Wekelo 4
Woho wakokayɛ mbeka awui wa Nzambi
Wɛ kokaka mbeka awui wa Nzambi lo mbadiaka Bible. Aya deko aha nɛ, Nzambi akasɔnɛ anto amɔtshi dia vɔ funda tokanyi tande. Efundelo ɛsɔ mbelamɛka ɔnɛ Bible. Ɛlɔ kɛnɛ, sho mbekaka awui wa Nzambi lo mbadiaka Bible. Lam’ele ɔtɛkɛta kana losango laki Jehowa mbele lo Bible, tɔ mbelamɛka nto ɔnɛ Ɔtɛkɛta wa Nzambi. Sho kokaka mbetawɔ kɛnɛ kata Bible nɛ dia Jehowa hataka kashi. ‘Nzambi hataka kashi pondjo.’ (Heberu 6:18) Akambo wa mɛtɛ mbele l’Ɔtɛkɛta wa Nzambi.—Joani 17:17.
Bible ekɔ woshasha ɔmɔtshi wa nɛmɔ efula wakatosha Nzambi. Tɔ kekɔ oko mukanda wotome ombutshi wa ngandji anande. Tɔ totɛka dia daka dia Nzambi dia kadimola nkɛtɛ kɛnɛ paradiso, dihole dia dimɛna efula di’anto mbidjasɛ. Tɔ totɛka kɛnɛ kakandasalɛ anande wa kɔlamelo lo nshi ya ntondo, kɛnɛ kâsalɛnde nshi nyɛ ndo kayondâsalɛ lo nshi yayaye. Tɔ tokimanyiyaka nto dia sho kandola ekakatanu aso ndo monga l’ɔngɛnɔngɛnɔ.—2 Timote 3:16, 17.
Ɛmɛnyi wa Jehowa wekɔ angɛnyi wa Nzambi; vɔ wayokokimanyiya dia wɛ shihodia wetshelo wa lo Bible. Tɛwɔ tsho wate dimi nangaka mbeka Bible. Vɔ hawɔlɔmbɛ falanga. (Mateu 10:8) Ndo nto, wɛ kokaka mbɔtɔ lo nsanganya y’Akristo. Yɔ salemaka l’ahole watɛmɔlawɔ Nzambi welɛwɔ ɔnɛ Mbalasa ya Diolelo. Naka wɛ ayɔtɔka lo nsanganya y’Akristo, kete ewo kayɛ ka Nzambi kayofula esadi eto.
Wɛ kokaka mbeya Nzambi oma lo diangɔ diakandatonge. Oko ɛnyɛlɔ, Bible mbutaka ɔnɛ: ‘Nzambi akatonge olongo la nkɛtɛ.’ (Etatelu 1:1) Lam’akatonge Jehowa ‘olongo,’ nde akatonge wonya. Ko dui sɔ atɛnyadiɔ lo kɛnɛ kendana la Nzambi na? Diɔ tɛnyaka ɔnɛ Jehowa ekɔ la nkudu k’efula. Ndamɛ oto mbakakoke tonga wonya, ɛngɔ kele la nkudu efula. Dui sɔ tɛnyaka nto ɔnɛ Jehowa ekɔ la lomba, oma lo lomba lakɔ mbakandatonge wonya dia toshaka djungudungu la esase aha la tolongoya.
Diangɔ diakatonge Jehowa mɛnyaka ɔnɛ nde tolangaka. Ohokanyiya yema weho w’elowa efula wele lanɛ la nkɛtɛ. Jehowa akakoke totongɛ kânga woho ɔtɔi w’olowa kana tshika. Koko, Jehowa akatosha weho efula w’elowa wotshikitanyi l’otale, lo woke, l’alangi ndo l’ɔlɛtɛlɔ. Dui sɔ mɛnyaka ɔnɛ Jehowa ekɔ Nzambi ka ngandji, ka lokaho, kakanyiya ndo k’ɔlɔlɔ.—Osambu 104:24.