Tshapita 75

Kiɔkɔ y’ɔngɛnɔngɛnɔ

LAM’AKANDASALAKA olimu ande la Ngalileya, Yeso akasale ahindo efula, woho akɔ wâmɛ mbasalande kakianɛ lam’ende la Judeya. Oko ɛnyɛlɔ, nde ambotondja ɔdiɛngɛ wasekɛ onto ɔmɔtshi ntɛkɛta. Elui w’anto wamamba, koko wambotatɛ mbɔ̂nyɔla oko akawawɔnyɔla la Ngalileya. Wota vate: “La wulu wa Belezebulu, uwandji w’edienge, mbatundutundjaka edienge.” Amɔtshi wekɔ lo nanga dia Yeso mbasha djembetelo kina yɛnya lonto lande, diɔ diakɔ diambowôhemba lo mbɔlɔmba djembetelo y’oma l’olongo.

Oko weyande tokanyi tawɔ, Yeso ambokadimola amɔnyɔdi ande w’Ase Juda oko wakandakadimola wanɛ waki la Ngalileya. Nde ambowatɛ ɔnɛ diolelo tshɛ dia shanga vwa diayɔkɔ. Ko nde ambowambola ate: “Naka ndu Satana ambatana, ukundi ayushikikala diulelu diandi?” Oma lâsɔ, nde ambɛnya ɔnɛ amɔnyɔdi ande wekɔ lo wâle, nde lawɔ ate: “Keli, naka dimi latutundjaka edienge la luhita la [Nzambi, NW], keti diulelu dia [Nzambi, NW] diambuyakaka le nyu.”

Wanɛ wɛna ahindo wasala Yeso pombaka sala oko akasale anto waki lo deko dia ntondo lam’akawɛnyi dihindo diakasale Mɔsɛ. Vɔ wakate vate: “Luhita la [Nzambi, NW] lone!” “Luhita la [Nzambi, NW]” mbakafunde Ɛlɛmbɛ Dikumi lo pase di’ave. Ndo “luhita la [Nzambi, NW]”—mbuta ate nyuma kande k’ekila, kana wolo wakamba olimu—mbakimanyiya Yeso dia nde tondja ɛdiɛngɛ ndo kɔnɔla hemɔ. Ɔnkɔnɛ, Diolelo diaki Nzambi diambokoma le amɔnyɔdi asɔ, nɛ dia Yeso, ɔnɛ lakasɔnama dia ndjâla Nkumekanga ka Diolelo diakɔ, ekɔ l’atei awɔ.

Oma lâsɔ, Yeso amboka wɛɛla ɔmɔtshi dia mɛnya ɔnɛ wolo wele lande wa tondja ɛdiɛngɛ mɛnyaka ɔnɛ nde mbahemɛ Satana: pami kɛmɔtshi ka wolo ambolɛmbia onyande lɔlɔtshi diangatangata tshɛ di’ata, ko ambɔsa diangɔ tshɛ dia lo luudu lande. Ndo nto, nde ambohola wɛɛla wakandoke la Ngalileya lo dikambo di’ɔdiɛngɛ. Ɔdiɛngɛ ayotomba oma le onto ɔmɔtshi, koko naka onto akɔ halodjisha dihole sɔ dia hwe la diangɔ di’ɛlɔlɔ, kete ɔdiɛngɛ ayokalola l’ɛdiɛngɛ ekina esambele, ko eongelo k’onto akɔ kayoyala kɔlɔ ndeka ndo woho wakinde ntondo.

Lam’ende lo mpokamɛ wetshelo ɔsɔ, omoto ɔmɔtshi hayokoka mbikikɛ solo nto, ɔnɛ atande la dui dia wolo l’atei w’anto ate: “Utema wakakuti, ndu awele wakayalome, weko la [ɔngɛnɔngɛnɔ, NW]!” Omoto ɔsɔ kokaka mbuta ɔsɔku, nɛ dia saki ka omoto tshɛ l’Ose Juda ele mbota omvutshi ndo djekoleko Mɛsiya. Aha la tamu, nde ekɔ lo kanyiya ɔnɛ Mariya pombaka ndjâla l’ɔngɛnɔngɛnɔ wa lânde l’ɔtɛ wakandote Yeso.

Koko, Yeso ambongola kanyi ya omoto ɔsɔ esadi eto lo dikambo dia kiɔkɔ y’ɔngɛnɔngɛnɔ. Nde ambôkadimola ate: “Mete, wane watuhukamaka diui dia [Nzambi, NW], la watudikitanyiaka, mbeli la [ɔngɛnɔngɛnɔ, NW].” Ndoko lushi lakɛnya Yeso ɔnɛ pombaka mbisha Mariya wa nyango lokumu lɔmɔtshi la lânde. Koko, nde ekɔ lo mɛnya ɔnɛ: kɛnɛ kasha onto ɔngɛnɔngɛnɔ wa mɛtɛ ele kambɛ Nzambi la kɔlamelo, koko aha diwotɔ dia l’emunyi kana akambo amɔtshi wamondosala.

Yeso ambohangwɛ Ase Judeya, oko wakandahangwɛ Ase Ngalileya, nɛ dia vɔ wambɔ̂lɔmba djembetelo mɔtshi y’oma l’olongo. Nde ambowatɛ ɔnɛ ndoko djembetelo yayowowasha, tshikima djembetelo ya Jɔna. Jɔna akayala oko djembetelo lo woho wakandatshikala nshi shato l’otema a lose ndo l’esambishelo kande ka la dihonga kakatshutshuya Ase Niniva dia vɔ ndjatshumuya. Yeso ambota ate: “Nyendi, luleki Jona, eko lane.” Woho akɔ wâmɛ mbakambiama nkumekanga ka omoto ka la Shɛba la lomba la Sɔlɔmɔna. Yeso ambota nto ate: “Nyendi, luleki Solomona, eko lane.”

Yeso ambolembetshiya ɔnɛ lam’atɔhɛtshaka onto tala, nde hatodikitshaka l’okengo kana dikukumɛ la shɛndji, koko nde todikitshaka lâdiko di’ekitshelo ka tala ɔnɛ kele anto wɛnyi osase. Ondo nde nangaka mbuta ɔnɛ mbetsha ndo sala ahindo la ntondo k’anto asɔ w’ɛtɛ wolo, ekɔ oko mbishɛ osase wa tala. Anto asɔ kema la sso di’ɔlɔlɔ, kɛdikɛdi vɔ hawɛnyi dimɛna, diɔ diakɔ diele ahindo watshande hawokotsha oyango awɔ.

Yeso oma la tondja ɔdiɛngɛ ndo tɛkɛtsha kanga lumi. Dikambo sɔ diakahombe tshutshuya anto wele la sso di’ɔlɔlɔ, mbuta ate wɛna dimɛna, dia vɔ tombola etsha ɛsɔ wa diambo ndo sambisha lokumu l’ɔlɔlɔ! Koko amɔnyɔdi asɔ hawotshe ndoko dikambo. Diɔ diakɔ diambodihiya Yeso ate: ‘Enda ɔlɔlɔ. Ondo osase wele le yɛ wekɔ wodjima. Naka demba diayɛ di’otondo diekɔ l’osase, aha kânga tshenyi mɔtshi monga lo wodjima, kete diɔ diayɔhɛta tshɛ woho ɔnɛ watokongamwɛka tala l’osase adiɔ.’ Luka 11:14-36; Etumbelu 8:18, 19; 31:18; Mateu 12:22, 28.

▪ Kakɔna kotshi anto lam’ɛnyiwɔ Yeso ambɔkɔnɔla onto ɔmɔtshi?

▪ “Luhita la [Nzambi, NW]” kɛdikɛdi na, ndo woho akɔna wambokoma Diolelo diaki Nzambi le ampokami wa Yeso?

▪ Ele kiɔkɔ y’ɔngɛnɔngɛnɔ wa mɛtɛ?

▪ Woho akɔna wakoka onto monga la sso di’ɔlɔlɔ?