ƆKƆNDƆ 98

Lo Dikona di’Ewele

YESO ongo ele lo Dikona di’Ewele. Apami anɛi ango wele kâmɛ lande wekɔ apɔstɔlɔ ande. Vɔ wekɔ Andɛlɛ la Petero, onto l’ɔnango ndo Jakɔba la Joani onto l’ɔnango. Hɛnyi tɛmpɛlɔ ka Nzambi ka la Jerusalɛma yema tshalola lengo.

Nshi hiende yambeta oma lam’akahema Yeso lâdiko di’ɔna ponda otsha la Jerusalɛma. Aki lushi la hende. Lushi lɔsɔ, Yeso akatshu otsha lo tɛmpɛlɔ la lɔkɛsɛ. Lɛkɔ, ɛlɔmbɛdi wakahembe mbonda dia mbodiaka. Koko vɔ wakoke wɔma dia sala dikambo sɔ nɛ dia anto wakalangaka Yeso efula.

Yeso akelɛ ewandji w’ɛtɛmwɛlɔ ɛsɔ ate: ‘Nyu nyekɔ elui ndo ana w’elui!’ L’ɔkɔngɔ diko, Yeso akayotaka dia Nzambi ayowasha dilanya l’ɔtɛ wa ditshelo diawɔ dia kɔlɔ. L’ɔkɔngɔ w’akambo asɔ, Yeso akatshu lo Dikona di’Ewele, ko apɔstɔlɔ ande anɛi wakatatɛ la mbôka wembola lɛkɔ. Onde wɛ mbeyaka kɛnɛ kakawambolaka Yeso?

Apɔstɔlɔ waki lo mombola akambo w’endana la nshi yayaye. Vɔ wakeyaka dia Yeso akahombe kumiya akambo wa kɔlɔ tshɛ wele la kɛtɛ. Koko, vɔ wakalangaka mbeya etena kayosalema akambo asɔ. Etena kakɔna kayokalola Yeso dia ndjôlɛ oko Nkumekanga na?

Yeso akeyaka dia ambeki ande wa la kɛtɛ hawotokoka mbɛ̂na lam’ayondokalola. Ekɔ ɔsɔku nɛ dia nde ayonga l’olongo, ɔnkɔnɛ vɔ hawotokoka mbɛ̂na lɛkɔ. Omalɔkɔ, Yeso akakɔndɔlɛ ambeki ande akambo amɔtshi wayosalema la kɛtɛ l’etena kayondotatɛ la mbolɛ oko Nkumekanga l’olongo. Naa akambo amɔtshi wa l’atei w’akambo akɔ na?

Yeso akate dia ata a weke wayonga, anto efula wayotata hemɔ ndo wayɔhɛnyahɛnyama la ndjala, akambo wa kɔlɔ wayofulanɛ, ndo adidimu wa kɛtɛ wa weke wayoyala. Yeso akanyomota nto ate: lokumu l’ɔlɔlɔ la Diolelo diaki Nzambi layosambishama l’ahole tshɛ wa lo kɛtɛ. Onde hatɛnyi akambo asɔ wasalema lo nshi yaso nyɛ? Eelo! Ɔnkɔnɛ, sho kokaka shikikɛ shate: Yeso ambotatɛka la mbolɛ l’olongo. Kem’edja, nde ayokumiya akambo wa kɔlɔ wele la kɛtɛ.

Mateu 21:46; 23:​1-39; 24:​1-14; Mako 13:​3-10.