Onde Wɛ Kokaka Kimɔ Luudu Layɛ?
1 Lo ntambe ka ntondo, Akristo efula wakakimɔka mvudu yawɔ dia nsanganya ya l’etshumanelo salemaka lɔkɔ. (1 Kor. 16:19; Kol. 4:15; File. 1, 2) Nshi nyɛ, tshumanelo dimɔtshi kema l’ahole efula wa salaka Wekelo wa Dibuku wa l’Etshumanelo ndo nsanganya y’otsha l’olimu w’esambishelo. Dikambo sɔ diokonyaka di’elui ɛmɔtshi wa wekelo wa dibuku monga l’ampokami 30 kana ndekana, oleki ndo lofulo l’anto lalɔmbama mbut’ate: anto oko 15.
2 Diɛsɛ di’Ɔlɔlɔ: Onde wɛ ambokanaka yimba dia kimɔ luudu layɛ dikambo dia Wekelo wa Dibuku wa l’Etshumanelo? Luudu lɔnɛ lele la woke wakoka, lele pudipudi, lele l’osase wa dimɛna, ndo lɔtshiya lɔpɛpɛ lahombama, lekɔ dihole dia dimɛna diakoka losanganya salema. Lam’ele wekelo wa dibuku wekɔ losanganya lɔmɔtshi la l’etshumanelo ndo ɔlɔngɔswɛlɔ ɔmɔtshi wakɔshi Jehowa dia mbetshaka ekambi ande, ekɔ diɛsɛ di’ɔlɔlɔ dia wekelo wa dibuku salemaka lo luudu layɛ. Efula mbutaka dia wakalongola ɛtshɔkɔ efula wa lo nyuma lo kimɔ mvudu yawɔ dia wekelo ɔsɔ salemaka lɔkɔ.
3 Naka wɛ mɛnaka dia luudu layɛ kokaka, kete lam’alangayɛ ewoya dikumanyi. Mbeyaka monga ko wekɔ lo nyanga dia kotsha ahole akina. Naka wekelo wa dibuku watakoke dia salemaka lo luudu layɛ, onde nsanganya y’otsha l’olimu w’esambishelo hayokoke salemaka lɔkɔ? Oyadi kakianɛ ohomba watayala, dikumanyi wayɔngɛnangɛna dia mbeya ɔnɛ luudu layɛ lekɔ hwe. Wɛ kokaka ndjonga la diɛsɛ sɔ lo nshi yayaye.
4 Tonge la Ditshelo di’Ɔlɔlɔ: Lam’asanganaso lo luudu lɔmɔtshi, ampokami tshɛ la dia nɛnya diangɔ dia kanga luudu. Ambutshi pombaka ndjashikikɛ ɔnɛ anawɔ wekɔ lo dihole diasalema wekelo, aha la vɔ mbeteta l’ahole akina wa lo luudu. Sho pombaka nto kanɛ asukanyi aso lo ndjalama di’aha mbafukutanya ofutanyafutanya.—2 Kor. 6:3, 4; 1 Pet. 2:12.
5 Heberu 13:16 tokeketshaka di’aha mbohɛ “ntshanela ololo la nkimanyanyiana, ne dia [Nzambi] atongenangenaka l’elambu wa wuhu oso.” Kimɔ luudu layɛ dia losanganya lɔmɔtshi la l’etshumanelo salemaka lɔkɔ ekɔ yoho y’ɔlɔlɔ ya kahana l’akina diangɔ di’ɛlɔlɔ diele layɛ ndo ya ‘tombola Jehowa la diangɔ diayɛ di’oshinga a wolo.’—Tuk. 3:9.