Ɛkɔndɔ W’apandjudi a Diolelo

“Okambake Olimu w’Ondakanyi w’Evanjiliyɔ”

NDJÂLA ondakanyi w’Evanjiliyɔ kɛdikɛdi na? Tshɛkɛta shɔ yokadimwami oma lo tshɛkɛta ya lo Ngirika eu·ag·ge·li·stesʹ yafɔna la tshɛkɛta eu·ag·geʹli·on, nembetshiyaka “lokumu l’ɔlɔlɔ.” Omalɔkɔ, ondakanyi w’Evanjiliyɔ ekɔ osambisha, kana ɔkɛndji, wa lokumu l’ɔlɔlɔ.

Akristo wa mɛtɛ tshɛ wekɔ andakanyi w’Evanjiliyɔ nɛ dia vɔ sambishaka lokumu l’ɔlɔlɔ l’endana la Diolelo diaki Nzambi. Akasungana mɛtɛ dia ɔpɔstɔlɔ Paulo keketsha Timɔtɛ ate: “okambake olimu w’ondakanyi w’Evanjiliyɔ.” Timɔtɛ akahombe mbɔsa olimu ɔsɔ la nɛmɔ. Paulo akôkeketsha dia nde ‘ndjakimela l’akambo tshɛ’ ndo ‘kotsha olimu ande woho wokoki.’​—⁠2 Timɔtɛ 4:​5, NW.

Oko weso andakanyi w’Evanjiliyɔ, ndo sho lawɔ, tɔshi olimu aso la nɛmɔ ndo ‘toyakimele,’ kana totetemale la pandjola lokumu l’ɔlɔlɔ lo diaaso tshɛ diakondjaso. Ɔsɔku mbamboyeya anto efula Jehowa la alaka ande l’ɔkɔngɔ wa vɔ sawola l’Ɛmɛnyi wa Jehowa lo esambishelo ka tshakitudi. Enda kɛnɛ kakakomɛ Seymore, pami kɛmɔtshi ka la Barbade.

Seymore aki ombetsha lo kalasa k’ɔfisiɛlɛ. Charles, aki ombetsha wakalakanyaka lo tena dimɔtshi lo kalasa kakɔ ndo nde aki Ɔmɛnyi wa Jehowa, ondakanyi w’Evanjiliyɔ w’okalanganu. Nde aki okambi wa lo tena ndo lo tena, kana ombatshi mboka, ko nde akakambaka la diaaso tshɛ diakandakondjaka dia sawola l’anto akina lo dikambo dia lokumu l’ɔlɔlɔ. Oma l’esambishelo ka tshakitudi kaki Charles mbakoke Seymore losango la Diolelo mbala ka ntondo.

Kem’edja, ndo Seymore lawɔ akɔshi yɛdikɔ dia mbewoya anto efula akambo a mɛtɛ wele lo Bible. Ɔnkɔnɛ nde akatatɛ asawo wa tshakitudi kâmɛ l’anto waki lɛnɛ akandakambaka olimu, djekoleko nde l’ambeki ande. Kânga mbele lo wedja ɛmɔtshi hawolakanya akambo a Nzambi lo kalasa y’ɔfisiɛlɛ, pami kɛsɔ akakondja ɔkɛndɛ wa ndakanya akambo w’ɛtɛmwɛlɔ ndo woho wa monga la dionga di’ɔlɔlɔ. Koko ɛlɔ kɛnɛ, tokanyi tâki la Seymore ntondo l’akambo asɔ tambofamɛ la ewo kande k’oyoyo kambondoyokondja oma lo Bible. L’eshidi wa mumuya, nde akatɛka ambeki ande kɛnɛ k’endana la daka dia Nzambi dia andja w’oyoyo la elongamelo ka ndjâla la lɔsɛnɔ la pondjo.

Dionga diakɔna diakɛnyaka ana akɔ na? Efula wakɛnyaka saki kawɔ lo lokumu l’ɔlɔlɔ la Diolelo diaki Jehowa. L’edjedja wonya, Seymore akatatɛ mbeka Bible l’ambeki ande 13. Oko wakiwɔ la saki k’efula, vɔ wakokana dia mbekaka Bible mbala hiende lo lomingu. Yema yema, efula l’atei awɔ wakatatɛ la mbɔtɔ lo nsanganya y’Akristo lo Mbalasa ka Diolelo k’Ɛmɛnyi wa Jehowa kaki lo mbilo kakɔ. Ɛlɔ kɛnɛ, divua l’atei awɔ wamboyakimɔ la tshondo ndo wambolongola batismu oko Ɛmɛnyi wa Jehowa. Ɛlɔ kɛnɛ Seymore, ekɔ lo kotsha olimu ande woho wokoki lam’akambande oko ombatshi mboka wa pondjo ndo ekumanyi l’atei w’etshumanelo kɛmɔtshi k’Ɛmɛnyi wa Jehowa la Barbade.

Ɔsɔ ekɔ paka ɛnyɛlɔ ɔtɔi keto ka woho wakamba Ɛmɛnyi wa Jehowa ‘olimu w’andakanyi w’Evanjiliyɔ,’ l’andja w’otondo lo salaka esambishelo ka tshakitudi. Vɔ wekɔ lo ndjela dako diatanema lo Bible lo Kolosai 4:​5, 6, diata ɔnɛ: “Nyokendekende la yewu le antu wahatetawo, tanyushishaki etena. Nyutaki paka aui wa ngandji ka mamba tena tshe, wosohanyimi la leho dia nyu mbeya wuhu wa nkaluya untu tshe diui.”