Ɛdiɛngɛ wekɔ andjakanyi!
Satana nde l’ɛdiɛngɛ wokongaka anto w’esehe ndo waale. Lo nshi y’edjedja, Satana akadiake dongalonga diaki Jɔbɔ onto laki la kɔlamelo. Oma laasɔ, nde akayodiaka ana dikumi waki Jɔbɔ, akatome “lɔpɛpɛ la wolo” lakanyukola luudu laki ana lɔkɔ. Ndo nto, Satana akatatsha Jɔbɔ “atshutshu wa kandji oma lo dikaka dia lo lokolo polo lo shɔdi y’ɔtɛ.”—Jɔbɔ 1:7-19; 2:7.
Lo nshi ya Yeso, ɛdiɛngɛ waketɛ anto amɔtshi nyumi ndo totshungu. (Mateo 9:32, 33; 12:22) Vɔ wakasoya pami kɛmɔtshi kakawatshutshuyaka dia ndjahomuya mpota la ave. (Makɔ 5:5) Wakakonya nto dikɛnda dimɔtshi dia pami dia mbida ekoko, kɔka la nkɛtɛ ndo “wakoohahanya la wolo oko onto lafumboya fudu.”—Luka 9:42.
Lo nshi y’edjedja, ɛdiɛngɛ wakatatshaka anto hemɔ ndo wakahohanyaka anto akina
Oko wakiwɔ lo nshi y’edjedja, Satana l’ɛdiɛngɛ wekɔ akanga w’esehe efula. Lo mɛtɛ, akambo wa kɔlɔ wasalawɔ wambohama efula la nkɛtɛ ntatɛ etena kakawakashema oma l’olongo. Akambo wa kɔlɔ wasalema l’andja w’otondo mɛnyaka kɔlɔ kawɔ. Vɔ tatshaka anto amɔtshi hemɔ. Vɔ ndashaka anto engondo kana mbaɛnyaka alɔ wa kɔlɔ. Amɔtshi wekɔ lo mbeyana la wamato la wolo, ndo vɔ tshutshuyaka anto amɔtshi dia mbidjɔ aladi, ndjaka kana ndjadiaka.
Nshi nyɛ, ɛdiɛngɛ konyaka anto amɔtshi dia monga ngala, ndashaka anto akina engondo lo mbaɛnya alɔ wa kɔlɔ ndo wa wɔma
Lintina, ladjasɛ la Suriname kɔndɔlaka dia ɔdiɛngɛ ɔmɔtshi, kana nyuma ka kɔlɔ kakadiake anto 16 wa lo nkumbo kande ndo wakɔhɛnyahɛnyaka lo demba ndo lo yimba l’edja ka ɛnɔnyi 18. Lo ndjela kɛnɛ kakokomɛ, nde mbutaka dia ɛdiɛngɛ “nangaka nsoya anto wahetawɔ awui awɔ polo ndo lo mbadiaka.”
Koko Jehowa ekɔ la wolo wa nkokɛ ekambi ande oma le Satana.—Tokedi 18:10.