ƆKƆNDƆ 78
Efundelo ka la lonya l’ehele
KAKƆNA kambotomba lanɛ na? Anto wekɔ lo difɛstɔ dia woke. Nkumekanga ka Babilɔna akelɛ anto ande wa weke kinunu. Vɔ wakɔshi akɔhɔ wa paunyi la wa fɛsa ndo alɔnga wakɔsama oma lo tɛmpɛlɔ ka Jehowa la Jerusalɛma. Ko la shashimoya, wɛnyi ko pita ya lonya l’onto yambotomba putshu ndo yambotatɛ funda l’ehele. Anto tshɛ wakandama la wɔma.
Bɛlɛshaza, okana waki Nebukadineza mbaki nkumekanga nshi yakɔ. Nde akɔtshiya akanga a tomba ande tshɛ. Nde akate ate: ‘Onto tshɛ layala efundelo kɛnɛ ndo nembetshiyami kitshimudi yatɔ, ayolongola eshasha efula ndo ayoyala ɔlɔhɛ wa sato lo diolelo.’ Koko ndoko kanga lomba ɔtɔi lakakoke mbala efundelo ka l’ehele, kânga mbuta kitshimudi yatɔ.
Nyango nkumekanga akoke londjo ko akɔtɔ lo mbalasa ka dambo. Nde akatɛ nkumekanga ate: ‘Lam’alangɛ, toyakiyanyake ngasɔ. Onto ɔmɔtshi ekɔ lo diolelo diayɛ leya tozambizambi t’ekila. Etena kaki tshɛyɛ Nebukadineza nkumekanga, nde akawetɛ owandji w’akanga a tomba ande tshɛ. Lokombo lande Danyɛlɛ. Etande, kele ayokote kitshimudi yatɔ.’
Kem’edja wakɔtshiya Danyɛlɛ. L’ɔkɔngɔ a nde tona mbɔsa weshasha, Danyɛlɛ akatɛ Bɛlɛshaza lande na kakanya Jehowa tshɛnde le Nabukadineza oma lo nkumekanga. Danyɛlɛ akate ate: ‘Nde aki lotamanya efula. Jehowa akawosha dilanya.’
Danyɛlɛ akatɛ Bɛlɛshaza ate: ‘Wɛ mbeyaka akambo asɔ tshɛ koko ndo wɛ lawɔ ekɔ lotamanya oko aki Nebukadineza. Wɛ akela akɔhɔ l’alɔnga w’oma lo tɛmpɛlɔ ka Jehowa ko wɛ akanɔ lɔkɔ. Wɛ akatombola tojambizambi takasalema l’esongo ndo l’ave, kele wɛ kotombola Otungi a Woke. Diɔ diakɔ diakatome Nzambi lonya dia lɔ ndjofunda awui ango.’
Danyɛlɛ akate ate: ‘Kɛnɛ kofundami tɔ kɛnɛ: MENE, MENE, TEKELE la PARASINA.’
‘MENE kɛdikɛdi Nzambi ambala nshi ya diolelo diayɛ ndo ambodikumiya. TEKELE kɛdikɛdi wɛ ambɛdikama lo kilɔ, ko ambotanema dia wɛ kema la nɛmɔ. PARASINA kɛdikɛdi diolelo diayɛ diamboshama le Ase Mediya la le Ase Pɛrɛsiya.’
Etena kakatɛkɛtaka Danyɛlɛ, Ase Mediya la Ase Pɛrɛsiya wakatatɛ mbɔtwɛ Babilɔna. Vɔ wakahɔtɔla osomba ndo wakadiake Bɛlɛshaza. Efundelo ka la lonya l’ehele kakakotshama ko otsho akɔ wâmɛ! Ko, kakɔna kayokomɛ Ase Isariyɛlɛ na? Kem’edja tayeya, koko ntondo tênde kɛnɛ kakakomɛ Danyɛlɛ.