Tônge Ekila lo Lɔkɛwɔ Laso Tshɛ
1. Lande na kele ekɔ ohomba dia sho monga ekila lo lɔkɛwɔ laso tshɛ?
1 Oko weso ekambi wa Nzambi k’ekila, Jehowa, sho salaka la wolo dia monga ekila lo lɔkɛwɔ laso tshɛ. (1 Pet. 1:15, 16) Kɛsɔ nembetshiyaka dia sho sala la wolo dia sukɛ ɛlɛmbɛ wa Jehowa l’akambo tshɛ wa lo lɔsɛnɔ laso. Losanganya la distrikɛ l’ɔnɔnyi ɔnɛ ayotosha diaaso di’ɔlɔlɔ dia mɛnya ekila kaso lo lɔkɛwɔ laso tshɛ.
2. Ngande wakokaso kɛnɛmɔla lɔkɛwɔ la dimɛna lo dihole diohangiso?
2 Lo Dihole Diohangiso: Oyadi tayonga lo luudu l’Okristo ɔmɔtshi, lo luudu l’owotɔ aso, kana lo Mbalasa ka Diolelo, sho pombaka nama waohwelo anɛ wayela: (1) La ntondo ka katɛ diangɔ, mbola kanga luudu kana ananyɔ wele l’ɔkɛndɛ w’ohangelo wa lo Mbalasa ka Diolelo dia kotɛ kɛnɛ kahombayɛ sala. (Nyovusole awui wa l’Olimu Aso wa Diolelo wa Ngɔndɔ ka Dikumi l’Ahende 2003, lɛkɛ 3.) (2) Tokambake la diangɔ diakalɔngɔswama dikambo di’angɛndangɛnda lo yoho ya kɔlɔ. Onga la wɛdimo ndo l’ekanelo k’ɔlɔlɔ ka yimba. (3) Monga pudipudi la monga ekila ekɔ suke la woho akɔ wâmɛ. Mbala tshɛ tshikaka pango kayɛ dimɛna, pudipudi ndo kɔmba. (4) Kɛnɛmɔla elowa wa nyuma lo edjaselo kayɛ l’anto akina, oyadi angɛndangɛnda ayɛ kana Akristo akina w’anyayɛ wohangi la yɛ dihole diamɛ.—Ngal. 5:22, 23.
3. Ngande wakoka dionga di’akɛnda amɔtshi wele Ɛmɛnyi mambiya anto akina?
3 Ambutshi ndo Ana: Efula k’ɛlɔngɔlɔngɔ l’esekaseka wa l’atei aso, la dia mandɔma l’ɔtɛ wa dionga diawɔ di’ɔlɔlɔ diatombola Jehowa ndo ɔlɔngɔswamelo ande wɛnama. Anto watɔsɛdingola wakambe heyama lo menda woho wakadjasɛ akɛnda ki ko ndjelaka losanganya la yambalo tshɛ, wɔsa nɔtɛ ndo wayela wadielo w’avɛsa lo Bible yawɔ. Koko, akɛnama nto di’akɛnda amɔtshi kondjelaka losanganya lo yoho yahombama nɛ di’ambutshi awɔ kombalamaka. (Tuk. 29:15) Pombaka namaka ana w’akɛnda dimɛna. Ana amɔtshi wekɔ la mbekelo ka tshɔka lo komba mbala la mbala. Nɔmbamaka di’ombutshi kana ɔnangɛwɔ kana kadiyɛwɔ kɛmɔtshi kaya opalanga mbatshindɛ otsha lo komba. Ekɔ dimɛna di’onto ndjaka la tema tande t’ashi di’aha nde ndjononɛka dia toyanga ashi. Wonya wa diomuyelo, ekɔ ohomba sho namaka ana aso di’aha vɔ talawɔlawɔka l’ɛsɛsɛ kana lâdiko di’esongo nɛ dia vɔ koka tɔkɔ kana tɔkɔsha anto akina. Naka hateye nama ana kete dui sɔ koka tela ekiyanu ndo mbisha lokombo la Jehowa sɔnyi. Dionga diaso di’ɔlɔlɔ tombolaka Jehowa ndo mɛnyaka ohomba w’efula wele la wetshelo w’oma lo Bible.—Tito 2:7.
4. Ngande wakokaso mɛnya dilɛmiɛlɔ diaso otsha le anto akina etena kalɛso diangɔ?
4 Mbo ya Ndɛ: Ambeta ɛnɔnyi efula wele mbo ya ndɛ hayoshama lo nsanganya yaso ya weke, ɔnkɔnɛ, onto koka ndja la yangɔ ya ndjɔlɛ la midi naka nde alanga. Sho nɔmbamaka dia ndjaka la diangɔ dia ndɛ di’osadi, ɛnyɛlɔ oko ekate, elowa, abɔtɛ kana mapa. Hatohombe ndɛ diangɔ dia wotsho, di’aha sho ndjolala l’etenyi ka l’ɔkɔngɔ a midi. Onto tshɛ nɔmbamaka dia ndja la yangɔ ya ndjɔnɔ, ɛnyɛlɔ ashi, eloko kana tshayi. Dia mbewɔ wâle ɛmɔtshi, ekɔ ɔlɔlɔ mbidja ashi kana tshayi l’ɛlɔndɔ wa ponde wahakoke mbolɛ. Ndoko lele la lotshungɔ la ndja la wanu lo dihole dia losanganya. Naka onto ambela diangɔ dia ndɛ ndo ashi wa nɔ dikambo dia nkumbo kande, kete nde hatotshɔ toyanga mbo ya ndɛ le wanɛ watoyisondjaka lo tɔmɛsamɛsa tawɔ lo dihole dia losanganya. Mbala efula wanɛ wasomba diangɔ le asondjishi mbikashaka kana kɔshaka akatshi wakawɔmbɛ diangɔ sɔ lo nkɛtɛ. Dihole tshɛ dia losanganya ndjololaka l’akatshi, sashɛ kana mindo kina. Dui sɔ mɔnyɔlaka dihole dia losanganya, diele diekɔ dihole diaso di’ɔtɛmwɛlɔ l’edja tshɛ kasalema losanganya. Asondjishi hawohombe ndja lo dihole dia losanganya. Jehowa ekɔ Nzambi k’ekila ndo atɛmɔdi ande pombaka monga oko nde.—1 Pet. 1:16.
5. Lande na kele hasungana dia sho katɛ diangɔ wonya wasalema losanganya?
5 Akɛnama nto dia lo nsanganya mɔtshi, anto amɔtshi tatɛka katɛ diangɔ diawɔ, etena kele losanganya lekɔ lo salema. Dui sɔ hadiohombe salema. Sho pombaka mbidja yambalo ndo mbetsha awui wa lo nyuma lo dihole dia ntondo. Hatohombe mbekola timba t’anto lo mononɛka. Wanɛ wakamba la wa rɛsho pombaka kondja dikimɔ oma le anɛngɛso walɔmbɔla losanganya la ntondo ka vɔ kamba la diangɔ sɔ. Tɛdikɔ pombaka mbɔsama di’aha ndoko wâle monga.—Luka 10:38-42.
6. Monga la lɔkɛwɔ l’ekila lo dihole dia losanganya kɛdikɛdi na?
6 Lo Losanganya: Ekɔ ohomba efula dia sho kɛnɛmɔla lɔkɛwɔ laso l’ekila lo dihole dia losanganya. Lam’alanganyu, nyoyele kɛnɛ kanyotɛ wanɛ washana ahole oyadi lo parkingɛ kana l’ahole wodjashi ampokami. (Heb. 13:17) Nkumbo pombaka mbidjasɛ kâmɛ lo dihole di’ana wele l’ɛnɔnyi dikumi l’ɛmɔtshi, tshɔ dia todjasɛ l’elui w’akɛnda akina. Pombaka ndiha waa telefɔnɛ di’aha yɔ mbekola anto yimba.
7. Ngande wele lɔkɛwɔ lônga laso lo losanganya tombolaka Nzambi?
7 Lɔkɛwɔ laso totshikitanyaka l’anto akina wa l’andja ɔnɛ ndo lɔ tombolaka Nzambi kaso. (1 Pet. 2:12) Lo losanganya, anto tshɛ wayɛna ditshelo di’Ɛmɛnyi wa Jehowa. Ɔnkɔnɛ, yashikikɛ dia monga ekila lo lɔkɛwɔ layɛ tshɛ.
[Kiombo ya lo lɛkɛ 5]
Tônge la Lɔkɛwɔ l’Ekila
◼ Tɔsɛdingole awui wendana l’ohangelo
◼ Tolamake ana dimɛna
◼ Tɔlɛmiya anto akina