Tokondja Wahɔ Efula oma lo Losanganya la Distrikɛ Lele l’Ɔtɛ a Dui ɔnɛ: “Apandjudi wa Diolelo Wele l’Ohetoheto”

¹ Ekongelo Kaki l’Ekeketshelo k’Efula: Takakeketshama mɛtɛ efula lo losanganya laso la distrikɛ lekeso ka mbɔtɔ! Sho tshɛ takatshumana paka l’oyango wamɛ wa ndeka monga l’akoka wa sambishaka Diolelo diaki Nzambi l’ohetoheto. Onde wɛ akohɔ woho wakalembetshiya ɔtɛkɛtshi wa ntondo etelo k’ɔnɛ “pandjola”? Onde wɛ akohɔ eyangelo wakawatokeketsha dia sala lo ndjela sawo diaki l’ɔtɛ a dui ɔnɛ: “Tatokake Wɔma nɛ dia Sho Mbeyaka dia Jehowa Ekɔ la So”? Ɛkɔndɔ akɔna wa mɛtɛ w’awui weta lo lɔsɛnɔ wakayasɛdingola dimɛna?

² Dako dia tenyi sato diaki l’ɔtɛ a dui ɔnɛ: “Wolo wa Mbetawɔ Kaso Mɛnamaka l’Ehemba Wotshikitanyi” diakatosha ɛkɔkɔ esato wɛnya bonde katshika Jehowa di’ɛhɛnyɔhɛnyɔ tokomɛ. Onde wɛ mbeyaka nembetshiya ehemba akɔ? Divɛsa diakɔna diatɛkɛta dikambo dia lomangemange laso l’Akristo? Akawatokeketsha dia sala woho wa sho mbeya ndjalɔngɔsɔla dia shika tanga la tondo k’ehemba wayotokomɛ l’ɔtɛ wa lomangemange laso? Ngande watombwama Jehowa lo woho wakikɛso ehemba la kɔlamelo tshɛ?

³ Etenyi kakɔna ka lo dramɛ diaki l’ɔtɛ a dui ɔnɛ: “Totshikale Nge lo Tena dia Wolo” kakaleke kokeketsha? Woho akɔna wokokiso monga oko Jeremiya?

⁴ Sawo dia lo sɛkɛ diaki l’ɔtɛ a dui ɔnɛ: ‘Akambo wa ‘l’Andja Ɔnɛ Wekɔ lo Tatshikitana,” diakalembetshiya etshikitanu akɔna wa weke wayonga lo nshi yayaye ndo wayotokonya lo lushi la wɔma laki Nzambi? Lam’akayalongaka sawo dia ndjihelo, diaki l’ɔtɛ a dui ɔnɛ: “Toyasha Tshɛ l’Elimu w’Ɔlɔlɔ oko Weso Apandjudi wa Diolelo Wele l’Ohetoheto,” woho akɔna wakayɔtɔnganyiya awui wa lo sawo sɔ l’olimu ayɛ w’esambishelo?

⁵ Awui w’Ohomba wa Kamba la Wɔ: Oko wakadialembetshiyama lo sawo diaki l’ɔtɛ a dui ɔnɛ: “Tônge la Dionga dia Lowando,” ngande wakokaso monga la lowando l’efula otsha le Jehowa? Lo nyango dako diaki l’ɔtɛ a dui ɔnɛ: “Apandjudi wa Diolelo Wahɛtahɛta l’Ohetoheto,” ohetoheto waki onto akɔna wakawatokeketsha dia mbokoya? Dikambo diakɔna diakawatɔlɔmbɛ dia sho ndjasɛdingola shamɛ?

⁶ Sawo dia tenyi sato diaki l’ɔtɛ a dui ɔnɛ: “Prɔfɛsiya Kaki Mika Tokeketshaka dia Kɛndakɛnda lo Lokombo la Jehowa,” diakake epole ɔsɛkɛ l’akambo akɔna asato wahombaso kotsha dia sho mbetawɔma le Jehowa? Onde onto kokaka mbakotsha? (Mika 6:⁠8) Lo ndjela sawo diaki l’ɔtɛ a dui ɔnɛ: “Totetemale Monga la Lɔkɛwɔ la Pudipudi lo Kokɛ Etema Aso,” lo toho takɔna tahombaso nama lɔkɛwɔ laso la pudipudi? L’akambo akɔna wakatewola sawo diaki l’ɔtɛ a dui ɔnɛ: “Tewɔ Lokeso” diaha sho kesama ndo aha sho kesa anto akina?

⁷ Awui akɔna w’ohomba w’oma lo sawo diaki l’ɔtɛ a dui ɔnɛ: “Apandjudi wa Diolelo Watombola Olimu Awɔ” wamboyotatɛ kamba la wɔ l’olimu ayɛ w’esambishelo? Lo sawo diaki l’ɔtɛ a dui ɔnɛ: “Asawo wa lo Nyuma Keketshaka,” takasɛdingola Filipi 4:⁠8. Woho akɔna wakatokimanyiya divɛsa sɔ dia mengesolaka asawo aso otsha l’akambo w’ɔlɔlɔ ndo etena kakɔna kahombaso salaka dikambo sɔ?

⁸ Sawo diaki l’ɔtɛ a dui ɔnɛ: “Toyaɛkɛ Tshɛ le Jehowa lo Tena dia Wolo” diakatɛnya woho wokokiso ndɔshana l’awui wa wɔma, ekakatanu wendana l’ekondjelo, wola, hemɔ, ekakatanu wa lo nkumbo, ndo wɛɔdu wa demba wonga laso mbala efula. Woho akɔna wakokaso ndjaɛkɛ le Jehowa etena katanemaso l’atei w’awui asɔ?

⁹ Dihomɔ di’Eyoyo di’Ohomba Efula dia lo Nyuma: Sho takangɛnangɛna etena kakatalongola dibuku di’oyoyo diele l’ɔtɛ a dui ɔnɛ: Tɔtɛmɔlɛ Nzambi Ɔtɔi ka Mɛtɛ. Shɛngiya yakɔna yakonge la waewoyelo wakalembetshiya oyango wa dibuku nɛ le yɛ? Lande na kele diɔ diayotokimanyiya efula l’olimu aso wa mbetɛ anto ambeki oko wediɔ dibuku diahende dia wekelo?

¹⁰ Oma lâsɔ takalongola dibuku dikina dia dimɛna diata ɔnɛ Tosukane le Jehowa. Naa awui amɔtshi w’ohomba efula watanema lɔkɔ? Esato akɔna wakaleke kɔngɛnyangɛnya? Onde wadielo ayɛ wa dibuku sɔ wambokosukanya efula la Jehowa? Naa anto akina wakoka kondja waho oma lɔkɔ?

¹¹ Losanganya la Distrikɛ laki l’ɔtɛ a dui ɔnɛ: “Apandjudi wa Diolelo Wele l’Ohetoheto” lakatosha ekeketshelo ka lo nyuma keso l’ohomba dia shika tanga lo tena dia wolo nɛ. Lâsɔ dia sho kondja wahɔ w’efula oma lo ɛlɔngɔswɛlɔ ka diambo ka lo nyuma kɛnɛ, tosale la wolo dia mbohɔ kɛnɛ kakatama, mandolaka awui wakatalongola, ndo kamba l’akambo wakateke. (2 Pet. 3:14) Naka tayosalaka ngasɔ, kete tayokeketshamaka dia nama kɔlamelo yaso ndo monga apandjudi wa Diolelo wele l’ohetoheto oko Nkumɛso Yeso Kristo, kɛsɔ tshɛ dia lotombo laki Jehowa.​—⁠Fil. 1:​9-11.