ƆKƆNDƆ 93
Yeso ambolesha anto efula
DIKAMBO dimɔtshi dia diambo mala salema. Joani Obatizanyi oma la ndjakema. Herodiyasi, wadi aki nkumekanga, akôhetshaka. Ndo nde akatshutshuya nkumekanga dia pembola Joani ɔtɛ.
Lam’akoke Yeso dikambo sɔ, nde aki la lonyangu l’efula. Nde akatshu lo dihole dia woshamu ndamɛmɛ. Koko anto wakôyele. Lam’akɛnyi Yeso elui w’anto, nde akawaoke kɛtshi. Ɔnkɔnɛ, nde akawatɛ akambo w’endana la diolelo diaki Nzambi, ndo akakɔnɔla anto awɔ waki la hemɔ.
La dikɔlɔ dia lushi lakɔ, ambeki wakaye oya le nde ko wakawotɛ vate: ‘Wonya ambeta, ko dihole nɛ diɛkɔ dihole dia shɛnga. Toma anto watshu dia vɔ tosomba diangɔ dia ndɛ lo ngelo yosukanyi.’
Yeso akâkadimola ate: ‘Vɔ hawutshu. Nyowasha diangɔ dia ndɛ.’ Yeso akasekesɔ otsha le Filipo ko akawombola ate: ‘Lende akokaso tosomba diangɔ diakoka ndesha anto anɛ tshɛ na?’
Filipo akakadimola ate: ‘Di’onto l’onto ndɛ kânga yema tshitshɛ tsho, pombaka falanga y’efula.’ Andɛlɛ akate ate: ‘Ɔna pami ɔnɛ layatɛmbɛ mma diaso ekɔ l’etande etanu wa mapa la nse hiende. Koko diangɔ sɔ diekɔ yema tshitshɛ efula le anto anɛ tshɛ.’
Yeso akate ate: ‘Nyote anto wadjasɛ l’adiyo.’ Ko nde akɔshi mapa, akakaloya Nzambi losaka, ko akatatɛ la mbata bɛtshi bɛtshi. Ko ambeki wakasha anto tshɛ mapa la nse. Aki apami 5 000 la nunu efula di’amato l’ana wa totshitshɛ. Vɔ tshɛ wakale ndo wakalote. Lam’akatɔngɔna ambeki kɛnɛ kakatshikala, asaka dikumi l’ahende wakalole tɔ!
L’ɔkɔngɔ w’akambo asɔ, Yeso akatɛ ambeki ande dia vɔ mbɔtɔ lo wâto dia tehɔ Ndjale ka Ngalileya. L’otsho akɔ, lɔpɛpɛ la wolo lakapɛpɛ ko asuku wakatatɛ sutshasutsha wâto. Ambeki wakandama la wɔma w’efula. Ko l’atei a deke, wɛnyi ko onto ɔmɔtshi ayakɛndakɛnda lâdiko di’ashi. Vɔ wakade ekoko wa wɔma, nɛ dia vɔ kombeyaka kɛnɛ kakiwɔ lo mɛna.
Ko Yeso akawatɛ ate: ‘Tanyokaki wɔma. Toko dimi!’ Koko vɔ kombetawɔ. Ɔnkɔnɛ, Petero akate ate: ‘Nkumadiɔndjɔ naka wɛ mɛtɛ, ombute dia dimi kɛndakɛnda lâdiko di’ashi oya le yɛ.’ Yeso akôkadimola ate: ‘Yaka!’ Ko Petero akatombe ndo akatatɛ kɛndakɛnda lâdiko di’ashi! Lam’akandoke wɔma, nde akatatɛ la dinda, koko Yeso akôshimbela.
L’ɔkɔngɔ diko, Yeso akayoleshaka nunu di’anto nto. Ndo l’etena kɛsɔ, nde akâlesha l’etande a mapa esambele la yema ya tosese. Ko anto tshɛ wakalote nto. Onde kema dikambo di’ɔngɛnɔngɛnɔ efula dia mɛna woho wakokɛ Yeso anto oka? Etena kayondolɛ oko nkumekanga kakadjama oma le Nzambi, ndoko ɛngɔ kayotohomba!
Mateu 14:1-32; 15:29-38; Joani 6:1-21.