Tewɔ “diui dia antu akina”
“Vo hawuyeli untu ukina, keli vo wayûlawo, ne dia vo haweyi diui dia antu akina.”—JOANI 10:5.
1, 2. (a) Akasale Mariya etena kakawelɛ Yeso lo lokombo lande, ndo awui akɔna wakate Yeso yema tshitshɛ la ntondo wɛnyama oma lo dikambo sɔ? (b) Kakɔna katokimanyiya dia tshikala suke suke la Yeso?
YESO lakolwama akɛnyi womoto ɔmɔtshi emadi suke la diombo diande dia hwe. Nde akeyaka womoto akɔ dimɛna. Womoto ɔsɔ ko Mariya w’ose Mangadala. Suke l’ɛnɔnyi ehende la ntondo, Yeso akatondja ɛdiɛngɛ waki lo demba diande. Oma ko etena kɛsɔ, nde akatâtshindɛka Yeso la apɔstɔlɔ ande, ndo akatakotshaka ehomba awɔ wa lushi la lushi. (Luka 8:1-3) Koko, ɛlɔ Mariya ekɔ lo ndela l’ɔtɛ wa lonyangu lele lande woho wakandɛnyi Yeso avɔ ko demba diande diaya bu nto! Ɔnkɔnɛ, Yeso akawombola ate: “Umuntu kalelaye na? Ayangaye na?” Oko wakandafɔnya ɔnɛ nde aki onami w’ekambɔ, Mariya akakadimola ate: “Uwandji, naka we akawunyisha, umvuteli lene akayatuwetamia, keli ntuwose.” Ko, Yeso akawete ate: “Mariya!” Mbala kakɔ ɔtɔi nde akashihodia yoho yatondɔtɛkɛtaka la nde. L’ɔngɛnɔngɛnɔ tshɛ nde akôkadimola ate: “Umbetsha!” Ko nde akôkumbatɛ. —Joani 20:11-18.
2 Ɔkɔndɔ ɔnɛ mɛnyaka lo yoho ya diambo kɛnɛ kakate Yeso yema tshitshɛ la ntondo. Etena kakandayaɛdika l’onami w’ɛkɔkɔ ndo ambeki ande l’ɛkɔkɔ, nde akate dia onami mbelɛka ɛkɔkɔ ande lo nkombo yawɔ ndo vɔ mbeyaka dui diande. (Joani 10:3, 4, 14, 27, 28) Lo mɛtɛ, oko weya ɔkɔkɔ onami awɔ, woho akɔ wâmɛ mbakeye Mariya Onami ande, Kristo. Ndo ambeki waki Yeso wa nshi nyɛ mbeyaka Onami awɔ. (Joani 10:16) Oko wele woho washihodia ɔkɔkɔ dui di’onami mbokimanyiyaka dia tshikala suke suke l’onami awɔ, mbele shɛnɔdi yaso ya lo nyuma tokimanyiyaka dia kɛndakɛnda lo ndjela wanya w’Onami aso w’Ɔlɔlɔ, Yeso Kristo. —Joani 13:15; 1 Joani 2:6; 5:20.
3. Naa wembola ɛmɔtshi watohola wɛla waki Yeso wa lokoto l’ɛkɔkɔ?
3 Koko, lo ndjela wɛla akɔ wâmɛ, dikoka diele l’ɔkɔkɔ dia shihodia awui w’onto mbokimanyiyaka dia mbeya aha tsho ɔngɛnyi awɔ koko ndo otunyi awɔ. Dui sɔ diekɔ ohomba efula nɛ dia tekɔ l’atunyi wa keso. Atunyi akɔ ewɔ na? Ngande wasalawɔ akambo? Ngande wakokaso ndjakokɛ? Dia kondja okadimwelo, nyɛsɔ tende kɛnɛ kakate Yeso nto lo dikambo dia wɛla ande wa lokoto l’ɛkɔkɔ.
“One Lahoto lu Suku”
4. Lo ndjela wɛla w’onami, ɛkɔkɔ ndjelaka onto akɔna, ndo onto akɔna lahawayele?
4 Yeso ekɔ lo mbuta ate: “Keli one latotoka lu suku, eko u[n]ami w’ekoko. U[n]ami a suku atûdihulaka; ekoko watukaka diui diandi. Ndi atetaka ekoko andi kumbu, at[a]lombolaka utsha l’andja. Lam’atundutundjaka ekoko andi tshe, ndi atetaka la ntundu kawo. Ekoko watûyelaka, ne dia vo mbeyaka diui diandi. Vo hawuyeli untu ukina, keli vo wayûlawo, ne dia vo haweyi diui dia antu akina.” (Joani 10:2-5) Tolembete dia, Yeso akakambi la tshɛkɛta “diui” mbala shato. Mbala hiende nde ekɔ lo tɛkɛta dikambo dia dui di’onami w’ɔlɔlɔ, koko mbala ka sato, nde ekɔ lo tɛkɛta dikambo dia “diui dia antu akina.” Yeso ekɔ lo tɛkɛta dia onto okina la woho akɔna?
5. Lande na kahatalongola onto okina lɔtɛkɛtshiwɔ lo Joani tshapita 10?
5 Yeso hatɛkɛta dikambo dia onto okina lalangaso nongola, dikambo l’ɔtɛkɛta wa ntondo wakafundama Bible tshɛkɛta nongola nembetshiyaka “ngandji k’angɛndangɛnda.” (Heberu 13:2) Lo wɛla waki Yeso, onto okina kema ɔngɛndangɛnda wakawele. Nde “[“hɔtɔ,” NW] lu suku dia lukumbu l’ekoko, [“koko mbidɛka oma lo dihole dikina,” NW].” Nde ekɔ “uvi la opotodi.” (Joani 10:1) Naa onto la ntondo lɔtɛkɛtshiwɔ dikambo diande l’Ɔtɛkɛta waki Nzambi lakakome wovi la ɔpɔtɔdi? Satana Diabolo. Dibuku di’Etatelu toshikikɛka dikambo sɔ.
Etena Kakokɛma Dui dia Onto Okina Mbala ka Ntondo
6, 7. Lande na kakoka Satana mbelamɛ ɔnɛ onto okina ndo wovi?
6 Etatelu 3:1-5 kɔndɔlaka woho wakokɛma dui di’onto okina la nkɛtɛ mbala ka ntondo. Ɔkɔndɔ mbutaka dia Satana akatɛkɛta la womoto la ntondo, Eva, l’ekimanyielo k’olui la lokeso tshɛ. Ekɔ mɛtɛ dia, l’ɔkɔndɔ ɔsɔ Satana kema “untu ukina” lo yoho ya mɛtɛ mɛtɛ. Koko, etsha ande mɛnyaka dia lo toho efula nde fɔnaka l’onto okina lɔkɔndwami lo wɛla wa Yeso wele lo Joani tshapita 10. Tɔsɛdingole awui amɔtshi wafɔnawɔ.
7 Yeso mbutaka di’onto okina ndjasukanyaka le ɛkɔkɔ walangande salɛ kɔlɔ wele lo lokoto lo yoho y’edimidimi. Woho akɔ wâmɛ mbele, Satana akatɛkɛta l’onto lakandalange salɛ kɔlɔ, lo tshimbo y’olui. Woho ɔnɛ wakatɛkɛta Satana la mayɛlɛ mɛnyaka dia nde ekɔ mɛtɛ kanga lokeso. Ndo nto, onto okina laya lo lokoto l’ɛkɔkɔ nyangaka dia mbiva kanga ɛkɔkɔ, ɛkɔkɔ ande. Ɔnkɔnɛ, nde ekɔ kɔlɔ ndeka wovi, nɛ dia oyango ande wekɔ nto wa “ndjaka ndu dia nanya.” (Joani 10:10) Woho akɔ wâmɛ mbele, Satana aki kanga wovi. Lo kesa Eva, nde akoshishɛ kɔlamelo yande le Nzambi. Ndo nto, Satana akela anto nyɔi. Omalɔkɔ, nde ekɔ ondjakanyi.
8. Ngande wakengesola Satana ɛtɛkɛta ndo eyango waki Jehowa?
8 Lokeso laki Satana lakɛnama lo woho wakandengesola ɛtɛkɛta ndo eyango waki Jehowa. Nde akambola Eva ate: ‘Mɛtɛ kakanyotela Nzambi di’aha nyu ndɛ elowa w’etamba tshɛ?’ Satana akɛnya dia nde akâmbe efula, aki oko nde akataka ɔnɛ: ‘Ngande wakakoke Nzambi monga aha l’ekanelo k’ɔlɔlɔ nganɛ na?’ Nde akakotsha ate: “[Nzambi] mbeyaka ati: lushi layunyole, ashu anyu wayudiho.” Tolembete ɛtɛkɛta ande: “[Nzambi] mbeyaka.” Aki oko Satana aki lo mbuta ate: ‘Dimi mbeyaka kɛnɛ keya Nzambi. Dimi mbeyaka eyango ande ndo vɔ wekɔ kɔlɔ.’ (Etatelu 2:16, 17; 3:1, 5) Lonyangu ko, Adama l’Eva kombewɔ dui di’onto okina. Koko, vɔ wakohokamɛ ko wakayaela vɔamɛ ndo tokanula tawɔ asui.—Romo 5:12, 14.
9. Lande na kahombaso nongamɛ dia dui di’anto akina mbokɛma ɛlɔ kɛnɛ?
9 Satana kambaka la toho takɔ tâmɛ dia minganyiya ekambi wa Nzambi ɛlɔ kɛnɛ. (Enyelo 12:9) Nde ekɔ “shi kashi,” ndo wanɛ wahemba oko nde dia minganyiya ekambi wa Nzambi wekɔ anande. (Joani 8:44) Nyɛsɔ tɔsɛdingole toho tɔmɔtshi tokɛma dui di’anto akina ɛlɔ kɛnɛ.
Woho Wokɛma Dui di’Anto Akina Ɛlɔ Kɛnɛ
10. Naa yoho mɔtshi yokɛma dui dia anto akina?
10 Tokanyi ta kashi. Ɔpɔstɔlɔ Paulo mbutaka ate: “Tanyunganyiamaki la wetshelu wa wehu la wehu w’antu.” (Heberu 13:9) Wetshelo wa weho akɔna? Lam’ele vɔ koka ‘tonganyiya,’ mbokɛmaka hwe dia Paulo tɛkɛtaka dikambo dia wetshelo wakoka ndanya wɛdimo aso wa lo nyuma. Waa na wetsha wetshelo w’eyoyo wa ngasɔ? Paulo akatɛ olui ɔmɔtshi wa dikumanyi di’Akristo ate: “Antu wayunela uma l’atei anyu nyame, wayutela antu akambu waha mete, dia nkutula ambeki l’okongo awo.” (Etsha 20:30) Lo mɛtɛ, nshi nyɛ oko lo nshi ya Paulo, anto amɔtshi waki ntondo l’atei w’etshumanelo k’Akristo wekɔ lo pemba kakianɛ dia minganyiya ɛkɔkɔ lo tɛkɛta “akambu waha mete,” mbut’ate wele yema mɛtɛ yema kashi ndo wele tshɛ kashi. Ndo oko wakadite ɔpɔstɔlɔ Petero, vɔ kambaka l’“awui wa nyimbiya,” mbut’ate ɛtɛkɛta wafɔna la mɛtɛ koko wele bu la nɛmɔ watekana oko falanga ya kashi.—2 Petero 2:3.
11. Woho akɔna wɛnya ɛtɛkɛta wa lo 2 Petero 2:1, 3 toho tasala waa apɔsta akambo ndo oyango awɔ?
11 Ndo Petero akɛnya nto toho tasala waa apɔsta akambo lo mbuta dia vɔ ‘wayɔtshiya tâto t’elanyelo lo woshɛshɛ.’ (2 Petero 2:1, 3) Oko wele wovi wa lo wɛla waki Yeso wa lokoto l’ɛkɔkɔ hɔtɔ ‘lo soko, koko mbudɛka oma lo dihole dikina,’ woho akɔ wâmɛ mbele waa apɔsta ndjasukanyaka le so oko wevi. (Ngalatiya 2:4; Jude 4) Naa oyango awɔ na? Petero ekɔ lo kotsha ate: “Vo wayunyukesa.” Lo mɛtɛ, oyadi kɛnɛ kakoka mbuta waa apɔsta dia ndjaswɛlɛ, oyango wa mɛtɛ w’akanga wa lokeso asɔ ele “dia mvua, dia ndjaka ndu dia nanya.” (Joani 10:10) Tewɔ anto akina wa woho ɔsɔ!
12. (a) Ngande wakoka anto wekesanɛ la so tokonya dia pokamɛ dui dia anto akina? (b) Awui akɔna wafɔna lam’asa toho takamba la Satana ndo tɔnɛ takamba l’anto akina ɛlɔ kɛnɛ?
12 Angɛnyi wa kɔlɔ. Dui dia anto akina mbeyaka mbokɛma oma le wanɛ wekesanɛ la so. Angɛnyi wa kɔlɔ wekɔ wâle, djekoleko le ɛlɔngɔlɔngɔ l’esekaseka. (1 Koreto 15:33) Tohɔke dia Satana akasɔmana la Eva nɛ dia nde mbaki atashihodia akambo dimɛna ndo mbakaleke dikɛnda l’atei w’anto ahende wa ntondo. Satana akawetawoya dia Jehowa akasuse lotshungɔ lande tshanana, ko tete lee dikambo sɔ diaki kashi. Jehowa akalangaka anto wakandatonge ndo akayakiyanyaka dikambo di’ɔlɔlɔ awɔ. (Isaya 48:17) Woho akɔ wâmɛ mbele, ɛlɔ kɛnɛ anto akina pembaka dia nyetawoya, nyu ɛlɔngɔlɔngɔ l’esekaseka di’ambutshi anyu w’Akristo susaka lotshungɔ lanyu. Ngande wakoka anto akina asɔ monga la shɛngiya le nyu? Ɔna womoto ɔmɔtshi l’Okristo aketawɔ ate: “Lo tshanda mɔtshi, mbetawɔ kami kakɔlɛ lo yɛdikɔ mɔtshi l’ɔtɛ w’asekami wa la kalasa. Vɔ wakatetemala mbuta ɔnɛ ɔtɛmwɛlɔ ami wekɔ l’ɛlɛmbɛ efula ndo nɔmbaka akambo ambotamanya.” Eelo, kɛnɛ kele mɛtɛ ele ambutshi ayɛ kolangaka. Ɔnkɔnɛ, lam’akotshutshuya asekayɛ wa la kalasa di’aha wɛ mbetawɔ kɛnɛ kakotɛ ambutshi ayɛ, tonganyiyamake oko wakanganyiyama Eva.
13. Naa yɛdikɔ ya lomba yakɔshi Davidi, ndo naa yoho mɔtshi yakokaso mbôkoya?
13 Omembi w’esambo, Davidi akafunde lo dikambo di’angɛnyi wa kɔlɔ ate: “Dimi hatudjaseka kame l’akanga a kashi, kuyanga mengola kame l’akanga a lukesu.” (Osambu 26:4) Onde wɛ ambolembetɛ nto dionga sɔ di’anto akina? Vɔ mbishɛka kɛnɛ kewɔ oko wakashɛ Satana kɛnɛ kakinde lo kamba la olui. Ɛlɔ kɛnɛ, anto amɔtshi wayasha l’awui wa mindo kambaka l’Ɛtɛrnɛtɛ dia mbishɛ kɛnɛ kewɔ ndo eyango awɔ. Lo elui w’anto wakɛtshanya l’anto akina akambo lo Ɛtɛrnɛtɛ, epalanga wele la lɔkɛwɔ la kɔlɔ kokaka ndjatondja oko ɛlɔngɔlɔngɔ dia nyonda lo djonga. Ɛlɔngɔlɔngɔ l’esekaseka lee, lam’alanganyu, nyonge la yewo di’aha nyu ndjodja lonyuma lanyu lo wâle.—Osambu 119:101; Tukedi 22:3.
14. Ngande wadianganya tita sango dui di’anto akina tena dimɔtshi?
14 Emamatanya wa kashi. Kânga mbele awui amɔtshi watawɔ lo dikambo di’Ɛmɛnyi wa Jehowa wekɔ mɛtɛ, tena dimɔtshi ase tita sango mbetawɔka dia vɔ kamba la wɔ dia mbewoya dui di’anto akina. Ɛnyɛlɔ, lo wodja ɔmɔtshi jurunalɛ mɔtshi yakate di’Ɛmɛnyi wa Jehowa wakasukɛ lowandji laki Hitler lo Ta dia Hende di’Andja w’Otondo. Lo jurunalɛ kina, wakafunde Ɛmɛnyi wa Jehowa ɔnɛ vɔ wekɔ lo mbiva anto oma l’ɛtɛmwɛlɔ ekina. Lo wedja efula tita sango fundaka Ɛmɛnyi wa Jehowa ɔnɛ vɔ tonaka sakɛ anawɔ ndo vɔ ndihaka washo lo pɛkato ya weke yasala asekawɔ ambetawudi. (Mateu 10:22) Kânga mbata anto ngasɔ, wanɛ wateya dimɛna mbeyaka di’emamatanya ɛsɔ wekɔ kashi.
15. Lande na kele bu dui dia lomba ndjela awui tshɛ watama lo tita sango?
15 Kakɔna kahombaso sala etena kahomanaso la emamatanya wadianganya dui di’anto akina asɔ na? Sho pombaka ndjela dako dia lo Tukedi 14:15 diata ɔnɛ: “Kanga enginya atetawoka aui tshe wata antu. Keli kanga ewu atushishimaka mbuka katandatshu.” Kema dui dia lomba mbetawɔ awui tshɛ watama lo tita sango watawɔ ɔnɛ wekɔ mɛtɛ. Kânga mbeso hatɔnyɔla sango tshɛ y’oma le anto wa l’andja ɔnɛ, sho mbeyaka dia “wa la kete tshe weko lu wulu wa kanga kolo.”—1 Joani 5:19, sho mbɛnganyisha alɛta ango.
‘Nyohembe Ɛtɛkɛta Wakasambiyama’
16. (a) Ngande wɛnya dionga di’ɛkɔkɔ mɛtɛ k’ɛtɛkɛta waki Yeso watanaso lo Joani 10:4? (b) Kakɔna katokeketsha Bible dia sala?
16 Ko, ngande wakokaso ndjashikikɛ dia kapanda ekɔ ɔngɛnyi kana otunyi ɔmɔtshi? Eelo, Yeso akate di’ɛkɔkɔ ndjelaka onami “ne dia vo mbeyaka diui diandi.” (Joani 10:4) Aha ɛnamelo k’onami mbatshutshuya ɛkɔkɔ dia vɔ mboyela; koko dui diande. Dibuku dimɔtshi dia lo wedja wɔtɛkɛtshiwɔ lo Bible kɔndɔlaka woho wakasɛmɛ ɔngɛndangɛnda ɔmɔtshi di’ɛkɔkɔ mbeyaka onami awɔ oma lo ɔlɔtɔ ande, koko aha oma lo dui diande. Onami ɔmɔtshi akakadimola dia oma lo dui mbatowoweyaka. Dia shikikɛ dikambo sɔ nde akengɔnya ahɔndɔ l’ɔngɛndangɛnda ɔsɔ. Lam’akandalɔtɛ ahɔndɔ w’onami, ɔngɛndangɛna ɔsɔ akatatɛ mbelɛ ɛkɔkɔ kele vɔ kondja oya le nde. Vɔ kombeyaka dui diande. Koko, etena kakawaelɛ onami, kânga mbakinde kɔndɔta oko onami, ɛkɔkɔ wakaye mbala kakɔ ɔtɔi. Ɔnkɔnɛ, onto ɔmɔtshi kokaka monga l’ɛnamelo kele oko k’onami, koko le ɛkɔkɔ kɛsɔ hɛnya dia nde kele mɛtɛ onami. Ɛkɔkɔ sɛdingolaka dui di’ɔnɛ lawaelɛ ko diɛdika la nɛ di’onami. Ɔtɛkɛta waki Nzambi totɛka dia sala woho akɔ wâmɛ, mbut’ate ‘dia pemba ɛtɛkɛta tshɛ wakasambiyama dia mbeya kana vɔ ndja oma le Nzambi.’ (1 Joani 4:1; 2 Timote 1:13) Kakɔna kayotokimanyiya dia sala dikambo sɔ na?
17. (a) Ngande wayotekesanɛ la dui dia Jehowa? (b) Ewo ka Jehowa tokimanyiyaka dia sala na?
17 Mbokɛmaka hwe dia, naka sho mbeyaka dui kana losango la Jehowa dimɛna efula, kete tayoshola esadi eto dui dia onto okina. Bible mɛnyaka woho wahamiaso ewo ka ngasɔ. Tɔ mbutaka ɔnɛ: “Atui anyu wayuka diui uma l’okongo ati: mbuka keku, nyokendekende loko!” (Isaya 30:21) “Diui” sɔ diokɛma l’ɔkɔngɔ aso ndja oma l’Ɔtɛkɛta wa Nzambi. Etena tshɛ kadiaso Ɔtɛkɛta waki Nzambi, sho mbokaka lo yoho ya didjidji, dui di’Onami aso wa Woke Jehowa. (Osambu 23:1) Omalɔkɔ, woho watataleke mbeka Bible, mbayotoleka mbekesanɛ la dui dia Nzambi. Ewo kɛsɔ kayotokimanyiya dia sho shihodia dui di’anto akina mbala kakɔ ɔtɔi.—Ngalatiya 1:8.
18. (a) Alembetshiya mbeya dui dia Jehowa? (b) Lo ndjela Mateu 17:5, lande na kahombaso kitanyiya dui dia Yeso?
18 Mbeya dui dia Jehowa nembetshiyaka nto na? Lâdiko dia mboka, dui sɔ nembetshiyaka nto kitanyiya. Tɔsɛdingole nto Isaya 30:21. Ɔtɛkɛta wa Nzambi mbutaka ɔnɛ: “Mbuka keku.” Eelo, sho kondjaka ɛlɔmbwɛlɔ ka Jehowa oma lo wekelo wa Bible. Oma lâsɔ nde mbidjangaka ate: “Nyokendekende loko.” Jehowa nangaka sho kamba la kɛnɛ kokaso. Ɔnkɔnɛ, lo kamba la kɛnɛ kekaso, sho mɛnyaka dia sho hatoke tsho dui dia Jehowa koko sho dikitanyiyaka. (Euhwelu k’Elembe 28:1) Kitanyiya dui dia Jehowa nembetshiyaka nto kitanyiya dui dia Yeso, nɛ dia Jehowa nde ndamɛ mbakatotɛ dia sala ngasɔ. (Mateu 17:5) Kakɔna katotɛ Yeso, Onami aso w’Ɔlɔlɔ dia sala? Nde tetshaka dia mbetɛ anto ambeki ndo dia monga la wɛkamu le ‘ɔhɔmbɔ wa kɔlamelo ndo wa kɛsɔ.’ (Mateu 24:45; 28:18-20) Naka sho kitanyiya dui diande kete tayokondja lɔsɛnɔ la pondjo.—Etsha 3:23.
“Vo Wayûlawo”
19. Kakɔna kahombaso sala la ntondo ka dui di’anto akina?
19 Ko lâsɔ, ngande wahombaso sala la ntondo ka dui di’anto akina? Sho la dia sala yoho yasala ɛkɔkɔ. Yeso mbutaka ate: “[“Koyanga lo yoho yakɔna tshɛ,” NW] vo hawuyeli untu ukina, keli vo wayûlawo.” (Joani 10:5) Ekɔ weho ehende wahombaso sala akambo. Ntondotondo, “koyanga lo yoho yakɔna tshɛ” sho ‘hatoyele’ onto okina. Eelo, sho tamboyashikikɛ dia tona onto okina. Lo Grɛkɛ kakawakambe latɔ dia funda Bible, etelo k’ɔnɛ “koyanga lo yoho yakɔna tshɛ” mɛnyaka yoho yoleki tshɛ ya tona dikambo dimɔtshi. (Mateu 24:35; Heberu 13:5) Woho wa hende ele, sho ‘tayôlawɔ,’ kana tayowoka ɔkɔngɔ. Ngasɔ mbahombaso sala la ntondo ka wanɛ wele wetshelo awɔ hawɔtɔnganɛ la dui di’Onami w’Ɔlɔlɔ.
20. Ahombaso sala etena kalɔshanaso (a) la waa apɔsta wa lokeso, (b) l’angɛnyi wa kɔlɔ, ndo (c) la akambo wa kashi lo tojurunalɛ?
20 Ɔnkɔnɛ, etena kahomanaso la wanɛ wadianganya tokanyi ta waa apɔsta, sho salaka kɛnɛ kata Ɔtɛkɛta waki Nzambi ɔnɛ: “Nyewo waku watutungaka diatanelu la etakanya wutshikitanyi la akambu wakanyetsha amvutshi. Nyangani uma le wo.” (Romo 16:17, sho mbɛnganyisha alɛta ango; Tito 3:10) Woho akɔ wâmɛ mbele, Akristo w’ɛlɔngɔlɔngɔ l’esekaseka walɔshana la wâle waya oma le angɛnyi wa kɔlɔ kombolaka kamba la dako diakasha Paulo ɔlɔngɔlɔngɔ Timɔtɛ diata ɔnɛ: “Ulawo saki ya kolo y’elongo w’apami.” Ndo lam’atomamatanyiyawɔ awui wa kashi lo tita sango, sho tayohɔka dako dikina diakasha Paulo Timɔtɛ diata ɔnɛ: “[“Wanɛ wahokamɛ dui di’anto akina,” NW] wayetola lu ekondo [“wa kashi,” NW]. Keli we, uyakimeli lu akambu tshe.” (2 Timote 2:22; 4:3-5, sho mbɛnganyisha alɛta ango.) Dui dia anto akina kɔngɛnyangɛnyaka woho akɔna tshɛ, sho ndawɔka kɛnɛ tshɛ kakoka ndanya mbetawɔ kaso.—Osambu 26:5; Tukedi 7:5, 21; Enyelo 18:2, 4.
21. Difuto diakɔna diakongɛ wanɛ watona dui dia anto akina?
21 Etena katonawɔ dui di’anto akina, Akristo w’akitami w’esɔ kitanyiyaka ɛtɛkɛta waki Onami w’Ɔlɔlɔ wa lo Luka 12:32. Yeso mbatɛka lɔkɔ ate: “Tanyukaki woma, nyu limba la tshitshe l’ekoko, ne dia Shenyu nangaka nyusha diulelu.” Woho akɔ wâmɛ mbele “ekoko ekina” wekɔ lo kongɛ l’asolo walomɔlomɔ dia mboka ɛtɛkɛta waki Yeso wata ɔnɛ: “Nyuyi, nyu etshokwami wa Papa, nyukiti diulelu diakawanyolongoswela umaka etatelu k’andja.” (Joani 10:16; Mateu 25:34) Ande difuto dia diambo diakongɛ wanɛ watona “diui dia antu akina” lee!
Onde Wɛ Mbohɔka?
• Lande na kele Satana sunganaka mbɔsama oko onto okina lɔtɛkɛtshiwɔ dikambo diande lo wɛla waki Yeso wendana la lokoto l’ɛkɔkɔ?
• Ngande wokɛma dui dia anto akina ɛlɔ kɛnɛ?
• Woho akɔna wakokaso mbeya dui dia anto akina?
• Kakɔna kahombaso sala etena kokaso dui dia anto akina?
[Osato wa lo lɛkɛ 15]
Ngande wahombaso sala lam’okaso dui dia anto akina?