Etini 1
Onde na Nzambi tokaneka mete ondo?
1, 2. Dimbola diakona diayaoka anto lo kene kendana la Nzambi, ndo lande na?
LO ETENA kimotshi ka loseno laye, ondo wakayambola mbala kimotshi wate: “Ohondonga Nzambi latokane eko, lande na kahombande mbetawo paa y’efula ngane na?” Sho tshe tambenaka paa kana sho mbeyaka onto omotshi lakadiene.
2 Lo mete, anto wambodiene la kandji ndo ohenyohenyo l’asolo lo kene katomba oma lo ata, akambo w’osehe, odiakanelo, diengiyelo, wola, hemo, kame ndo nyoi y’anto wa kandji lo nshi y’okondo wa loseno l’onto. Paka lo eleko keso k’akumi ahende kene kito, oleki miliyo 100 y’anto wambovo lo ata. Kama la kama ya miliyo y’anto akina wakahomo wa mpota ndo shisha mvudu kame ndo diango diawo. Lo tena diaso ne akambo wa woma efula wambosalema, akambo ako wambela ohenyohenyo l’asolo le anto efula, alelo, ndo efula k’anto kahewoma mbade wamboshisha dikongelo diawo.
3, 4. Tokanyi takona tele l’anto efula wonya wetawo Nzambi dia paa yônge na?
3 Amotshi waya la lonyangu efula ne dia vo kanyiyaka one endaka Nzambi eko, kete nde hatokane mete. Akina fonyaka one Nzambi kema. Enyelo, pami kimotshi kakavusha angenyi ande ndo nkumbo kande oma lo ohenyohenyo waki lasa waoho w’anto etena kaki Ta dia Ntondo dia andja w’otondo lo ndôma akayambola ate: “Lende aki Nzambi etena kene kakiso la dihombo diande na?” Pami kikina kakake oma lo odiakelo a wa miliyo y’anto oma le ase nazi lama wakalomaka Ta Diahende dia andja w’otondo, aki l’otshutshumalo w’efula dia fonu nye yakandatekolaka ko akate ate: “Ohondonga nyu kokaka nombola otema ami, nyohoka dia weko ololo.”
4 Omaloko, anto efula hawoke woho akona wele Nzambi kanga ololo mbetawoka dia akambo wa kolo wasalemi. Vo ndjâmbolaka dia kana Nzambi tokaneka mete ndo kana nde eko. Efula kanyiyaka one asui hawoshilaki lo loseno l’onto.
[Osato wa lo lɛkɛ 2, 3]
Onde andja w’oyoyo wamboshila fonu waya suke?