Toyaɛkɛ Le Jehowa Ndo Lo Dui Diande
‘Wanɛ weya lokombo layɛ, wayoyaɛkɛ le yɛ.’—OSAMBU 9:10.
L’ATEI w’andja wa nshi nyɛ, leeta la ndjaɛkɛ le Nzambi ndo lo Bible, Dui diande, mbeyaka mɛnama oko dikambo di’anyanya ndo diahakoke salema. Koko l’edja ka deko la deko, lomba laki Nzambi mɛnamaka dia lɔ mbele lomba la mɛtɛ ndo l’ohomba. Otungi wa pami la omoto mbele Kiɔkɔ ya diwala ndo ya nkumbo, ndo nde mbeyaka ehomba aso dimɛna efula, oleki onto tshɛ. Oko wahatshikitanyi ehomba wa ntondo w’onto, woho akɔ wâmɛ mbahatshikitanyi ndo yoho yoleki ɔlɔlɔ yakokaso kotsha ehomba akɔ. Alako w’eshika wa lo Bible, kânga mbambowofundama aya deko ko deko, wekɔ nshi tshɛ alako woleki ɛlɔlɔ wakoka kimanyiya onto dia nde mpomɔ lokolo l’ɔlɔ lo lɔsɛnɔ ndo dia nde kandola ekakatanu. Onto lakitanyiya alako akɔ kondjaka ɔngɛnɔngɛnɔ efula—kânga l’atei w’andja w’ohokosanu wasɛnaso ɔnɛ ndo wambolola l’akambo wa bewo!
2 Onto layaɛkɛ le Jehowa ndo lakitanyiya adjango wa lo Bible kondjaka etombelo w’ɛlɔlɔ lushi la lushi. Mɛtɛ ka dikambo sɔ mɛnamaka lo nsɛnɔ ya miliyɔ y’Ɛmɛnyi wa Jehowa wa l’andja w’otondo, wanɛ wele la dietawɔ dia wolo ndo la dihonga dia kitanyiyaka alako wa lo Bible. Vɔ mɛnaka ɔnɛ: ndjaɛkɛ le Otungi ndo lo Dui diande ekɔ dikambo di’ɔlɔlɔ efula. (Osambu 9:9, 10) Woho wakitanyiyawɔ ɛlɛmbɛ wa Nzambi ambowaetɛ anto w’ɛlɔlɔ efula l’akambo wele oko: monga pudipudi, ndjâla la losembwe, kamba olimu efula, nɛmiya lɔsɛnɔ ndo diangɔ diakana, ndo ndɛ la nɔ lo yɛdikɔ yakoka. Diɔ diakɔ diewɔ la ngandji k’oshika ndo l’awui w’ɛlɔlɔ l’atei a nkumbo—vɔ nongolaka angɛndangɛnda, wekɔ la lotutsha, la kɛtshi, nyimanyiyanaka kɔlɔ—ndo salaka lokema l’akambo akina w’ɛlɔlɔ. Vɔ wekɔ l’akoka efula wa mbewɔ elowa wa kɔlɔ w’oma lo kɛlɛ, lohetsho, odiakanelo, ɔkɔmiya, wɔma, ɛnɛndɛ, ndjambiya, kashi, mamanyiyɛ onto dikambo, loseka kana monanyi, ndo akambo wa mindo. (Osambu 32:10) Koko Nzambi kondaka wanɛ wakitanyiya ɛlɛmbɛ ande dia mbahomuya paka lokolo l’ɔlɔ loto. Yeso akate ɔnɛ wanɛ wadjɛ lo mboka k’Akristo wayolongola “kakiane l’etena kene: . . . wanyangu, ana, ndu dikambo, tena lukama, kame l’asui; ku l’etena kayayi, lumu la pundju.”—Mako 10:29, 30.
Tewɔ dia Ndjaɛkɛ lo Lomba la l’Andja Ɔnɛ
3 Okakatanu wele le anto wele kema kokele ele vɔ mɔnyɔlaka kana mbohɛka ɛlɛmbɛ wa Nzambi. Vɔ tatɛka kanyiya esadi eto ɔnɛ vɔ mboleki mbeya kana ɔnɛ lomba l’oma le wa nomb’ewo ya l’andja ɔnɛ ndeka lomba laki Nzambi, ndo lɔ mbele lomba l’oyoyo. Ndo ekambi wa Nzambi kokaka ndjɔsa dionga sɔ l’etena kewɔ lo sɛna l’atei w’andja ɔnɛ. Ɔnkɔnɛ, lam’akandatelɛ la ngandji tshɛ dia sho mpokamɛ alako ande, Shɛsɔ lele l’olongo akatosha ndo diewoyelo nɛ diasungana ate: “On’ami, tuhelaki wetshelu ami, utema aye alamaki elembe ami, ne dia vo mbayukufudiya nshi, la deku dia lumu laye. Ekamaki [Jehowa] l’utema aye tshe, tekamaki yimba yaye hita. Uwetawoki lu akambu aye tshe, ku ndi ayukolongoswela mbuka yaye. Tuyalaki kanga yimba lu ashu aye weme: uki [Jehowa] woma, umo uma lu kolo.”—Tukedi 3:1, 2, 5-7.
4 Lomba la l’andja ɔnɛ lekɔ efula ndo lɔ ndja oma lo tɔkɔkɔ efula. Atshunda a wekelo kana kalasa yekɔ efula, ndo “efundelu k’abuku [efula, NW] hashili.” (Undaki 12:12) Ɛlɔ kɛnɛ, nsango yewoyama lo tshimbo y’ɔrdinatɛrɛ (kɛnɛ kasɛmawɔ ɔnɛ autoroutes de l’information), ndakaka dia nembetshiya lokema l’awui lo suke la dikambo tshɛ dia lo lɔsɛnɔ. Koyanga mbewɔ l’ewo kɛsɔ tshɛ, anto wa l’andja ɔnɛ kema la lomba l’efula ndo hawokoke kandola ekakatanu awɔ. Lɔsɛnɔ la l’andja ɔnɛ lekɔ lo taleke fukutana lushi la lushi. Diɔ diakɔ mɛtɛ diatotɛ Bible ɔnɛ: ‘Lomba la l’andja ɔnɛ lekɔ enginya lo asho wa Nzambi.’—1 Koreto 3:19, 20.
5 Lo etenyi kɛnɛ ka komelo ka nshi y’ekomelo, sho kokaka nongamɛ ɔnɛ Satana Diabolo, okeshi a woke, ayotondja lokema l’akambo wa kashi la kanyi ya nanya wɛkamu wele l’anto lo mɛtɛ ka Bible. Wa nomb’ewo yasala wekelo wa tshɔtɔpɔngɛ w’abuku wa lo Bible dia mbeya ɔtɔngwɛlɔ l’oyango awɔ wekɔ lo tondja lokema l’abuku wele la tokanyi t’ɔnɛ Bible kema dibuku dia mɛtɛ ndo diakokaso ndjaɛkɛ lɔkɔ. Paulo akewola onyande Okristo ate: “We Timote, ulamaki dikambu diakawakutela, oseke eteketateketa wa kolo la aui wa tamu uma le antu waha la yimba ya mete. Antu amotshi waketawo akambu ane, wakanganela uma lu mbuka ka mbetawo.” (1 Timote 6:20, 21) Bible ekɔ lo tewola nto ɔnɛ: “Nyewo untu tanyunganyiaki la [filɔzɔfi, NW] ndu la akambu wa kashi, uku ditshelu di’antu, watuyelaka akambu wa la kete, wahayeli Kristu.”—Kolosai 2:8.
Lɔshana la Saki ka Mbidja Tamu
6 Tshelo kina ya mayɛlɛ efula yaki Diabolo ele monɛ tamu lo timba t’anto. Nde mendaka nshi tshɛ dia mɛna wɔdu ɔmɔtshi wa lo mbetawɔ ko nde nunya wɔdu akɔ. Onto tshɛ lele la tamu lo yimba yande pombaka mbohɔka ate: ɔnɛ lɔtshiya tamu ta ngasɔ lo timba t’anto ele ɔnɛ lakatɛ Eva ate: ‘Onde mɛtɛ mbakanyotɛ Nzambi ate: tanyɔlɛke elowa tshɛ wa l’ekambɔ?’ L’ɔkɔngɔ w’Ohembanyi monɛ tamu lo yimba ya omoto, dikambo dia hende diakandayosala ele mbotɛ kashi, ko Eva aketawɔ kashi kakɔ. (Etatelu 3:1, 4, 5) Di’aha mbetawɔ kaso nanyema la tamu oko akalana mbetawɔ k’Eva, sho pombaka nkukola sso ɔlɔlɔ. Naka yema ya tamu lo dikambo dia Jehowa, dia Dui diande, kana di’ɔlɔngɔswamelo ande ambotatɛ shikikala l’otema ayɛ, kete ɔsa tɛdikɔ esadi eto dia minya tamu takɔ tɔsɔ oma lo yimba yayɛ la ntondo ka tɔ ndjohama ko ndjoyala ɛngɔ kakoka nanya mbetawɔ kayɛ.—Ɛdika la 1 Koreto 10:12.
7 Kakɔna kakokayɛ sala na? Ndo lâsɔ nto, wɛ pombaka ndjaɛkɛ le Jehowa ndo lo Dui diande. “Naka omotshi ambuhumba [lomba, NW], ndi alombe [Nzambi, NW], katushaka antu tshe diango la lukahu, hâhangwela, ku ndi ayuwusha[l]o. Keli ndi alombe la mbetawo, aha la tamu, ne dia untu ladja tamu, eko uku sukhu di’ashi a wuki, diasukuyama la diasutshasutshama la loheledi.” (Jakoba 1:5, 6; 2 Petero 3:17, 18) Ɔnkɔnɛ, dikambo dia ntondo diahombayɛ sala ele nɔmba Jehowa oma ka tshina diayɛ di’otema. (Osambu 62:8) Oma lâsɔ, tengengake dia nɔmba emendji wa l’etshumanelo dia vɔ kokimanyiya. (Etsha 20:28; Jakoba 5:14, 15; Jude 22) Vɔ wayokokimanyiya dia wɛ mbeya oma lɛnɛ oye tamu tayɛ, ondo tɔ ndja oma lo lotamanya kana oma lo tokanyi tɔmɔtshi ta kɔlɔ.
8 Onde walelo kana ohokamelo wa tokanyi ta wanɛ wakatakɔ mbetawɔ ka mɛtɛ (apostats) kana ta filɔzɔfi ya l’andja ɔnɛ ambɔtshiya tamu ta kɔlɔ lo yimba yayɛ? Bible toshaka dako nɛ di’oshika ɔnɛ: “Utetemali dia ndjakimo le [Nzambi, NW] uku untu lambuluwana, uku usi ulimu laha la dikambu dia mbutshama sonyi. Enya antu aui wa mete w’usimbwi atu. Keli utuni aui w’oteketateketa, ne dia antu ane wayuhama lu akambu wa dionyo. Aui awo wayufula uku puta [kambokunda, katahɔndja emunyi].” (2 Timote 2:15-17) Tolembete dia, efula ka wanɛ wakakɔ lo apɔstazi wakatatɛ mbidjɛ lo mboka ka kɔlɔ ntondotondo lo nkiyanaka lo dikambo dia woho wakawakanaka ɔnɛ wekɔ lo mbaɔsa l’atei w’ɔlɔngɔswamelo waki Jehowa. (Jude 16) L’ɔkɔngɔ diko mbakawayotatɛ nyanga dikɔmɔ dia wetshelo. Oko watotshaka dɔkɔtɛlɛ esadi esadi dia sɛsɔla mpota kambokunda katahɔndja emunyi, ndo wɛ lawɔ onula oma lo wɔɔngɔ ayɛ mbekelo ka nkiyanaka, ka mongaka la lonyangu lo menda woho wasalema akambo l’atei w’etshumanelo k’Akristo. (Kolosai 3:13, 14) Nya oseka dikambo tshɛ diadja tamu ta ngasɔ lo yimba yayɛ.—Mako 9:43.
9 Mamema Jehowa l’ɔlɔngɔswamelo ande. La kɔlamelo tshɛ, okoya Petero, ɔnɛ lakate la dihonga tshɛ ate: ‘Nkumadiɔndjɔ, sho la onto okina latotemalɛ? Toko wɛ mbele l’ɛtɛkɛta wa lɔsɛnɔ la pondjo.’ (Joani 6:52, 60, 66-68) Onga la ekongelo ka dimɛna ka wekelo wa Dui dia Jehowa kele mbetawɔ kayɛ kongake nshi tshɛ nge, oko engawo ka woke kakoka “nyima akuwa tshe wa dja wa kanga kolo.” (Efeso 6:16) Ongaka l’ohetoheto l’olimu w’Akristo w’esambishelo, sambishaka anto akina losango la Diolelo la ngandji tshɛ. Lushi la lushi, kanaka yimba la lowando tshɛ lo woho wakakɔtshɔkɔla Jehowa. Ongaka la lowando l’ɔtɛ wakayakondja ewo ka mɛtɛ. Naka wɛ salaka akambo asɔ tshɛ lo ndjela mbekelo k’ɔlɔlɔ k’Akristo, kete dui sɔ diayokokimanyiya dia wɛ monga l’ɔngɛnɔngɛnɔ, dia wɛ tetemala, ndo di’aha wɛ monga la tamu kânga yema lo yimba yayɛ.—Osambu 40:4; Filipi 3:15, 16; Heberu 6:10-12.
Tokitanyiyake Ɛlɛmbɛ wa Jehowa l’Atei a Diwala
10 Lam’akandalɔngɔsalaka dia pami la omoto mbidjasɛ kâmɛ oko wadi l’omi, sangwelo dia Jehowa kondjala paka dia ndodja nkɛtɛ keto, koko ndo dia fudia ɔngɛnɔngɛnɔ awɔ. Koko, pɛkato la ekokele akayela ekakatanu a weke l’atei a diwala. Akristo hawohandwe oma l’ekakatanu ɛsɔ, lam’ele ndo vɔ mbele kema kokele ndo mbahomana l’ekakatanu wa lo lɔsɛnɔ la nshi nyɛ. Koko, lo yɛdikɔ yayaɛkɛwɔ le Jehowa ndo lo Dui diande, Akristo kokaka mpomɔ lokolo l’ɔlɔ lo diwala ndo lo diodielo di’anawɔ. Ditshelo la mbekelo ya l’andja ɔnɛ kema la dihole lo diwala di’Akristo. Dui dia Nzambi tolakaka ɔnɛ: “Diwala dialemiami le antu tshe, [ndo aha tange ka diwala mbɔtɔ mindo, NW], ne dia [Nzambi, NW] ayulumbuya akanga a munanyi la luseka.”—Heberu 13:4.
11 Diwala diakitanyiya alako wa lo Bible ndjalaka la ngandji, l’ɔkɛndɛ ndo la lotui tshitshi l’atei adiɔ. Oyadi omi kana wadi shihodiaka ndo nɛmiyaka dui di’endana la lowandji. Esangɔ efula, ekakatanu totombaka naka wambonya yimba dia kitanyiya alako wa lo Bible. Dia vɔ kandola okakatanu ɔmɔtshi w’etshaka wenya, ekɔ ohomba dia wadi l’omi mbidja yimba yawɔ tshɛ l’okakatanu akɔ mɛtɛ mɛtɛ, ndo shidiya okakatanu akɔ l’etshina kawɔ, koko aha la shɔdi. Naka l’ɔkɔngɔ wa vɔ kɛtshanya ko hawokanyi dimɛna kana hawosangi l’olemi kânga yema, kete atshukanyi mbeyaka nɔmba emendji woludi la ngandji dia vɔ mbasha ekimanyielo kaha la shɔnɔdi.
12 Onde nyekɔ l’okakatanu dia sawola, dia nɛmiya tokanyi t’onto l’onto, dia nɛmiya lowandji, kana lo woho wɔsama tɛdikɔ? Onde nyekɔ l’okakatanu lo diodielo di’ana, kana di’aha monga la mposa ka dieyanelo ka tshambandeko? Onde okakatanu akɔ tombaka oma lo akambo wa falanga ya l’atei a nkumbo, oma lo wendelo wa filmɛ, lɔngɛnyi, dia kana wadi kokaka kamba olimu, kana dia dihole diahombanyu mbidjasɛ? Oyadi okakatanu akɔna wakoka ndjâla, Bible mbishaka alako w’eshika mbala kakɔ ɔtɔi oma l’ekimanyielo k’ɛlɛmbɛ kana lo tshimbo y’alako. (Mateu 19:4, 5, 9; 1 Koreto 7:1-40; Efeso 5:21 -23, 28-33; 6:1-4; Kolosai 3:18-21; Tito 2:4, 5; 1 Petero 3:1-7) Naka wadi l’omi mbewɔ di’onto l’onto nyangaka paka wahɔ ande hita ndo naka vɔ tshika ngandji dia tɔ mɛnama hwe lo diwala diawɔ, kete wayokondja ɔngɛnɔngɛnɔ efula. Ekɔ ohomba efula dia wadi l’omi monga la saki ka wolo ka sala etshikitanu wahombama, dia vɔ salaka akambo lo yoho yalanga Jehowa. “One latulangaka diui atuhumoka lukulu l’olo. La one latekamaka [Jehowa] eli l’ongenongeno.”—Tukedi 16:20.
Ɛlɔngɔlɔngɔ—Nyolonge Dui dia Nzambi
13 Kema wɔdu le ɛlɔngɔlɔngɔ w’Akristo dia vɔ keketala lo mbetawɔ l’etena kewɔ l’andja ɔnɛ wa kɔlɔ. Ɔkɔkɔ ɔmɔtshi ele nɛ dia ‘andja w’otondo wekɔ lo lowandji la kanga kɔlɔ,’ Satana Diabolo. (1 Joani 5:19) Ɛlɔngɔlɔngɔ wekɔ lo ndɔshama oma le otunyi ɔsɔ wa ngala, ɔnɛ lakoka kadimola kɔlɔ ɔlɔlɔ. Dionga di’onto nyangaka paka wahɔ ande ndamɛ oto, saki ya lokaki, saki ka sala akambo wa mindo ndo wa ngala, ndo oyango wa kɔlɔ w’ɛngɛnɔngɛnɔ—akambo asɔ tshɛ tshumana lo dui ɔtɔi: yoho y’ekanelo yaleka mɛnama efula ndo yalembetshiyama lo Bible oko ‘yimba yakamba le ana w’ohedia.’ (Efeso 2:1-3) Satana ekɔ lo keketsha ‘yimba’ shɔ la mayɛlɛ tshɛ lo abuku wa la kalasa, lo weoho efula wa mishiki watanema nshi nyɛ, ndo lo weoho ekina wa tɔkɛnyɔ. Ambutshi pombaka nkukolaka sso ɔlɔlɔ nshi tshɛ dia vɔ minya tɔsɛngiya ta ngasɔ lo kimanyiyaka anawɔ dia vɔ keketala lo ndjaɛkɛ le Jehowa ndo lo Dui diande.
14 Paulo akasha onyande la dikɛnda lakawelɛka Timɔtɛ dako diele wate kana ombutshi a pami mbalaka ɔnande, nde akawotɛ ate: “Ulawo saki ya kolo y’elongo w’apami. Uyeli akambu w’ololo la mbetawo la ngandji, la ki, kame l’antu weta lukumbu la Khumadiondjo uma l’etema wa pudipudi.” (2 Timote 2:22) Kânga mbele aha ‘saki tshɛ yatongaka l’ɛlɔngɔlɔngɔ’ mbele kɔlɔ, ɛlɔngɔlɔngɔ pombaka ‘ndjilawɔ’ lo yoho nyɛ: vɔ hawohombe mbetɛ akambo asɔ oko ekiyanu awɔ wa ntondo, ko pomba tena, kana monga la yema y’etena ka tshitshɛ keto dia sala akambo wa Nzambi. Tɔkɛnyɔ ta mbekiya demba, ɛkɛnyɛlɔ, mishiki, wendelo wa filmɛ, wetshelo wa wenya lo dikambo dimɔtshi ndo wɛɛngɔ, kânga mbele akambo asɔ kema kɔlɔ nshi tshɛ, vɔ kokaka ndjoyala tshondo ya djonga naka vɔ wambɔsa dihole dia woke lo lɔsɛnɔ laso. Nyolawɔ diyɔkayɔka, nyolawɔ tokanyi t’anyanya, nyolawɔ yoho ya kɔlɔ ya ndjaɔtshiyaka l’akambo w’endana la dieyanelo, nyolawɔ etshelo ka mbidjasɛka wodjasɛdjasɛ aha la sala olimu ndo ndjalɛndja demba, ndo nyolawɔ etshelo ka nkiyanaka ɔnɛ ambutshi anyu hawonyokɛ.
15 Kânga lam’ewɔ lo mvudu yawɔ vamɛ, wâle mbeyaka komɛ ɛlɔngɔlɔngɔ. Naka wekɔ lo menda akambo wa mindo ndo wa ngala wɛnyama lo televiziɔ kana lo video, kete saki ka sala kɔlɔ kokaka mbɔtɔ l’etema awɔ. (Jakoba 1:14, 15) Bible toshaka dako nɛ ɔnɛ: “Nyu wane watukaka [Jehowa] ngandji, nyuhetshaki kolo.” (Esambu 97:10; 115:11) Jehowa mbeyaka naka onto ɔmɔtshi ôhemba dia sɛna lɔsɛnɔ la dungi pende. (Tukedi 15:3) Ɛlɔngɔlɔngɔ w’Akristo le, nyende kɛnɛ kele lo mvudu yanyu. Onde wɛ akahanɛ fɔtɔ kana esato w’akɛnyi wa tɔkɛnyɔ kana w’amembi a nkembo wele la lɔkɛwɔ la kɔlɔ, kana wɛ akahanɛ diangɔ di’ɛlɔlɔ diakohola akambo w’ɛlɔlɔ lo luudu layɛ? (Osambu 101:3) Lo tapa diayɛ diadjayɛ ahɔndɔ, onde wɛ ekɔ la ahɔndɔ waha la lokumu, kana ahɔndɔ ayɛ amɔtshi mɛnyaka yoho y’ɔlɔtɛlɔ wa tshambandeko wa l’andja ɔnɛ? La mayɛlɛ tshɛ, Diabolo kokaka kotadja lo ndjonga naka wɛ nkɔ l’ohemba wa pemba sala kɛnɛ kele kɔlɔ. Bible ekɔ lo mbisha dako nɛ di’oshika ɔnɛ: ‘Nyoyalame ɔlɔlɔ ndo nyosungukalake. Otunyi anyu, Diabolo, atɔkɛndakɛndaka oko kimbwe kahangiya, kayanga onto la tɔ ndɛ.’—1 Petero 5:8.
16 Bible kotɛka dia wɛ menda angɛnyi ayɛ ɔlɔlɔ. (1 Koreto 15:33) Angɛnyi ayɛ pombaka monga wanɛ woka Jehowa wɔma. Tetawɔke ndjela tɔsɛngiya t’angɛnyi ayɛ. (Osambu 56:11; Tukedi 29:25) Kitanyiyaka awui w’ambutshi ayɛ woka Nzambi wɔma. (Tukedi 6:20-22; Efeso 6:1-3) Ntshɔkaka le dikumanyi dia vɔ kosha alako la ekeketshelo. (Isaya 32:1, 2) Shikikɛka yimba yayɛ la asho ayɛ nshi tshɛ lo akambo ndo l’eyango wa lo nyuma. Yangaka waaso wakoka kokimanyiya dia wɛ pama lo nyuma ndo wa salaka elimu wa l’etshumanelo. Eka dia kambaka olimu l’anya ayɛ. Yala la mbetawɔ ka nge ko wɛ ayoyaɛnya wate: onto mɛtɛ mbemi—onto lakoka monga la lɔsɛnɔ l’andja w’oyoyo waki Jehowa! Shɛso lele l’olongo ayɔngɛnangɛna lo dikambo diayɛ, ambutshi ayɛ wa lanɛ la nkɛtɛ wayoka ɔlɔ lo dikambo diayɛ, ndo ananyɔ l’akadiyɛ w’Akristo wayokeketshama oma le yɛ. Kɛsɔ kele ohomba!—Tukedi 4:1, 2, 7, 8.
17 L’osambu ande, omembi w’esambu akatshutshuyama oma le nyuma k’ekila dia nde funda ate: “[Jehowa] hatudimaka wane watokendakendaka lu akambu w’usimbwi engo k’ololo. [Jehowa], Kanga lulimbilimbi li, untu tshe latukekamaka eli la ongenongeno!” (Osambu 84:11, 12) Mɛtɛ, wanɛ tshɛ wayaɛkɛ le Jehowa ndo lo Dui diande wayokondja ɔngɛnɔngɛnɔ ndo wayohomɔ lokolo l’ɔlɔ, vɔ hawototshama nsɔnyi ndo hawotohomɔ lokolo l’ɛngɛnɔ.—2 Timote 3:14, 16, 17.
[Study Questions]
1. Lande na kakokaso ndjaɛkɛka nshi tshɛ le Jehowa ndo lo Dui diande l’andja wa nshi nyɛ?
2. (a) Naa etombelo w’ɛlɔlɔ wɛnama lo nsɛnɔ y’ekambi wa Jehowa oma lo woho wakitanyiyawɔ ɛlɛmbɛ wa Nzambi? (b) Naa ɛngɔ kekina kalaka Jehowa dia mbisha wanɛ wele l’okitanyiya otsha le nde ndo lo Dui diande?
3. Ekakatanu akɔna wahomana l’Akristo mbala mɔtshi lam’atetemalawɔ ndjaɛkɛ le Jehowa ndo lo Dui diande?
4. Woho akɔna wambohandjɔnɛ ‘lomba la l’andja ɔnɛ,’ ndo lande na kelɔ ‘enginya lo asho wa Nzambi’?
5. Diewoyelo diakɔna diatosha Bible lo dikambo dia ‘lomba la l’andja ɔnɛ’?
6. Lande na kahombaso nkukola sso ɔlɔlɔ di’aha sho tshikɛ tamu dihole dia tɔ mbika edo l’otema aso?
7. Kakɔna kakokayɛ sala dia minya tamu oma lo yimba yayɛ?
8. Woho akɔna watotatɛka tokanyi t’apɔstazi mbala efula, ndo ngande wakokayɛ tinya?
9. Woho akɔna wayotokimanyiya mbekelo y’ɛlɔlɔ ya lo Teokrasi dia sho mongaka la mbetawɔ ka nge nshi tshɛ?
10. Lande na kele ekɔ ohomba efula dia sho mendɛka le Jehowa dia kondja alako wa lo diwala di’Akristo?
11. Kakɔna kahomba wadi l’omi mbeya lam’akandolawɔ ekakatanu wa lo diwala?
12. (a) Bible ekɔ lo mbisha alako l’ekakatanu akɔna watanema efula l’awala? (b) Lande na kahomba wadi l’omi salaka akambo lo yoho yalanga Jehowa?
13. Lande na kele kema dikambo dia wɔdu le ɛlɔngɔlɔngɔ dia vɔ ndjâla la mbetawɔ ka wolo le Jehowa ndo lo Dui diande?
14. Woho akɔna wakoka ɛlɔngɔlɔngɔ ‘ndawɔ nsaki yatongaka l’ɛlɔngɔlɔngɔ’?
15. Akambo akɔna wakoka salema lo luudu wakoka keketsha ɔlɔngɔlɔngɔ dia nde monga la lɔsɛnɔ la dungi pende?
16. Woho akɔna wakoka alako wa lo Bible kimanyiya ɔlɔngɔlɔngɔ dia nde ngɛnyangɛnya onto tshɛ lele ohomba lo asho ande?
17. Ɛlɔlɔ akɔna wakondja wanɛ wayaɛkɛ le Jehowa ndo lo Dui diande?
[Caption]
[Wembola]
[Caption on page 28]
[Diombwɛlo di’osato wa lo lɛkɛ 28]
Akristo ndjaɛkɛka le Jehowa la lo Dui diande, koko vɔ mbikashaka ‘lomba la l’andja ɔnɛ,’ vɔ liɛnaka enginya
[Caption on page 30]
[Diombwɛlo di’osato wa lo lɛkɛ 30]
Nkumbo yayaɛkɛ le Jehowa ndo lo Dui diande mpomɔka lokolo l’ɔlɔ ndo kondjaka ɔngɛnɔngɛnɔ
[Caption on page 31]
Okonde Ayôkadimola Na?
◻ Lande na kahahombe Akristo ndjaɛkɛ lo ‘lomba la l’andja ɔnɛ’?
◻ Kakɔna kakoka onto sala naka nde aya la tamu?
◻ Woho akɔna wahomɔ atshukanyi lokolo l’ɔlɔ ndo wakondjawɔ ɔngɛnɔngɛnɔ l’atei a diwala naka vɔ salaka akambo lo yoho yalanga Jehowa?
◻ Woho akɔna wakimanyiya Bible ɛlɔngɔlɔngɔ dia vɔ ‘ndawɔ nsaki yatongaka l’ɛlɔngɔlɔngɔ’?