Wekelo 5

Angɛnyi wa Nzambi wayɔsɛna lo paradiso

Paradiso hatɔfɔna l’andja wasɛnaso ɔnɛ. Nzambi konanga dia nkɛtɛ kɛnɛ ndolanɛ l’efukutanu, ɛhɛnyɔhɛnyɔ, pâ ndo asui. Lo nshi yayaye, Nzambi ayokadimola nkɛtɛ paradiso. Ngande wayonga Paradiso kakɔ na? Tênde kɛnɛ kata Bible:

Anto w’ɔlɔlɔ. Angɛnyi wa Nzambi mbayodjasɛ lo paradiso. Vɔ wayotshanɛka akambo w’ɔlɔlɔ. Vɔ wayoyelaka mboka ya Nzambi y’ɔlɔlɔ.—Tukedi 2:21.

Mbo ya ndɛ yayonga tɔ. Ndjala hatonga lo Paradiso. Bible mbutaka ɔnɛ: ‘Mbo ya ndɛ yayonga tɔ la nkɛtɛ.’—Osambu 72:16.

Mvudu y’amɛna ndo olimu w’ɔngɛnɔngɛnɔ. Lo Paradiso ka la nkɛtɛ, nkumbo tshɛ ayonga la luudu latɔ hita. Onto tshɛ ayonga l’olimu wawosha ɔngɛnɔngɛnɔ wa mɛtɛ.—Isaya 65:21-23.

Wɔladi wayonga l’andja w’otondo. Anto hawɔlɔki ata nto pondjo ndo hawovɔki nto la ta. Ɔtɛkɛta wa Nzambi ate: “Nzambi ayokumiya ata.”—Osambo 46:8, 9, NW.

Alemba w’amɛna. Bible mbutaka ɔnɛ: ‘Ndoko onto lodjashi [lo Paradiso] layota ate: Lekɔ la hemɔ.’ (Isaya 33:24) Ndo nto, ndoko onto layonga l’ɛkɔmɔ kana tshungu kana ehoke kana lomi.—Isaya 35:5, 6.

Pâ, shɔkɔ, la nyɔi ayokomɛ. Ɔtɛkɛta wa Nzambi mbutaka ɔnɛ: ‘Nyɔi hatonga nto, oyadi alelo kana ndjawi. Akambo wa ntondo wamboshila.’—Enyelo 21:4.

Anto wa kɔlɔ hawonga nto. Jehowa ate: “Antu wa kolo wayunyema uma la kete, akanga w’ukadi wayukhundwama uma loko.”—Tukedi 2:22.

Anto wayokana ngandji ndo wayɔlɛnyana. Awui wa wɛngiya, shɔkɔ, lokaki, ndo lohetsho hatonga nto. Anto wayonga kâmɛ ndo wayɔtɔnganyiya nsɛnɔ yawɔ la mboka ya Nzambi ya losembwe.—Isaya 26:9.