Etini 2
Kete yamboshila fonu
1, 2. Tokanyi takona totshikitani tele l’anto efula na?
TENA efula, l’andja w’otondo wa miliyo y’anto weko la tokanyi totshikitani. Vo weko lo mena angedingedi wa andja w’ongenongeno lo nshi yayaye. Vo mbutaka dia paka lane la kete ndo kema edja nto mbayonga andja wele akambo wa ngala kame ndo fonu ayoshila. Vo suyaka dia kema edja nto akambo wa kolo wayoshila ndo andja w’oyoyo mbayoshikikala l’ahole tshe. Vo komaka ndo lo mbuta one etshina ka andja w’oyoyo keko lo mbikama nshi nye!
2 Anto ako mbetawoka one lo andja w’oyoyo honga nto ata, akambo w’esehe, odiakanelo, shonodi, ndo wola. Ayonga andja waha la hemo, aha kandji, aha alelo, ndo waha la nyoi. Lo etena kako, anto wayonga kokele ndo wayosena pondjo l’ongenongeno lo paradiso ka la kete. L’ololo tshe, wane wakavu wayolo ndo wayonga la diaaso dia sena pondjo pondjo!
3, 4. Bonde kele anto ako mbetawoka l’otema otoyi tokanyi tele lawo na?
3 Lokanyi l’ololo la kene kayoya keso onde dɔ mbedio kana ekanyikanyi? Kema, aha ngaso. Lo l’eko la etshina lo oshikikelo w’one: eyelo ka Paradiso eko dikambo dia mete. (Heberu 11:1) Bonde kele anto ako mbetawoka osoku na? Ne dia daka so ndja oma le kanga kudu tshe ndo Otungi w’andja w’otondo.
4 Lo kene kendana la alaka waki Nzambi, Bible mbutaka ate: “Ndoko dui otoyi dia lateyi wa awui w’ololo wakanyote Jehowa Nzambi kanyu diaki kôkotshama. Vo tshe wakakotshama le nyu. Ndoko otoyi a lateyi awo diakatshikala anyanya.” “Unyashungu kema untu dia ndi mvuta kashi . . . Diui diakandatshi, ku ndi haditshi? Kana akambu wakandatshi, ku ndi hâshidiya?” “Latuyalaka Kanga lulimbilimbi akatshibi ati: Mete, kene kakamakani, kayuyala; La kene kakamasanguya, [kayokotshama, NW].”—Jashua 23:14, NW; Walelu 23:19; Isaya 14:24.
5. Wambola akona wele l’ohomba w’okadimwelo na?
5 Omaloko, ohondonga didjango diaki Nzambi aki dia mbete kete nye paradiso kele kema fonu loko, lande na kakandetawo akambo wa kolo na? Lande na kambondokonga enonyi tonga tosamalo polo ndo kakiane dia nde nongosola akambo wa kolo na? Onde deko samalo di’asui ne menyaka one Nzambi hatokane, kana one nde kema?