Tshapita 10
Diolelo “Diahalanyemaki Pundju”
LUSHI la lushi, akambo wasalema l’andja ɔnɛ mɛnyaka hwe ɔnɛ: anto kotana ɔngɛnɔngɛnɔ lam’akawakasha lowandji laki Jehowa dia pemba dia ndjâlɔmbɔla vɔamɛmɛ. Ndoko dikongɛ di’ɛlɔmbwɛlɔ k’anto diakela ɛlɔlɔ le anto tshɛ aha la shɔnɔdi. Kânga mbambohamia anto diewo diawɔ di’akambo lo yɛdikɔ yahatongaka, vɔ hawokoke munola ɛsɔngu ka pɛkato, nɛmbia hemɔ ndo kumiya nyɔi, kânga le onto ɔtɔi la l’atei awɔ. Lo wedi okina, wedja wekɔ lo tetemala la tondja bɔngɛ di’eyoyo dioleki kɔlɔ tshɛ. Akambo wa ngala wekɔ lo tafulanɛ. Diewo dia tshulatshula, lokaki ndo wengengo sanganyema olui ɔtɔi, nanyaka kɛtɛ, ashi ndo hiɛlɛlɛ. Eshinga wa hiale wele lo talemɔ paka nemɔ tsho ndo ohombelo w’olimu wekɔ lo taleke shingana wolo efula lo yɛdikɔ yele efula k’anto wekɔ l’okakatanu dia kondja ehomba wa lo lɔsɛnɔ. Anto waya kema l’elongamelo dia tana okandwelo l’akambo asɔ.—Und. 8:9.
2 Naa okandwelo wele l’akambo asɔ na? Ele Diolelo diaki Nzambi, lo dikambo dia Diolelo diakɔ mbaketsha Yeso ambeki ande dia vɔ nɔmbaka. (Mat. 6:9, 10) Ande lowando lahombaso monga lalɔ lo mbeya ɔnɛ: esambelo kaya suke la ndja oma lo Diolelo diakɔ sɔ lee!
3 Tatɛ oma lo 1914 T.D., Diolelo diaki Nzambi diele l’anya wa Yeso Kristo diambôtatɛka la sala olimu adiɔ.a L’ɔnɔnyi ɔsɔ, akambo wakɛnyi Danyɛlɛ lo ɛnɛlɔ ka pɔlɔfɛsi wakakotshama l’olongo. “Tangu Andja,” Jehowa Nzambi, akasha Ɔn’onto, Yeso Kristo, “luwandji, lutumbu, La diulelu dia antu tshe, wedja, La antu w’eteketa tshe ndjala l’okongo andi.” Lam’akandakɔndɔlaka ɛnɛlɔ kakɔ, Danyɛlɛ akafunde ate: “Luwandji landi, leli luwandji la pundju, lahashilaki. La diulelu diandi, hadiulanyemaki pundju.” (Dan. 7:13, 14) Oma l’ekimanyielo ka Diolelo sɔ mbayosha Nzambi wanɛ walanga losembwe diaaso dia vɔ monganɛ akambo w’ɛlɔlɔ waheyama mbadia wakandasangoya lam’akandakitsha ambutshi aso wa ntondo lo Paradiso.
4 Ambolami wa kɔlamelo wa Diolelo sɔ ndjashaka efula lo dikongɛ ndo l’olimu wasala ɛlɔmbwɛlɔ kakɔ. Vɔ nangaka mbeya kɛnɛ kasalatɔ etena kɛnɛ, la kɛnɛ kayotosala lo nshi yayaye ndo kɛnɛ kalɔmbatɔ oma le wɔ. Vɔ sɛdingolaka dikambo sɔ la yambalo tshɛ, ndo omalɔkɔ, lowando lawɔ otsha lo Diolelo diakɔ lekɔ lo tahame ndo vɔ wekɔ lo pamia akoka wahombama dia nsanyɛ anto akina dikambo di’ɛlɔmbwɛlɔ kakɔ kɛsɔ.—Osam. 48:12, 13.
ƆSƐDINGWELO WAHƐTSHAHƐTSHA ASOLO
5 Ɔtɔi ɔmɔtshi a l’atei w’akambo wa ntondo oko ɔsɛdingwelo wa nganɛ mɛnyaka di’ɔnɛ: Diolelo dia Mɛsiya diekɔ ɛnyɛlɔ ka lowandji laki Jehowa ndamɛmɛ. Nde mbakasha Ɔn’ande “luwandji, lutumbu, La diulelu.” Ɔnkɔnɛ, l’ɔkɔngɔ wa Diolelo sɔ tatɛ la mbolɛ, awui wakokɛma l’olongo wata ɔnɛ: “Diulelu dia la kete nye diambuyala dia Khumesu [Jehowa Nzambi], la dia Kristu kandi. Ndi [Jehowa] ayulela pundju pundju.” (Eny. 11:15) Lɔkɔ mbele, kɛnɛ tshɛ kekaso lo dikambo dia Diolelo sɔ ndo dia kɛnɛ kasaladiɔ tosukanyaka ma ma la Jehowa ndamɛmɛ. Dikambo sɔ toshaka saki ka sho ndjakitshakitsha la tshina dia lowandji lande pondjo.
6 Ande ɔngɛnɔngɛnɔ nɛ dia Jehowa akakitsha Yeso Kristo lâdiko dia kiti ka diolelo dia nde mbolɛ lo lokombo Lande lee! Oko wende Okambi wa Kɔmba wakakambe la Nzambi olimu dia tonga kɛtɛ l’onto, Yeso ndeka mbeya ehomba aso oleki onto tshɛ la l’atei aso. Lâdiko dia kɛsɔ, nde akɛnya ‘ngandji kokande ana w’anto’ oma k’etatelo k’Ɔkɔndɔ w’anto. (Tuk. 8:30, 31; Kol. 1:15-17) Ngandji kande kaki woke efula polo ndo lo yɛdikɔ yakandaye la kɛtɛ ko ndjolambola lɔsɛnɔ lande oko tshungo di’ɔlɔlɔ awɔ. Ɔsɔku mbakandatosha diaaso dia sho tshungɔ oma lo pɛkato la nyɔi, ndo dikoka dia kondja lɔsɛnɔ la pondjo.—Mat. 20:28.
7 Ɔsɔ ekɔ Diolelo dia shikaa, diayotshikala pondjo. Mɛtɛ diɔ diayotshikala pondjo nɛ dia Jehowa hakoke mvɔ. (Hab. 1:12; Osam. 146:3-5, 10) Otshikitanyi la nkumi ya dikanga y’anto, Yeso Kristo, ɔnɛ lakalongola lowandji oma le Nzambi, ndo nde lawɔ hakoke mvɔ. (Romo 6:9; 1 Tim. 6:15, 16) Akina wayosangana la Yeso lo kiti ya diolelo ya l’olongo wayonga anto 144 000, ekambi wa Nzambi wa kɔlamelo wakasɔnwama oma lo “wauhu tshe ndu w’eteketa tshe, Ndu uma lu wehu tshe.” Ndo vɔ lawɔ wakakondja lɔsɛnɔ lahawakokaki mvɔ nto. (Eny. 5:9, 10; 1 Kor. 15:42-44, 53) Lofulo la woke la l’atei awɔ wambotshɔka otsha l’olongo, ndo atshikadi a l’atei awɔ wele la kɛtɛ mbakenga etshumanelo k’“[ɔhɔmbɔ wa kɔlamelo ndo wa kɛsɔ, NW],” vɔ wekɔ etshumanelo k’Akristo wasukɛ wahɔ wa Diolelo diakɔ la kɔlamelo tshɛ la kɛtɛ.—Mat. 24:45-47.
8 Kem’edja, l’etena kakandashikikɛ, Jehowa ayotoma alembe ande dia vɔ ndjokotsha dombwelo diande ndo dia ndjosala olimu wa mbɛdia kɛtɛ. Vɔ wayolanya anto wele, oma lo tɛdikɔ takawɔshi vɔamɛmɛ di’aha mbeya Nzambi, wekɔ lo tona dia nɛmiya lowandji lande, ndo wekɔ lo mɔnyɔla tɛdikɔ toludi la ngandji takandɔshi oma lo tshimbo ya Yeso Kristo. (2 Tes. 1:6-9) Ɔsɔ kayoyala lushi la Jehowa, etena kambotosuna dia kongɛ dia nde ndjoyindja Lowandji lande la l’Andja w’otondo.
9 Ɛtɛmwɛlɔ wa kashi tshɛ, ndo mandji y’anto tshɛ l’alembe awɔ, wanɛ wakalɔmbwamaka oma le owandji wahɛnama wa kɔlɔ w’andja ɔnɛ, wayoshilama oshiki. Onto tshɛ lɛnya dia nde ekɔ lo ndjâtambiya l’atei w’andja ɔnɛ lam’ende la lɔsɛnɔ la lokaki, la kadikadi kana la mindo, ayodiakema. Losambi lele l’asa Satana l’ɛdiɛngɛ ande vɔ l’anto layohembwama, nɛ dia vɔ wayodjama lo lokanu l’edja k’ɛnɔnyi kinunu. Ande esambelo kayoyala le onto tshɛ lalanga losembwe lee!—Eny. 18:21, 24; 19:11-16, 19-21; 20:1, 2.
EYANGO ADIƆ—YOHO YAYOWOKOTSHAMA
10 Diolelo sɔ diaki Mɛsiya diayokotsha sangwelo tshɛ diaki Nzambi di’oma l’etatelo lo dikambo dia kɛtɛ. (Etat. 2:8, 9, 15; 1:28) Lo nshi nyɛ, ndoko onto lakakoke kotsha sangwelo sɔ. Koko, “kete yayayi” yakakitshama la tshina diaki Ɔn’onto, Yeso Kristo. Anto tshɛ wayohandɔ oma l’elombwelo ka Jehowa lo dikongɛ nɛ di’edjedja wayokamba olimu kâmɛ la tshina di’ɛlɔmbwɛlɔ ka Kristo, Nkumekanga kawɔ, wayokotshaka kɛnɛ tshɛ kayondowadjangelaka l’ɔngɛnɔngɛnɔ dia kɛtɛ k’otondo kadimɔ Paradiso. (Heb. 2:5-9) Anto tshɛ wayongɛnangɛnaka l’olimu w’anya awɔ ndo wayokondja ɛlɔlɔ efula oma l’efula ka diangɔ dia lo kɛtɛ.—Osam. 72:1, 7, 8, 16-19; ɛdika la Isaya 65:21, 22.
11 Etena kakatongama Adama l’Eva, vɔ waki kokele, ndo sangwelo diaki Nzambi aki dia kɛtɛ ndola l’ekana awɔ, dia vɔ tshɛ monga la lokokele la lo yimba ndo la lo demba. La tshina di’ɛlɔmbwɛlɔ ka Diolelo sɔ, sangwelo sɔ diayoyala dikambo dia mɛtɛ dia diambo. Dia dikambo sɔ ndjâla, pombaka minya etombelo tshɛ w’oma lo pɛkato, ndo l’oyango ɔsɔ mbayokambaka Kristo olimu, aha paka oko Nkumekanga keto koko ndo oko Ɔlɔmbɛdi a Lâdiko. La lotutsha tshɛ, nde ayokimanyiya ambolami ande wele l’okitanyiya dia vɔ kondja ɛlɔlɔ w’oma l’olambo wadimanyiya pɛkato wa lɔsɛnɔ lande l’onto. Washo w’akanga a tutshungu wayɔsɛna. Atoi w’akanga a poke wayoka. Lɔwa la demba l’enyanga enyanga l’esombe w’anto layoyala ashashi oleki lɔnɛ l’ɔna dikɛnda. Ndoko hemɔ yahakɔnɔ yayoyala, nɛ dia onto tshɛ ayoyala la yonge ya dimɛna. Lushi layoyala lele ndoko onto layonga l’ɔkɔkɔ wa mbuta ate: “Dimi la kandji!” nɛ dia anto woka Nzambi wɔma wayotshungɔ oma lo lɔhɔmbɔ la pɛkato ndo oma l’etombelo wa kɔlɔ efula w’oma lɔkɔ.—Ɛdika la Isaya 33:22, 24; 35:5, 6; Jobo 33:25; Luka 13:11-13.
12 Koko dia koma kokele, hahombama paka demba dia dimɛna la yimba ya dimɛna tsho. Dikambo sɔ nembetshiyaka nto kɛnɛmɔla waonga wa Jehowa, nɛ dia onto akatongama l’‘efanelo ka Nzambi, dia fɔna lande.’ (Etat. 1:26) Dia vɔ sala dikambo sɔ, anto pombaka mbetshama. Vɔ wayɔsɛna lo Dikongɛ di’Oyoyo, lɛnɛ ahomba “[losembwe ndjâla, NW],” ndo oko akadilake omvutshi Isaya, “[mɛtɛ anto wa lo kɛtɛ k’otondo wayeka losembwe, NW].” (2 Pet. 3:13; Is. 26:9) Dionga sɔ mbalɔmbɔla anto otsha lo wɔladi—wɔladi l’asa anto wa lo wedja tshɛ, l’asa angɛnyi w’eshika, l’asa anto wa lo nkumbo ɔtɔi ndo djekoleko l’asaso la Nzambi ndamɛmɛ. (Is. 32:17; Osam. 85:10-13) Wanɛ wayeka losembwe wayotekesanɛka yema yema la lolango laki Nzambi l’endana lawɔ. Lam’ayosɔnga ngandji ka mboka yaki Jehowa edo l’etema awɔ, vɔ wayoyelaka mboka yakɔ l’akambo tshɛ wa lo sɛnɔ yawɔ. Yeso, onto la kokele, akakoke mbuta ate: ‘Dimi latosalaka kɛnɛ kangɛnyangɛnya Papa nshi tshɛ.’ (Joa. 8:29) Ande lɔsɛnɔ l’ɔngɛnɔngɛnɔ layoyala lam’ayokotshama akambo asɔ tshɛ le anto lee!
EKOTSHAMELO WAMBOSHILAKA MƐNAMA
13 Akambo wa diambo wakasale Diolelo sɔ wamboshilaka mɛnama le wanɛ wele la washo wa mbetawɔ. Wembola wayela ɛnɛ ndo avɛsa woshilami wayokohola akambo amɔtshi wa l’atei awɔ, ndo akambo wahomba ambolami tshɛ wa Diolelo sɔ sala l’etena kɛnɛ:
Nkumekanga akekama ntondo dia ndɔshana la na, ndo etombelo akɔna wakatombe oma lo dikambo sɔ na? (Eny. 12:7-10, 12)
Lo Mateu 24:14, naa olimu okina wakalake Yeso wakandahombe sala l’ɔkɔngɔ wa nde mbahema l’okudi ndo la ntondo kande nanya atshi wa kɔlɔ na?
Woho akɔna wasalema olimu ɔsɔ na? Wâ na washa lonya lɔkɔ na? (Osam. 110:3; Eny. 14:6, 7)
Lande na kaki kokoka atunyi wa pɔlitikɛ la wa ɛtɛmwɛlɔ memadja olimu akɔ na? (Etsha 5:38, 39; Zak. 4:6)
Oma l’olimu wa wetshelo wele lo salema, naa etshikitanelo wamboshilaka mɛnama le anto wayakitshakitsha la tshina di’ɛlɔmbwɛlɔ ka Diolelo na? (Is. 2:4; 1 Kor. 6:9-11)
DIOLELO DIAHOMBA TSHIKALA PONDJO
14 L’ɔkɔngɔ wa Satana l’ɛdiɛngɛ ande mbikadjema lo difuku di’aha l’ekomelo, Yeso Kristo kâmɛ l’anto ande 144 000 wayosangana lande, wayolɛ l’edja k’ɛnɔnyi kinunu. (Eny. 20:6) L’edja k’etena kɛsɔ, anto tshɛ wayokoma kokele. Ɛlɔmbwɛlɔ tshɛ la lowandji tshɛ ndo diolelo tshɛ dialɔshana la Jehowa diayoshilama oshiki. L’ɔkɔngɔ w’akambo asɔ tshɛ salema, Yeso ayokimɔ Diolelo l’anya wa She, “dia [Nzambi, NW] ayali la diko dia diango tshe, la lu diango tshe.”—1 Kor. 15:24, 28.
15 Lasɔ dihole diele la Yeso lo kɛnɛ k’endana la kɛtɛ diayotshikitana, koko lowandji lande layoyala lowandji “la pundju” ndo Diolelo diande “hadiulanyemaki pundju.” (Dan. 7:14) Lo yoho yakɔna na? Lo yoho y’ɔnɛ: lowandji lakɔ halotoshama le ɛlɔmbɔdi ekina wele l’eyango wotshikitanyi. Akambo wayosalema oma lo Diolelo sɔ ‘hawolanyemaki pondjo.’ Kɛnɛ kasala Diolelo diakɔ dia nyindja lokombo la Jehowa la sangwelo diande di’endana la kɛtɛ nyɛ kayotshikala pondjo.
[Notɛ ka l’ɛsɛ ka dikatshi]
a Enda lo dibuku “Que ton royaume vienne!,” lɛkɛ 127 polo 39.
OVUSWELO A LƆKƐTSHANYA
● Lande na kele Diolelo dia Nzambi diekɔ okandwelo akɔ wâmɛ l’ekakatanu w’anto na? Etena kakɔna kakamɛ mbolɛ Diolelo diakɔ sɔ na?
● Kakɔna kaleka kɔngɛnyangɛnya lo dikambo dia Diolelo ndo kakɔna kayodiosala na? Lande na?
● Akambo akɔna wakasalema oma lo Diolelo dia Nzambi wakokaso mɛna oma ko kakianɛ na? Dihole diakɔna diele laso l’akambo asɔ na?
[Wembola]
1, 2. (a) Akambo wasalema l’andja ɔnɛ lushi la lushi, mbikaka epole ɔsɛkɛ lo dikambo diakɔna, ndo woho akɔna na? (b) Naa okandwelo wâmɛ wele l’akambo asɔ na?
3.(a) Lo kɛnɛ k’endana la Diolelo sɔ, dikambo diakɔna diakasalema l’olongo lo 1914 T.D. na? (b) Lande na kediɔ ohomba le so na?
4. Lo akambo akɔna w’ɔm’ɔmɔ w’endana la Diolelo wahombaso ndjasha la yambalo tshɛ, ndo lande na?
5. (a) Lo ndjela Afundelo, Diolelo dia Mɛsiya diekɔ ɛnyɛlɔ ka lowandji laki na? (b) Woho akɔna wasɛngiyamaso oma lo kɛnɛ kekaso lo dikambo dia Diolelo na?
6. Lande na kangɛnangɛnaso otamanya l’ɔtɛ w’ɔnɛ Jehowa akasɔnɔla Yeso Kristo dia nde mbolɛ lo lokombo lande na?
7. (a) Lo yoho yotshikitanyi la dɔmbwɛlɔ di’anto, lande na kayotshikala lowandji lɔsɔ edja? (b) Diɔtɔnganelo diakɔna diele l’asa “ɔhɔmbɔ wa kɔlamelo ndo wa kɛsɔ” la lowandji la l’olongo na?
8, 9. (a) Tɔsɛngiya takɔna ta diatwanelo la ta kɔlɔ tayolanyema oma le Diolelo sɔ na? (b) Ɔnkɔnɛ, naka sho hatolange ndjâla atunyi wa Diolelo dia Nzambi, lo atshunda la ditshelo diakɔna diahatahombe ndjadja na?
10. (a) Woho akɔna wayokotsha Diolelo dia Mɛsiya sangwelo diaki Jehowa di’endana la kɛtɛ na? (b) Dikambo sɔ ayodiolembetshiya le anto wayɔsɛna la kɛtɛ l’etena kɛsɔ na?
11. (a) Woho akɔna wayokondja ambolami wa lo Diolelo lokokele la lo demba ndo la lo yimba na? (b) Etombelo akɔna wayoyala na?
12. (a) Dikambo diakɔna diahombama nto di’anto koma kokele na? (b) Woho akɔna wayokotshama dikambo sɔ, ndo etombelo akɔna wayoyala na?
13. Kamba olimu la wembola wa la diko engo dia mɛnya kɛnɛ kayosala Diolelo ndo kɛnɛ kahombaso sala shoamɛmɛ l’etena kɛnɛ.
14. (a) L’edja ka tena dingana kayolɛ Kristo na? (b) Kakɔna kayosalema l’edja k’etena kɛsɔ na?
15. Lo yoho yakɔna mɛtɛ yele Diolelo sɔ ‘hadiolanyemaki pondjo’?
[Diombwɛlo di’osato wa lo lɛkɛ 84, 85]
Anto wayeka losembwe