Kalasa katokimanyiya dia kɛnɛmɔla ohomba wa dikambo
1 Etena kasɛdingolaso awui wele lo Ekongelo ka Kalasa k’olimu wa teokrasi 2006, sho salaka la wolo dia kondja wahɔ oma lo wetshelo wa lo Afundelo lo kamba la wɔ l’olimu aso w’ekila ndo lo lɔsɛnɔ laso la lushi la lushi. Sho ndjashikikɛka dia kamba l’awui wekaso.—Joa. 13:17; Fil. 4:9.
2 Woshelo wa kɔmatɛrɛ: Ekongelo ka ɔnɔnyi ɔnɛ kambahɛ ampokami lominitɛ lɔmɔtshi lâdiko dia mbisha kɔmatɛrɛ lo awui w’ohomba wa lo Bible. Dui sɔ nembetshiyaka dia ɔnangɛso layɔmbɔla akambo w’ohomba pombaka monga la yewo dia sala minitɛ yande tshanu lo dihole dia shamalo. Wanɛ washa kɔmatɛrɛ oma lo ahole awɔ pombaka vɔ lawɔ mbohɔka sekɔndɛ yakawawasha. Lo tâkanyiyisha yema la ntondo la yambalo tshɛ, onto layosha kɔmatɛrɛ kokaka mbisha awui w’ohomba lo sɛkɔndɛ 30 kana l’ɛse ka lâsɔ. Naka sho sala ngasɔ, kete ondo anto dikumi mbeyaka mbisha kɔmatɛrɛ y’ohomba lo edja ka minitɛ tshanu yashawɔ ampokami.
3 Asawo washa wetshelo: Akambo w’ohomba wa lo Bible ndo sawo dia wetshelo pombaka mɛnya ohomba w’awui akɔ lo olimu aso ndo lo awui akina wa lo lɔsɛnɔ laso la lushi la lushi. Ɔtɛkɛtshi hahombe tsho nomialomia nsaki k’ampokami ande dia mbatshutshuya dia sala dikambo dimɔtshi. Nde pombaka mbuta shikaa kɛnɛ kahombawɔ sala, woho wakokawɔ kisala ndo kotola yambalo lo wahɔ wayokondja anto lo mbɔsa yɛdikɔ ya woho ɔsɔ. Nde kokaka mbuta ɔnɛ: “Ɛlɔmbwɛlɔ kɛnɛ mbatosha divɛsa nɛ,” kana “Woho ɔnɛ mbakokaso kamba la avɛsa anɛ lo olimu w’esambishelo.” Dikumanyi ndo ekambi w’olimu weya ekakatanu wa lo etshumanelo pombaka ndjaketembola dia mɛnya yoho ya shikaa yakokaso kamba la awui asɔ.
4 Lo yoho ya lânde, shila bɛnyɛlɔ dia lo Bible diakoka monga la etombelo w’ɔlɔlɔ etena kɛnyaso ohomba w’awui akɔ. L’ɔkɔngɔ wa kamba la ɛnyɛlɔ kɛmɔ ka lo Afundelo, ɔtɛkɛtshi kokaka mbuta ɔnɛ: “Ondo wɛ lawɔ kokaka tanema lo dikambo dia woho ɔsɔ.” Nde pombaka ndjashikikɛ dia olembetshiyelo tshɛ wa ɛnyɛlɔ ka lo Bible koshande mbɔtɔnɛka la awui wodingi etenyi kɔmbɔlande, mbɔtɔnɛka la Bible k’otondo, ndo la kɛnɛ kakatondja ‘ɔhɔmbɔ wa kɔlamelo ndo wa kɛsɔ.’—Mat. 24:45.
5 Lomba ekɔ dikoka dia kamba dimɛna la ewo ndo la shɛnɔdi. ‘Lomba mbele dikambo dia ntondo.’ (Tuk. 4:7) Oko watetemalaso kondja lomba la shikaa oma lo ekimanyielo ka wekelo aso wa lo Kalasa k’olimu wa teokrasi, nyɛsɔ sho lawɔ tolowanya akoka aso wa sambiyɛ anto akina awui akɔ.