Tshapita 58

Mapa la wodoya

ELUI w’anto wambɔmɔta lale Yeso la Dekapɔli. Efula wakaye oma l’etale oya lo lɛtshi lɔsɔ la nkɛtɛ loludi l’Ase Wedja dia ndjohokamɛ Yeso ndo dia ndjɔkɔnɔ lo hemɔ yawɔ. Vɔ wakaye la tɔsɛndji ta weke, kana asaka watowodjaka diangɔ diawɔ dia ndɛ nshi tshɛ lam’atawatenyanya bɛtshi dia nkɛtɛ diodjashi Ase Wedja.

Koko l’ɔkɔngɔ wa tshanda mɔtshi, Yeso ambelɛ ambeki ande ko ambowatɛ ate: “Dimi lambuka ului one w’antu ketshi, ne dia vo wambutshikala la mi nshi shatu. Vo kema la mbu ya nde. Naka dimi layâkimo utsha la wakawo la ndjala, vo wayutokomo lu mbuka, ne dia amotshi wakayi uma l’etali.”

Ko ambeki wambowombola vate: “Lendi ukuki untu nkundja ekama wa [mapa, NW] lu dihuli ne dia shenga, dia ndutsha antu ane?”

Yeso ambowambola ate: “Ekama engana weli la nyu?”

Vɔ wambôkadimola vate: “Esambeli la tusisi.”

Yeso ambotɛ anto dia vɔ mbidjasɛ l’adiyo, nde ambɔsa ekama wa mapa la nse, ambɔlɔmba Nzambi, ambowâtola, ko ambosha ambeki ande. Ko ambeki wambokahɛ anto, anto akɔ wambɔlɛ ko wambolota. L’ɔkɔngɔ diko, lam’ɔtɔngɔnyiwɔ ehekɔ, vɔ wambolodja asaka esambele, kânga mbakale apami 4 000, kâmɛ ndo amato la ana!

Oma lâsɔ, Yeso ambodianganya elui w’anto, ambɔtɔ lo wâto nde l’ambeki ande ko wambotehɔ otsha lo wedi wa Ndjale ka Ngalileya wa lo lɛkɛ l’edjelo ka wonya. Lam’okumiwɔ lɛkɔ, Afarisɛ l’ase ɔtɛmwɛlɔ wa tshitshɛ welɛwɔ ɔnɛ Asadukɛ, wambohemba Yeso lo mbɔlɔmba dia nde mbaɛnya djembetelo y’oma l’olongo.

Oko weyande ɔnɛ vɔ nangaka pembami, Yeso ambâkadimola ate: “La dikolo, nyu nyatutaka nyati: Ayuyala yanyi, ne dia ulungu weko tilili. La pindju, nyu nyatutaka nyati: Ayuyala tshitshi, ne dia ulungu weko tilili ndu lutshukutshuku. Nyu mbeyaka nshihudia akambu wa l’ulungu, keli hanyeyi nshihudia tulimbitelu ta tena.”

L’etena kɛnɛ, Yeso ambowaelɛ ɔnɛ lɔlɔnga la kɔlɔ ndo la loseka ndo ambotawate oko akandatɛ Afarisɛ la ntondo ɔnɛ ndoko djembetelo yayowowasha, paka djembetelo ya Jɔna. Oma lâsɔ, nde ambomɔ oma lale wɔ, ambɔtɔ lo wâto nde l’ambeki ande ko wambotshɔ otsha la Bɛtɛsayida, lo wedi wa Ndjale ka Ngalileya wa lo nɔrdɛ-ɛsta. Lam’ewɔ l’atei a mboka, ambeki wambɛna ɔnɛ vɔ wakatohe mbela mapa, ko wakaye paka l’okama ɔtɔi oto.

Yeso ambohɔ mbala ka komelo kakandasawola l’Afarisɛ vɔ l’Asadukɛ, l’aseka Hɛrɔdɛ, ko nde ambewola ambeki ande ate: “Nyendi ololo, nyewo edya k’Afarise ndu edya ka Herode.” Mɛtɛ, lam’okiwɔ Yeso atɛkɛta dia wodoya, ambeki ande vate kana nde ekɔ lo tɛkɛtaka dikambo dia woho wakawatohe mapa, ɔnkɔnɛ vɔ wambotatɛ mana lam’asawɔ lo dikambo sɔ. Yeso ambeya ɔnɛ vɔ hawoke kɛnɛ kawatɛnde, ko nde ambowatɛ ate: “Ukundi wadjanyu lundju ne dia nyaha la [mapa, NW]?”

Ambeta ondo lushi ɔtɔi loto kana nshi hiende oma lam’akasha Yeso nunu di’anto mapa lo dihindo. Vɔ pombaka mbeya ɔnɛ aha dia woho wewɔ kema la mapa mbayakiyanyande. Nde ambowaohola ate: “Undi, nyu hanyuho? Lam’akamatula ekama etanu wa [mapa, NW] l’atei w’antu nunu tanu, asaka angana wa betshi dia [mapa, NW] diakatshikala wakanyatongona?”

Ko vɔ wambôkadimola vate: “Dikumi la ahendi.”

“Ndu lam’akamatula ekama wa [mapa, NW] esambeli l’atei w’antu nunu nei, asaka angana wa betshi dia [mapa, NW] diakatshikala wakanyatongona?”

Vɔ wambôkadimola vate: “Esambeli.”

Yeso mbambolande ate: ‘Nyu nyatamane fundo oto? Okonde ahanyashihodia ɔnɛ aha dikambo dia mapa mbanyotɛmi? Koko nyewɔ wodoya w’Afarisɛ la Asadukɛ.’

Wonya ɔsɔ mbamboyoshihodia ambeki ande. Wodoya, mbuta ate ɛngɔ katodoyaka diangɔ dikina ndo katodoyaka kibuku k’ekate, aki tshɛkɛta yakɔsamaka dia mɛnya olanyelo. Kakianɛ, ambeki wambeya ɔnɛ Yeso ekɔ lo kamba la didjidji, dia nde mbatɛ woho wa vɔ mbewɔ ‘wetshelo w’Afarisɛ la Asadukɛ,’ wele la shɛngiya ya kɔlɔ yalanya onto. Mako 8:1-21; Mateu 15:32–16:12.

▪ Lande na kakaye anto la tɔsɛndji ta weke tatowodjaka diangɔ dia ndɛ?

▪ L’ɔkɔngɔ wa nde mumɔ oma la Dekapɔli, lɔkɛndɔ lakɔna lambosala Yeso lo wâto?

▪ Kanyi yakɔna ya wɛngɛngɛ yele l’ambeki lam’otshi Yeso dikambo dia wodoya?

▪ Kakɔna kolangi Yeso mbuta lo tshɛkɛta “edya k’Afarise la Asaduke”?