Nzambi, Lɛɛta, La Wɛ

“Ɛkɛlɛsia la Lɛɛta Hawokana lo Dikambo di’Odiakelo wa Diwala lo Wodja w’Irlande”

ƆTƐ a dui ongo wakatombe lo jurunalɛ yelɛwɔ The New York Times mɛnyaka woho wakoka anto ɛlɔ kɛnɛ pomana l’akambo amɔtshi wahombawɔ sɔnɔla l’asa kɛnɛ kalanga Lɛɛta la kɛnɛ kalakanya ɔtɛmwɛlɔ awɔ.

Sawo sɔ diakate ɔnɛ: “Atakoke ndo ngɔndɔ la ntondo ka vɔ kɔnya wodja w’otondo dia mbeya kana vɔ pombaka minya kana tshika ɔlɛmbɛ washimba odiakelo wa diwala, owanu wa mamba wekɔ lam’asa ewandji wa wodja l’ewandji w’ɔtɛmwɛlɔ wa l’Irlande, lɛnɛ ele lofulo loleki woke l’anto wekɔ Aseka Mupɛ walɔmbwama oma l’Ɔrɔma.” Lɛɛta akate dia minya ɔlɛmbɛ washimba odiakelo wa diwala, koko Ɔtɛmwɛlɔ w’Aseka Mupɛ hawolange kânga yema di’onto ndjaka diwala ko tshukana l’onto okina. Aseka Mupɛ w’Ase Irlande wakahombe sɔnɔla l’asa Ɛkɛlɛsia la Lɛɛta. L’ɔkɔngɔ wa vɔ sala vɔtɛ, Lɛɛta mbakadje otshumba l’akatshi angana ato.

Dikambo dia lonyangu efula nto ele, l’edja k’ɛnɔnyi efula lo wodja w’Irlande wa la Ngɛl’a Nkushi, anto wakahomana l’okakatanu wa wolo lo dikambo dia lotshungɔ lele la wodja awɔ dia ndjalɔmbɔla vamɛ. Anto efula wakadiakema. Aseka Mupɛ walɔmbwama oma l’Ɔrɔma l’Ase Asɔnyi waki la tokanyi

totshikitanyi lo kɛnɛ k’endana la Lɛɛta lakawahombe mbetawɔ: lowandji l’Ase Grande-Bretagne lakatetemalaka lo lɛkɛ la Ngɛl’a Nkushi kana lowandji lakalɔmbɔlaka wodja w’otondo w’Irlande.

Woho akɔ wâmɛ mbakasalema ndo lo wodja wakawelɛka ntondo ɔnɛ Yougoslavie, emboledi wakalɔmbɛ ase ɛtɛmwɛlɔ wotshikitanyi, ndo Aseka Mupɛ l’Ase Asɔnyi, dia vɔ ndɔshana lo ta diakawalɔka dia susana nkɛtɛ kana wodja. Le lofulo l’anto wa lo wodja ɔsɔ, ɔkɛndɛ awɔ wa ntondo aki na? Onde vɔ waki la dia ndjela wanɛ wakayataka ɔnɛ vɔ mbele akɛndji wa Lɛɛta, kana wakahombe kitanyiya dui dia Nzambi, ɔnɛ lata ate: “Tudiakaki, . . . Ulangi unyaye uku ayalangaye”?​—⁠Romo 13:⁠9.

Ondo wɛ mbeyaka kanyiya ɔnɛ dikambo dia ngasɔ hadiokokomɛki pondjo. Koko, diɔ kokaka kokomɛ. Mɛtɛ, diɔ mbeyaka mendana la yɛ kânga kakianɛ. Lo dibuku diande dielɛwɔ The State in the New Testament (Lɛɛta lo Dikelemba di’Oyoyo), Oscar Cullmann, nomb’ewo kɛmɔtshi k’awui a Nzambi, ekɔ lo tɛkɛta dikambo dia “tɛdikɔ t’eko kana nyɔi tahomba kana takoka Akristo wa nshi nyɛ nɔmbama dia mbɔsa la ntondo k’akambo wa wolo naka wambânemɛ oma le mandji ya kɔlɔ ya hiadi.” Koko, nde ekɔ lo tɛkɛta nto dikambo dia “ɔkɛndɛ wa mɛtɛ ndo w’ohomba wele l’Okristo tshɛ​—⁠oyadi Okristo wasɛna la tshina di’akambo welɛwɔ ɔnɛ ‘akambo w’ɛlɔlɔ,’ ‘wasalema lushi la lushi’​—⁠wa tokomɛ ndo shidiya okakatanu ɔmɔtshi wa wolo wôkomɛ paka l’ɔtɛ wênde Okristo oto.”

Onde akambo weta lam’asa ɔtɛmwɛlɔ la Lɛɛta pombaka kotola yambalo y’Akristo wa nshi nyɛ? Eelo. Oma ko nshi ya ntondo, Akristo wakayatshutshuyaka dia monga la kanyi yasungana lo dikambo di’emboledi w’andja ɔnɛ. Ɔlɔmbɔdi awɔ, Yeso Kristo, akalomboyama, akânyema, ndo akadiakema oma le Lɛɛta l’Ase Rɔmɔ. Ambeki ande wakahombe mbokanya ɛkɛndɛ awɔ w’Akristo l’ɛkɛndɛ awɔ w’otsha le Diolelo di’Ase Rɔmɔ. Naka sho sɛdingola kɛnɛ kaketaka lam’asawɔ, kete Akristo wa nshi nyɛ wayɛna mboka kahombawɔ mbidjɛ.