Yeso ambokalola l’olongo

Yeso akasangana l’ambeki ande la Ngalileya. Nde akawasha didjango di’ohomba efula di’ɔnɛ: ‘Nyotshu, nyetɛ anto w’oma lo wedja tshɛ ambeki. Nyowaetshake akambo wakamanyetsha ndo nyaabatize.’ Ko nde akaalake ate: ‘Nyohɔ dia dimi layongaka la nyu nshi tshɛ.’

L’edja ka nshi 40 l’ɔkɔngɔ wa eolwelo kande, Yeso akɛnama le ambeki ande nkama la Ngalileya ndo la Jɛrusalɛma. Nde akawaetsha wetshelo w’ohomba ndo akasale ahindo efula. Ko Yeso akasangana la apɔstɔlɔ ande mbala k’ekomelo lo Dikona di’esongo w’Ɔlivɛ. Nde akawatɛ ate: ‘Tanyomɔke oma la Jɛrusalɛma. Kanyotetemale nkonga kɛnɛ kakanyolake Papa.’

Apɔstɔlɔ ande koshihodia kɛnɛ kakandalange mbuta. Vɔ wakawombola vate: ‘Onde wɛ ayanga monga nkumekanga k’Isariyɛlɛ etena kɛnɛ?’ Yeso akawatɛ ate: ‘Etena katakoke ka Jehowa konyami nkumekanga. Keema edja nyu nyayolongola wolo wa nyuma k’ekila ndo nyayonga ɛmɛnyi ami. Nyotshu nyotosambisha la Jɛrusalɛma, la Judeya ndo la Samariya polo lo ahole woleki etale wa la nkɛtɛ.’

Oma laasɔ, Yeso akadɛ otsha l’olongo ko dinge diakokombe. Ambeki ande wakatetemala menda otsha l’olongo, koko nde akatshu.

Ambeki wakamɔ oma lo Dikona di’esongo w’Ɔlivɛ ko wakatshu la Jɛrusalɛma. Vɔ wakasanganaka mbala la mbala lo luudu la la diko ndo wakalɔmbaka. Vɔ wakakongaka dia Yeso mbasha ɛlɔmbwɛlɔ kekina.