondjo.” (1 Joani 2:17, NW) Nde otshikitanelo wayoyala lee! Ekomelo k’andja halembetshiya one ayoyala ekomelo ka kete yakiso nye. Koko, oko wakatshama lo Mvula k’elola k’andja w’otondo lo nshi ya Noa, ayonga paka elanyelo k’anto wa kolo kame la mboka nye yatotombaka êko ka nseno yawo. Koko ekambi a Nzambi wayoka. L’etena kako, vo wayotomba oma lo lohombo l’anto wakawaenyaka paa, wayodjase la kete nye yayoyala pudipudi.—Mateu 24:3, 37-39; Tokidi 2:21, 22.
16. Akambo akona wakewoma edja la ntondo lo kene k’endana la nshi y’ekomelo na?
16 Koko, anto amotshi wayokoka mbuta voate: ‘akambo weko lo taleke fukutana. Woho akona wayotokoka ndjashikike one otshikitanelo a woke waya suke na?’ Yeso Kristo akewoya edja la ntondo akambo ane wakahombe ambeki ande sedingola dia vo mbeya etena kene kayohomba Nzambi kumiya andja. Yeso akate dia: nshi y’ekomelo ka dikonge di’etena kene yayenama oma lo ata a weke, ndjala, adidimu a weke wa kete, edelo k’akambo wa kolo ndo kema mbokana ngandji. (Mateu 24:3-12) Bible akakotsha nto ate: “Lu nshi y’ekumelu, tena dia wulu diayuyala.” (2 Timote 3:1-5) Onde aha akambo ako wa ngaso mbɛnaso nshi nye?
17. Anto amotshi wakanyiya akawate di’akambo w’eta nshi nye na?
17 Anto efula weka akambo w’endana l’andja one weko lo mbuta dia ofukutanu omotshi lo nongoswama. Ofundi wa jurunale Herald la Miami (U.S.A.), akafunde ate: “Onto tshe lele la lomba l’ololo kokaka tshumanya weho w’akambo tshe wambosalema lo ndjela enonyi tshitshe wambeta ene ko mena dia andja one ambokolo dihondo. . . . Seno y’anto yeko lo wâle wa wolo.” Woho ako wame mbakate kânga Lewis Mumford, ofundi omotshi w’ose Amerike ate: “Oshidimikoelo w’eko lo talana. Pondjo pondjo. . . . Nshi ya ntondo, etena kakahandjoka oshidimikwelo omotshi, dikambo so diakendanaka paka l’oshidimikwelo ako voameme. . . . Koko nshi nye, lam’ele wedja tshe lo kimane lam’asawo oma lo woho wasambiyanawo akambo, ofukutanu w’oshidimikwelo a wodja otoyi, ayokadja andja w’otondo wâle.”
18. (a) Akambo w’eta nshi nye enyawo dia nshi yayaye na? (b) Kakona kayohena weoho a mandji tshe yele nshi nye na?
18 Akambo weta nshi nye l’andja one menyaka dia teko lo sena lo etena kahomba dikonge di’otondo di’etena k’akambo wa nshi nye nanyema. Eelo, kema edja nto, Nzambi ayolanya wane watolanyaka kete. (Enyelo 11:18) Nde ayolanya weoho a lowandji tshe lele nshi nye dia lowandji lakinde l’ololo l’ôle kete k’otondo. Dia lowandji la Diolelo diako mbakalakanya Yeso ambeki ande dia vo nombaka.—Danyele 2:44; Mateu 6:9, 10.
19. Naka sho nangaka monga la loseno la pondjo, kakona kahombaso ntsha na?
19 Naka we nangaka monga la loseno la pondjo la kete nye yayolombwama oma le Nzambi, kete pombaka we nyanga aha la tshimbatshimba woho wa kondja diewo dia mete di’endana la Nzambi, l’eyango ande ndo di’endana la kene katolombande. Lo disambe diakinde otsha le Nzambi, Yeso Kristo akate ate: “Loseno la pondjo lone: wêke dia nkeya, wememe Nzambi otoyi ka mete, la Yeso Kristo, lakayatumi.” (Joani 17:3, NW) Nde ongenongeno wele laso dia mbeya one sho kokaka monga la loseno la pondjo—ndo di’one lɔ kema dɔ di’anyanya lee! Koko dia sho kondja otshoko a dimena w’ongenongeno w’oma le Nzambi oso, sho pombaka mbeka woho wa mbeya ondoshi one wayanga woho wa tohombiya otshoko ako.
[Diombwɛlo di’osato wa lo lɛkɛ 9]
Onde ngane mbakalange Nzambi ate andja kawônge?
[Full-page picture on page 11]