Tshapita 60

Ɛnamelo ka lotombo la Kristo lo diolelo diande

YESO ambokoma la Kayisariya Filipi, ko nde ambotatɛ mbetsha elui w’anto, ndo apɔstɔlɔ ande mbele l’atei awɔ. Nde ambowaewoya dikambo dimɔtshi dia diambo efula, ata ate: “Mete kanyutelami nti: Amotshi wemadi lane, hawunganela nyoi ntundu watenyi On’a untu ayayi lu diulelu diandi.”

Ambeki wamboyambola vate: ‘Alangande mbuta?’ L’ɔkɔngɔ wa lomingu ɔtɔi, Yeso ambɔsa Petero, Jakɔba, la Joani ko ambodɛ la wɔ lo dikona di’otale. Ondo wonya ambodja, nɛ dia ambeki wôka djɔ. L’etena kalɔmba Yeso, nde ambohilɔ la ntondo kawɔ. Elungi kande kambotatɛ mpɛta oko wonya, ndo ahɔndɔ waya ngaingai oko osase.

Ko anto ahende wele oko “Mose la Elidja” wambɛnama ko wambotatɛ sawola la Yeso lo dikambo dia ‘lɔkɛndɔ lahombande munda otsha la Jerusalɛma.’ Aha la tamu, lɔkɛndɔ lɔsɔ mendanaka la nyɔi ka Yeso ndo l’eolwelo kande. Ɔnkɔnɛ, sawo sɔ diambɛnya ɔnɛ Yeso hahombe mbewɔ nyɔi ka nsɔnyi kahombande mvɔ, oko wakombola Petero.

Kakianɛ, ambeki wambemɔ oma lo djɔ, ko wênda ndo wôlonga la diambo heyama. Kânga mbediɔ ɛnɛlɔ, diɔ mɛnamaka oko dikambo dia mɛtɛ mɛtɛ ko ndo Petero ambotatɛ sawola lawɔ, ata ate: “Khumadiondjo, kawo shu ntshikala lindu. Naka we alanga, dimi layuhika tumbu satu lindu: kemotshi kaye, kemotshi ka Mose, la kemotshi ka Elidja.”

Petero âkatɛkɛta ko dinge dia ngaingai diamboya, diambâkomba, ko dui diambokɛma oma l’olongo diata ɔnɛ: “On’ami la ngandji one, ndi ambongenyangenya; nyuwukeli.” Lam’okiwɔ dui sɔ, ambeki wamboyakɔsha ekukumadi. Koko Yeso ambowatɛ ate: “Nyeto, tanyukaki woma.” Wêtɔke nganɛ ko hawoyɛna ndoko onto nto, paka Yeso ndamɛ.

La wedi a pindju, wonya wayawaholɔ oma lo dikona, Yeso ambowatɛ ate: “Tanyutelaki nduku untu enelo kene, edja ndu lam’ayulo On’a untu uma lu nyoi.” Ɛnamelo k’Elidja lo ɛnɛlɔ ambonyiya dimbola dimɔtshi lo timba t’ambeki. Mbambolawɔ Yeso vate: “Ya ukundi atutaka afundji vati: Dieli la Elidja dia ndja ntundu?”

Ko Yeso nde lawɔ ate: “Elidja ambuyakaka, keli vo kumbêya.” Koko Yeso ekɔ lo tɛkɛta dikambo dia Joani Obatizanyi, ɔnɛ lakasale olimu wɔfɔnyi la wɔnɛ w’Elidja. Joani akalɔngɔsɔlɛ Yeso mboka, oko wakalɔngɔsɔla Elidja mboka lo dikambo di’Elisha.

Ande woho wambokeketshama Yeso l’ambeki ande oma l’ɛnɛlɔ kɛnɛ lee! Lo yoho mɔtshi, ɛnɛlɔ kɛnɛ kekɔ ɛnamelo ka ntondo ka lotombo la Kristo lo Diolelo diande. Mɛtɛ, ambeki wakɛnyi “On’a untu ayayi lu diulelu diandi,” oko wakalake Yeso ambeta lomingu l’otondo. L’ɔkɔngɔ wa nyɔi ka Yeso, Petero akayofunda ɔnɛ ‘vɔ wakɛnyi lotombo la Kristo la asho awɔ vamɛ lam’akiwɔ kâmɛ la nde lo dikona di’ekila.’

Afarisɛ wakalɔmbɛ Yeso djembetelo yɛnya ɔnɛ nde mbele ɔnɛ lakalakema l’Afundelo dia monga Nkumekanga kakasɔnama oma le Nzambi. Vɔ kokondja djembetelo ya ngasɔ. Koko ambeki wa Yeso wa suke suke wambokondja diaaso dia mɛna ohilwelo ande, ohilwelo ɔsɔ wamboshikikɛ pɔlɔfɛsi y’endana la Diolelo. Diɔ diakɔ diakayofunda Petero l’ɔkɔngɔ diko ate: “Diɔ diakɔ dieso la dui di’amvutshi diamboleka shikikɛma.” Mateu 16:13, 28–17:13; Mako 9:1-13; Luka 9:27-37; 2 Petero 1:16-19, NW.

▪ Woho akɔna wambɛna anto amɔtshi Kristo ayaye lo Diolelo diande la ntondo ka vɔ monganɛ nyɔi?

▪ Lo ɛnɛlɔ, Mɔsɛ la Elidja wekɔ lo sawola la Yeso lo dikambo diakɔna?

▪ Lande na kele ɛnɛlɔ kɛnɛ ekeketshelo ka woke le ambeki wa Yeso?