Sambisha lo Monga Osukanyi w’Ɔlɔlɔ
1 Yeso akate ate “ulangi unyaye uku ayalangaye.” (Mat. 22:39) Aha la tamu, wɛ ‘salɛka’ ambetawudi w’asekayɛ ‘kɛnɛ kele ɔlɔlɔ,’ ko onde wɛ hakoke mɛnya ngandji kayɛ ndo otsha le asukanyi ayɛ? (Ngal. 6:10) Lo toho takɔna na?
2 Lo Ndjaeyanya: Onde asukanyi ayɛ mbeyaka dia wɛ ekɔ Ɔmɛnyi wa Jehowa? Naka bu, ko lande na kahayawaembola lam’eyɛ l’olimu w’esambishelo na? Wɛ koka mamba etombelo wakokayɛ kondja! Ndo naka wɛ mɛnaka dia kokaka, kete hemba dia mbâsambisha lo tshakitudi. Lam’atombayɛ l’andja wa lokombo kana wa luudu layɛ, wɛ koka mbawɛna wɔmba asɛkɛ awɔ kana watete lo shinga. Sawola la wɔ l’elungi k’ɔmɔnɔmɔnɔ. Sala la wolo dia tɛkɛta la wɔ dikambo dia mbetawɔ kayɛ, dia dihole diatanema Mbalasa ka Diolelo, ndo kɛnɛ kasalema lɛkɔ ndo tɛwɔ asukanyi akina watshɔ dia tosangana la nyu. Lɔmbawɔ dia vɔ ndja lo nsanganya. Ɔsa yɛdikɔ ya sambisha onto tshɛ leyayɛ lokumu l’ɔlɔlɔ.—Etsha 10:42; 28:23.
3 Oma lo Dionga Diayɛ di’Ɔlɔlɔ: Dionga diayɛ di’ɔlɔlɔ nembetshiyaka hwe êyɛ ndo koshaka diaaso dia sambisha. Ndo nto, diɔ ‘mbishaka wetshelo waki Nzambi kɛnɛmɔ.’ (Tito 2:7, 10) Yasha l’otema ɔtɔi le asukanyi ayɛ. Onga ɔngɛnyi ndo onto loka akambo. Tɔtɔke l’akambo awɔ wa lânde ndo kitshakawɔ lotui ki. Naka ɔmɔtshi l’atei awɔ ambotata hemɔ, kete djande yimba ndo kimanyiyande. Naka nkumbo kɛmɔtshi k’oyoyo kambonɔ dia ndjodjasɛ suke la nyu, longolatɔ dimɛna. Etsha w’ɔlɔlɔ wa ngasɔ mbishaka anto kanyi ya dimɛna oya le so ndo ngɛnyangɛnyaka Jehowa.—Heb. 13:16.
4 Oma lo Pudipudi Kele la Diangɔ Diayɛ: Monga osukanyi w’ɔlɔlɔ mendanaka nto la woho walɔngɔsɔlayɛ luudu layɛ dia lɔ mongaka olangala. Luudu ndo sɛkɛ diele pudipudi ndo olangala ekɔ tshondo y’esambishelo. Koko luudu la mindo kana lele la diangɔ dia nyɛtɛtɛ l’emamu mbeyaka ndjokonya anto dia mɔnyɔla losango la Diolelo. Ɔnkɔnɛ, ekɔ ohomba efula mbetɛ luudu layɛ, sɛkɛ ndo dikalo, mututu, kana mutuka ayɛ pudipudi ndo dimɛna.
5 Ndjakiyanya dikambo di’anto wele l’andja w’etshumanelo k’Akristo mɛnyaka ngandji ka wonyayɛ onto. Etombelo akɔna wakokayɛ kondja na? Amɔtshi l’atei awɔ mbeyaka “[ndj]utumbula [Nzambi]” naka “vo wayena etsha anyu w’ololo.”—1 Pet. 2:12.