Tshapita 52

Yeso ambolesha nunu di’anto lo dihindo

APƆSTƆLƆ 12 wakasadi lɔkɛndɔ l’ohomba efula lam’akiwɔ lo takindola la Ngalileya dia tâsambishaka. Kakianɛ, l’ɔkɔngɔ wa Joani ndjakema, vɔ wambokalola oya le Yeso ko wamboyɔ̂kɔndɔlɛ awui w’amɛna efula wakawatɛna l’olimu awɔ. Yeso ambɛna ɔnɛ vɔ wambɔlɛmba, ndo vɔ kema l’etena ka ndɛ yangɔ l’ɔtɛ w’ɔkɛlɔkɛlɔ w’anto, ko nde ambowatɛ ate: ‘Nyoyete otsha lo dihole diele ndoko onto kele nyotokotomuya yema.’

Vɔ wambɔtɔ lo wâto, ondo suke la Kapɛrɛnauma, ko wambotshɔ otsha lo dihole dia diɛta, ondo lo lɛkɛ l’ehotwelo ka wonya la Jɔrɔdana, ndekana Bɛtɛsayida. Koko, anto efula wambowaɛna wonya watawatshu, ndo akina wambodioka. Anto asɔ tshɛ wambolawɔ l’ɔkɛngɛ w’ashi ko wambotâkomɛ ntondo.

Lam’otumbinde oma lo wâto, Yeso amboka olui ɔsɔ w’anto kɛtshi lam’owaɛnyinde nɛ dia vɔ wekɔ oko ɛkɔkɔ waha l’olami. Ɔnkɔnɛ, nde ambɔkɔnɔya wanɛ wele la hemɔ l’atei awɔ ndo ambotatɛ mbaetsha akambo efula.

Wonya tetaka esadi esadi, ko ambeki wa Yeso wamboya le nde dia ndjowotɛ ɔnɛ: “Dihuli ne dieko dieta la unya utsha mbidja; ukimo antu ane, vo watshu lu tusamba la lu ngelu ya lasuki, watuyasumbeli mbu ya nde.”

Koko Yeso ambâkadimola ate: “Nyame, nyuwasha mbu ya nde.” Oma lâsɔ, oko weyande kɛnɛ kayangande ntsha, Yeso ambohemba Filipɛ lo mombola ate: “Lendi ayutusumba ma dia antu aku nde?”

Lo kanyi ya Filipɛ, ndoko dikambo diakokawɔ ntsha. Mɛtɛ, ekɔ apami suke la 5 000, naka sho mbadia ndo amato l’ana kete ondo anto wekɔ ndekana 10 000! Filipɛ ambokadimola ate: “Ma dia denariyo kama hyendi [l’etena kɛsɔ, denariyo ɔtɔi akikɔ difuto di’olimu wa lushi l’otondo] hadiukuki dia untu la untu nungula yema.”

Ondo dia nde mɛnya ɔnɛ ndoko kɛnɛ kakokawɔ ntsha dia ndesha lokema l’anto la ngasɔ, Andɛlɛ ambâhola dui ate: “Dikenda dieko lane la ekama etanu wa [mapa, NW], la nsi hyendi. Keli diango ne dieli na l’atei w’antu efula okone?”

Adiyo wekɔ efula, nɛ dia nshi nyɛ yekɔ eleko kamɔnga akatshi, la ntondo ka difɛstɔ di’Elekanelo dia l’ɔnɔnyi 32 T.D. Ɔnkɔnɛ, Yeso ambotɛ ambeki ande dia vɔ mbutɛ anto ɔnɛ wadjasɛ l’elui w’anto 50 la w’anto 100. Nde ambɔsa ekama akɔ etanu wa mapa la nse hiende, ambâlɛ l’olongo ko ambâtshɔkɔla. Ko nde ambotatɛ mbata ekama wa mapa la nkahanya nse. Nde ambosha ambeki ande diangɔ diakɔ ko vɔ wambotatɛ dikahɛ anto. Dikambo dia diambo ko, anto asɔ tshɛ wambɔlɛ ko wambolota!

L’ɔkɔngɔ diko, Yeso ambotɛ ambeki ande ate: “Nyotongone betshi diutshikadi, diaha nduku engo nshisho.” Vɔ wamboditɔngɔna, ko wambolodja asaka 12! Mateu 14:13-21; Mako 6:30-44; Luka 9:10-17; Joani 6:1-13.

▪ Lande na kayangɛ Yeso apɔstɔlɔ ande dihole dia diɛta?

▪ Otsha lende ambotshɔ Yeso nde l’ambeki ande, ndo lande na kahawakoki mumuya?

▪ Ambeki ambowotɛ Yeso dia nde sala lam’ɛnyiwɔ ɔnɛ onya aya dikɔlɔ, ko woho akɔna wambokotsha Yeso ehomba w’anto?