Tshapita 63

Yeso ambongola ambeki ande nto

YESO nde l’apɔstɔlɔ ande wêke lo luudu la Kapɛrɛnauma, kakianɛ, vɔ wambɔkɛtshanya lo dikambo dimɔtshi, koko aha lo osanyi wakasanaka apɔstɔlɔ dia mbeya ɔnɛ loleki woke l’atei awɔ. Dikambo sɔ diakatshami ondo lam’akawayakalolaka la Kapɛrɛnauma, l’etena kaki Yeso bu lâwɔ. Ɔpɔstɔlɔ Joani ekɔ lo kɔndɔla ate: “Umbetsha, shu takenyi untu atundja edienge lu lukumbu laye, ku shu [takahembi mboshimba, NW], ne dia ndi nkuntuyela.”

Mbokɛmaka dia, lo ndjela kanyi yaki Joani, paka apɔstɔlɔ ato mbele la dikimɔ dia kɔnɔla anto. Diɔ diakɔ diakanyiyande ɔnɛ pami kɛsɔ ekɔ lo ntsha ahindo lo yoho ya kɔlɔ nɛ dia nde bu l’olui awɔ.

Koko Yeso ambosha dako nɛ ate: “[Tanyohembake mboshimba, NW], ne dia nduku untu latsha dikambu dia mamba lu lukumbu lami, ayeya mpindwelami esadi. Ne dia untu tshe laha utunyi le su, keli la su. Mete kanyutelami nti: Untu tshe lanyusha dikoho di’ashi a no, ne dia nyu nyeko wa Kristu, ndi hushisha difutu diandi.”

Dia nde monga kâmɛ la Yeso, komonga ohomba dia pami kɛsɔ mboyela la tshondo yande. Lam’ele l’etena kɛsɔ ko etshumanelo k’Akristo katâtongama, woho wakinde komonga l’olui awɔ kɔmɛnyaka ɔnɛ nde aki l’olui okina wotshikitanyi. Pami kɛsɔ mɛtɛ aki la mbetawɔ lo lokombo la Yeso ongo akandakokaka tondja ɛdiɛngɛ. Nde akasalaka dikambo diɔfɔnyi la nɛ diakate Yeso ɔnɛ onto ladisala kokaka kondja difuto. Yeso akɛnya ɔnɛ nɛ dia nde akasalaka dikambo sɔ, nde hatoshisha difuto diande.

Ko kakɔna kotoyala otondonga ɛtɛkɛta la ditshelo di’apɔstɔlɔ diakatakanya pami kɛsɔ na? Kɔlɔ ka woke kotoyala! Yeso ate: “Untu tshe latakanya kiendakenda motshi yambumbetawo, ndeka ololo vo mbukeleka dive dia wuki di’ohelo lu kingu, ku mbutambiya lu uduwa.”

Yeso ambota ɔnɛ ambeki ande pombaka minya ɛngɔ tshɛ kakoka mbatakanya oma lo lɔsɛnɔ lawɔ, oyadi ohomba akɔna wele ɛngɔ kakɔ, ɛnyɛlɔ oko lonya, lokolo kana sso. Ndeka ɔlɔlɔ pomba diangɔ sɔ di’ohomba la ntondo ka dimamema ko mbikadjema lo Ngɛhɛna (dihole diakashawɔ mindo ndo diahɛta dja suke la Jerusalɛma), dihole diakɔ sɔ diekɔ didjidji di’elanyelo ka pondjo.

Yeso ambosha diewoyelo nɛ nto ate: “Nyewo, tanyonyolaki nduku kiendakenda l’atei awo. Dimi lambunyutela nti: L’ulungu, andjelo awo watendaka elundji ka Papa leli l’ulungu nshi tshe.” Oma lâsɔ, nde ambɛnya ohomba wa “[tɔkɛndakɛnda, NW]” lam’amondota dikambo dia pami kɛmɔtshi kele l’ɛkɔkɔ lokama ko amboshisha ɔtɔi ɔmɔtshi l’atei awɔ. Oko walembetshiya Yeso, pami kɛsɔ ayotshika ɛkɔkɔ 99 dia toyanga wɔnɛ woshishwe, ndo lam’ayondotowɛna, nde ayɔngɛnangɛna woho w’anyanya lo dikambo diawɔ oleki ndo lo dikambo di’ekina 99. Ko Yeso ambodihiya ate: “Okone Shenyu leli l’ulungu halangi nduku kiendakenda mvo.”

Ondo Yeso ambohɔ osanyi waki l’asa apɔstɔlɔ ande, ko nde ambowasha dako nɛ ate: ‘Nyoyale la lɛhɔ le nyu nyamɛ, ndo nyoyale la wɔladi lam’asa onto la onyande.’ Lɛhɔ mbaleka nɔngɔsɔla djɛtɔ ya diangɔ di’ɛlɛlɔ. Ɔnkɔnɛ, lɛhɔ la didjidji nɔngɔsɔlaka ɛtɛkɛta watondja onto dia vɔ mbetawɔma esadi eto. Naka tayonga la lɛhɔ la ngasɔ, kete tayolama wɔladi.

Koko, ewanu wa weke ndjotombaka lo tena dimɔtshi nɛ dia anto kema kokele. Yeso ambɛnya nto woho wahombaso kandolaka ekakatanu wa ngasɔ. Nde ate: “Naka unyaye ayukutshela kolo, kutshu, kutuwenya munga kandi, we la ndi atu. Naka ndi ayukukela, [kete wɛ ambokondja ɔnanyɔ, NW].” Ko naka nde hoke, Yeso ate: “Kutshu la untu otoi kana ahendi. Okone aui tshe wayushikikala l’enyo w’emenyi ehendi kana esatu.”

Lo ndjela kɛnɛ kambota Yeso, paka l’ɔkɔngɔ diko mbakokaso ndjotshɔ dia tɛviya “ekelizia,” kɛdikɛdi, emendji w’etshumanelo, nɛ dia vɔ wekɔ anto w’eshika, vɔ kokaka mbɔsa yɛdikɔ mɔtshi. Yeso ambodihiya ɔnɛ naka ɔnɛ losadi pɛkato hetawɔ yɛdikɔ yawɔ, kete “ndi ayali uku usi wudja le ye, la uku ulungudi w’elambu.”

Dia vɔ mbɔsa yɛdikɔ ya ngasɔ, emendji pombaka ndjela wetshelo watanema lo Dui dia Jehowa lo nna ndo lo nna. Ɔnkɔnɛ, lam’ayowoshikikɛ onongo w’onto ɔmɔtshi ko wambɛna ɔnɛ nde kokaka nongola dilanya, kete dikambo sɔ diambotashilaki ‘kelekama l’olongo.’ Ndo ‘lam’akelekolawɔ la nkɛtɛ,’ mbuta ate lam’ɛnawɔ ɔnɛ onto hakungudi onongo, kete lâsɔ dikambo diakɔ sɔ diambotashilaki ‘nkelekɔma l’olongo.’ Lo wonya wa ngasɔ walomboyawɔ onto, Yeso ambota ɔnɛ: “Lene asangana ahendi kana asatu lu lukumbu lami, dimi ndjalaka l’atei awo.” Mateu 18:6-20; Mako 9:38-50; Luka 9:49, 50.

▪ Lo nshi ya Yeso, lande na kele komonga ohomba di’onto tawotshindɛka?

▪ Onde ekɔ dikambo dia woke dia takanya kiɛndakɛnda, ndo woho akɔna wambɛnya Yeso ohomba wa tɔkɛndakɛnda?

▪ Ondo kakɔna kambotshutshuya Yeso dia nde keketsha apɔstɔlɔ ande dia vɔ monga la lɛhɔ le wɔ vamɛ?

▪ Alembetshiya ‘keleka’ la ‘kelekola’ lanɛ?