Wekelo 10
Ditshelo Diahetsha Nzambi
Woho akɔna wɔsayɛ akambo wata Nzambi ɔnɛ wekɔ kɔlɔ? (1)
Weoho akɔna wa dieyanelo wele kɔlɔ? (2)
Woho akɔna wahomba Okristo mbɔsa kashi lo asho ande? (3) tɔkɛnyɔ ta falanga? (3) wovi? (3) akambo wa ngala? (4) ɔtɛmwɛlɔ w’ɛdiɛngɛ? (5) wodjwelo wa wanu? (6)
Woho akɔna wakoka onto tshungɔ oma lo ditshelo sɔ? (7)
1. Ekambi wa Nzambi nangaka kɛnɛ kele ɔlɔlɔ. Koko, vɔ pombaka nto mbeka dia mpetsha kɛnɛ kele kɔlɔ. (Osambu 97:10) Kɛdikɛdi vɔ pombaka mbewɔ ditshelo dimɔtshi diahetsha Nzambi. Naa ditshelo dimɔtshi dia l’atei adiɔ na?
2. Monanyi: Mbeyana l’onto la ntondo ka tshuki, loseka, dieyanelo dia la nyama, dieyanelo dia l’owotɔ ayɛ, ndo dieyanelo dia l’asa pami la pami, akambo asɔ tshɛ wekɔ pɛkato ya mamba le Nzambi. (Akambu w’Asi Lewi 18:6; Romo 1:26, 27; 1 Koreto 6:9, 10) Naka anto ahende hawotshukanyi koko wadjasɛkɔ kâmɛ, kete vɔ pombaka kakitɔna kana ntshɔ dia tofundja diwala diawɔ lo buku dia lɛɛta.—Heberu 13:4.
3. Kashi, Ɔtwɛlɔ w’Owale, Wovi: Jehowa Nzambi hataka kashi. (Tito 1:2) Anto walanga mbetawɔma lende pombaka mbutaka paka mɛtɛ keto. (Tukedi 6:16-19; Kolosai 3:9, 10) Weoho tshɛ wa tɔkɛnyɔ ta falanga sokoyamaka oma lo lokaki. Omalɔkɔ, Akristo hawɔkɛnya weoho tshɛ w’owale, ɛnyɛlɔ oko lɔtɛri, tɔmbɔla, ɔsɛmanelo wa lowango la falasa, la longanda la falanga. (Efeso 5:3-5) Ndo, Akristo hawove. Hawosombe ɛngɔ keyawɔ ɔnɛ ka lova kana mbɔsa ɛngɔ kakana aha la dikimɔ.—Etumbelu 20:15; Efeso 4:28.
4. Nkɛlɛ ka Tshambandeko, Akambo wa Ngala: Nkɛlɛ k’efula kokaka sokoya onto dia nde salɛ okina kɔlɔ kana mbodiaka. (Etatelu 4:5-8) Kanga ngala hakoke ndjâla ɔngɛnyi wa Nzambi. (Osambu 11:5; Tukedi 22:24, 25) Ekɔ kɔlɔ sɔmbɔya kana kaloya kɔlɔ lo kɔlɔ lam’atondjɛ anto akina.—Tukedi 24:29; Romo 12:17-21.
5. Tɛndɛlɔ w’asombo la ɔtɛmwɛlɔ w’ɛdiɛngɛ: Anto amɔtshi tɛndɛ̂ka asombo kana ɛdiɛngɛ dia vɔ kondja wolo wa kɔnɔya anto hemɔ. Anto akina mbâtɛndɛka dia tatsha atunyi awɔ hemɔ kana mbadiaka. Satana kasala akambo asɔ tshɛ edimidimi. Omalɔkɔ, Akristo hawohombe ndjadja l’akambo asɔ tshɛ. (Euhwelu k’Elembe 18:9-13) Naka sho ndjâsukanya suke suke la Jehowa, kete vɔ koyangaka weoho tshɛ wa tosenga kana todja etshii, hatɔki pondjo.—Tukedi 18:10.
6. Wodjwelo wa Wanu: Kema kɔlɔ nɔ yema ya vinyɔ, biɛlɛ, kana alɔfu akina wa wolo. (Osambu 104:15; 1 Timote 5:23) Koko wodjwelo a wanu kana ɔnwɛlɔ wa tshambandeko ekɔ dikambo dia kɔlɔ lo asho wa Nzambi. (1 Koreto 5:11-13; 1 Timote 3:8) Nɔ wanu lo tshambandeko mbeyaka fukutanya yonge yayɛ ndo kohandjolɛ nkumbo. Otshelo ɔsɔ kokaka kokonya esadi eto lo wɛ nkɔ l’ehemba ekina.—Tukedi 23:20, 21, 29-35.
7. Anto watsha ditshelo diata Nzambi ɔnɛ diekɔ kɔlɔ ‘hawotokita Diolelo diaki Nzambi.’ (Ngalatiya 5:19-21) Naka mɛtɛ wɛ mbokaka Nzambi ngandji ndo nangaka mbɔngɛnyangɛnya, kete wɛ kokaka mangana la ditshelo dia ngasɔ. (1 Joani 5:3) Eka dia wɛ mpetsha kɛnɛ kata Nzambi ɔnɛ kekɔ kɔlɔ. (Romo 12:9) Okanaka l’anto wele la mbekelo yɔtɔnɛ la lolango la Nzambi. (Tukedi 13:20) Diokanelo dia l’Akristo wambotshunda wɛɔngɔ mbeyaka ndjâla kiɔkɔ y’ekeketshelo. (Jakoba 5:14) Lâdiko di’akambo asɔ tshɛ, yaɛkɛ l’ekimanyielo ka Nzambi kakokayɛ kondja oma lo dɔmbɛlɔ.—Filipi 4:6, 7, 13.
[Diombwɛlo di’osato wa lo lɛkɛ 20, 21]
Nzambi mpetshaka wodjwelo wa wanu, wovi, tɔkɛnyɔ ta falanga, l’akambo wa ngala