Tshapita 123

“He onto akɔ nd’oko!”

LƆKƐWƆ la Yeso lamambia Pilato efula, ndo nde ambeya ate: onto ɔnɛ bu l’onongo, diɔ diakɔ diambondoyanga yoho kina ya mbotshungola. Nde ambotɛ olui w’anto ate: “Nyu nyeko la etshelu ka dimi nyutshungwela untu omotshi lu dambu dia [pasaka, NW].”

Lam’ele ndo Barabasi, ondjakatanyi wa mamba, mbele lo lokanu, Pilato ambowambola ate: “Akona alanganyu dimi nyutshungwela, Barabasi, kana Jesu, letawo vati: Kristu?”

Oko ambâtshutshuya ɛlɔmbɛdi wa weke, wanɛ wâtɔmbɔsha, anto wambɔlɔmba dia vɔ tshungola Barabasi ko ndjaka Yeso. Pilato hahekɔ, ko nde ambowambola nto ate: “L’atei awo vo ahendi, akona alanganyu dimi nyutshungwela?”

Ko vɔ wambohangɔhangɔ vate: “Barabasi.”

Pilato amboka wɔma, ko ambowambola nto ate: “Kayumutshela Jesu, letewo vati: Kristu, na?”

Ko vɔ tshɛ wambokadimola la dui dia wolo vate: ‘Akɔkɔmame l’otamba.’ ‘Kɔmɔmɛnde! Kɔkɔmɛnde l’otamba!’

Oko weyande ɔnɛ wekɔ lo nyanga nyɔi k’onto laha l’onongo, Pilato ambɔkɔkɔmala mbambola ate: “Okoko wana, kolo kakona kutshindi? Dimi halawenyi la dikambu dia ndi mvo. Okone dimi layôkomola, ku layûtshungula.”

Kânga mbayanga Pilato sala kakɔna tshɛ, olui w’anto watshutshuyama oma le ewandji w’ɛtɛmwɛlɔ wambodunganela la nkɛlɛ ko wambohangɔshangɔ nto vate: ‘Wɔ̂kɔkɔmɛ l’otamba!’ Oko walomialomiama nkɛlɛ kawɔ oma le ɛlɔmbɛdi, olui w’anto wambokombola dikila. Ohokanyiya dia, ambeta oko nshi tshanu tsho, amɔtshi wa l’atei awɔ waki l’atei a wanɛ wakalongola Yeso lam’akandayɔtɔka lo Jerusalɛma oko Nkumekanga! L’etena kɛnɛ tshɛ, kana ambeki wa Yeso wekɔ lâwɔ, koko vɔ hawolange anto mbaeya.

Lam’ɛnyinde ɔnɛ weolo wadjande tshɛ wambɔtɔ l’ashi, koko elui w’anto wôlanga tondja londjo la mamba, Pilato ambɔsa ashi, ambɔtsha anya la ntondo k’olui w’anto ko ambota ate: “Dimi lambuyindjama lu dikambu dia dikila dia untu ololo one; dikambu dianyu nyame.” Ko anto wambota vate: “Dikila diandi diayali l’ete asu, ndu l’ete wa an’asu!”

Ɔnkɔnɛ, lo ndjela kɛnɛ kalɔmbawɔ—oko wambondolanga mondoya mposa k’olui w’anto lo dihole dia nde ntsha kɛnɛ keyande ɔnɛ tɔ kele losembwe—Pilato ambâtshungolɛ Barabasi. Nde ambɔsa Yeso, ambôkoloya ahɔndɔ, ko ambotɛ asɔlayi dia vɔ mbɔkɔmɔla fimbɔ. Ɔsɔ kondjala fimbɔ ya fimbɔ. Jurunalɛ mɔtshi y’aseka enganga (Journal de l’Association des médecins américains) yekɔ lo kɔndɔla woho wakakɔmanaka Ase Rɔmɔ eshingɔ:

“Ehomɔ kakawakambaka latɔ nshi tshɛ akikɔ lofimbɔ la mondo (flagrum kana flagellum), lofimbɔ lakɔ laki l’ɛkɔdi efula wa lokoho la nyama wahɛdimi l’etale, ko l’atei w’ɛkɔdi akɔ, wakadjaka tokamakama ta mbolo, kana tɛtshɛtshi ta weka w’ɔkɔkɔ wa pɛmɔ efula. . . . Lam’ele asɔlayi w’Ase Rɔmɔ wakakɔmɔlaka onto l’ɔkɔngɔ mbala efula ndo la wolo tshɛ, tokamakama ta mbolo tɔsɔ takadiyaka ɛtɔmbɔ ɛtɔmbɔ lo demba, ndo ɛkɔdi wa dikoho kâmɛ la weka w’ɔkɔkɔ wakâtshatshaka emunyi wa lo lokoho ndo wa la tshina dia lokoho. Ko naka fimbɔ shɔ tetemala, kete mpota kayotshɔ ɔhɔngɔ polo ndo l’emunyi womamasanyi la weka, ko ayohahola bɛtshi di’emunyi diatɔngɔtɔngɔ dikila.”

L’ɔkɔngɔ wa vɔ kɔmɔla Yeso ngasɔ, wambowɔsa ko wambɔ̂tɔla lo luudu l’ɔlɔmbɔdi, lam’okumiwɔ lɛkɔ, vɔ wambelɛ olui tshɛ w’alembe. Asɔlayi wambotetemala mbɔsɔka: wambela ekata k’atɛndɛ ko wambokikɔkɔmɛ l’ɔtɛ ande. Wambɔ̂kɛkɛtshiya etenyi ka kolɔ lo lonya l’omi, ndo wambɔ̂lɔtsha dihɔndɔ dia bela oko nɛ diatɔlɔtaka nkumi ya dikanga. Wambɔ̂sɔka ɔnɛ: “Moyo, Khum’ekanga k’asi Juda!” Wambowotɛ nsɔi l’elungi nto ndo wambɔ̂kɔmɔla mbala. Ko wambɔsa etenyi ka kolɔ ya wolo kele lo lonya lande, wambɔ̂kɔmɔlatɔ l’ɔtɛ, ko atɛndɛ wele l’‘ekata’ kɔ̂lɔtshishawɔ dia mbosha nsɔnyi wamboleka ntɔtɔmɛ.

Nɛmɔ dia Yeso ndo wolo ande w’efula wakikɛnde ɛhɛnyɔhɛnyɔ ɛsɔ amambia Pilato hakoke ko otema ande ambôtshutshuya nto dia nde mbotshungola. Nde l’olui w’anto ate: “Nyulungi, dimi lambuya la ndi le nyu, ne dia nyu mbeya nyati: Dimi hambutanyi la unungu.” Ondo nde ekɔ lo kanyiya ɔnɛ lam’ayowɛna woho wambosowa Yeso, vɔ wayowoka kɛtshi. Yeso ambemala la ntondo k’olui w’anto waha la kɛtshi k’onto, ɔlɔtshi ekata k’atɛndɛ la dihɔndɔ dia beela ndo elungi kande kakɛlanɛ dikila, ko Pilato ambowatɛ ate: “[He onto akɔ nd’oko, NW]!”

Onto akɔ, kânga mbambowôhumuya ndo mbambowɔ̂hɛnyahɛnya, nde mbele onto loleki woke lo lɔsɛnɔ l’anto, mɛtɛ nde mbele onto loleki woke lo tena tshɛ! Nɛmɔ dia Yeso ndo ki kande mɛnyaka wokewoke ande wahomba kânga Pilato shihodia, nɛ dia ɛtɛkɛta ande mɛnyaka dilɛmiɛlɔ ndo kɛtshi kele lande le nde. Joani 18:39–19:5; Mateu 27:15-17, 20-30; Mako 15:6-19; Luka 23:18-25.

▪ Kakɔna kambosala Pilato dia nde pemba woho wa tshungola Yeso?

▪ Woho akɔna wambohemba Pilato ndjanya oma l’onongo?

▪ Ɛngɔ kakɔna kɔsawɔ dia nkɔmɔla onto fimbɔ?

▪ L’ɔkɔngɔ wa vɔ mbodja fimbɔ, woho akɔna wambowɔsɔka Yeso?

▪ Woho akɔna wambohemba Pilato nto dia tshungola Yeso?