Mboka ka Mpika Tɔlaka Otsha lo Lotshungɔ

L’ATEI w’anto wele la timba, yema tshitshɛ tsho mbahetawɔ ɔnɛ andja wekɔ lo nɔmbwama l’ɛlɛmbɛ w’oma l’etongelo. Ɛlɛmbɛ akɔ ɛsɔ mbalɔmbɔla oseka ema tshɛ, oma ka tokamakama ta totshitshɛ polo ndo lo wa galaksi yele la miliyara ya tɔɔtɔ. Otondoyalaka ɛlɛmbɛ w’oma l’etongelo kema, tshike ndoko ekongelo koyanga ewo kotoyala, ndo tshike lɔsɛnɔ bu. Oma lo woho washihodiande ɛlɛmbɛ ɛsɔ w’oma l’etongelo ndo wakambande lawɔ olimu, mbambokoka onto sala akambo wa mamba, ɛnyɛlɔ oko kɛndakɛnda lo ngɔndɔ ndo toma alɛdi wa weoho la weoho lo asuku wa lo lɔhɛlɛlɛ oya lo televiziɔ ya lo mvudu yaso, alɛdi akɔ kokaka ndja oma l’oseka dihole tshɛ dia la kɛtɛ kana oma lo loowa, mangana la kɛtɛ etale efula.

Ko kakɔna kayotota lo dikambo di’endana l’ɛlɛmbɛ wa lɔkɛwɔ na? Onde okitanyielo w’ɛlɛmbɛ akɔ ekɔ ɔlɔlɔ ndo mbishaka onto wahɔ ɛmɔtshi? Efula kanyiyaka ɔnɛ ndoko ɛlɛmbɛ w’endana la lɔkɛwɔ ndo vɔ toyelaka filozofi yasha onto lotshungɔ la nde sala kɛnɛ kalangande kana ɔtɛmwɛlɔ wɔtɔnɛ la nsaki yawɔ hita.

Koko, ekɔ anto amɔtshi wanɛ wambɔsɔnɔla mboka kekina, ‘mboka ka mpika katɔla otsha lo lɔsɛnɔ,’ oko wɛnyamidiɔ l’atei a Bible. Hatokoke mamba l’ɔtɛ w’ɔnɛ paka anto yema tshitshɛ mbambɔsɔnɔla mboka kɛsɔ, nɛ dia Yeso akate lo kɛnɛ k’endana la mboka ka mpika ate: “Antu atoi mbatukienaka.” (Mateu 7:14) Bonde kele anto atɔi ato na?

Nɛ dia mboka ka mpika susama ndo l’ɛlɛmbɛ l’adjango waki Nzambi. Tshikima ɔnɛ lalanga mbɔtɔnganyiya lɔsɛnɔ lande l’ɛlɛmbɛ wa Nzambi mbakoka kiɛna dimɛna ndo mbidjɛ lɔkɔ. Otshikitanyi efula la mboka k’enanɔnanɔ kele la lotshungɔ la lo asho loto ko tete le lo mɛtɛ tɔ mbetɛka anto ɛhɔmbɔ, mboka ka tshitshɛ kɛnama ɔnɛ tɔ susama, mbishaka onto lotshungɔ l’oseka dikambo tshɛ di’ohomba dia lo lɔsɛnɔ. Elelo atɔ mbidjama oma lo “ɛlɛmbɛ wa kokele w’endana la lotshungɔ.”​—⁠Jakɔba 1:​25, NW.

Woho Washa Mboka ka Mpika Lotshungɔ

Mɛtɛ, ekɔ wolo di’onto shikimala lo mboka ka mpika. Oseka onto tshɛ lasɛna kema kokele ndo nde akahowɔ mposa ka ntsha kɔlɔ. Ɔnkɔnɛ, onto kokaka tshutshuyama dia mbɛtɔla yema oma lo mboka. Koyanga mbediɔ ɔsɔku, ekɔ ohomba di’onto ndjaekiya ndo ndjalɔngɔsɔla dia tshikalaka nshi tshɛ ‘lo mboka ka mpika,’ nɛ dia Nzambi ‘tolakanyaka dia wahɔ aso shwamɛ.’​—⁠Isaya 48:17; Romo 3:⁠23.

Tɔ̂shi ɛnyɛlɔ kɛnɛ: Ambutshi wele la lomba watɔlɔngɔsɔlaka ekongelo ka mbo ya ndɛ katɛnamaka oko ‘mboka ka mpika’ le anawɔ. Mbala mɔtshi, lo ndjela ekongelo kɛsɔ, onto tshɛ pombaka tanema lo wenya w’olelo. Koko, lam’ayokoma ana epalanga, vɔ wayoyandola mbekelo koludi la ngandji kakawaekiya ambutshi awɔ. Lam’ayowonga epalanga, kete vɔ wambotashilaki la mbekɛ mbo ya ndɛ yasha wolo lo demba. Ndo, lam’ele vɔ ndɛka diangɔ dia weoho la weoho, ndoko lushi layowoyaoka oko ase lokanu lo dikambo di’olelo.

Lo yoho ya lo nyuma, woho akɔ wâmɛ mbasalɛ Nzambi wanɛ wele lo mboka ka mpika katɔla otsha lo lɔsɛnɔ. Nde monɛka nsaki y’ɛlɔlɔ yasha onto ɔngɛnɔngɛnɔ la lotshungɔ la mɛtɛ l’atei w’etema w’anto wele la ndjakitshakitsha. Lo dikambo diakɔ mbatoshande Bible, Dui diande. Lâdiko dia lâsɔ, nde ekɔ lo todjangɛ dia sho sanganaka kâmɛ l’asekaso Akristo, nɛ dia vɔ kokaka tokeketsha dia sho shikimala lo voka ya mpika. (Heberu 10:​24, 25) Mɛtɛ, Nzambi ekɔ ngandji, ndo dionga sɔ dioleki woke mbalɔmbɔla eyango ande la etshelo ande.​—⁠1 Joani 4:⁠8.

Mboka ka tshitshɛ hɛnama oko mpika naka ngandji, wɔladi, ɔlɔlɔ, ndjakimela, la elowa ekina wa nyuma ka Nzambi wambeta la ntondo. Oko wata divɛsa nɛ: “Kema olembe lu akambu wa wuhu oso.” (Ngalatiya 5:​22, 23) “Lo dihole diele nyuma kaki Jehowa, lo dihole diakɔ mbele lotshungɔ.” (2 Koreto 3:​17, NW) Kânga nshi nyɛ, Akristo w’eshika wekɔ lo kondja woho wa lotshungɔ lɔsɔ. Vɔ wambotshungɔ oma l’akambo efula mbokiya anto wɔma nshi nyɛ, ɛnyɛlɔ oko wɔma wa nshi yayaye ndo wɔma wa nyɔi woludi la dikanyiyakanyiya. Ande ɔngɛnɔngɛnɔ dia nongamɛ nshi yayaye, etena ‘kayolola kɛtɛ la ewo ka Jehowa mɛtɛ oko atololaka ndjale l’ashi’ lee! (Isaya 11:⁠9) L’etena kɛsɔ, koyanga wɔma w’akambo wa ngala hawoyala nto. Dipole dia sapi la tokengete ta mbolo tayomɔ pondjo pondjo. Onto tshɛ ayoyaoka la lotshungɔ ndo la lotui tshitshi​—⁠otsho oko otsho, yanyi oko yanyi, oyadi l’etei ka luudu kana l’andja. Ɔsɔ mɛtɛ ayonga tshondo ya lotshungɔ!

Jehowa Ekɔ lo Tokimanyiya

Mɛtɛ, pombaka onto mbidja weolo dia nde ndjaɔtɔnganyiya l’ɛlɛmbɛ wa Nzambi, koko “elembe andi [kema, NW] wutshu.” (1 Joani 5:⁠3) Lam’ele tekɔ lo ndjalɔngɔsɔla dia mbɔtɔ lo mboka ka mpika ndo kondja ɛlɔlɔ w’oma lɔkɔ, sho pombaka petsha ditshelo la tokanyi tele la wanɛ wele lo mboka k’enanɔnanɔ. (Osambu 97:10) Okitanyielo w’ɛlɛmbɛ wa Nzambi tɔlɔmbaka dia sho tshɛ monga la nkum’etema y’ɛlɔlɔ. L’ɔtɛ wa monga la “etema wa lunyangu” la “ukiyanu wa lo [yimba, NW]” wele le antu efula, Nzambi ekɔ lo mbisha daka di’ɔnɛ: “Ekambi ami wayimba esambu la etema w’ongenongeno.” Eelo, otema walakanyema oma le Jehowa wekɔ l’ɔngɛnɔngɛnɔ ndo la lotshungɔ.​—⁠Isaya 65:⁠14.

Yeso akavu dia sho monga la lotshungɔ la mɛtɛ. Bible ekɔ lo mbuta ɔnɛ: “[Nzambi, NW] akalangi wa la kete utamanya, mbakandawasha on’andi etoi lakanduti, dia untu tshe lawetawo, tavokaki, keli ayali la lumu la pundju.” (Joani 3:16) Kakianɛ, oko wende Nkumekanga ka lo Diolelo diaki Nzambi dia l’olongo, Yeso ekɔ lo mbisha anto ɛlɔlɔ w’oma l’olambo akɔ ɔsɔ. Kem’edja, oma l’ɔkɔngɔ wa “fɔnu ka woke,” lam’ayolanyema mboka k’enanɔnanɔ kâmɛ la wanɛ watɔkɛndakɛndaka lɔkɔ, nde ayotatɛ nɔmbɔla anto wele l’okitanyiya la lotutsha tshɛ l’etenyi kambotshikala ka mboka polo ndo la koma yatɔ, mbuta ate polo ndo lam’ayokoma anto tshɛ kokele. (Enyelo 7:​14-17, NW; Mateu 24:​21, 29-31) L’etena kɛsɔ mbayotɛna ekotshamelo ka daka dia woke nɛ: “Ditungatunga diayutshungwama uma lu lohombo la ehondelo, dia [kondja lotshungɔ la lotombo, NW] la ana a [Nzambi, NW].” Ndoko kɛnɛ kakoka ndeka lotshungɔ lɔsɔ l’oma le Nzambi. Koyanga nyɔi hoyala nto.​—⁠Romo 8:21; Enyelo 21:​3, 4.

Lam’ayondɛna ndo lam’ayondoshihodia otsha lɛnɛ atatshu mboka ka mpika, onto kokaka sɔnɔla voka shɔ ndo tetemala kɛndakɛnda lɔkɔ. Djekoleko ɛlɔngɔlɔngɔ wekɔ lo kimanyiyama di’aha vɔ monga oko totshungu kana mbɔsa ɛlɛmbɛ wa Nzambi oko wotsho. Vɔ wekɔ lo mbeka dia mbɔsa ɛlɛmbɛ ɛsɔ oko djembetelo ya ngandji ka Nzambi ndo oko ekombɔ kâkokɛ oma lo akambo wa kɔlɔ wasalema lo mboka k’enanɔnanɔ. (Heberu 12:​5, 6) Mɛtɛ, onto pombaka mbikikɛ solo, ndo mbohɔka ɔnɛ dia nde ndjonga la waonga ndo la nsaki yɔtɔnɛ la lolango la Nzambi, paka nshi kambe yambeta, oko wahomba etena k’otale mbeta di’otamba w’elowa ntɔ elowa w’ɛlɔlɔ. Koko, otamba wayɔtɔ elowa naka vɔ wekɔ lo mɔmbamɛ ndo mbitamɛ ashi.

Ɔnkɔnɛ, ekaka Dui dia Nzambi, sanganaka kâmɛ l’Akristo akina, ndo ‘tetemala nɔmba’ dia kondja nyuma k’ekila. (1 Tesalonika 5:17) Kitsha wɛkamu ayɛ le Nzambi dia nde kokimanyiya woho wa wɛ ‘nɔngɔsɔla mboka yayɛ.’ (Tukedi 3:​5, 6) Ko onde dikambo sɔ kimanyiyaka onto mɛtɛ? Onde diɔ diekɔ l’etombelo w’ɛlɔlɔ oka? Eelo, diɔ diaki l’etombelo w’ɛlɔlɔ le Tom nde la Marie, wanɛ wakatatɛkɛtshi dikambo diawɔ lo sawo diakatɛnyi la ntondo.

Vɔ Kɔkɛndakɛnda Nto lo Mboka K’Enanɔnanɔ

Tom akafunde ate: “L’atei w’ɛnɔnyi wa 1970, takɛnana l’Ɛmɛnyi wa Jehowa lam’akaye Ɔmɛnyi ɔmɔtshi dia ndjotenda la ngelo kaso. Oma lo sawo diakatasawola lawɔ, takayokomaka lo mbeka Bible. Yema yema, lakamɛ nɔngɔsɔla lɔsɛnɔ lami. Lakalongola batismu l’ɔnɔnyi 1982 ndo kakianɛ lekɔ lo kamba l’etshumanelo ka lo ngelo kaso. Ɔnaso la pami ndo nde lawɔ ambolongola batismu. Losaka mbashami wadiɛmi nɛ dia nde akakikɛ solo oya le mi l’ɛnɔnyi tshɛ wakimi taleke mɛtɛ. Lâdiko di’akambo tshɛ, dimi ndekaka kaloya Jehowa losaka nde la Yeso Kristo lo kɛnɛ tshɛ kakawatosha ndo l’ɔtɛ w’elongamelo ka nshi yayaye keso latɔ kakianɛ.”

Ko Marie nde ngande na? Eelo, nde akakanaka ate Nzambi hodimanyiyɛki kɔlɔ yande pondjo, koko nde akalange mbeka akambo wa Nzambi lo dikambo di’anande. Lam’akandoke ɔnɛ Ɛmɛnyi wa Jehowa wekɔ lo ndakanya osukanyi ande, ndo nde lawɔ akalɔmbɛ ekimanyielo. Koko ditshelo diande dia kɔlɔ diakonɛma l’otema ande diakatondjaka ekakatanu eto. Ndjâka nshi mɔtshi nde pama la wekelo ko nshi kina nde ndjokalola ɛkɔngɔkɔngɔ. Yana yande ya yimato y’ɛnɔnyi esambeli akatetemalaka mbokeketsha ɔnɛ: “Mama tetemala. Wɛ kokaka sala dikambo nɛ.” Oma lâsɔ, Marie akayatshutshuya la wolo tshɛ.

Lam’akakalola oseka wakalanganaka lande oya la ngelo, oseka akɔ akanɔka didjoyadjoya efula ndo nde lawɔ, koko ndo nde lawɔ akayotatɛ mbeka Bible. L’edjedja ka wonya, vɔ akɔ ahende wakanya ditshelo diawɔ dia kɔlɔ. Oma lâsɔ, l’ɔkɔngɔ wa vɔ todja diwala diawɔ lo dibuku dia Lɛɛta ndo nongola batismu, vɔ waki l’ɔngɛnɔngɛnɔ woho w’anyanya ndo wakayaoke oko waya la nkumbo k’oyoyo. Lonyangu ko, Marie akavu la SIDA, koko kânga mbakandavu, otema ande wakashikikala lo alaka wa lo Bible lo kɛnɛ k’endana l’eolwelo k’oma lo nyɔi ndo lɔsɛnɔ la lo paradiso ka la kɛtɛ, nde akatayaɛdisha oma lo mindo tshɛ ya lo mboka ka woke ka kɔlɔ.

Eelo, onto kokaka tomba oma lo mboka ka woke ndo k’enanɔnanɔ katɔla otsha l’elanyelo. Yeso Kristo akate ate: “Lumu la pundju lone, eli [wêke dia, NW] nkêya, weme [Nzambi ɔtɔi ka mɛtɛ, NW], la Jesu Kristu, lakayatumi.” (Joani 17:⁠3) Ko lâsɔ, lande na kahayakoke mbɔsa tɛdikɔ dia kɛndakɛnda lo voka ya tshitshɛ yatɔla otsha lo lɔsɛnɔ na? Naka wɛ mbidja kɛnɛ kekayɛ oma lo Dui dia Nzambi l’otema ayɛ ndo kikitanyiya, kete wɛ ayɛna woho wakotshama daka nɛ dia dimɛna efula dia lo Bible le yɛ: “Nyayeewa kɛnɛ kele mɛtɛ, ko kɛnɛ kele mɛtɛ kayoonyo[tshu]ngola.”​—⁠Yowanɛ 8:​32, Dyokaneelo dy’oyooyo.