Tshapita 19
Etena Kayolola Ewo Ka Nzambi Lo Kɛtɛ K’Otondo
1, 2. Woho akɔna wakayolana diangɔ diakatonge Jehowa?
OHOKANYIYA dia osangi ɔmɔtshi a woke w’asango oma la shidiya la sanga sango dimɔtshi dia dimɛna dia mamba. Nde ekɔ lo diɔsa ɔnɛ diɔ diekɔ dimɛna efula—nyango sango! Koko, l’otsho, otunyi ande ɔmɔtshi wawoka kandjema amboyodilanya. Mbokɛmaka dia, dikambo sɔ mbishaka osangi akɔ w’asango kandji l’asolo. Nde ayonga la saki k’efula ka mbidja onto ɔsɔ lakayolanya sango diande lo lokanu! Ndo, wɛ kokaka kanyiya dia osangi ɔsɔ w’asango ayonga la saki kalomɔlomɔ ka nɔngɔsɔla ɛngɔ kakandasale dia tɔ monga dimɛna woho wakitɔ oma l’etatelo.
2 Oko osangi w’asango ɔsɔ, Jehowa akasange nyango sango lam’akandalɔngɔsɔla kɛtɛ ko mbidjasha anto lɔkɔ. L’ɔkɔngɔ wa nde tonga pami la omoto, nde akɛnyi olimu ande tshɛ wa la kɛtɛ ate: “dimɛna efula.” (Etatelo 1:31, NW) Adama l’Eva waki ana wa Nzambi hita, ndo nde akawaokaka ngandji. Nde aki la sangwelo dia vɔ monga la lɔsɛnɔ l’ɔngɛnɔngɛnɔ ndo la lotombo lo nshi yayaye. Mɛtɛ, Satana akayowadjaka lo mboka k’ɔtɔmbɔkwɛlɔ, koko etongelo ka dimɛna efula kaki Nzambi kondana lo yoho yahatɔakokaki nɔngɔswama pondjo.—Etatelu 3:23, 24; 6:11, 12.
3. “Lɔsɛnɔ la mɛtɛ” kɛdikɛdi na?
3 Nzambi akɔshi tɛdikɔ dia nde sembola akambo. Nde nangaka dia sho sɛna lo woho wɔtɔnɛ la sangwelo diande di’oma l’etatelo. Lɔsɛnɔ laso la tshenyi tenyi ndo l’ɔhɛnyɔhɛnyɔ kema “lɔsɛnɔ la mɛtɛ,” nɛ dia lɔ halɛdimi kânga yema la lɔnɛ lele lo sangwelo dia Nzambi. “Lɔsɛnɔ la mɛtɛ” lalanga Nzambi sho likondja ele “lɔsɛnɔ la pondjo” lo weoho w’akambo tshɛ wa kokele.—1 Timɔtɛ 6:12, 19, NW.
4, 5. (a) Woho akɔna wayokotshama elongamelo ka Paradiso? (b) Lande na kahombaso kanyiyaka dikambo di’elongamelo kaso ka lo nshi yayaye?
4 Ewo ka Nzambi toshaka ɔkɛndɛ la ntondo ka Jehowa. (Jakoba 4:17) Koko, kanyiya ɛtshɔkɔ wayoyokondja lam’ayoyokamba la ewo ka Nzambi ndo lam’ayoyoyatshutshuyaka dia kondja lɔsɛnɔ la pondjo. L’atei wa Bible, Dui diande, Jehowa Nzambi akasange osato wa dimɛna efula wa woho wayoyala lɔsɛnɔ lo Paradiso ka la kɛtɛ kaya ka suke. Koko mɛtɛ, oko weso anto wa Jehowa, sho hatokambɛ Nzambi paka la saki ka kondja difuto keto. Sho tekɔ lo kambɛ Nzambi nɛ dia sho mbôkaka ngandji. (Mako 12:29, 30) Lâdiko dia lâsɔ, hatokoke kondja lɔsɛnɔ l’ɔtɛ w’ɔnɛ tekɔ lo kambɛ Jehowa. Lɔsɛnɔ la pondjo lekɔ woshasha w’oma le Nzambi. (Romo 6:23) Ayonga ɔlɔlɔ sho kanyiyaka lɔsɛnɔ la ngasɔ nɛ dia elongamelo ka Paradiso toholaka woho wa Nzambi wele Jehowa—nde ekɔ kanga ngandji ndo “ufutshi a wane tshe watûyangaka.” (Heberu 11:6) Elongamelo kahɛtahɛta lo timba taso ndo l’etema aso tokimanyiyaka dia sho mbikikɛ asui wa l’andja waki Satana.—Jeremiya 23:20.
5 Kakianɛ, todje yimba lo elongamelo ka lo Bible ka lɔsɛnɔ la pondjo la lo Paradiso ka la kɛtɛ ka lo nshi yayaye. Woho akɔna wayoyala lɔsɛnɔ lam’ayolola ewo ka Nzambi lo kɛtɛ k’otondo na?
L’ƆKƆNGƆ W’ARMAGƐDƆ—KƐTƐ KAYOKADIMƆ PARADISO
6. Armagɛdɔ kɛdikɛdi na, ndo kakɔna kayolembetshiya dikambo sɔ le anto?
6 Oko wakatadiɛnyi la ntondo, kem’edja nto, Jehowa Nzambi ayolanya dikongɛ di’akambo dia nshi nyɛ dia kɔlɔ. Andja ɔnɛ wekɔ lo tasukana esadi esadi otsha lo kɛnɛ kelɛ Bible ɔnɛ Aramangɛdɔna, kana Armagɛdɔ. Tshɛkɛta shɔ kokaka tshutshuya anto amɔtshi dia vɔ kanyiya ɔnɛ kana ɔsɔ ekɔ odiakelo w’anto tshɛ la bɔmbɛ ya dja ya weolo lam’ayɔlɔshana wedja, koko Armagɛdɔ kema ɔsɔku. Oko wadiɛnya Ɛnyɛlɔ 16:14-16 (NW), Armagɛdɔ ekɔ “ta dia lushi la woke la Nzambi Kanga-Wolo-Tshɛ.” Ɔsɔ ekɔ ta dia la “khumi ya di[k]anga ya la kete,” kana wedja. Kem’edja nto, Ɔn’aki Jehowa Nzambi, Nkumekanga kakasɔnama, ayɔtɔ lo ta diakɔ sɔ. Etombelo w’oma lo ta sɔ wekɔ shikaa. Wanɛ tshɛ walɔshana la Diolelo diaki Nzambi ndo wele l’atei wa dikongɛ diaki Satana dia kɔlɔ wayolanyema. Paka wanɛ wele la kɔlamelo le Jehowa mbayohanda.—Enyelo 7:9, 14; 19:11-21.
7. Lende ayoyala Satana nde l’ɛdiɛngɛ ande l’edja ka Diolelo diaki Kristo di’Ɛnɔnyi Kinunu, ndo ɛlɔlɔ akɔna wayokondja anto oma lo dikambo sɔ?
7 Ohokanyiya dia wɛ ambohanda l’elanyelo ka woke kɛsɔ. Woho akɔna wayoyala lɔsɛnɔ la kɛtɛ, l’andja w’oyoyo wakalake Nzambi na? (2 Petero 3:13) Hatohombe fɔnya ɔfɔnyafɔnya, nɛ dia Bible kekɔ lo totɛ, ndo kɛnɛ katotɛtɔ toshaka ɔngɛnɔngɛnɔ wa mamba. Sho mbekaka ɔnɛ Satana nde l’ɛdiɛngɛ ande wayɔlɛmbiama, wayodjama lo lokanu lo difuku di’aha l’ekomelo l’edja ka Diolelo diaki Yeso Kristo di’Ɛnɔnyi Kinunu. Ditongami sɔ dia kɔlɔ ndo dia ngala hadiotoyashɛ nto, ndo hawotosala akambo wa ngala nto kana pemba dia totshutshuya woho wa sho tɔmbɔkwɛ Nzambi. Ande esambelo lee!—Enyelo 20:1-3.
8, 9. L’andja w’oyoyo, okonde ayoyala lonyangu, hemɔ, la lotshundu?
8 L’etena kakashikikɛma, weoho tshɛ wa hemɔ yayoshila. (Isaya 33:24) L’etena kakɔ kɛsɔ, akanga wa tshumbe wayemala, wayɔkɛndakɛnda, wayolawɔ lowango, ndo wayɔnɔ ngɔmɔ, nɛ dia vɔ wayoyala l’ekolo w’amɛna ndo wa wolo. L’ɔkɔngɔ wa vɔ sɛna ɛnɔnyi efula l’andja awɔ wahawakoke mboka ndoko dui, akanga a poke wayoka nkembo y’ɔngɛnɔngɛnɔ. Akanga a totshungu wayamba heyama lam’ayowɛna andja woludi l’alangi a weoho la weoho. (Isaya 35:5, 6) L’etena kɛsɔ, vɔ wayɛna dungi dia wakiwɔ wa ngandji! Ondo asho awɔ wayofukutana yema l’edja ka tshanda mɔtshi l’asɔi w’ɔngɛnɔngɛnɔ.
9 Ohokanyiya dikambo sɔ! Ndoko talatala ya lo asho nto, ndoko alanga kana ɛkɔmba nto, ndoko ekanga wa hemɔ nto, ndo pitadi yasaka hemɔ ya lo wanyu kana pitadi ya weoho ekina wa hemɔ tshɛ yaya bu! Hemɔ ya lo yimba ndo ɔkɔmwɛlɔ wa lo tokanyi hatohombia anto ɔngɛnɔngɛnɔ nto. Ndoko ana wayoka hemɔ nto. Akambo wa kɔlɔ w’oma lo lotshundu wayɔlɔngɔswama. (Jobo 33:25) Tayoyala l’alemba w’amɛna efula ndo la wolo efula. Pindju tshɛ, tayemɔka oma lo djɔ y’ɔlɔ efula ndo yasalanganya demba, tolodiami la wolo ndo asolo aso walomɔlomɔ dia mɛna lushi l’oyoyo la dimɛna efula ndo dia kamba olimu w’ɔngɛnɔngɛnɔ.
10. Olimu akɔna wayosala wanɛ wayohanda l’Armagɛdɔ?
10 Lɛkɔ, Wanɛ wayohanda l’Armagɛdɔ wayonga la lotumu efula l’ɔngɛnɔngɛnɔ. Vɔ wayokadimola kɛtɛ paradiso. Oseka kiambokambo tshɛ ya l’andja ɔnɛ w’edjedja wambolana yayonyɛma. Wa parkɛ la dikambɔ di’amɛna diayoyala lo ahole waki totombotombo ndo lo kɛtɛ ya kɔlɔ. Anto tshɛ wayonga la mvudu y’eshika ndo y’amɛna. (Isaya 65:21) L’edjedja ka wonya, tenyi sɔ dia lo paradiso ka la kɛtɛ diayodiangana ndo diayohamanɛ polo ndo lam’ayoyala okama a kɛtɛ w’otondo dimɛna woho wakasale Otungi l’ekambɔ k’Ɛdɛna. Ande ɔngɛnɔngɛnɔ wayoyala dia kamba olimu ɔsɔ wa nɔngɔsɔla kɛtɛ lee!
11. Diokanelo diakɔna diayoyala l’asa anto la dihole diodjashiwɔ ndo l’asawɔ la nyama?
11 Akambo asɔ tshɛ wayosalema oma l’ɛlɔmbwɛlɔ kaki Nzambi woho w’aha kɛtɛ, anto la diangɔ diowadingi nanyema. Anto wayoyala la wɔladi lam’asawɔ la nyama. Lo dihole dia ndjidiaka odiakadiaka, anto wayonga l’ɔkɛndɛ wa nama kɛtɛ, wayolama ndo nyama yakɔ. Ohokanyiya dikambo dia lawondo la ana w’ɛkɔkɔ, dimbwe la ɛsɔngɔ wa ngɔmbɛ, wɔlɛ kâmɛ—ndo nyama ya lo ngelo yoyaoka lo lotui tshitshi. Kânga yana ya dikɛnda hatoka nyama ya pango wɔma, ndo wɔladi wa l’andja w’oyoyo hatofukutana oma le anto w’ekonda ndo wa ngala. (Isaya 11:6-8) Ande andja w’oyoyo wa wɔladi wayoyala lee!
ANTO WAMBOTSHIKITANA
12. Woho akɔna wakotshama Isaya 11:9 ɛlɔ kɛnɛ, ndo woho akɔna wayotokotshama divɛsa sɔ lo Paradiso?
12 Isaya 11:9 totɛka lande na kahosalema ndoko kɔlɔ lo kɛtɛ k’otondo. Divɛsa sɔ mbutaka ɔnɛ: “Kete ayulula la ewu ka [Jehowa, NW], uku atululaka ashi a waki.” Divɛsa sɔ mendanaka l’anto, nɛ dia nyama hayokoke kondja “ewo ka [Jehowa, NW]” ndo sala etshikitanelo ɛmɔtshi, lam’ele yɔ nɔmbwamaka la saki ka lôtɔ. Koko, ewo k’Otungi aso tshikitanyaka anto mɛtɛ. Aha la tamu, oma lo woho wakambayɛ la ewo ka Nzambi lo lɔsɛnɔ layɛ, wɛ amboshila sala etshikitanelo ɛmɔtshi. Miliyɔ y’anto yakasale ɔsɔku. Ɔnkɔnɛ, pɔlɔfɛsi kɛsɔ kakatatɛ kotshama le wanɛ wakambɛ Jehowa. Koko, tɔ mɛnyaka nto etena kayonya anto wa l’andja w’otondo waonga tshɛ wele oko wa nyama ndo wa ngala ndo wayoyala anto wa wɔladi pondjo pondjo.
13. Naa ekongelo ka wetshelo kayosalema la kɛtɛ?
13 Lam’ayolola ewo ka Nzambi lo kɛtɛ k’otondo, ayonga diambo dia mamba! Ayonga ekongelo ka woke ka wetshelo kayɔlɔmbwama oma le Nkumekanga Yeso Kristo nde l’anto ande 144 000 wayolɛ kâmɛ lande. “Wɛɔmbɔ” w’eyoyo wayofɔma l’etena kɛsɔ. Ondo wɛɔmbɔ ɛsɔ wayoyala awui wa Nzambi wa lofunda wayeka anto wa lo kɛtɛ k’otondo. (Enyelo 20:12) Anto tshɛ wayeka wɔladi, koko aha akambo w’ata nto. Ekoma tshɛ wadiaka anto wayolanyema pondjo pondjo. (Osambu 46:9) Wanɛ wayodjasɛ l’andja w’oyoyo wayeka woho wa mboka anyawɔ anto ngandji, mbalɛmiya ndo mbasha nɛmɔ.
14. Woho akɔna wayotshikitana andja lam’ayonga anto tshɛ nkumbo ɔtɔi kele kâmɛ?
14 Anto wa l’andja w’otondo wayoyala nkumbo ɔtɔi kele kâmɛ. Ndoko dikambo diayofukutanya kâmɛ kɛsɔ ndo nkumbo kɛsɔ. (Osambu 133:1-3) Ndoko luudu l’onto ɔmɔtshi layodihama la sapi nto woho w’aha wevi mbiva. Wɔladi wayolola l’etema w’anto tshɛ, l’atei wa nkumbo tshɛ, ndo l’ahole tshɛ wa lo kɛtɛ.—Mika 4:4.
EOLWELO K’ƆNGƐNƆNGƐNƆ
15. Naa elui ehende w’anto wayolɔ?
15 L’edja ka Diolelo sɔ di’Ɛnɔnyi Kinunu mbayosalema eolwelo k’anto. Wanɛ wakasalɛ nyuma k’ekila kaki Nzambi, mbuta ate wolo wakamba olimu, pɛkato l’okonda, ndo wakasale ditshelo diahɔtɔnɛ l’akambo wasala nyuma kakɔ kana l’ɛlɔmbwɛlɔ katɔ ko hawoyatshumuya, hawotolɔ. (Mateu 23:15, 33; Heberu 6:4-6) Mɛtɛ, Nzambi mbayɔsa tɛdikɔ dia mbeya wanɛ wakasalɛ nyuma k’ekila pɛkato. Koko, elui ehende w’anto wotshikitanyi wayolɔ—“antu w’ololo la antu wa kolo.” (Etsha 24:15) Lam’ele eolwelo kayosalema l’ɔnɔngɔ, ekɔ ɔlɔlɔ sho mbuta ɔnɛ anto wa ntondo wayolɔ lanɛ la kɛtɛ ele anto w’ɔlɔlɔ, wanɛ wakakambɛka Jehowa la kɔlamelo.—Heberu 11:35-39.
16. (a) Wa na wayoyala l’atei w’“antu w’ololo” wayolɔ la kɛtɛ? (b) Anto akɔna wa kɔlamelo wa lo nshi ya ntondo walekayɛ nanga dia tɛnana lawɔ, ndo lande na?
16 Lo dihole dia mboka sango y’ata, y’efukutanu, la ya nyɔi, ekambi wa Jehowa wayolongolaka sango y’amɛna y’eolwelo. Ayonga ɔlɔ wa mamba dia mboka ɔnɛ apami la amato anɛ wambolɔ: Abɛlɛ, Ɛnɔka, Nɔa, Abarahama, Sara, Jɔbɔ, Mɔsɛ, Rahaba, Ruta, Davidi, Elidja, la Ɛsta. Ande ɛkɔndɔ w’amɛna wayowɔkɔndɔlaka, ndo akambo w’ɔm’ɔmɔ w’endana l’ɛkɔndɔ efula wofundami l’atei a Bible lee! Aha la tamu, vɔ l’anto w’ɛlɔlɔ wakavu lo nshi nyɛ wayoyala la saki k’efula ka mbeya woho wakakomɛ dikongɛ diaki Satana nɛ ndo woho wakatombola Jehowa lokombo lande l’ekila la nyindja lowandji lande.
17. Ekimanyielo kakɔna kayokondja anto akina wayolɔ oma le akanga wa kɔlamelo?
17 Anto wa kɔlamelo asɔ wayokimanyiya anto akina efula l’edja k’etenyi ka hende k’eolwelo, lam’ayotshungɔ miliyara y’“antu wa kolo” oma lo lokanu la nyɔi! Efula k’anto kokondja diɛsɛ dia mbeya Jehowa. Satana ‘akawaetɛka totshungu lo timba tawɔ.’ (2 Koreto 4:4) Koko, elimu waki Satana wayolanyema. Anto wa kɔlɔ wayolɔ lo kɛtɛ ka dimɛna efula ndo ka wɔladi. Vɔ wayolongwama oma le anto wakayalɔngɔsɔla dia mbaetsha akambo wa Jehowa ndo wa Yeso Kristo, Ɔn’ande lele owandji. Etena kayeya miliyara ya wanɛ wayolɔ Otungi awɔ ndo kayowoyowoka ngandji, ewo ka Jehowa kayolola lo kɛtɛ k’otondo lo yoho yahatayalaka ndoko lushi.
18. Oko wakanyiyayɛ, ngande wayoyoka lam’ayoyolongola wakiyɛ wa ngandji wayolɔ?
18 Ande ɔngɛnɔngɛnɔ wayotela eolwelo lee! Akɔna ahatongaka la pâ k’oma le nyɔi, otunyi aso na? Mɛtɛ, akɔna aki kondjatshatsha la lonyangu etena kakahembɔ dimama dia ngandji kana lɔngɛnyi lam’akavu onto ɔmɔtshi lokande ngandji la hemɔ, la lotshundu, la wâle ɔmɔtshi, kana la dikambo dimɔtshi dia ngala na? Ohokanyiya ɔngɛnɔngɛnɔ wayonga l’etena kɛsɔ lam’ayotohomana anto lo Paradiso. Ambutshi wa amato la ambutshi wa apami, ana w’apami la ana wa amato, angɛnyi la ewotɔ, wayokumbatanɛ, wayɔla hakoke ndo wayolela alelo w’ɔngɛnɔngɛnɔ.
ANTO WAYA KOKELE!
19. Dihindo diakɔna diayosalema l’edja ka Diolelo di’Ɛnɔnyi Kinunu?
19 L’edja ka Diolelo di’Ɛnɔnyi Kinunu, dihindo dia diambo efula diayosalema. Le anto, ondo diɔ diayoyala dikambo dioleki ɔngɛnɔngɛnɔ dia lo Diolelo diaki Kristo di’Ɛnɔnyi Kinunu. Jehowa ayodjangɛ Ɔn’ande dia nde mbisha apami la amato tshɛ wele la kɔlamelo ndo l’okitanyiya, ɛtshɔkɔ w’oma l’olambo w’etshungwelo. Oma lo yoho shɔ mbayonyɛma pɛkato tshɛ ndo mbayokoma anto tshɛ kokele.—1 Joani 2:2; Enyelo 21:1-4.
20. (a) Kakɔna kalembetshiya dikambo di’ɔnɛ anto wayoyala kokele? (b) Ehandɔ wa l’Armagɛdɔ la wanɛ wayolɔ, wayotatɛ sɛna lɔsɛnɔ la mɛtɛ mɛtɛ etena kakɔna?
20 Kokele! Dikambo sɔ alembetshiyadiɔ na? Dikambo sɔ diayolembetshiya ɔnɛ anto wambokalola nto lo lɔsɛnɔ laki l’Adama l’Eva la ntondo ka vɔ salɛ Jehowa Nzambi pɛkato. Lo demba, lo yimba, lo saki yawɔ, lo tokanyi, lo nyuma—lo weoho tshɛ wakokaso kanyiya—anto wa kokele wayoyaɔtɔnganyiyaka l’ɛlɛmbɛ wa Nzambi tshɛ. Ko onde, l’etena kɛsɔ anto tshɛ wayoyala woho ɔtɔi? Kema, aha ɔsɔku! Diangɔ diakatonge Jehowa—esongo, alɛmbɔlɛmbɔ, nyama—diangɔ sɔ tshɛ tɛnyaka ɔnɛ Nzambi nangaka diangɔ dia weoho la weoho. Anto wa kokele wayotoyala la weoho wa lonto lotshikitanyi ndo l’akoka wotshikitanyi. Onto l’onto ayoyala la lɔsɛnɔ woho wakalɔngɔsɔla Nzambi dia lɔ monga. Enyelo 20:5 mbutaka ɔnɛ: “Akina wakavu kundjala la lumu, edja ndu lam’akashili deku kinunu diako.” Oko olui a woke w’anto wayohanda l’Armagɛdɔ, wanɛ wayolɔ wayoyoyala la lɔsɛnɔ la mɛtɛ mɛtɛ paka lam’ayowokoma kokele, aha la pɛkato.
21. (a) Kakɔna kayosalema l’ekomelo ka Diolelo diaki Kristo di’Ɛnɔnyi Kinunu? (b) L’ɔkɔngɔ diko, kakɔna kayokomɛ Satana nde la wanɛ wayɔtɔ l’ɔnɔngɔ ande?
21 Anto wa kokele wayodjama l’ohemba wa komelo. L’ekomelo ka Diolelo di’Ɛnɔnyi Kinunu, Satana nde l’ɛdiɛngɛ ande wayotshungolama oma lo difuku diaha l’ekomelo l’edja ka tshanda mɔtshi ndo wayokondja diaaso woho wa vɔ mbidja weolo awɔ wa komelo dia mbekola anto oma le Jehowa. Anto amɔtshi wayetsha saki ya kɔlɔ la ntondo ka ngandji ka Nzambi, koko ɔtɔmbɔkwɛlɔ ɔsɔ hawotoviya. Jehowa ayodiaka anto asɔ wa lohehe kâmɛ la Satana nde l’ɛdiɛngɛ ande tshɛ. L’etena kɛsɔ, atshi wa kɔlɔ tshɛ wayolanyema pondjo pondjo.—Enyelo 20:7-10.
KAKƆNA KAYOYOSALA?
22. Kakɔna kalongamɛyɛ dia tosala lo Paradiso?
22 Lɔsɛnɔ la pondjo layokitshama la ntondo ka wanɛ woka Jehowa Nzambi ngandji ndo wayodjasɛ lo Paradiso ka la kɛtɛ. Hatokoke ndo kanyiya ɔngɛnɔngɛnɔ wayowoka, koko ndo wɛ lawɔ kokaka kahana lawɔ ɔngɛnɔngɛnɔ ɔsɔ. Mishiki, disɛlasɛla, elimu w’anya—akambo wayosala anto wa kokele wayoleka ndo elimu woleki amɛna wakasale wa nomb’ewo yoleki timba l’andja ɔnɛ w’edjedja! Lâdiko di’akambo asɔ tshɛ, anto wayoyala kokele ndo wayokondja etena kahakomɛki pondjo. Ohokanyiya kɛnɛ kayoyokoka sala lam’ayoyonga kokele. Ohokanyiya ndo akambo wayeka anyayɛ anto lo kɛnɛ k’endana la diangɔ diakatonge Jehowa—oma lo miliyara y’elui a weke wa tɔ̂tɔ polo ndo lo tokamakama toleki totshitshɛ. Oseka dikambo tshɛ diayosala anto diayɔngɛnyangɛnya otema wa Jehowa, Shɛso le l’olongo loludi la ngandji.—Osambu 150:1-6.
23. Lande na kele anto hawotɛna lɔsɛnɔ la lo Paradiso oko disanya dimɔtshi?
23 L’etena kɛsɔ, ndoko onto layɛna lɔsɛnɔ oko disanya dimɔtshi. Lɔ layotalekaka ndjâla dimɛna l’edja kayotetaka nshi. Ewo ka Nzambi kema l’ekomelo. (Romo 11:13) L’edja ka lɔsɛnɔ la pondjo, akambo wa mbeka wayoyalaka efula nshi tshɛ ndo akambo w’eyoyo wa sala wayongaka. (Undaki 3:11) Lam’ayoyotetemalaka la mbeka akambo wa Jehowa Nzambi, wɛ ayotetemalaka sɛna—aha l’edja k’ɛnɔnyi ɛmɔtshi eto koko pondjo pondjo!—Osambu 22:26.
24, 25. Lande na kahombayɛ ndjaɔtɔnganyiya la ewo ka Nzambi kakianɛ?
24 Shi sunganaka wɛ mbidja weolo ayɛ tshɛ kana sala kɛnɛ tshɛ kahombama dia wɛ kondja lɔsɛnɔ l’ɔngɛnɔngɛnɔ la lo nshi yayaye lo paradiso ka la kɛtɛ? Eelo mɛtɛ! Jehowa ambokosha sapi k’otsha lo lɔsɛnɔ la dimɛna efula la lo nshi yayaye. Sapi kɛsɔ kɛdikɛdi ewo ka Nzambi. Onde wɛ ayokamba latɔ?
25 Naka wɛ mbokaka Jehowa ngandji, kete wɛ ayɔngɛnangɛna dia sala lolango lande. (1 Joani 5:3) Ande ɛtshɔkɔ wayoyokondja lam’ayoyotetemala sala dikambo sɔ lee! Naka wɛ kamba la ewo ka Nzambi, kete tɔ kokaka kosha lɔsɛnɔ l’ɔngɛnɔngɛnɔ efula kânga l’andja ɔnɛ w’ofukutanu. Ndo nto, difuto dia lo nshi yayaye diekɔ woke efula, nɛ dia ɔnɛ mbele ewo katɔla otsha lo lɔsɛnɔ la pondjo! Kakianɛ, etena k’ɔlɔlɔ ka wɛ mbɔsa tɛdikɔ kambokoka. Ɔsa tɛdikɔ dia wɛ ndjaɔtɔnganyiya la ewo ka Nzambi. Ɛnya ngandji kokayɛ Jehowa. Lɛmiya lokombo lande l’ekila ndo ɛnya dia Satana ekɔ kanga kashi. Lo wedi ande, Jehowa Nzambi, Kiɔkɔ ya lomba la mɛtɛ ndo y’ewo, ayɔngɛnangɛna efula lo dikambo diayɛ. (Jeremiya 31:3; Zefaniya 3:17) Nde ayokoka ngandji pondjo pondjo!
HEMBA EWO KAYƐ
“Lɔsɛnɔ la mɛtɛ” kɛdikɛdi na?
L’ɔkɔngɔ w’Armagɛdɔ, kakɔna kayosalema la kɛtɛ?
Wa na wayolɔ la kɛtɛ?
Woho akɔna wayokoma anto tshɛ kokele ndo ndjodjama l’ohemba wa komelo?
Naa elongamelo kele layɛ lo dikambo dia Paradiso?
[Picture on page 188, 189]
Onde wɛ ekɔ lo nongamɛ dia sɛna lo Paradiso, etena kayolola ewo ka Nzambi lo kɛtɛ k’otondo?