666 Bu Tsho Numero k’Ehekesa

“Untu teyaki nsumba kana nsundja, paka one leli la djimbitelu ku ya lukumbu la nyama kako kana numero ka lukumbu lato. Yimba nye. One leli la yimba, ali numero ka nyama kako, ne dia to keli numero k’untu omotshi. Numero kato keko kama shamalu la akumi asamalu la asamalu.”​—Enyelo 13:17, 18.

ASAWO wa lo Bible amɔtshi ato mbonyiya yambalo y’anto oko wonyiya prɔfɛsiya kendana la djembetelo y’ehekesa, kana lokombo la ‘nyama ka djawudi,’ mbut’ate numero ka 666. Vate vate yaha pe mbutamaka lo televiziɔ, l’Ɛtɛrnɛtɛ, lo waa filmɛ, l’abuku ndo lo waa tojurunalɛ lo kɛnɛ kendana la djembetelo ya nyama ka djawudi.

Anto amɔtshi mbetawɔka dia numero ka 666 ekɔ djembetelo yaki otunyi waki Kristo wa lo nshi yakafundamaka Bible. Akina mbutaka dia numero kɛsɔ nembetshiyaka djembetelo mɔtshi yetawɔma, ɛnyɛlɔ oko ɔkɔtshɛlɔ wa losalo kana wodjelo wa yangangɔ mɔtshi ya tshitshɛ efula lo demba yɛnya dia onto ekɔ okambi waki nyama ka djawudi. Akina nto mbetawɔka dia numero ka 666 ekɔ djembetelo ya waa papa ya lo Rɔma y’aseka Mupɛ. Numero kɛsɔ mbalembetshiya alɛta wofundami l’ɔtɛkɛta wa Latin ɔnɛ Vicarius Filii Dei (Ɔlɔmbɛdi w’Ɔna Nzambi) wele lo tofulɛ taki waa papa ya lo Rɔma, ndo lo kolonganya alɛta asɔ vɔ ndjokomaka lo numero ka 666. Anto akina mbutaka nto ɔnɛ vɔ koka kamba dia tana numero kakɔ yâmɛ shɔ oma lo lokombo la lo Latin laki Dioclétien Nkumekanga ka woke k’ase Rɔma ndo oma lo lokombo la lo Hɛbɛru laki Kayisa Nɛrɔ.a

Ɔnkɔnɛ, oko wayotɛna lo sawo diaso diayela elembetshiyelo wa lɔfɔnya ndo wa kashi ɛsɔ tshikitana mɛtɛ la kɛnɛ kata Bible twamɛ lo dikambo dia djembetelo ya nyama ka djawudi. Bible mɛnyaka dia Nzambi ayotshulwɛ wanɛ wele la djembetelo yaki nyama ka djawudi nkɛlɛ kande etena kayondokumiya la dikongɛ nɛ di’akambo dia kɔlɔ. (Enyelo 14:9-11; 19:20) Ɔnkɔnɛ, shihodia numero ka 666 bu tsho kondja olembetshiyelo lo ehekesa ka dikambo kɛsɔ. Diɛsɛ ko, Jehowa Nzambi lele ngandji ndo kiɔkɔ y’osase wa lo nyuma hatotshike lo wodjima lo kɛnɛ kendana la dikambo di’ohomba efula sɔ.​—2 Timote 3:16; 1 Joani 1:5; 4:8.

[Nɔtɛ ka l’ɛse ka dikatshi]