Onde Ɛmɛnyi wa Jehowa wekɔ l’ɛlɛmbɛ wendana la diembwanelo?

Ɛmɛnyi wa Jehowa mbetawɔka di’atɔndɔ ndo ɛlɛmbɛ wele lo Bible koka tokimanyiya dia mbɔsa tɛdikɔ tangɛnyangɛnya Nzambi ndo tayotokondja wahɔ. (Isaya 48:17, 18) Sho bu lo kiɔkɔ y’ɛlɛmbɛ ndo atɔndɔ asɔ, koko sho kambaka la wɔ lo nsɛnɔ yaso. Tende woho wɔtɔnɛ atɔndɔ ndo ɛlɛmbɛ ɛmɔtshi la diembwanelo.a

• Diwala diekɔ dimama diahomba ntshikala pondjo. (Mateo 19:6) Lam’ele Ɛmɛnyi wa Jehowa mbɔsaka diembwanelo oko dui di’ohomba diakonya lo diwala, vɔ hawodiɔsɛ oko sawosawo.

• Paka anto waya l’ɛnɔnyi wakoka tshukana mbakoka membwana. Anto asɔ pombaka ndekanya ‘ɛnɔnyi wa dikɛnda,’ mbuta ate etena konga nsaki ya dieyanelo wolo efula.​—1 Kɔrɛtɔ 7:​36.

• Wanɛ wembwana pombaka monga anto wele la lotshungɔ la tshukana. Anto amɔtshi wadiaka diwala laka lɛɛta, lo washo wa Nzambi, vɔ bu la lotshungɔ la ntshuka kana tshukama, nɛ dia lo ndjela atɔndɔ ande awui wa mindo wa dieyanelo mbele ɔkɔkɔ ɔtɔi wakoka diwala ndjakema.​—Mateo 19:9.

• Bible mbidjangɛka Okristo walanga tshukana dia nsɔna paka onto lele la dietawɔ diaamɛ la nde. (1 Kɔrɛtɔ 7:​39) Ɛmɛnyi wa Jehowa shihodiaka ɔnɛ didjango sɔ hadiɔtɛkɛta di’onto lalɛmiya tsho dietawɔ diaso, koko di’onto lele la dietawɔ diaamɛ la so ndo lele Ɔmɛnyi wa Jehowa wambobatizama. (2 Kɔrɛtɔ 6:​14) Nzambi okodjangɛka atɛmɔdi ande dia ntshuka kana tshukama paka l’onto lele la dietawɔ diaamɛ la so. (Etatelo 24:3; Malaki 2:​11) Didjango sɔ diekɔ dimɛna lo ndjela anyangiyangi wa nshi nyɛ.b

• Ana pombaka nkitanyiya ambutshi awɔ. (Tokedi 1:8; Kɔlɔsayi 3:​20) Le ana wodjashi l’ambutshi awɔ, didjango sɔ mendanaka ndo la nkitanyiya tɛdikɔ t’ambutshi awɔ lo kɛnɛ kendana la diembwanelo. Dui sɔ mendanaka ndo l’ɛnɔnyi wahomba ɔna la pami kana la womoto monga la wɔ dia ntatɛ membwana ndo awui wayowowaetawɔ dia nsala.

• Lo ndjela ɛlɔmbwɛlɔ kasha Afundelo, Ɔmɛnyi wa Jehowa tshɛ ndaamɛ mbasɔna dia ntatɛ membwana ndo la onto akɔna. Dui sɔ mbɔtɔnɛka la tɔndɔ diata ɔnɛ: “Onto l’onto ayɛmba wotsho ande hita.” (Ngalatiya 6:5, nɔtɛ) Koko lo kɛnɛ kendana la diembwanelo, anto efula mɛnyaka dia vɔ wekɔ la lomba lo nyanga alako oma le Ɛmɛnyi wa Jehowa wambotshunda lo nyuma waakombolɛ kɛnɛ kele ɔlɔlɔ.​—Tokedi 1:5.

• Ditshelo efula diasalema l’etena ka diembwanelo diekɔ etondo wa pɛkato ya weke. Ɛnyɛlɔ, Bible todjangɛka dia mbewɔ awui wa mindo wa dieyanelo. Dui sɔ hadiendana tsho la dieyanelo, koko mendanaka ndo l’awui wa mindo wasala anto ahende wahatatshukana, ɛnyɛlɔ, minyaminya onto okina lo tenyi dia demba dia diwutshi kana nsala dieyanelo dia l’onyɔ kana dia l’odingi. (1 Kɔrɛtɔ 6:​9-​11) La ntondo ka tshukana, ditshelo dionyiya nsaki ya dieyanelo oyadi diɔ hadiokonyisha l’awui wa mindo wa dieyanelo, diekɔ “akambo wa mindo” wahangɛnyangɛnya Nzambi. (Ngalatiya 5:​19-​21) Bible tonaka ndo asawo wa mindo, mbuta ate “ɛtɛkɛta wa nsɔnyi.”​—Kɔlɔsayi 3:8.

• Otema, mbuta ate lonto laso la l’etei lekɔ lokeso. (Jɛrɛmiya 17:9) Vɔ koka konya onto dia nsala akambo weyande dia wekɔ kɔlɔ. Dia mbewɔ di’aha etema awɔ mbanganyiya, anto ahende wembwana koka mbewɔ dia monga vɔamɛ l’ahole wakoka mbakonya l’ohemba. Vɔ koka nsɔna dia mbɔsa tɛdikɔ dia mongaka l’olui w’anto kana monga l’onto latshindɛ. (Tokedi 28:26) Akristo w’enyemba wayanga elonganyi shihodiaka waale waya lo membwana lo tshimbo y’Ɛtɛrnɛtɛ, djekoleko waale wa monga la diɔtɔnganelo l’onto lahayeye dimɛna.​—Osambo 26:4.