ƆKƆNDƆ 79
Danyɛlɛ lo difuku dia dimbwe
YEE! Mɛnamaka oko Danyɛlɛ ekɔ lo wâle. Koko dimbwe hadiolumata! Onde wɛ mbeyaka lande na? Akɔna ambodja Danyɛlɛ lanɛ kâmɛ la dimbwe na? Tênde kɛnɛ kakatombe.
Nkumekanga ka Babilɔna ka nshi shɔ lokombo lande Dariyo. Dariyo akalangaka Danyɛlɛ efula nɛ dia nde aki kanga ɔlɔlɔ efula ndo lomba. Dariyo akasɔnɛ Danyɛlɛ dia nde ndjâla owandji ɔmɔtshi a woke lo diolelo diande. Anto akina wakokaka Danyɛlɛ kandjema lo dikambo sɔ, omalɔkɔ enda kɛnɛ kakawasale.
Vɔ wakatshu le Dariyo ko vɔ towotɛ vate: ‘Nkumekanga le, sho tambɛna dimɛna, dia wɛ mbidja ɔlɛmbɛ di’aha ndoko onto tɛmɔla jambizambi kina kana onto okina paka wɛ nkumekanga, l’edja ka nshi 30. Onto tshɛ lahatoyela awui asɔ kakadjemi lo difuku dia dimbwe.’ Dariyo kombeya bonde kakalangaka anto asɔ di’ɔlɛmbɛ wa ngasɔ mbidjama. Nde akafɔnya ate kana lokanyi l’ɔlɔlɔ mbakilɔ, ɔnkɔnɛ nde akafunde ɔlɛmbɛ akɔ lofunda. Lâsɔ ɔlɛmbɛ akɔ kokoka kadimɔ.
Lam’akôke Danyɛlɛ dikambo di’ɔlɛmbɛ akɔ nde akatshu lakande, ndo akalɔmbɛ oko akandasalaka nshi tshɛ. Anto akɔ wa kɔlɔ wakeyaka dia Danyɛlɛ hotshika nɔmba le Jehowa. Vɔ wakangɛnangɛna nɛ dia akɛnama oko lokanyi lawɔ la ndjaka Danyɛlɛ ambokotshama.
Lam’akeye nkumekanga Dariyo bonde kakalangaka anto akɔ mbidja ɔlɛmbɛ ɔsɔ, nde akanyange efula. Koko nde kokoka kadimola ɔlɛmbɛ, ɔnkɔnɛ nde akatome dui dia vɔ mbidja Danyɛlɛ lo difuku dia dimbwe. Koko nkumekanga akatela Danyɛlɛ ate: ‘Lambolongamɛ dia Nzambi kayɛ, kakambɛyɛ, ayokoshimbela.’
Dariyo akanyange heyama, otsho w’otondo nde kondala djɔ. La kɛsɛkɛsɛ nde akalawɔ otsha lo difuku dia dimbwe. Hɛnyi nde lengo. Nde akawelɛ ate: ‘Danyɛlɛ, okambi a Nzambi kasɛna! Onde Nzambi kakambɛyɛ akakoshimbe oma le dimbwe oka?’
Danyɛlɛ akôkadimola ate: ‘Nzambi akatomi ondjelo ande akadihi enyɔ wa dimbwe, ɔnkɔnɛ diɔ hadionumatshi.’
Nkumekanga akangɛnangɛna heyama. Nde akatome dui dia vɔ tondja Danyɛlɛ oma lo difuku. Ko nde akatome dui dia vɔ mbikadja anto wa kɔlɔ wakafunde Danyɛlɛ lo difuku dia dimbwe. Ntondo ka vɔ koma l’ɛse ka difuku, dimbwe diakawande ndo diakatɛtshatɛtsha weka awɔ tshɛ.
Ko Nkumekanga Dariyo akafundɛ anto tshɛ wa lo diolelo diande ate: ‘Lambodjanga dia anto tshɛ pombaka nɛmiya Nzambi ka Danyɛlɛ. Nde akasale ahindo wa weke. Nde akashimbela Danyɛlɛ di’aha dimbwe mbɔ̂lɛ.’