Onde Wɛ Kokaka Mbisha Lonya?
1 Ɔpɔstɔlɔ Paulo akakɔkɔmiya ase etshumanelo dia vɔ ‘kananɛka lam’asawɔ.’ (1 Kor. 12:25) Omalɔkɔ, sho la dia mbidjanaka yimba lam’asaso ndo kimanyiyanaka l’etena k’ohomba. Oko ɛnyɛlɔ, akadiyɛso amɔtshi wa lo nyuma wekɔ lo mbodia anawɔ vamɛ l’akambo wa mɛtɛ. Akadiyɛso asɔ wekɔ lo mɛmba ɔkɛndɛ ɔsɔ wa wotsho vamɛ dia ndakanya anawɔ lo nyuma. Aha la tamu, vɔ sunganaka keketshama ndo kondja ekimamyielo oma le so ‘lo ndjela ehomba awɔ.’ (Romo 12:13a) Onde wɛ kokaka mbakimanyiya?
2 Toho Takokayɛ Mbakimanyiya: Sho kokaka mbakimanyiya lo mbaɛmbaka otsha lo nsanganya la l’assemblée le wanɛ wahomba futa mutuka dia koma lɛkɔ. Kimanyiya mama kele l’ana wa totshitshɛ lo mbakokɛ mbeyaka mbosha diaaso dia nde ndjela losanganya dimɛna. Ndo nto, sho mbeyaka mbokimanyiya lo tombaka la nde lam’atshɔnde l’ana l’esambishelo. Sho kokaka sɛngiya ɛlɔngɔlɔngɔ kana esekaseka lo yoho y’ɔlɔlɔ lo ndjasha l’otema ɔtɔi le wɔ ndo lo monga oko angɛnyi awɔ. Lo mbeta ɔnangɛso kana kadiyɛso kôdja ana ndamɛ kâmɛ l’anande lo wekelo aso wa lo nkumbo lo tena dimɔtshi mbeyaka mbokeketsha lo nyuma.
3 Onga Kanga Kɛsɔ: Sho pombaka monga la yewo di’aha kimanyiya onto la wolo naka nde bu l’ohomba w’ekimanyielo. Ndo nto, hatohombe mbɔtɔ l’akambo wa lo nkumbo kakana kânga tekɔ lo kikimanyiya. Aha la tamu, akadiyɛso kana atshukanyi mbaleka sungana dia kimanyiya kadiyɛso kɛmɔtshi kele l’ohomba w’ekimanyielo.
4 Akristo tshɛ keketshamaka dia ‘nongɔnaka’ lam’asawɔ. (Romo 12:13b) Lo kimanyiya anangɛso kana akadiyɛso wa lo nyuma, sho mɛnyaka yoho mɔtshi yokanaso ngandji l’ɛnyɛlɔ ka Kristo.—Joa. 13:35.