Paradiso ka la nkɛtɛ

Jehowa ayonya akambo wa kɔlɔ tshɛ wasala Satana lanɛ la nkɛtɛ. Jehowa aketɛ Yeso Nkumekanga ka nkɛtɛ k’otondo. L’ɛlɔmbwɛlɔ kande, nkɛtɛ k’otondo kayokadimɔ paradiso.—Danyɛlɛ 7:13, 14; Luka 23:43.

Jehowa akalake akambo anɛ:

• MBO YA NDƐ YAYONGA EFULA: “Nkɛtɛ yayɔngɔnya diangɔ;Nzambi, ɛɛ, Nzambi kaso ayotɔtshɔkɔla.” “Mbo ya ndɛ yayoyala efula la nkɛtɛ; yɔ yayonga tshavutshavu lo tɔsɔdi t’akona.”—Osambo 67:6; 72:16.

• ATA HAWOTOYALA NTO: “Nyoye nyoyende etsha wa Jehowa, woho wamondosala akambo wa diambo la nkɛtɛ. Nde ekɔ lo nkomiya ata lo nkɛtɛ k’otondo.”—Osambo 46:8, 9.

• ANTO WA KƆLƆ HAWOTOYALA NTO: “Nɛ dia anto wa kɔlɔ wayolanyema . . . Etena ka tshitshɛ keto kambotshikala, ko kanga kɔlɔ hatonga nto; wɛ ayoshishima lo dihole diande, ko nde hatonga nto.”—Osambo 37:9, 10.

• 

  HEMƆ, ƆKƐYI, KANA NYƆI HATOYALA NTO: “L’etena kɛsɔ washo w’akanga wa totshungu wayɔsɛna, ndo atoyi w’akanga wa mpoke wayoka. L’etena kɛsɔ kanga etshumbe ayolembɔlembɔ oko mpele, ndo lolemi la kanga lomi layoda ekoko w’ɔngɛnɔngɛnɔ.”—Isaya 35:5, 6.

  “Nzambi ndamɛ ayoyala kaamɛ la wɔ. Nde ayokitola asɔyi tshɛ oma lo washo awɔ, nyɔi hatoyala nto, otanda hatoyala nto, delo hatoyala nto, kaanga kandji hatoyala nto. Akambo wa ntondo wamboshila.”—Ɛnyɛlɔ 21:3, 4.

Otshikitanyi la Satana ndo ɛdiɛngɛ, Jehowa hataka kashi pondjo. Kɛnɛ tshɛ kalakande kotshamaka. (Luka 1:36, 37) Jehowa kookaka ngandji ndo nde nangaka wɛ nsɛna lo paradiso kayondela lanɛ la nkɛtɛ. Ɔnkɔnɛ, ɛnana l’Ɛmɛnyi wa Jehowa dia mbeka akambo wa mɛtɛ w’ohomba watanema l’Ɔtɛkɛta wa Nzambi. Naka wɛ nkamba l’akambo wa mɛtɛ lo lɔsɛnɔ layɛ, kete wɛ ayotshungɔ oma l’akambo wa kashi, dikanyiyakanyiya ndo wɛ ayonga la ewo. L’ekomelo wɛ ayotshungɔ oma lo lɔhɔmbɔ la pɛkato ndo nyɔi. Yeso akate ate: “Nyayeya akambo wa mɛtɛ, ko akambo wa mɛtɛ wayonyotshungola.”—Joani 8:32.