Tshapita 44

Yeso ambɔladia lɔpɛpɛ la wolo

YESO akasadi olimu lushi l’otondo, nde aketshisha anto waki l’ɔkɛngɛ w’ashi ko l’ɔkɔngɔ diko, nde akayolembetshiya ambeki ande wɛɛla lam’akiwɔ vɔ la nde ato. La dikɔlɔ, nde lawɔ ate: “Tutshu la wedi.”

La wedi okina wa Ndjale ka Ngalileya, l’ɔkɛngɛ wa l’ehotwelo ka wonya, mbatanema lɛtshi la nkɛtɛ lelɛwɔ ɔnɛ: Dekapɔli, lokombo lɔsɔ ndja oma lo tshɛkɛta ya lo Grɛkɛ deʹka, kɛdikɛdi “dikumi,” ndo poʹlis, nembetshiyaka “osomba.” Kânga mbodjashi Ase Juda efula lɛkɔ mɛtɛ, esomba wa dekapɔli ndola l’Ase Ngirika. Koko Yeso hatshe olimu efula lɛkɔ. Kânga mbala kɛnɛ koyende lɛkɔ, nde hatshe olimu efula, oko ayotoyodiɛna l’ɔkɔngɔ diko, nɛ dia wayowoshimba dia nde ntshikala edja.

Yeso ambotɛ ambeki ande dia vɔ ntshɔ lo wedi okina, ko vɔ wambowodja lo wâto. Koko anto wakawaɛnyi wonya watawatshu. Kem’edja, anto akina wambɔtɔ lo wâto ekina dia mbatshindɛ. Kema etale efula dia vɔ tenyanya. Mɛtɛ, Ndjale ka Ngalileya kekɔ paka oko oduwa wa woke wele l’otale wa kilɔmɛtɛlɛ 20 ndo woke wa kilɔmɛtɛlɛ 12.

Oko atɔlɛmbaka onto tshɛ, Yeso ambɔlɛmba nde lawɔ. Ɔnkɔnɛ, l’ɔkɔngɔ wa vɔ sɛmɛ yema, nde ambolala la koma ya l’ɔkɔngɔ wa wâto, ɛ̂kɛ ɔtɛ lo weekɔ ɔmɔtshi, ko ambonukɔ la djɔ. Apɔstɔlɔ ande efula mbeyaka nduka wâto dimɛna, nɛ dia mbala efula vɔ wakandaka nse lo Ndjale ka Ngalileya. Diɔ diakɔ diatawaduke wâto.

Koko, ɔnɛ kema lɔkɛndɔ la wɔdu. Nɛ dia djungudungu ya lâdiko di’oduwa mbundɛka, suke la mɛtɛlɛ 200 la tshina dia yɛdikɔ ya Ndjale, ko l’akona waki suke lɔhɛlɛlɛ la tshitshi mongaka, mbala efula mpɛpɛ ya weolo mpɛpaka ndo mbelaka ngembe ya wolo la shashimoya lâdiko di’oduwa. Kɛsɔ mbambosalema l’etena kɛnɛ. Kem’edja, asuku wambotatɛ mumbɔmbɔ otsha lo wâto, wôwosutshasutsha, suke ndo la mbodindja l’ashi. Koko Yeso êke lo djɔ oto!

Oko wewɔ la diewo di’efula l’odukelo a wâto, ambeki wambosala tshɛ dia nɔmbɔla wâto. Koko l’etena kɛnɛ, wolo awɔ amboshila. Lam’ɛnyiwɔ ɔnɛ tanga mvɔ, vɔ wambemula Yeso. Vɔ lande vate: ‘Ombetsha, wɛ hadje yimba? Enda tanga ninda la wâto l’ashi! Otoshimbele, tangavɔ l’ashi!’

Yeso ambemɔ ko ambohangwɛ lɔpɛpɛ la ndjale ate: “Olembohali!” Ko lɔpɛpɛ lambɔlala ndo ndjale kaya ki. Mbasekesɔnde le ambeki ande ko nde la wɔ ate: ‘Lande na kokanyu wɔma? Onde nyu nyatayala la mbetawɔ oto?’

Lam’ɛnyiwɔ dikambo sɔ, ambeki wambondama la wɔma wa mamba. Wôtatɛ mumbwana vate: ‘Akɔna ɔnɛ na? Ndjâka nde mbutɛ lɔpɛpɛ la ndjale dui ko vɔ mbokitanyiyaka.’

Yeso mɛtɛ ekɔ la nkudu k’efula! Ande ekeketshelo kakondjaso lo mbeya ɔnɛ Nkumekanga kaso mbahemɛ diangɔ dia la nkɛtɛ ndo lam’ayondokotola yambalo yande tshɛ oya lo nkɛtɛ kaso kɛnɛ lo Diolelo diande, anto tshɛ wayodjasɛka lo lotui tshitshi, ndoko wâle wayowakomɛ oma lo diangɔ dia la nkɛtɛ!

Yema l’ɔkɔngɔ wa lɔpɛpɛ mbɔlama, Yeso nde l’ambeki ande wambokoma l’ɔkɛngɛ wa l’ehotwelo ka wonya, aha la wâle mbakomɛ. Ondo wâto ekina kombeta lam’aki lɔpɛpɛ la wolo ko vɔ wakakome dimɛna. Mako 4:35–5:1; Mateu 8:18, 23-27; Luka 8:22-26.

▪ Dekapɔli kɛdikɛdi na, ndo lende atanema lɛtshi la nkɛtɛ lɔsɔ?

▪ Kakɔna katotondjaka mpɛpɛ lâdiko dia Ndjale ka Ngalileya?

▪ Kakɔna kambosala ambeki wa Yeso lam’ɛnyiwɔ ɔnɛ: hatokoke ndjashimbɛ kânga mbeyaso nduka wâto dimɛna?