Onde Wɛ Pombaka Lietawɔ?
Anto mbutaka esangɔ efula ɔnɛ vɔ mbetawɔka Losato l’Osanto, koko vɔ hawoloshihodia woho akɔ wâmɛ.
Losato l’Osanto kɛdikɛdi na mɛtɛ?
Onde Bible lietshaka?
Onde Yeso Kristo ekɔ Nzambi Kanga-Wolo-Tshɛ ndo ɔmɔtshi a lo Losato l’Osanto?
ONDE wɛ mbetawɔka Losato l’Osanto? Anto efula wa lo Lokristokristo lietawɔka. Ndo nto, lɔ lokôngaka wetshelo w’etshina w’ɛtɛmwɛlɔ oma ko deko la deko.
Omalɔkɔ, wɛ mbeyaka fɔnya ɔnɛ ndoko tamu tokoki mbidjama lo dikambo dialɔ. Ko tete le atete ndoko edja, kânga amɔtshi a l’atei wanɛ walietawɔ wakamɛ mbidjana tamu.
Bonde kahombaso kana yimba lo dikambo sɔ na? Nɛ dia Yeso ndamɛ akate ate: “Lɔsɛnɔ la pondjo lɔnɛ: nkêya wɛ, Nzambi kâmɛ ka mɛtɛ, la Yeso Kristo ɔnɛ lakayatome.” Ɔnkɔnɛ, otondo a lɔsɛnɔ laso la lo nshi yayaye nemanɛka la woho weyaso lonto la Nzambi la mɛtɛ, ndo kɛsɔ nɔmbaka dia sho sɛdingola dikambo dia Losato l’Osanto oma ka tshina. Lâsɔ, bonde kahalisɛdingola wɛmɛ na?—Joani 17:3, Bible de Jérusalem (Jé), k’Aseka Mupɛ.
Tokanyi efula tekɔ lo dikambo dia Losato l’Osanto. Koko vɔ ndeka mbuta ɔnɛ Losato l’Osanto kɛdikɛdi: lo Nzambi ɔtɔi etondo esato mbekɔ, Papa, Ɔna, la Spirito k’Osanto; koko vɔ tshɛ wekɔ Nzambi ɔtɔi. Wetshelo akɔ mbutaka ɔnɛ vɔ akɔ asato mbɛdima, akang’a-wolo-tshɛ, ndo vɔ tshɛ kotongama, mbuta ate wokôngaka pondjo pondjo lo Lonzambi.
Koko, akina mbutaka vate wetshelo wa Losato l’Osanto wekɔ kashi, Nzambi ka pondjo Kanga-Wolo-Tshɛ ndo ka nkudu tshɛ ekɔ paka ɔtɔi, ndo nde tshikitana l’akina. Vɔ mbutaka vate la ntondo ka Yeso ndjonga onto la nkɛtɛ, nde aki, oko andjelo, onto la lo nyuma lakatongama oma le Nzambi, ɔnkɔnɛ nde akahombe monga la etatelo. Vɔ ndakanyaka ɔnɛ Yeso hɛdimi la Nzambi Kanga-Wolo-Tshɛ kânga yema; nde okôngaka l’ɛse ka Nzambi ndo ekɔ paka la tshina diande. Vɔ mbetawɔka nto ɔnɛ spirito k’osanto kema onto koko ekɔ nyuma ka Nzambi, wolo ande wakamba olimu.
Amamedi wa Losato l’Osanto mbutaka ɔnɛ lɔ kotomba paka oma lo wetshelo wa l’ɛtɛmwɛlɔ oto koko ndo oma lo Bible. Asɛdingodi wa wetshelo akɔ mbutaka vate lɔ kema wetshelo wa lo Bible, kânga okanda ɔmɔtshi w’ɛkɔndɔ mbutaka ɔnɛ: “[Losato l’Osanto] lakaye la tshondo oma le apanganu.”—Survivances païennes dans le monde chrétien.
Naka Losato l’Osanto lekɔ mɛtɛ, kete tekɔ lo tɛnga Yeso lam’ataso ɔnɛ nde hɛdimi la Nzambi oko ɔmɔtshi a lo Lonzambi. Koko naka lɔ lekɔ kashi, kete tekɔ lo tɛnga Nzambi Kanga-Wolo-Tshɛ lam’ataso ɔnɛ onto ɔmɔtshi ekɔ lɛdimi la nde, ndo djekoleko lam’elɛso Mariya ɔnɛ “Nyango Nzambi.” Naka Losato l’Osanto lekɔ kashi, kete tekɔ lo mɔnyɔla Nzambi lam’ataso oko ata dibuku Catholicisme (angl.) ɔnɛ: “Mɛtɛ, [onto tshɛ] layodja tamu ɔnɛ dietawɔ nɛ kema losembwe ndo pudipudi, ayovɔ pondjo. Dietawɔ di’Aseka Mupɛ diɔ nɛ: Tekɔ lo tɛmɔla Nzambi ɔtɔi lo Losato l’Osanto.”
Lo menda kɛnɛ tshɛ kotami, sunganaka mɛtɛ dia wɛ nyanga dia mbeya kɛnɛ kele mɛtɛ lo dikambo dia Losato l’Osanto. Koko la ntondo ka sɛdingola kiɔkɔ yalɔ ndo elembetshiyelo alɔ kana wekɔ mɛtɛ, ayonga ohomba efula têyi kitshimudi ya mɛtɛ mɛtɛ ya wetshelo akɔ. Losato l’Osanto kɛdikɛdi na mɛtɛ? Ngande alilembetshiya ambetawudi alɔ na?
[Caption on page 2]
Lo lɔmɔsɔ: Lohingo la l’Edjibito la l’ɔnɔnyi wa yinga ya hende (N.T.D.) Losato l’Amon-Ra, Ramses II, la Mut. Lo l’omi: Lohingo la Losato l’Osanto la Yeso Kristo, Papa, ndo spirito k’osanto l’eleko ka 14 (T.D.). Lembetɛ dia, wekɔ anto asato koko ekolo ɛnɛi eto.