Tshapita 117

Lonyangu la Yeso l’ekambɔ

LAM’OSHIDIYISHA Yeso la nɔmba, nde l’apɔstɔlɔ ande 11 wa kɔlamelo wambemba esambu wa tombola Jehowa. Ko vɔ wamboholɔ oma lo luudu la la diko, wambotomba l’otsho wa kati, ko wambotenyanya Okidi wa Kidirɔna dia vɔ nkalola la Bɛtaniya. Koko, l’atei a mboka, vɔ wambemala lo dihole dialangawɔ efula, l’ekambɔ ka Ngɛtɛsɛmanɛ. Ekambɔ kɛsɔ kekɔ lo Dikona di’Ɔlivɛ kana l’omamu adiɔ. Lɛkɔ mbakahomanaka Yeso nde l’apɔstɔlɔ ande mbala efula l’atei w’esongo w’ɔlivɛ.

Nde ambotshika apɔstɔlɔ ande enanɛi—ondo suke l’ɛɔtwɛlɔ k’ekambɔ—ko ambowatɛ ate: “Nyutukudjase lane, dimi ntukutsho lene dia ntolomba.” Oma lâsɔ, nde ambɔsa apɔstɔlɔ asato—Petero, Jakɔba, la Joani—ko ambɔtɔ l’ekambɔ. Yeso ambotatɛ mundama la lonyangu l’efula ndo ambotshimba yimba. Nde ambowatɛ ate: “[Anima ami wambonyanga efula, polo ndo lo nyɔi. Nyotshikale lanɛ, ndo nyɔsɛnake kâmɛ la mi, NW].”

Yeso ambɔsɛmɛ yema otsha la ntondo, ambɔkɔ ekukumadi, ko ambotatɛ la nɔmba efula oma ka tshina di’otema ate: “Papa, naka nkukaka, dikoho ne diamumweli. Keli aha uku alangami, paka uku alangaye.” Kakɔna kolanginde mbuta na? Lande na ‘kambondondama la lonyangu efula polo ndo lo nyɔi’? Onde nde hayetawɔ nto dia mvɔ ko nkimɔ olambo w’etshungwelo?

Kema, aha ɔsɔku! Yeso halɔmbi dia vɔ mbonyɛ nyɔi. Kanyi ya mbewɔ nyɔi kele oko olambo, oko akawotɛ Petero mbala kɛmɔtshi, yekɔ wɔnɔnyi le nde. Koko, nde ekɔ la lonyangu efula nɛ dia nde ekɔ lo mboka wɔma dia woho wa nyɔi kayangande mvɔ—nyɔi kele oko onto la kɔlɔ—kayosha lokombo la She nsɔnyi. Nde mbeyaka ɔnɛ lo tshenyi ya wonya, layanga panema l’otamba oko otshi wa kɔlɔ woleki tshɛ—oko onto lambɔtɛnga Nzambi! Kɛsɔ mɛtɛ mbawonyangiya efula.

L’ɔkɔngɔ wa nde nɔmba edja efula, Yeso ambokalola ko amboyotana apɔstɔlɔ ande asato lo djɔ. Mbatɛnde Petero ate: “Ngandi, nyu hanyeyi nsena la mi ushidi otoi? [Nyâmbalɛke, NW], nyolombaki, nyutukoko l’ehimba.” Oko weyande ɔnɛ vɔ waya l’okiyanu efula ndo wonya ambodja edja efula, nde ate: “Utema nangaka, keli dimba mbeli wodu.”

Ko Yeso ambotshɔ nto, mbala ka hende, dia tɔlɔmba Nzambi dia nde mbonyɛ “dikoho ne,” mbuta ate etenyi kakawosha Jehowa, lolango lande le nde. Lam’okaludinde, nde amboyotana apɔstɔlɔ akɔ asato nto lo djɔ, ko tete vɔ wotohomba nɔmbaka di’aha ndjɔkɔ l’ehemba. Lam’awatɛ Yeso, vɔ ndoko la dui dia mbokadimola.

Mbala ka sato ndo ka komelo, Yeso ambotshɔ yema tshalola, ambokusɛ adwe ko ambɔlɔmba la delo dia wolo ndo l’asɔi ate: ‘Papa, naka wɛ nangaka, ominye dikɔhɔ nɛ.’ Otema wa Yeso wambolola la lonyangu l’efula l’ɔtɛ wa nsɔnyi kayɔlɔyama lokombo la She lo nyɔi kande kele oko otshi wa kɔlɔ. Mbelamɛ ɔnɛ ɔmɔnyɔdi—ɔnɛ lambɔtɛnga Nzambi—ekɔ dikambo dia wolo mbikikɛ le nde!

Koko Yeso ambotetemala nɔmba ate: “Aha uku alangami, keli uku alangaye.” Yeso ambetawɔ ndjakitshakitsha la tshina dia lolango la Nzambi. L’etena kɛnɛ, ondjelo ɔmɔtshi oma l’olongo ambɛnama le nde ko ambôkeketsha l’ɛtɛkɛta ɛmɔtshi w’ekeketshelo. Ondo ondjelo akɔ ambotɛ Yeso ɔnɛ She mbolangaka efula.

Koko, wotsho w’efula wekɔ l’ahɛka wa Yeso! Lɔsɛnɔ lande hita ndo lɔnɛ la dioho di’anto tshɛ lekɔ lo wâle. Lonyangu lande lekɔ woke efula. Diɔ diakɔ diambotetemala Yeso nɔmba efula oma ka tshina di’otema, ko dungu diakɛlanɛ lo demba diande diamboyala oko apɔpɔ wa dikila watɔngɔtɔngɔ lo nkɛtɛ. Jurunalɛ mɔtshi y’aseka engana (Journal de l’Association des médecins américains) yekɔ lo mbuta ɔnɛ: “Kânga mbediɔ dikambo diahaleke salema, onto kokaka kɛla dikila oko dungu . . . naka nde ambondama l’okiyanu w’efula lo tokanyi.”

L’ɔkɔngɔ diko, Yeso ambokalola mbala ka sato otsha le apɔstɔlɔ ande, ko ambâtana nto lo djɔ. Vɔ wambɔkɔmɔ la lonyangu. Nde ambowatɛ ate: “Nyakalali djo ndu nyakumuya? Nyendi, unya aya suki; On’a untu ambushila la nkimwama l’anya w’antu wa kolo. Nyeto, tutshu. Nyendi ufungi ami aya suki.”

Nde âkatɛkɛta ko Judasɛ Isakariyɔtɛ ambosukana kâmɛ l’olui a woke w’anto wokime ewa, atala, ndo dihomɔ dia ta. Mateu 26:30, 36-47; 16:21-23; Mako 14:26, 32-43; Luka 22:39-47; Joani 18:1-3; Heberu 5:7.

▪ L’ɔkɔngɔ wa vɔ mumɔ oma lo luudu la la diko, lende ambotshɔ Yeso l’ambeki ande, ndo kakɔna kambondosala lam’okumiwɔ lɛkɔ?

▪ Apɔstɔlɔ asalawɔ l’etena kalɔmba Yeso?

▪ Lande na kambondama Yeso la lonyangu, ndo kakɔna kalɔmbande Nzambi?

▪ Woho wambotomba Yeso dungu dia dikila mɛnyaka dui diakɔna?