ƆKƆNDƆ 116
Woho wakokaso kondja lɔsɛnɔ la pondjo
ONDE wɛ kokaka mbuta kɛnɛ kâla yana ya yimato ndjo nde l’angɛnyi ande? Eelo, toko buku nɛ dieyɛ lo mbala—Buku di’Ɛkɔndɔ wa lo Bible. Vɔ wekɔ lo mbala ɔkɔndɔ akɔ wâmɛ weyɛ lo mbala—“Woho Wakokaso Kondja Lɔsɛnɔ la Pondjo.”
Onde wɛ mbeyaka kɛnɛ kewɔ lo mbeka? Ntondotondo, sho pombaka mbeya Jehowa nde la Yeso y’Ɔnande, naka sho nangaka kondja lɔsɛnɔ la pondjo. Bible mbutaka ɔnɛ: ‘Woho wakoka onto kondja lɔsɛnɔ la pondjo v’ɔnɛ. Nde pombaka mbeka dia mbeya Nzambi ɔtɔi ka mɛtɛ, la Yeso Kristo, Ɔnande lakandatome la kɛtɛ.’
Woho akɔna wakokaso mbeka dia mbeya Jehowa Nzambi nde la Yeso y’Ɔnande na? Yoho mɔtshi yakokaso sala dikambo sɔ ele lo mbalaka Buku di’Ɛkɔndɔ wa lo Bible oma l’etatelo polo ndo l’ekomelo. Buku diakɔ tɔkɔndɔlɛka akambo efula w’endana la Jehowa ndo la Yeso, shi mɛtɛ? Ndo diɔ tɔkɔndɔlɛka akambo efula wakawasale ndo akambo wayangawɔ sala nto. Koko sho pombaka sala akambo efula lâdiko dia mbalaka buku nɛ.
Wɛ ekɔ lo mɛna buku dikina diele l’odihe? Toko Bible. Onga l’onto ɔmɔtshi dia nde kâlɛka tenyi di’oma lo Bible diotumbi ɛkɔndɔ wele lo buku nɛ. Bible totɛka akambo efula wele laso ohomba dia sho tshɛ kambɛ Jehowa lo yoho yasungana ndo kondja lɔsɛnɔ la pondjo. Omalɔkɔ, sho pombaka monga la mbekelo ka mbekaka Bible mbala la mbala.
Koko aha ewo k’akambo w’endana la Jehowa Nzambi ndo la Yeso Kristo keto mbele ohomba. Sho kokaka monga l’ewo k’efula k’endana lawɔ ndo la wetshelo awɔ, koko hatotokondja lɔsɛnɔ la pondjo. Onde wɛ mbeyaka dikambo dikina diahombaso sala?
Sho pombaka mbɔtɔnganyiya nsɛnɔ yaso la kɛnɛ kekaso. Onde wɛ akohɔ Judasɛ Isakariyɔtɛ ondo? Nde aki ɔmɔtshi a l’atei w’anto dikumi l’ahende wakasɔnɔla Yeso dia vɔ ndjâla apɔstɔlɔ ande. Judasɛ aki l’ewo k’efula k’akambo w’endana la Jehowa ndo la Yeso. Ko kakɔna kakôkomɛ na? L’ɔkɔngɔ wa tena dimɔtshi, nde akayoyalaka la saki k’okundji ko akayofunga Yeso le atunyi ande l’ekenga wa fɛsa 30. Ɔnkɔnɛ, Judasɛ hatokondja lɔsɛnɔ la pondjo.
Onde wɛ mbohɔka Ngehazi, pami kakateke dikambo diande l’Ɔkɔndɔ wa 69? Nde akalange ndjâla l’ahɔndɔ amɔtshi ndo la falanga yaki kondjala yande. Ɔnkɔnɛ, nde akate kashi dia kondja diangɔ sɔ. Koko Jehowa akawosha dilanya. Ndo nde ayotosha dilanya, ndo sho lawɔ, naka sho hatokitanyiya ɛlɛmbɛ ande.
Koko anto efula wakambɛ Jehowa olimu la kɔlamelo wekɔ. Sho nangaka ndjâla oko vɔ, shi mɛtɛ? Dikɛnda dielɛwɔ Samuɛlɛ ekɔ ɛnyɛlɔ k’ɔlɔlɔ kakokaso ndjela. Ohɔ dia, oko wakatɛnyi l’Ɔkɔndɔ wa 55, nde aki paka l’ɛnɔnyi ɛnɛi kana etanu eto lam’akandatatɛ kambɛ Jehowa olimu lo tabɛrnakɛlɛ. Omalɔkɔ, oyadi dikɛnda diakɔna dieyɛ, wɛ kokaka kambɛ Jehowa olimu.
Mɛtɛ, onto lalangaso ndjela sho tshɛ ko Yeso Kristo. Kânga mbakinde dikɛnda, oko wakatɛnyi l’Ɔkɔndɔ wa 87, nde aki lo tɛmpɛlɔ asambisha akina akambo w’endana la She lele l’olongo. Toyele ɛnyɛlɔ kande. Tewoya anto efula wakokaso mbewoya kɛnɛ k’endana la Jehowa, Nzambi kaso ka diambo ndo l’Ɔnande Yeso Kristo. Naka sho sala akambo asɔ kete tayokondja lɔsɛnɔ la pondjo lo paradiso k’oyoyo kaki Nzambi lanɛ la kɛtɛ.