Tshapita 133

Yeso amboshidiya olimu wakawosha Nzambi

ANDE ɔngɛnɔngɛnɔ wayonga laso lam’ayonya Yeso Kristo, Nkumekanga ndo Ɔndɔshi wa Ta, Satana nde l’andja ande ɔnɛ wa kɔlɔ lee! Oma lâsɔ kete Diolelo dia wɔladi diaki Kristo di’Ɛnɔnyi Kinunu diambotatɛ!

Oma l’ɛlɔmbwɛlɔ ka Yeso nde la nkumi ya dikanga yayonga kâmɛ la nde, ehandɔ wa l’Armagɛdɔ wayonya mindo tshɛ y’oma lo ta sɔ dia losembwe. Mɛtɛ, ehandɔ wa lanɛ la nkɛtɛ wayota ana l’edja k’etena kɛmɔtshi, ko ana asɔ ndo vɔ lawɔ wayoyokamba olimu w’ɔngɛnɔngɛnɔ wa kadimola nkɛtɛ ekambɔ ka dimɛna efula.

L’edjedja ka wonya, Yeso ayotondja lokema la miliyɔ y’anto yaheyama mbadia oma lo waombo dia ndo vɔ lawɔ ndjɔngɛnangɛna lo Paradiso kɛsɔ ka dimɛna efula. Nde ayosala dikambo sɔ dia kotsha daka nɛ diakandatalaki ndamɛ ate: ‘Etena koyaye kele wanɛ tshɛ wele lo waombo wohɔma . . . wayotomba.’

L’atei a wanɛ wayolola Yeso mbayoyala ndo otshi w’akambo wa kɔlɔ w’edjedja, ɔnɛ lakavu suke la Yeso l’otamba w’asui. Ohɔ dia Yeso akôlake ate: “Mɛtɛ kakotɛmi ɛlɔ nte: Wɛ ayonga la mi lo Paradiso.” Pami kɛsɔ hatotshɔ l’olongo dia tôle oko nkumekanga kâmɛ la Yeso, ndo Yeso hatoyala onto nto dia ndjodjasɛ la nde lo Paradiso ka lanɛ la nkɛtɛ. Koko, Yeso ayonga l’otshi w’akambo wa kɔlɔ ɔsɔ lo yoho yayondowolola dia ndjɔsɛna lo Paradiso ndo yayondôkotshɛ ehomba ande, oyadi wa l’emunyi kana wa lo nyuma, oko wɛnyamidiɔ l’osato wa lo lɛkɛ layela.

Ohokanyiya yema! Oma l’ɛlɔmbwɛlɔ ka Yeso koludi la ngandji, nkumbo k’otondo k’anto—wanɛ wayohandɔ l’Armagɛdɔ, anawɔ, ndo miliyara ya wanɛ wambolwama wayokitanyiya awui ande—vɔ tshɛ wayohama ko ndjoyala kokele. Oma lo tshimbo ya Yeso Kristo, Ɔnande lele nkumekanga, Jehowa ayodjasɛ l’anto lo yoho ya lo nyuma. Oko wadita dui di’oma l’olongo diakoke Joani: “Ndi ayukitula asoi tshe lu ashu awo; nyoi hayuyala ntu, delu hadiuyala ntu, kuyanga ndjawi, kuyanga kandji.” Lanɛ la nkɛtɛ, ndoko onto layɛna pâ kana layotata hemɔ.

L’ekomelo ka Diolelo diaki Kristo di’Ɛnɔnyi Kinunu, akambo tshɛ wayoyala oko waki sangwelo dia Nzambi di’oma l’etatelo lam’akandatɛ Adama l’Eva, atshukanyi wa ntondo, dia vɔ fulanɛ ndo ndodja nkɛtɛ. Mɛtɛ, nkɛtɛ kayolola l’anto w’ɛlɔlɔ ndo wa kokele. Dikambo sɔ diayotshama nɛ dia anto tshɛ wayokondja ɛlɔlɔ w’oma l’olambo wa Yeso w’etshungwelo. Nyɔi k’oma lo pɛkato kakatshe Adama hatoyala nto!

Ɔsɔku mbayoshidiya Yeso kɛnɛ tshɛ kalongamɛ Jehowa oma le nde. Omalɔkɔ, l’ekomelo k’ɛnɔnyi kinunu, nde ayokimɔ Diolelo la nkumbo k’anto wa kokele l’anya wa She. L’etena kɛsɔ mbayotshungola Nzambi Satana nde l’ɛdiɛngɛ ande oma lo difuku diaha l’ekomelo, mbuta ate oma l’eongelo kahawatosala ndoko olimu wate kana wanɛ wambovɔ. Nde ayowatshungola dia vɔ ndjotsha na?

L’ekomelo k’ɛnɔnyi kinunu, l’atei a wanɛ wayɔsɛna lo Paradiso, efula wayonga wanɛ wambolwama wele mbetawɔ kawɔ katahembamaka ndoko lushi. La ntondo ka nyɔi kawɔ, vɔ kombeya alaka wa Nzambi kânga yema ndo kokoka mɛnya mbetawɔ kawɔ l’alaka akɔ. Lâsɔ, l’ɔkɔngɔ wa vɔ mbolɔ ndo mbetshama mɛtɛ ya lo Bible, ayonga wɔdu le wɔ lo Paradiso dia vɔ kambɛ Nzambi aha la wekamu ɔmɔtshi mbaekamɛ. Ko naka Satana kondja diaaso dia mbahemba ɔnɛ kele watshike kambɛ Nzambi, onde vɔ wayotshikala la kɔlamelo l’atei w’ehemba? Dia kadimola dimbola sɔ mbayowotshungola Satana.

Oshwelo wakawasholɛ Joani mɛnyaka ɔnɛ l’ɔkɔngɔ wa Diolelo dia Yeso di’Ɛnɔnyi Kinunu, Satana ayɔkɔsha lemba l’anto laheyama mbala di’aha vɔ kambɛ Nzambi. Ko lâsɔ, lam’ayoshila ohemba wa ndjihelo, Satana, ɛdiɛngɛ ande, la wanɛ tshɛ wayondonganyiya wayoshilama oshiki pondjo pondjo. Koko, wanɛ wahɔkɔ l’ohemba akɔ, wayotshikala la kɔlamelo, wayɔsɛna dia ngɛnangɛna pondjo pondjo l’ɛtshɔkɔ wayowasha Shɛwɔ lele l’olongo.

Mbokɛmaka hwe dia, Yeso ekɔ l’ɔkɛndɛ ndo ayotetemala monga l’ɔkɛndɛ w’ohomba lo ekotshamelo k’asangwelo waki Nzambi. Mɛtɛ, nshi yayaye y’ɔngɛnɔngɛnɔ efula yekɔ la ntondo kaso oma lo kɛnɛ tshɛ kasalande oko Nkumekanga ka woke ka l’olongo kakadjama oma le Nzambi. Koko, hatokoke mbohɛ kɛnɛ tshɛ kakandasale lam’akinde oko onto lanɛ la nkɛtɛ.

Yeso akaye la nkɛtɛ la lolango lande ndamɛ, ndo akatetsha akambo w’endana la She. Lâdiko di’akambo asɔ, nde akɛnya waonga waki Nzambi w’ohomba efula. Etema aso munandemaka lam’asɛdingolaso dihonga diande di’efula, waonga ande wa pami la lokombo, lomba lande laheyama mbɛdika, yewo y’efula ya ndakanya yaki lande, ohetoheto ande, kɛtshi ndo ngandji kakandokaka anto. Mɛtɛ, etema aso ndolaka la lowando lam’ohɔso asui waheyama ndo mbuta wakandasowe dia nkimɔ olambo w’etshungwelo wele paka vɔ oto mbakoka tokimanyiya dia sho kondja lɔsɛnɔ la pondjo!

Mɛtɛ, lo wekelo ɔnɛ wa lɔsɛnɔ la Yeso, tambɛna onto loleki anto tshɛ! Wokewoke ande wambɛnama hwe ndo wekɔ la wolo w’efula. Etema aso totshutshuyaka dia sho mbuta, oko akate Pɔnsɔ Pilato, ɔlɔmbɔdi w’Ose Rɔmɔ, ate: “He onto akɔ nd’oko!” Eelo mɛtɛ, “onto akɔ,” onto loleki woke lo tena tshɛ!

Naka sho mbetawɔ nɛmɔ di’olambo ande w’etshungwelo, kete sho kokaka tshungɔ oma lo wotsho wa pɛkato ndo wa nyɔi kakatahowɔ oma le Adama, ndo Yeso ayoyala “Shesu ka Pundju.” Wanɛ tshɛ walanga kondja lɔsɛnɔ la pondjo pombaka mbeya, aha paka Nzambi oto, koko ndo Ɔnande Yeso Kristo. Tambolongamɛ shate walelo ndo wekelo wa dibuku nɛ ayokokimanyiya dia wɛ kondja ewo kɛsɔ kasha lɔsɛnɔ! 1 Joani 2:17; 1:7; Joani 5:28, 29; 3:16; 17:3; 19:5, NW; Luka 23:43, NW; Etatelu 1:28; 1 Koreto 15:24-28; Enyelo 20:1-3, 6-10; 21:3, 4; Isaya 9:6.

▪ Diɛsɛ diakɔna di’ɔngɛnɔngɛnɔ diayokondja wanɛ wayohandɔ l’Armagɛdɔ l’anawɔ?

▪ Lâdiko dia wanɛ wayohandɔ l’Armagɛdɔ l’anawɔ, wa na nto wayɔngɛnangɛnaka lo Paradiso, ndo lo yoho yakɔna yayoyala Yeso kâmɛ la wɔ?

▪ Woho akɔna wayoyala akambo tshɛ l’ekomelo k’ɛnɔnyi kinunu, ndo kakɔna kayosala Yeso l’etena kɛsɔ?

▪ Lande na kayowotshungola Satana oma lo difuku diaha l’ekomelo, ndo kakɔna kayoyôkomɛ l’ɔkɔngɔ diko nde la wanɛ tshɛ wayowoyela?

▪ Woho akɔna wakoka Yeso ndjâla “Shesu ka Pundju”?