Wekelo 6

Paradiso kaya suke!

Awui wa kɔlɔ wasalema nshi nyɛ la nkɛtɛ mɛnyaka ɔnɛ Paradiso kaya suke. Bible akate ɔnɛ, la ntondo ka Paradiso ndja, tayotasɛnyi lo tena dia wolo. Tena diakɔ nɛ diotɔsɛna! Awui amɔtshi wakate Bible ɔnɛ wayonga vɔanɛ:

Ata a weke. “Wudja ayolosha wudja ukina. Diulelu diayolosha diulelu dikina.” (Mateu 24:7) Prɔfɛsiya kɛsɔ kambokotshama. Tatɛ oma l’ɔnɔnyi wa 1914, ata ahende w’andja w’otondo wakalɔma kâmɛ ndo ata akina efula wa totshitshɛ. Miliyɔ y’anto wakadiakema l’ata asɔ.

Elando wayohandjɔnɛ l’ahole efula. ‘Elando wayonga lo dihole la dihole.’ (Luka 21:11) Onde dui sɔ diambokotshama? Eelo. Kansɛrɛ, hemɔ ya lo dui, lɔkɔsu la lohondja, malaria, sida, la hemɔ nkina yambodiaka miliyɔ y’anto.

Mbo ya ndɛ hayotonga. L’andja w’otondo, ekɔ anto wele bu ndo la yangɔ ya ndɛ y’oshika. Ɔnɔnyi tshɛ miliyɔ y’anto wekɔ lo mvɔ la ndjala. Ɔsɔ ekɔ djembetelo kina yɛnya ɔnɛ Paradiso kaya suke. Bible ate: “Ndjala ya kasha yayuyala.”—Mako 13:8.

Adidimu wa nkɛtɛ. “Adidimu wa kete wayuyala lu dihuli la dihuli.” (Mateu 24:7) Ndo dui sɔ diambokotshama lo nshi yaso nyɛ. Tatɛ oma lo 1914, anto ndekana miliyɔ ɔtɔi wambovɔ l’adidimu wa nkɛtɛ.

Anto wa kɔlɔ. Anto ‘wayonga anangi wa falanga’ ndo ‘wayoyâlanga.’ Wayoyala ‘anangi w’ɛngɛnɔngɛnɔ lo dihole dia monga angɛnyi wa Nzambi.’ Ana ‘hawotokitanyiya awui w’ambutshi awɔ.’ (2 Timote 3:1-5) Shi wɛ mbetawɔka dia weho w’anto asɔ wekɔ efula lo nshi yaso nyɛ? Vɔ hawɔlɛnya Nzambi ndo soyaka wanɛ walanga mbeka awui ande.

Awui wa ngala. ‘Ɛɔnywɛlɔ k’ɛlɛmbɛ’ kayohama. (Mateu 24:12) Ondo wɛ suyaka ɔnɛ nshi nyɛ mamboleka awui wa ngala oleki ɛnɔnyi wakete. L’ahole tshɛ, anto wekɔ lo wâle wa mbivama, kesama, kana salemɛ kɔlɔ.

Awui asɔ tshɛ mɛnyaka ɔnɛ Diolelo dia Nzambi diaya suke. Bible ate: ‘Lam’ayonyɛna awui asɔ, nyeye nyate diolelo dia Nzambi diaya suke.’ (Luka 21:31) Diolelo dia Nzambi kɛdikɛdi na? Diɔ diekɔ lowandji laki Nzambi la l’olongo layela Paradiso la nkɛtɛ. Diolelo dia Nzambi mbayɔhɛna mandji y’anto.—Danyele 2:44.